Mayo 9–15

Numeros 11–14; 20–24

“Ayaw Lamang Kamo Pagsukol sa Ginoo ug Ayaw Kahadlok”

Usa sa labing maayo nga mga paagi aron masayud kon unsay angayang tutokan atol sa klase mao ang pagpangutana sa mga sakop sa klase kon unsay ilang nakita nga makahuluganon samtang nagtuon sila sa mga kasulatan. Mopadayag kini kon unsay importante ngadto kanila ug unsay ilang andam nga makat-unan.

Irekord ang Imong mga Hunahuna

Dapita ang Pagpaambit

Usahay ang gikinahanglan lang aron maawhag ang mga sakop sa klase nga mopaambit og mga ideya gikan sa ilang pagtuon mao ang pagpangutana og yano nga pangutana sama sa “Unsay gitudlo sa Espiritu Santo kaninyo samtang nagbasa kamo sa mga kasulatan niini nga semana?” Dayon hatagi sila og panahon sa pagpamalandong ug pagtubag.

Itudlo ang Doktrina

Numeros 12

Ang pagsulti batok sa propeta sa Ginoo makapasilo sa Ginoo.

• Ang pagbasa sa Numeros 12 makatabang sa mga sakop sa klase nga makasabut sa kabug-at sa pagsulti batok sa propeta sa Ginoo. Mahimo nimong dapiton ang mga sakop sa klase sa pagbasa niini nga kapitulo ug maghisgot mahitungod kon unsa ang gibati sa Ginoo mahitungod sa Iyang mga sulugoon. Base sa mga bersikulo 1–2, unsa man kaha ang gipasabut sa pagsulti batok sa propeta sa Ginoo? Unsa ang mga kakuyaw sa paghimo sa ingon? Unsa ang atong makat-unan gikan sa mga gibuhat ni Moises ug sa mga Israelihanon diha sa mga bersikulo 13 ug 15?

Numeros 12:3

“Si Moises maoy labing mapaubsanon.”

• Ang ubang tawo tingali matingala nga makabasa nga ang usa ka lider nga ingon ka bantugan ni Moises, nga mibarug sa atubangan sa Paraon ug mihimo og makapahingangha nga mga milagro pinaagi sa gahum sa Dios, usa usab diay ka “labing mapaubsanon.” Mahimo nimong gamiton ang Numeros 12:3 sa pagsugod og panaghisgutan mahitungod kon unsa ang tinuod nga pagkamapaubsanon [pagkamaaghup]. Mahimo ka nga motan-aw sa kahulugan sa “Maaghup, Pagkamaaghup” diha sa Giya ngadto sa mga Kasulatan (scriptures.ChurchofJesusChrist.org). Isip usa ka klase, mahimo usab kamo nga mangita sa mga timailhan sa pagkamapaubsanon ni Moises diha sa Numeros 12.

• Unsa ang uban nga mga ebidensya sa pagkamapaubsanon ni Moises nga mahimo natong makat-unan? (tan-awa, pananglitan, sa Exodo 18:13–25; Numeros 11:26–29; Mga Hebreohanon 11:24–27; Moises 1:10–11). Mahimo usab ninyong basahon ug hisgutan kon sa unsang paagi nga ang Manluluwas mipakita og pagkamapaubsanon (tan-awa sa Mateo 11:29; 27:11–14; Lucas 22:41–42; Juan 13:4–5). Unsa ang gitudlo kanato sa mga ehemplo ni Moises ug sa Manluluwas—o sa mga tawo nga atong nailhan—mahitungod sa pagkamapaubsanon? Nganong ang Dios gusto man nga kita mahimong mapaubsanon?

Numeros 13–14

Pinaagi sa hugot nga pagtuo diha sa Ginoo, makabaton kita og paglaum alang sa umaabut.

• Samtang naghisgot kamo sa istorya mahitungod sa 12 ka Israelihanon nga nangespiya sa yutang saad ug mihatag sa ilang report, ikonsiderar ang pagpangutana sa mga sakop sa klase kon sa unsang paagi nga kini nga istorya mahimong magamit sa mga sitwasyon nga ilang giatubang. Aron makatabang, mahimo nimong dapiton ang mga sakop sa klase sa paglista sa mga butang gikan sa Numeros 13:23–33 nga mahimong ikatandi sa pipila ka butang sa atong kinabuhi. Pananglitan, ang yutang saad mahimong morepresentar sa pipila ka butang nga gusto sa Ginoo nga atong makab-ot, ang pungpong sa ubas mahimong mao ang mga panalangin, ang mga higante mahimong mao ang mga hagit nga atong atubangon, ug uban pa. Awhaga ang mga sakop sa klase nga mopaambit unsa sa ilang pamati ang gusto sa Ginoo nga ilang makat-unan gikan niini nga istorya.

  

  Ang napulo ka espiya nga Israelihanon nangahadlok; si Josue ug si Caleb adunay hugot nga pagtuo. © Lifeway Collection/lisensyado gikan sa goodsalt.com

Numeros 21:4–9

Kon motan-aw kita ni Jesukristo nga adunay hugot nga pagtuo, Siya makaayo kanato sa espirituhanong paagi.

• Aron matabangan ang mga sakop sa klase sa paghisgot sa asoy diha sa Numeros 21:4–9 ug mapalig-on ang ilang pagtuo diha sa Manluluwas, mahimo nimong isulat ang mga pangutana sama niini diha sa pisara: Unsa ang girepresentar sa bitin nga bronse? Unsa kaha ang girepresentar sa mga pinaakan sa bitin? Ngano nga ang ubang mga tawo midumili man sa pagtan-aw sa bitin nga bronse? Sa unsang paagi nga kita “makatan-aw” niini karon? Ang mga sakop sa klase mahimong mopaaambit sa mga tubag nga ilang makita samtang magbasa sila sa Numeros 21:4–9; 1 Nephi 17:40–41; Alma 33:18–22; ug Helaman 8:13–15. Unsa ang pipila ka yano nga mga butang nga gidapit sa Manluluwas nga atong buhaton aron madawat ang Iyang pag-ayo? Ngano nga usahay lisud man buhaton ang ingon ka yano nga mga butang? (tan-awa sa “Dugang nga mga Kapanguhaan” alang sa pipila ka hunahuna bahin niini). Tingali ang mga miyembro sa klase mahimong mopaambit kon sa unsang paagi nga ang pagbuhat niining mga butanga nagdala og gahum sa Manluluwas nganha sa ilang kinabuhi.

Dugang nga mga Kapanguhaan

“Gagmay ug yano nga mga butang.”

Si Elder L. Whitney Clayton misulti kalabut sa usa ka bishop nga mitambag sa mga miyembro sa ward nga nag-atubang og nagkalain-laing lisud nga mga hagit sa ilang kinabuhi:

“Ang iyang tambag sa mga miyembro sa ward kanunay naglakip sa pagbalik ngadto sa yanong mga buhat sa pagtuo, sama sa pagtuon sa Basahon ni Mormon[,] … pagbayad sa ikapulo, ug pagserbisyo diha sa Simbahan uban sa debosyon. Hinoon, ang ilang tubag kaniya kanunay nga maduha-duhaon: ‘… Sa unsang paagi ang pagbuhat niadto nga mga butang dunay kalabutan sa mga isyu nga akong giatubang?’

“… Kadtong tuyo nga nagbuhat sa ‘gagmay ug yano nga mga butang’ [Alma 37:6]—nagsunod sa daw gamayng mga paagi—mapanalanginan og pagtuo ug kalig-on nga lapas pa mismo sa aktwal nga mga lihok sa pagkamasulundon ug, sa pagkatinuod, daw walay kalabutan kanila” (“Unsa ganiy Iyang Isugo Kaninyo, Buhata Ninyo,” Liahona, Mayo 2017, 98).

Pagpalambo sa Atong Pagtudlo

Tutuki kon unsay pinakaimportante. Dili kini posible nga mahisgutan ang matag istorya o matag baruganan. Sunda ang Espiritu, ug ikonsiderar ang mga panginahanglan sa mga sakop sa klase samtang magdesisyon ka unsaon paggamit ang oras sa klase. Hinumdumi nga ang panimalay, dili ang klasehanan, ang sentro sa pagkat-on sa ebanghelyo.