Paghulagway kang Moises didto sa Bukid sa Nebo, © Providence Collection/lisensyado gikan sa goodsalt.com

Mayo 16–22

Deuteronomio 6–8; 15; 18; 29–30; 34

“Magabantay Ka Aron Dili Mahikalimot sa Ginoo”

Si Moises nadasig sa pagtudlo sa mga anak sa Israel base sa ilang mga panginahanglan (tan-awa sa Deuteronomio 6:1). Samtang magtuon ka sa Deuteronomio, pagtinguha og inspirasyon aron masayud kon unsa nga mga baruganan ang itudlo, base sa mga panginahanglan sa mga sakop sa klase.

Irekord ang Imong mga Hunahuna

Dapita ang Pagpaambit

Tungod kay ang Deuteronomio naglangkob man sa katapusang mga pulong ni Moises ngadto sa mga anak sa Israel, mahimo nimong dapiton ang mga sakop sa klase sa pagpaambit og butang nga ilang makita diha sa Deuteronomio nga gusto nilang ilakip sa ilang katapusang mga pulong ngadto sa ilang mga anak o mga apo. Samtang nagpaambit sila, hangyoa sila sa pagpasabut kon nganong gipili nila kadto nga mga pulong.

Itudlo ang Doktrina

Deuteronomio 6:4–7, 20–25; 8:2–5, 11–17; 29:18–20; 30:6–10, 15–20

Gusto sa Ginoo nga kita mohigugma Kaniya sa tibuok natong kasingkasing.

• Sa tibuok Deuteronomio, adunay mga tudling nga makapaaghat kanato sa paghunahuna mahitungod sa espirituhanong kahimtang sa atong kasingkasing. Aron matabangan ang mga sakop sa klase sa pagpaambit sa ilang mga hunahuna mahitungod niining mga tudling, mahimong magdrowing ka og usa ka kasingkasing diha sa pisara. Dayon bahina ang mosunod nga mga kasulatan sa mga sakop sa klase: Deuteronomio 6:4–7, 20–25; 8:2–5, 11–17; 29:18–20; 30:6–10, 15–20. Dapita ang mga sakop sa klase sa pagsulat sa pakisayran diha sa sulod sa kasingkasing kon nagtudlo kini mahitungod sa butang nga kinahanglang anaa sa sulod sa atong kasingkasing o sa pagsulat sa pakisayran diha sa gawas sa kasingkasing kon nagtudlo kini og butang nga kinahanglan natong likayan. Unsay gipasabut sa pagtugyan sa atong tibuok kasingkasing ngadto sa Langitnong Amahan?

• Unsaon nato sa pagpapasabut sa atong pamilya ug sa uban kon nganong mosunod kita sa mga sugo sa Dios? Human sa pagpamalandong niini nga pangutana, ang mga sakop sa klase mahimong mobasa sa Deuteronomio 6:4–7, 20–25 o sa pamahayag diha sa “Dugang nga mga Kapanguhaan” ug mopaambit sa ilang mga hunahuna. Sa unsang paagi nga kini nga mga ideya makaapekto sa atong pagbati mahitungod sa mga sugo o sa mga pakigsaad?

Deuteronomio 6:4–9, 20–25

“Itudlo kini [ang mga pulong sa Ginoo] kanunay sa inyong kabataan.”

• Usahay makatabang nga makadungog og mga ideya mahitungod sa mga paagi sa uban sa pagtudlo ug pagkat-on sa ebanghelyo diha sa ilang mga panimalay. Ang paghisgot kon giunsa sa mga sakop sa klase sa pagsunod ang tambag diha sa Deuteronomio 6:4–9, 20–25 makahatag sa inyong klase og oportunidad nga makakat-on gikan sa usag usa. Unsay atong buhaton aron sa pagtudlo ug “[pag]hisgot” (bersikulo 7) sa pulong sa Dios sama sa gihulagway niining mga bersikulo? Unsa nga mga kasinatian ang atong mapaambit diin ang Ginoo migiya kanato sa atong mga paningkamot?

Deuteronomio 15:1–15

Ang pagtabang sa mga nanginahanglan naglangkob sa manggihatagon nga mga kamot ug andam nga mga kasingkasing.

• Wala pa kita moabut sa adlaw nga “walay pobre kaninyo” (Deuteronomio 15:4), busa ang mga baruganan mahitungod sa pagtabang sa mga kabus diha sa Deuteronomio 15 bililhon pa gihapon, bisan kon ang partikular nga mga gipangbuhat kalabut sa mga utang ug mga sulugoon nausab na. Mahimo nimong dapiton ang mga sakop sa klase sa pagribyu sa mga bersikulo 1–15 ug sa pagpangita sa mga baruganan mahitungod sa pagtabang sa mga kabus ug timawa nga gusto nilang hisgutan. Ang mga pangutana sama niini makatabang sa panaghisgutan: Unsay gipasabut sa “pagabuklaron mo ang imong kamot” niadtong nanginahanglan? (mga bersikulo 8, 11). Unsay tahas sa atong kasingkasing diha sa pagtabang sa uban? (tan-awa sa mga bersikulo 7, 9–10). Unsay atong makat-unan mahitungod sa pagtabang sa nanginahanglan gikan sa ehemplo sa Manluluwas? (tan-awa sa bersikulo 15).

Deuteronomio 29:9; 30:15–20

Ang Ginoo nagdapit kanato sa pagpili tali sa “kinabuhi ba ug kauswagan, ug kamatayon ba ug katalagman.”

• Siguro makapainteresado kini nga itandi ang mga pulong ni Moises diha sa Deuteronomio ngadto sa katapusang mga pagtulun-an ni Lehi sa iyang pamilya diha sa 2 Nephi 1–4. Tingali ang mga sakop sa klase makakita og mga pagkasusama ug mga kalainan tali niining mga tudling: Deuteronomio 29:9 ug 2 Nephi 4:4; Deuteronomio 30:15–20 ug 2 Nephi 2:26–29. Giunsa ni Lehi sa pagpasabut ang unsay gitudlo ni Moises? Ngano nga ang mga pulong sama sa kinabuhi ug kamatayon usa ka maayong paagi sa paghulagway sa atong mga pagpili nga “tumanon” o “isalikway” ang mga sugo sa Dios? (Deuteronomio 30:16–17). Ang mga sakop sa klase mahimong mopaambit sa unsay ilang nakita diha niining mga tudling nga nakapadasig nila sa “pagpili sa kinabuhi” (Deuteronomio 30:19).

Dugang nga mga Kapanguhaan

Nagtuman kita sa atong mga pakigsaad tungod kay kita nahigugma sa Dios.

Si Presidente Linda K. Burton mitudlo:

“Sa tanang rason nga kita kinahanglang mas makugihon sa atong pagtuman sa pakigsaad, kini nga rason mas makapadasig kay sa tanan—gugma. …

“‘Kon tinuoray kitang nagpasalamat sa daghang panalangin nga atong naangkon tungod sa katubsanan nga gihimo alang nato, walay butang nga pangayoon sa Ginoo ngari nato nga dili nato buhaton sa madasigon ug andam nga paagi’ [Joseph Fielding Smith, “Importance of the Sacrament Meeting,” Relief Society Magazine, Okt. 1943, 592]. Sumala niini nga pamahayag ni Presidente Joseph Fielding Smith, ang pagtuman sa pakigsaad usa ka pagpahayag sa atong gugma sa Pag-ula sa atong Manluluwas ug Manunubos ug sa hingpit nga gugma sa atong Amahan sa Langit” (“Ang Gahum, Kalipay, ug Gugma sa Pagtuman sa Pakigsaad,” Liahona, Nob. 2013, 114).

Pagpalambo sa Atong Pagtudlo

Paminaw. “Ang pagpaminaw usa ka buhat sa gugma. … Hangyoa ang Langitnong Amahan sa pagtabang kanimo nga makasabut kon unsay isulti sa mga sakop sa imong klase. Samtang hatagan nimo og mainampingong pagtagad ang ilang gipamulong ug wala gipamulong nga mga mensahe, mas makasabut ka sa ilang mga panginahanglan, sa ilang mga kabalaka, ug sa ilang mga tinguha” (Pagtudlo sumala sa Pamaagi sa Manluluwas, 34).