Paghulagway kang Debora nga nangulo sa mga kasundalohan sa Israel, © Lifeway Collection/lisensyado gikan sa goodsalt.com

Mayo 30–Hunyo 5

Mga Maghuhukom 2–4; 6–8; 13–16

“Ang Ginoo Nagpadala og Usa ka Tawo aron Pagluwas Kanila”

Hinumdumi nga ang labing importante nga magtutudlo mao ang Espiritu Santo. Unsaon nimo pagtabang ang mga sakop sa klase nga matudloan sa Espiritu Santo samtang naghisgot kamo sa mga kamatuoran gikan sa basahon sa Mga Maghuhukom?

Irekord ang Imong mga Hunahuna

Dapita ang Pagpaambit

Isulat diha sa pisara ang mga ngalan sa pipila ka maghuhukom nga makita diha sa Mga Maghuhukom 2–4; 6–8; 13–16 (sama ni Debora, Barac, Gideon, ug Samson). Hatagi ang mga sakop sa klase og pipila ka minuto sa pagribyu niining mga kapitulo ug sa pagsulat og kamatuoran sa ubos sa usa sa mga ngalan diha sa pisara nga ilang nahibaloan gikan sa kasinatian nianang tawhana.

Itudlo ang Doktrina

Mga Maghuhukom 2:11–19; 3:5–12; 4:1–16

Ang Ginoo nagtanyag og kaluwasan [deliverance] kon kita mahisalaag.

• Ang pagsusi sa balik-balik nga pagsupil, kasubo, paghinulsol, ug kaluwasan sa Israel makatabang sa mga sakop sa klase sa pag-ila sa gahum sa Dios sa pagluwas diha sa ilang kaugalingong kinabuhi. Ang mga sakop sa klase mahimong magtrabaho diha sa ginagmay nga mga grupo aron pangitaon ang balik-balik nga gihulagway diha sa Mga Maghuhukom 2:11–19; 3:5–12. Giunsa sa Ginoo pagluwas ang mga anak sa Israel gikan sa ilang balik-balik nga sala ug pag-antus? Unsa ang atong makat-unan gikan sa basahon sa Mga Maghuhukom kon sa unsang paagi nga kita makaeskapo gikan sa sala ug pag-antus? Unsa ang pipila ka paagi nga ang Dios moluwas kanato? Mahimo usab nimong dapiton ang mga sakop sa klase sa pagpangita ug pagpaambit sa mga kasulatan nga nagpamatuod sa Ginoo isip atong Tigluwas ug Manunubos (pananglitan, 2 Samuel 22:1–3; Salmo 40:16–17; 1 Nephi 1:19–20; Mosiah 23:21–23; Doktrina ug mga Pakigsaad 138:23).

• Ang Mga Maghuhukom 2:19 nagrekord nga ang mga Israelihanon balik-balik nga mipalayo sa Dios ngadto sa pagsimba og dios-dios. Tingali ang mga sakop sa klase mahimong mominubo niini nga bersikulo isip usa ka pasidaan alang sa ilang kaugalingon. Sa unsang mga paagi nga usahay atong “simbahon” ang “laing mga dios”? Sa unsang paagi nga ang Ginoo makatabang kanato sa pag-usab sa atong “masupilong kinabuhi”?

• Sa pagsugod og panaghisgutan kon giunsa ni Debora ug Barac pagluwas ang Israel gikan sa mga Canaanhon, mahimo nimong hangyuon ang usa ka sakop sa klase sa pagminubo sa istorya alang sa klase (makatabang tingali kon kontakon nimo daan ang sakop sa klase pipila ka adlaw sa dili pa ang klase aron makaandam siya). Ang klase makahisgot mahitungod sa mga kinaiya ni Debora nga nakapadayeg nila. Giunsa ni Debora pagdasig ang mga anak sa Israel nga mosunod sa Ginoo? Tingali mahimo ninyong basahon og dungan ang Mga Maghuhukom 4:14 ug hisgutan ang kahulugan sa matinud-anong pamahayag ni Debora: “Wala ba ang Ginoo mag-una kanimo?” Sa unsang paagi nga ang Ginoo nag-una kanato? (tan-awa usab sa Doktrina ug mga Pakigsaad 84:87–88).

Mga Maghuhukom 6–8

Ang Ginoo makahimo og mga milagro kon mosalig kita sa Iyang mga paagi.

• Ang pagtuon sa tawag ni Gideon sa pagserbisyo makapadasig sa mga sakop sa klase sa ilang kaugalingong pagserbisyo. Mahimo nimo silang hangyuon sa pagbasa ug paghisgot sa Mga Maghuhukom 6:11–16. Unsa man ang atong makat-unan gikan niini nga kasinatian? Aron matabangan sila nga makakat-on gikan sa Mga Maghuhukom 7, mahimo nimong dapiton ang usa o dugang pa nga mga sakop sa klase nga magpakaaron-ingnon nga mga sundalo ni Gideon ug mosaysay sa istorya gikan sa panglantaw sa mga sundalo. Ang ubang mga sakop sa klase mahimong mangutana nila mahitungod sa kasinatian sa mga sundalo. Unsay mga kaparehas nga atong makita tali niini nga istorya ug sa unsay nahitabo sa atong kinabuhi? Unsay atong makat-unan mahitungod sa Ginoo gikan niini nga istorya?

Mga Maghuhukom 13–16

Ang kalig-on nagagikan sa pagkamatinud-anon sa atong mga pakigsaad ngadto sa Dios.

• Unsaon nimo pagtabang ang mga sakop sa klase nga makadiskobre sa makapadasig nga mga kamatuoran ug sa importante nga mga pasidaan gikan sa istorya ni Samson? Usa ka paagi tingali mao ang pagdapit sa katunga sa klase sa pagribyu sa Mga Maghuhukom 14–16 nga mangita sa mga bersikulo nga nagpakita nga ang Ginoo nagauban ni Samson. Ang laing katunga mahimong mangita sa mga bersikulo nga nagpakita nga si Samson dili hingpit nga mapasaligon ngadto sa Ginoo. Hangyoa ang mga sakop sa klase sa pagpaambit kon unsay ilang nakit-an. Unsay gitudlo sa kinabuhi ni Samson kanato mahitungod sa pagtuman sa mga pakigsaad nga atong gihimo ngadto sa Dios? Ang pamahayag ni Sister Ann M. Dibb diha sa “Dugang nga mga Kapanguhaan” tingali makatabang.

  

  Samson Puts Down the Pillars [Gipangtumpag ni Samson ang mga Haligi], ni James Tissot ug uban pa

Dugang nga mga Kapanguhaan

Usa ka leksyon gikan sa kinabuhi ni Samson.

Si Sister Ann M. Dibb nagtudlo: “Natawo si Samson nga may dakong potensyal. Gisaaran ang iyang inahan, ‘Siya magsugod sa pagluwas sa Israel gikan sa kamot sa mga Filistehanon’ [Mga Maghuhukom 13:5]. Apan sa nagtubo si Samson, mas gisunod niya ang mga tintasyon sa kalibutan kay sa direksyon sa Dios. Mihimo siya’g mga pagpili tungod kay ‘sila nakapahimuot kaayo [kaniya]’ [Mga Maghuhukom 14:3] kay sa tungod kay ang mga gipili mga husto. Sa kasagaran, ang mga kasulatan migamit og ‘ug milugsong siya’ [Mga Maghuhukom 14:7] samtang nag-asoy sa mga panaw, mga buhat, ug pagpili ni Samson. Kay sa motindog ug mopakita aron pagtuman sa iyang dakong potensyal, nabuntog si Samson sa kalibutan, nawad-an sa hinatag nga gahum sa Ginoo, ug namatay sa makalilisang, sayo nga kamatayon” (“Tindog ug Pakita,” Liahona, Mayo 2012, 118).

Pagpalambo sa Atong Pagtudlo

Paggahin og panahon alang sa pagpaambit sa mga tigkat-on. “Kon ang mga tigkat-on mopakigbahin sa ilang nakat-unan, sila dili lamang mobati sa Espiritu ug molig-on sa ilang kaugalingong mga pagpamatuod, apan nag-awhag usab sila sa mga sakop sa klase sa pagdiskobre sa mga kamatuoran sa ilang mga kaugalingon. … Paggahin og panahon alang sa pagpaambit sa estudyante sa matag leksyon.” (Pagtudlo sumala sa Pamaagi sa Manluluwas, 30.)