ang batan-ong David nga adunay saplong

David and Goliath [David ug Goliat], ni Steve Nethercott

Hunyo 13–19

1 Samuel 8–10; 13; 15–18

“Ang Gubat Iya sa Ginoo”

Samtang mangandam ka sa pagtudlo, hinumdumi nga ang mga sakop sa klase mahimo nga adunay makahuluganon nga mga kasinatian sa pagtuon sa mga kasulatan diha sa panimalay. Unsay imong mabuhat aron sa pag-ugmad niana nga mga kasinatian?

Irekord ang Imong mga Hunahuna

pagpaambit nga icon

Dapita ang Pagpaambit

Sa pag-awhag sa mga sakop sa klase nga mopaambit sa unsay ilang nakat-unan niini nga semana, hatagi sila og panahon sa paghunahuna mahitungod sa bisan unsa sa ilang mga hunahuna mahitungod sa 1 Samuel 8–10; 13; 15–18. Dayon hangyoa sila sa pagpaambit og bersikulo nga nakapadasig og hunahuna.

icon sa pagtudlo

Itudlo ang Doktrina

1 Samuel 9:15–17; 10:1–12; 16:1–13

Ang Dios nagtawag og mga tawo pinaagi sa panagna aron moserbisyo sa Iyang gingharian.

• Ang mga asoy bahin sa pagpili sa Dios kang Saul ug kang David pinaagi sa panagna ug pagpadayag makatabang sa mga sakop sa klase nga masabtan kon giunsa pagpili ang mga tawo aron moserbisyo sa Simbahan karon. Mahimo nimong dapiton ang mga sakop sa klase sa pagbasa sa 1 Samuel 9:15–17; 10:1–12; ug 16:1–13, mangita sa mga tudling nga makatabang nila nga masabtan kon unsay gipasabut sa “pagatawgon sa Dios” (Mga Artikulo sa Hugot nga Pagtuo 1:5). Unsay mahimo nga kalainan niini, alang sa mga tawag nga gitawag ug alang niadtong kinsa mopaluyo kanila, nga masayud nga ang Dios nagpili og mga tawo nga moserbisyo diha sa Iyang Simbahan?

  Si Samuel nga nagdihog ni Saul

  Paghulagway kang Samuel nga nagdihog ni Saul, © Lifeway Collection/lisensyado gikan sa goodsalt.com

1 Samuel 13:5–14; 15

“Ang pagsugot mas maayo pa kay sa halad.”

• Sa paghisgot kon nganong importante nga magmasulundon ngadto sa Ginoo, mahimo nimong dapiton ang klase sa pagribyu sa 1 Samuel 13:5–14 ug mangita sa mga kinaiya ug mga pamatasan nga miresulta sa pagkapukan ni Saul. Unsay atong makat-unan gikan sa mga sayop ni Saul?

• Bisan kon wala kita masayud sa tanang rason nganong gisugo si Saul nga patyon ang tanang Amalekanhon ug ang ilang mga hayop, adunay mga leksyon nga angayang makat-unan gikan sa iyang pagtubag niana nga sugo. Aron matabangan ang mga sakop sa klase sa pagtino niini nga mga leksyon, mahimo nimo kining isulat diha sa pisara Ang pagsugot mas maayo pa kay sa … ug dapita ang mga sakop sa klase sa pagpamalandong niining hugpong sa mga pulong samtang nagdungan mo og ribyu sa mga panghitabo gikan sa 1 Samuel 15. Unsa ang pipila ka maayo nga mga butang nga atong gibuhat sa atong kinabuhi nga mao usahay ang atong gipili imbis nga mosunod sa Dios? Nganong ang pagkamasulundon ngadto sa Dios mas maayo pa man kay sa niadtong uban pang maayo nga mga butang?

1 Samuel 16:6–7

“Ang tan-awon sa Ginoo mao ang kasingkasing.”

• Human sa pagbasa sa 1 Samuel 16:6–7, ang mga sakop sa klase mahimong mopaambit sa ilang mga hunahuna mahitungod sa unsay gipasabut sa tan-awon “ang kasingkasing” (bersikulo 7). Sa unsang paagi nga makakat-on kita nga motan-aw sama sa pagtan-aw sa Ginoo? Ang mga sakop sa klase mahimong mopaambit og mga kasinatian nga nagtudlo kanila sa kaimportante sa pagtan-aw sa kasingkasing kay sa panagway sa gawas.

1 Samuel 17

Ang Ginoo makatabang kanato sa pagbuntog sa bisan unsa nga hagit.

• Sa latid [outline] niini nga semana sa Dali, Sunod Kanako—Alang sa mga Indibidwal ug mga Pamilya, ang mga sakop sa klase tingali nakapamalandong sa mga pulong sa nagkalain-laing mga tawo nga makita diha sa 1 Samuel 17. Ikonsiderar ang paghangyo sa klase sa pagpaambit sa unsay ilang nakat-unan gikan niining kalihokan. Ilabi na sa, unsay ilang nakat-unan mahitungod ni David?

• Ang pipila ka sakop sa imong klase malagmit nag-atubang og mga hagit nga daw ingon ka makalilisang sama sa nabuhat ni Goliat ngadto ni Saul ug sa iyang kasundalohan. Unsaon nimo paggamit ang istorya ni David ug Goliat aron sa pagtabang sa mga sakop sa klase nga atubangon ang ilang mga hagit pinaagi sa hugot nga pagtuo diha sa Ginoo? Tingali mahimo nimong ipakita ang usa ka hulagway ni David ug Goliat (sama sa usa diha sa latid [outline] niini nga semana sa Dali, Sunod Kanako—Alang sa mga Indibidwal ug mga Pamilya). Ang mga sakop sa klase mahimo dayon nga molista diha sa pisara sa pipila ka butang nga tingali “mga Goliat” sa atong panahon. Dayon mahimo silang mangita og mga bersikulo diha sa 1 Samuel 17 nga nagpakita sa hugot nga pagtuo ni David, nga maoy hinungdan nga napildi niya si Goliat (tan-awa usab sa pamahayag diha sa “Dugang nga mga Kapanguhaan”). Tingali ang mga sakop sa klase mahimo nga mopaambit og mga kasinatian diin ilang gibati nga ang Ginoo mitabang sa ilang mga pagpakigbisog.

icon sa dugang nga mga kapanguhaan

Dugang nga mga Kapanguhaan

Pagbuntog sa atong mga Goliat.

Si Presidente Gordon B. Hinckley mitudlo:

“Adunay mga Goliat sa tibuok ninyong palibut, dagkong mga higante nga adunay dautang tuyo sa paglaglag kaninyo. Dili kini mga tawo nga adunay siyam ka pye ang gitas-on, apan mga tawo kini ug mga institusyon nga nagkontrolar sa makapadani apan dautan nga mga butang nga mahimong mohagit ug mopaluya ug molaglag kaninyo. …

“… Apan dili kamo angay nga mahadlok kon kamo adunay saplong sa kamatuoran diha sa inyong mga kamot. … Kamo adunay mga bato sa hiyas ug dungog ug kaligdong nga magamit batok niini nga mga kaaway nga gustong mobuntog kaninyo. Kabahin niini, mahimo ninyo kining maigo sa ‘tunga sa ilang mga mata,’ sa paggamit og masambingayong pagpahayag. Mahimo kamong modaug niini pinaagi sa pagdisiplina sa inyong kaugalingon nga likayan kini. Makasulti kamo niining tanan sama sa gisulti ni David ngadto ni Goliat, ‘Miduol ka kanako dala ang imong espada, ug bangkaw, ug salapang: apan ako makigsangka kanimo sa ngalan sa Ginoo nga Labing Gamhanan, ang Dios sa kasundalohan sa Israel, nga imong gipasipad-an’ [1 Samuel 17:45]” (“Overpowering the Goliaths in Our Lives,” Ensign, Mayo 1983, 46, 51).

Pagpalambo sa Atong Pagtudlo

Ang imong tawag dinasig. Isip usa ka magtutudlo, ikaw gitawag sa Ginoo sa pagpanalangin sa Iyang mga anak. Samtang magpakabuhi ka nga takus sa Iyang tabang, mohatag Siya kanimo sa pagpadayag nga imong gitinguha. (Tan-awa sa Pagtudlo sumala sa Pamaagi sa Manluluwas, 5.)