Whither Thou Goest [Bisan Asa Ikaw Moadto], ni Sandy Freckleton Gagon

Hunyo 6–12

Ruth; 1 Samuel 1–3

“Ang Akong Kasingkasing Naghimaya sa Ginoo”

Importante nga andam sa pagtudlo, apan siguroa nga ang imong mga plano naglakip sa paghatag sa mga sakop sa klase og mga oportunidad sa pagpaambit sa unsay ilang nakat-unan.

Irekord ang Imong mga Hunahuna

Dapita ang Pagpaambit

Sa pag-awhag sa mga sakop sa klase nga mopaambit sa unsay ilang nakat-unan niini nga semana, mahimo nimo silang dapiton sa pagsulat diha sa pisara og usa ka pulong o hugpong sa mga pulong gikan sa Ruth 1–4 o 1 Samuel 1–3 nga nakapadasig kanila atol sa ilang indibidwal o pamilya nga pagtuon. Kusga sa pagbasa ang pipila, nga maghangyo sa mga sakop sa klase sa pagpaambit kon sa unsang paagi nga kini nga mga pulong ug hugpong sa mga pulong nakapadasig kanila.

Itudlo ang Doktrina

Ruth; 1 Samuel 1–2

Si Kristo makausab sa trahedya ngadto sa kadaugan.

• Bisan kon ang mga sakop sa imong klase tingali adunay tagsa-tagsa nga mga pagsulay nga lahi niadtong kang Ruth ug kang Ana, sila makakat-on gikan sa mga paagi niining matinud-anong mga babaye sa pagtubag sa kasubo ug sa kasakit. Aron matabangan sila sa pagbuhat niini, mahimo nimong bahinon ang klase sa gagmay nga mga grupo ug dapiton ang matag grupo sa pagbasa og usa ka kapitulo gikan sa Ruth 1–4 o 1 Samuel 1. Diha sa pisara, mahimo nimong isulat ang mga pangutana sama niini: Unsa ang mga pagsulay nga giatubang ni Ruth o ni Ana? Giunsa nila sa pagpakita ang ilang pagsalig sa Ginoo atol sa ilang mga pagsulay? Ang mga grupo mahimong mangita sa mga tubag sa usa o daghan pa nga mga pangutana ug mopaambit sa unsay ilang makit-an. Unsa ang atong makat-unan gikan niini nga mga asoy mahitungod sa paagi nga ang Ginoo makatabang kanato sa atong mga pagsulay?

  

  For This Child I Prayed [Alang Niining Bata Ako Nag-ampo], ni Elspeth Young

• Dili tanan nga nag-ampo nga makabaton og anak makadawat, ug dili tanan kansang kapikas namatay maminyo og usab. Apan ang atong personal nga mga hagit, bisan unsa pa man kini, mahimong mga oportunidad sa pagdangup ngadto sa Manluluwas ug sa paglig-on sa atong pagtuo diha Kaniya. Mahimo nimong hangyuon ang mga sakop sa klase sa pagbasa sa Ruth 2:11–12 ug 1 Samuel 1:9–11 ug hisgutan kon sa unsang paagi nga ang mga pagsulay ni Ruth ug ni Ana nakaapekto sa ilang mga relasyon ngadto sa Ginoo. Ang mga sakop sa klase mahimo usab nga mopaambit kon sa unsang paagi nga ang ilang kaugalingong pagtuo nalig-on tungod kay sila midangup ngadto ni Jesukristo atol sa mga panahon sa pagsulay.

  Sa pagsuporta niini nga panaghisgutan, mahimo nimong dapiton ang usa o dugang pa nga mga sakop sa klase nga mangandam sa pagpaambit og mga hunahuna gikan sa usa sa mosunod: mensahe ni Sister Reyna I. Aburto “Sa Dag-um ug Kahayag, Ginoo, Ubani Ako!” (Liahona, Nob. 2019, 57–60); ang seksyon nga giulohan og “Ang Hingpit nga Kalipay sa Pagbuntog pinaagi kang Kristo” gikan sa mensahe ni Elder D. Todd Christofferson nga “Ang Hingpit nga Kalipay sa mga Santos” (Liahona, Nob. 2019, 16–17); o mga pulong ni Presidente Elaine S. Dalton diha sa “Dugang nga mga Kapanguhaan.” Hangyoa ang mga sakop sa klase sa pagpaambit sa unsay ilang nakat-unan kon sa unsang paagi nga ang atong mga pagsulay mahimong mga oportunidad alang sa mas dakong pagtuo diha ni Jesukristo.

1 Samuel 2:18–36; 3

Kinahanglan kitang maminaw ug mosunod sa tingog sa Ginoo.

• Tingali adunay mga tawo diha sa imong klase kinsa, sama ni Samuel, nakadungog sa tingog sa Ginoo apan wala makaila nga Iya kini. Mahimo nimong dapiton ang mg sakop sa klase sa pagribyu sa 1 Samuel 3, nga mangita sa unsay gibuhat ni Samuel nga makatabang kanato sa atong mga paningkamot sa pagpaminaw ug pagsunod sa tingog sa Ginoo. Mahimo usab nimong hangyuon ang duha ka sakop sa klase nga sundugon ang panag-istoryahanay ni Samuel ug ni Eli.

• Usahay atong makita ang atong kaugalingon nga anaa sa sitwasyon ni Eli—kita adunay oportunidad sa pagtabang sa uban nga makaila sa tingog sa Ginoo. Tingali ang mga sakop sa klase mahimong mopaambit kon sa unsang paagi nga nahimo nila kini alang sa mga higala, mga sakop sa pamilya, o sa uban. Unsa nga mga kasulatan o mga kasinatian ang atong napaambit aron sa pagtabang sa uban nga makasabut sa paagi nga ang Ginoo makig-istorya kanato? (tan-awa, pananglitan, sa Doktrina ug mga Pakigsaad 6:22–23; 8:2–3; 9:7–9).

Dugang nga mga Kapanguhaan

Wala kita mag-inusara.

Si Presidente Elaine S. Dalton nagtudlo:

“Ang panaw sa kinabuhi usahay modala kanato ngadto sa wala damha nga mga agianan. Adunay mga pagliko ug mga pagtuyok diha sa dalan nga walay usa nato nga nagdahum. Apan sa matag usa niini nga mga pagliko ug mga pagtuyok adunay oportunidad usab—oportunidad sa pagpili sa atong tubag ug atong plano nga buhaton. Ang mga kalisud sa kinabuhi mahimong mga oportunidad nga makatabang nato nga mas maduol sa Manluluwas ug mas hingpit nga mosalig Kaniya. Diha sa proseso sa pagpuyo nga duol Kaniya matag adlaw, mapalambo nato ang sama kang Kristo nga mga hiyas ug mga kinaiya. …

“Sama ni Ruth ug ni Ana, kitang tanan makasinati og kalisdanan. Tingali dili nato masabtan kanunay ang plano sa Ginoo alang sa atong kinabuhi, apan mao kini ang akong pagpamatuod nga wala kita mag-inusara. Nagauban gayud Siya kanato, ug Siya nagsaad kanato, ‘Kamo dili makakita uban sa inyong kinaiyanhon nga mga mata, alang karon nga panahon, sa paagi sa inyong Dios mahitungod niadto nga mga butang nga moabut sa umaabut, ug ang himaya nga mosunod human sa daghan nga kalisdanan’ [Doktrina ug mga Pakigsaad 58:3]” (“Lessons from Ruth and Hannah,” Ensign, Abr. 2006, 35, 37).

Tan-awa usab sa Juan 14:18; Alma 38:5.

Pagpalambo sa Atong Pagtudlo

OK ra nga moingon og “Wala ko kahibalo.” Bisan kon kinahanglan kang maningkamot kutob sa imong mahimo nga matubag ang mga pangutana sa mga sakop sa imong klase, ang Ginoo wala magpaabut nga makahibalo ka sa tanan. Kon wala ka masayud kon unsaon pagtubag ang usa ka butang, angkuna kana ug hatag og sinsero nga pagpamatuod bahin sa unsay imong nasayran. (Tan-awa sa 1 Nephi 11:16–17; Pagtudlo sumala sa Pamaagi sa Manluluwas, 24.)