King David Enthroned [Si Hari David Gipahimutang diha sa Trono], ni Jerry Miles Harston

Hunyo 20–26

2 Samuel 5–7; 11–12; 1 Mga Hari 3; 8; 11

“Ang Imong Gingharian Pagahimoong Malig-on sa Walay Katapusan”

Samtang magtuon ka sa mga kasulatan, mainampuong magtinguha aron masayud kon hain sa mga baruganan ang labing makahuluganon ngadto sa mga sakop sa imong klase aron imong matutukan ang ilang mga panginahanglan.

Irekord ang Imong mga Hunahuna

Dapita ang Pagpaambit

Aron masayran kon unsa ang nakita sa mga sakop sa klase nga makahuluganon sa ilang pagtuon sa kasulatan, mahimo nimo silang hangyuon sa pagsulat sa pakisayran sa tudling nga nakapadasig kanila diha sa mga piraso nga papel ug dayon ibutang ang mga papel sa usa ka sudlanan. Dayon ang mga sakop mahimong mopili sa mga papel gikan sa sudlanan, ug ang klase mahimong mobasa ug mohisgut sa mga tudling.

Itudlo ang Doktrina

2 Samuel 6:1–8

Kinahanglan gayud natong himoon ang buhat sa Dios diha sa Iyang paagi.

• Mahimo nimong hangyuon ang mga sakop sa klase sa pagbasa sa 2 Samuel 6:1–8 ug sa pagkonsiderar kon unsa ang mga pasidaan niini nga istorya ang mahimong makatabang nato karon. Ang pamahayag ni Brigham Young diha sa “Dugang nga mga Kapanguhaan” mahimong makatabang. Unsa ang pipila ka paagi nga kita mahimong mosulay sa paghimo sa buhat sa Dios sa usa ka paagi nga lahi kay sa Iyang gisugo? Nganong kuyaw man kini? Tingali ang mga sakop sa klase mahimong mopaambit og mga kasinatian diin nakakat-on sila sa pagsalig sa giya nga gihatag sa Ginoo alang sa katumanan sa Iyang buhat.

2 Samuel 11

Sa kanunay kita kinahanglang magbantay batok sa sala.

• Ang pagkat-on gikan sa makasubo nga mga pagpili ni David nga nahisulat diha sa 2 Samuel 11 makatabang nato nga malikayan ang susama nga mga sayop. Tingali ang klase mahimong magdungan og basa sa 2 Samuel 11:1–17 ug motino og mga pagpili nga gihimo ni David nga miresulta sa iyang pagpakasala. Unsa ang lahi unta nga gibuhat ni David? Mahimo nimong hangyuon ang mga sakop sa klase sa pagsulat og usa ka kapahayag [sentence] nga mahimong makatabang sa pagdasig sa usa ka tawo nga malikayan ang sala, base sa unsay ilang nakat-unan gikan sa 2 Samuel 11. Dapita ang pipila ka sakop sa klase sa pagpaambit sa ilang mga ideya.

• Mahimo nimong gamiton ang 2 Samuel 11 sa paghisgot sa mga kakuyaw sa pornograpiya ug uban pang sekswal nga mga sala. Sa pagbuhat niini, ang klase mahimong magdungan og ribyu sa mga porsyon sa mensahe ni Elder L. Whitney Clayton nga “Bulahan Ang Tanang Putli og Kasingkasing” (Liahona, Nob. 2007, 51–53). Unsa nga tambag ang gihatag ni Elder Clayton mahitungod sa mga kakuyaw sa pornograpiya? Sa unsang paagi nga ang Manluluwas makatabang nato nga mabuntog kining mga tintasyon o mga kinaiya?

  Tingali ang mga sakop sa klase mahimong mopaambit og mga ideya nga ilang nakit-an nga makatabang sa ilang mga paningkamot sa pagpanalipod sa ilang mga pamilya gikan sa pornograpiya o sa pagbuntog sa mga epekto sa pornograpiya. Ang mensahe ni Sister Linda S. Reeves nga “Panalipod gikan sa Pornograpiya—usa ka Panimalay nga Nag-focus kang Kristo” makatabang (Liahona, Mayo 2014, 15–17; tan-awa usab sa “Dugang nga mga Kapanguhaan”).

Ang templo mao ang balay sa Ginoo.

1 Mga Hari 8:22–61

Ang mga templo nagdala og mga panalangin.

• Ang 1 Mga Hari 8 naghulagway sa mga panalangin nga gitinguha ni Solomon alang sa iyang katawhan sa dihang nahuman na ang templo. Mahimo nimong bahinon ang mga bersikulo 22–61 sa mga sakop sa klase ug hangyoa sila sa pagpaambit og butang nga ilang nakita diha sa ilang mga bersikulo nga nakapadasig nila sa ilang pagsimba diha sa templo. Ang mga sakop sa klase mahimong mopaambit kon sa unsang paagi nga ang pagsimba diha sa balay sa Ginoo nakapanalangin sa ilang kinabuhi.

1 Mga Hari 8:61; 11:1–11

“Ang iyang kasingkasing dili matinud-anon sa bug-os ngadto sa Ginoo.”

• Unsay gipasabut sa “ang [atong] kasingkasing … magmatinud-anon sa bug-os ngadto sa Ginoo”? (1 Mga Hari 8:61). Lahi ba kana sa atong mga buhat sa pagkahimong hingpit? Sa unsang paagi? Samtang ang mga sakop sa klase mamalandong niini nga mga pangutana, mahimo nilang basahon ang 1 Mga Hari 11:1–11 ug timan-an kon unsa ang gisulti sa Ginoo mahitungod sa kasingkasing ni Solomon. Sa unsang paagi kita makalikay sa mga sayop nga iyang nahimo?

Dugang nga mga Kapanguhaan

Pagpugong sa arka.

Si Presidente Brigham Young nagtudlo: “Pasagdi lang ang Gingharian, ang Ginoo nagpugong sa arka; ug kon kini matarug, ug ingon og kinahanglan nga pugngan, kon kini nagtuya-tuya usahay, ug makita nga morag mahulog, pagbantay kon unsaon ninyo sa pagtuy-od sa inyong kamot sa pagpugong niini; kinahanglan nga dili kita madalidalion sa pag-apil nianang kita walay labut; pasagdi lang kini, buhat kini sa Ginoo” (Discourses of Brigham Young, sel. John A. Widtsoe [1954], 66).

Pagpanalipod sa mga pamilya gikan sa pornograpiya.

Si Sister Linda S. Reeves mitudlo: “Unsaon nato pagpanalipod sa atong mga anak ug kabatan-onan? Ang filter makatabang nga mga himan, apan ang pinakamaayong filter sa kalibutan, ug ang pinakaepektibo, mao ang personal nga filter nga naggikan sa kahiladman ug sa malungtarong pagpamatuod sa gugma sa atong Langitnong Amahan ug sa maulaong sakripisyo sa atong Manluluwas sa matag usa kanato” (“Panalipod gikan sa Pornograpiya—usa ka Panimalay nga Nag-focus kang Kristo,” Liahona, Mayo 2014, 16; tan-awa usab sa Joy D. Jones, “Paghisgot sa Pornograpiya: Pagpanalipod, Pagtubag, ug Pagkaayo,” Liahona, Okt. 2019, 22–27).

Pagpalambo sa Atong Pagtudlo

Siguroa nga nagtudlo ka sa tinuod nga doktrina. “Pangutan-a ang imong kaugalingon kanunay, ‘Sa unsang paagi ang akong gitudlo makatabang sa mga sakop sa akong klase nga makapalambo og hugot nga pagtuo diha kang Kristo, maghinulsol, maghimo ug motuman og mga pakigsaad uban sa Dios, ug modawat sa Espiritu Santo?’” (Pagtudlo sumala sa Pamaagi sa Manluluwas, 20).