Elijah Contends against the Priests of Baal [Si Elias Mibarug Batok sa mga Pari ni Baal], ni Jerry Harston

Hunyo 27–Hulyo 3

1 Mga Hari 17–19

“Kon ang Ginoo Dios Man, Sumunod Kamo Kaniya”

Ang katuyoan sa mga kasulatan—ug sa imong klase—mao ang pag-ugmad og hugot nga pagtuo diha sa Langitnong Amahan ug ni Jesukristo . Himoa nga kining katuyoan ang mogiya sa mga desisyon nga imong himoon mahitungod sa unsay angayang itudlo ug mga ipangutana.

Irekord ang Imong mga Hunahuna

Dapita ang Pagpaambit

Aron matabangan ang mga sakop sa klase nga mopaambit og mga ideya mahitungod sa 1 Mga Hari 17–19, mahimo nimo silang dapiton sa paghunahuna og ulohan alang sa matag usa niini nga mga kapitulo. Unsa nga mga bersikulo ang hinungdan nga sila nakahunahuna niini nga mga ulohan?

Itudlo ang Doktrina

1 Mga Hari 17:8–16; 19:19–21

Ang pagdapit sa pagsakripisyo usa ka oportunidad sa pagpakita sa atong hugot nga pagtuo.

• Ang ehemplo sa biyuda sa Sarefat mahimong makapadasig sa mga sakop sa imong klase sa higayon nga ang ilang hugot nga pagtuo pagasulayan. Mahimo nimong sugdan pinaagi sa paghangyo nila sa paglista og mga pagpili nga nagkinahanglan og hugot nga pagtuo diha ni Jesukristo. Dayon mahimo nilang basahon ang asoy diha sa 1 Mga Hari 17:8–16 ug hisgutan kon unsay gitudlo niini nga istorya ngadto nila mahitungod sa pagpakita og hugot nga pagtuo. Awhaga ang mga sakop sa klase sa pagpaambit sa ilang mga pagbati mahitungod sa biyuda ug sa unsang paagi nga ang iyang ehemplo nakapadasig nila sa pagpakita sa ilang hugot nga pagtuo. Sa unsang paagi nga ang iyang hugot nga pagtuo susama sa hugot nga pagtuo ni Eliseo nga gipakita diha sa 1 Mga Hari 19:19–21? Tingali ang mga sakop sa klase andam nga mopaambit sa mga sakripisyo nga ilang gihimo alang sa Ginoo ug sa unsang paagi nga Siya mipanalangin kanila.

• Ang istorya bahin sa biyuda sa Sarefat makatudlo usab kanato mahitungod sa mga panalangin nga moabut tungod sa sakripisyo. Mahimo nimong hangyuon ang mga sakop sa klase sa pagpamalandong kon unsaon nila pagtubag ang mga pamahayag sama niini: “Dili nako makaya ang pagbayad og ikapulo” o “Busy kaayo ko aron modawat og buluhaton sa pagpangalagad.” Unsay gitudlo kanato sa 1 Mga Hari 17:8–16 nga mahimong magamit niini nga mga pamahayag? Sa unsang paagi nga ang atong kahibalo bahin sa Manluluwas makatabang nato kon kita hangyuon sa paghimo og mga sakripisyo? Ang mga pulong ni Elder Lynn G. Robbins diha sa “Dugang nga mga Kapanguhaan” mahimong makatabang usab.

1 Mga Hari 18:17–39

“Kon ang Ginoo Dios man, sumunod kamo kaniya.”

• Ang panaghisgutan mahitungod sa 1 Mga Hari 18:17–39 mahimong makatabang sa mga sakop sa klase nga mahimong mas mapasaligon nga mosunod ni Jesukristo ug mosalig Kaniya. Human sa pagribyu sa istorya uban sa klase, mahimo nimong isulat diha sa pisara ang pangutana ni Elias sa katawhan sa Israel: “Hangtud kanus-a ba nga magtakingking kamo sa taliwala sa duha ka daplin?” (bersikulo 21). Tuguti ang mga sakop sa klase nga mopaambit kon unsa sa ilang pamati ang gipasabut niini nga pangutana. Unsa ang pipila ka rason nga ang mga tawo morag “magtakingking” (nagpasabut nga nagduhaduha, nagpalingpaling, o nagtakiang) tali sa pagsunod sa Ginoo ug sa pagsunod ni Baal? Nganong usahay dili man kita lig-on sa pagdesisyon mahitungod sa pagsunod ni Jesukristo? Ang mga sakop sa klase mahimong mopaambit og mga kasinatian nga nakatabang nila sa pagpili nga mosunod sa Manluluwas.

Usa ka simbolikanhon nga paghulagway sa 1 Mga Hari 19:11–12. The Prophet [Ang Propeta], © Robert Booth Charles/Bridgeman Images

1 Mga Hari 19:1–12

Ang Ginoo sa kasagaran mamulong sa usa ka hinay, yano nga mga paagi.

• Daghang tawo ang nanglimbasug sa pag-ila kon ang Ginoo makigsuti kanila. Aron matabangan ang mga sakop sa klase nga mas makaila sa tingog sa Ginoo, mahimo nimo silang dapiton sa pagbasa sa 1 Mga Hari 19:1–12 ug mopaambit sa unsay nakat-unan ni Elias. Tingali ang mga sakop sa klase mahimong mopaambit og mga kasinatian nga nagtudlo nila mahitungod sa lain-laing mga paagi nga ang Ginoo nakigsulti ngadto nila.

• Sa pagtabang sa pag-awhag og panaghisgutan mahitungod sa hugpong sa mga pulong nga “hinay, hinagawhaw nga tingog,” mahimo nimong ipakita ang mga butang (o litrato sa mga butang) nga mahimong makatabang sa mga sakop sa klase sa pagpamalandong sa hugpong sa mga pulong. Ang mga sakop sa klase mahimong mosugyot og uban pa nga mga ehemplo. Ngano nga ang mga pulong nga “hinay” ug “hinagawhaw” maayo man nga mga paagi sa paghulagway sa tingog sa Espiritu? Alang sa uban pa nga mga paghulagway, ang mga sakop sa klase mahimong mobasa sa mga kasulatan sama sa Helaman 5:30; 3 Nephi 11:3–7; Doktrina ug mga Pakigsaad 6:22–23; 8:2–3; 9:8–9; 11:12–14; 36:2. Mahimo usab sila nga mopaambit og uban pa nga mga kasulatan mahitungod sa pag-ila sa Espiritu. Unsay gisugyot niini nga mga kasulatan mahitungod sa unsay kinahanglan gayud natong buhaton aron makadungog sa tingog sa Ginoo?

Dugang nga mga Kapanguhaan

Ang biyuda sa Sarefta.

Si Elder Lynn G. Robbins miingon: “Nakasabut si Elijah sa doktrina nga ang mga panalangin moabut human sa pagsulay sa atong hugot nga pagtuo [tan-awa sa Ether 12:6; Doktrina ug mga Pakigsaad 132:5]. Wala siya maghinakog. Isip sulugoon sa Ginoo, didto si Elijah aron mohatag, dili sa pagkuha [tan-awa sa 1 Mga Hari 17:13–16]. … Usa ka rason nga gihulagway sa Ginoo ang mga doktrina uban sa pinakagrabe nga mga kahimtang aron sa pagwagtang sa mga pamalibad. Kon ang Ginoo nagpaabut bisan gani sa pinakapobre nga biyuda sa pagbayad sa iyang sinsilyo, unsa pa kaha sa uban nga naghunahuna nga malisud o dili sayon ang pagsakripisyo?” (“Ikapulo—usa ka Sugo Bisan pa Gani sa mga Pobre,” Liahona, Mayo 2005, 35).

Pagpalambo sa Atong Pagtudlo

Magmahimong mapaubsanon nga instrumento sa Espiritu. “Ang imong katuyoan isip usa ka magtutudlo dili ang paghimo og impresibo nga presentasyon apan sa pagtabang sa uban nga modawat sa impluwensya sa Espiritu Santo, kinsa mao ang tinuod nga magtutudlo” (Pagtudlo sumala sa Pamaagi sa Manluluwas, 10).