The Flight of the Prisoners [Ang Dinaliang Pagbiya sa mga Binilanggo], ni James Tissot and others

Hulyo 11–17

2 Mga Hari 17–25

“Siya Misalig sa Ginoo, ang Dios sa Israel”

Ribyuha ang mga hunahuna nga imong girekord atol sa imong personal nga pagtuon sa 2 Mga Hari 17–25 niini nga semana. Unsa nga mga tudling gikan niini nga mga kapitulo ang imong gibati nga labing makahuluganon ngadto sa mga sakop sa imong klase?

Irekord ang Imong mga Hunahuna

Dapita ang Pagpaambit

Kon ang mga sakop sa klase mopaambit sa unsay ilang nakat-unan diha sa panimalay sa ilang pagtuon sa kasulatan, ang ubang mga sakop sa klase mahimong mobati nga madasig sa pagtuon sa mga kasulatan sa tibuok semana. Mahimo nimong sugdan ang klase pinaagi sa pagdapit sa mga sakop sa klase sa pagtubag sa pangutana sama sa “Unsay gitudlo sa Espiritu Santo kaninyo samtang nagbasa kamo sa gi-assign nga mga kapitulo niini nga semana?”

Itudlo ang Doktrina

2 Mga Hari 18:28–36; 19:1–7, 14–19

Kita mahimong magpabilin nga matinuoron ngadto sa Ginoo kon hagiton ang atong pagtuo.

• Ang mga kamatuoran diha sa 2 Mga Hari 18–19 makatabang kanato nga masayud kon unsaon pagtubag kon hagiton ang atong pagtuo. Unsaon nimo pagtabang ang mga sakop sa klase nga madiskubrihan kini nga mga kamatuoran? Mahimo nimong dapiton ang mga sakop sa klase sa pagpaambit og pipila ka rason kon nganong mituo sila sa Dios ug sa Iyang plano. Dayon mahimo silang mosiksik sa 2 Mga Hari 18:28–35, nga mangita og mga rason nga gihatag sa mga taga-Asiria ngadto sa mga tawo sa Jerusalem sa dili pagsalig sa Ginoo. Giunsa ni Satanas pagsulay sa pagdani kanato nga magduhaduha sa atong pagtuo karon? Ang mga sakop sa klase mahimong mosiksik sa 2 Mga Hari 19:1–7, 14–19 alang sa unsay atong makat-unan gikan ni Ezequias mahitungod kon unsaon nato pagtubag kon hagiton ang atong pagtuo. Unsaon pagtabang sa Ginoo kanato nga mabuntog ang mga hagit sa atong pagtuo? Unsa pa ang ubang mga sugyot sa mga sakop sa klase sa pagbag-o sa ilang pagtuo ug pagsalig diha sa Ginoo?

• Mahimo nimong dapiton ang usa ka sakop sa klase nga moadto sa klase nga andam sa pagminubo sa panag-istoryahanay sa mga taga-Asiria ngadto sa mga opisyal ni Ezequias duol sa mga paril sa Jerusalem (tan-awa sa 2 Mga Hari 18:17–36). Sa dili pa siya mosaysay sa istorya, dapita ang mga sakop sa klase sa paghunahuna nga nagpuyo sila sa Jerusalem nga naminaw niini nga panag-istoryahanay. Unsa kaha ang ilang mga gihunahuna o mga gibati? Unsa kaha ang ilang buhaton? Mahimo nimong hatagan ang mga sakop sa klase og porsyon sa mensahe ni Elder David A. Bednar nga “Busa Sila Mihupay sa Ilang mga Kahadlok” (Liahona, Mayo 2015, 46–49) ug dapita sila sa pagpangita sa tambag nga makapatunhay nila atol sa mga panahon sa kahadlok o pagduhaduha. Sa unsang paagi nga ang atong hugot nga pagtuo diha ni Jesukristo makapatunhay kanato atol sa mahagiton nga mga panahon?

2 Mga Hari 22:8–20; 23

Ang mga kasulatan makapabalik sa atong kasingkasing ngadto sa Ginoo.

• Ang paghisgot sa gahum sa pulong sa Dios diha sa kinabuhi ni Hari Josias ug sa iyang katawhan makapadasig sa mga sakop sa klase nga magtinguha nianang sama nga gahum sa ilang kaugalingong kinabuhi. Mahimo nimong sugdan ang panaghisgutan pinaagi sa pagdapit sa mga sakop sa klase sa paghunahuna kon unsa kaha ang kalainan sa ilang kinabuhi kon wala kanila ang mga kasulatan. Dayon mahimo silang mosiksik sa 2 Mga Hari 22:8–11; 23:1–6, 21, 24 sa pagpangita kon sa unsang paagi nga si Josias ug ang iyang katawhan nausab sa dihang naminaw sila sa pulong sa Dios gikan sa mga kasulatan nga bag-ohay lang nadiskubrihan og balik didto sa templo. Sa unsang paagi nga ang mga kasulatan nakatabang kanato nga mas maduol ngadto sa Langitnong Amahan ug ni Jesukristo?

• Ang talagsaon nga mga kausaban nga nahimo sa pulong sa Dios ngadto kang Josias ug sa daghang tawo sa iyang gingharian mahimong makapadasig sa mga sakop sa imong klase nga magtinguha sa susama nga mga kausaban sa ilang kinabuhi. Human sa paghisgot niini nga mga kausaban (tan-awa sa 2 Mga Hari 23:1–6, 21, 24), ang mga sakop sa klase mahimong mopaambit og mga kasinatian diin ang tudling o asoy sa kasulatan nakahimo og kalainan sa ilang kinabuhi. Tingali mahimo silang maghisgot kon nganong madawaton sila sa mensahe niana nga kasulatan nianang higayuna sa ilang kinabuhi. Ang pamahayag diha sa “Dugang nga mga Kapanguhaan” mahimong makadugang sa inyong panaghisgutan.

  

  Ang mga kasulatan makatabang sa pagpabalik sa atong kasingkasing ngadto sa Ginoo.

Dugang nga mga Kapanguhaan

Pagdiskubre og balik sa mga kasulatan.

Si Presidente Spencer W. Kimball miingon:

“Kombinsido ako nga kada usa kanato, sa ubang panahon sa atong mga kinabuhi, kinahanglang modiskubre sa mga kasulatan alang sa atong kaugalingon—ug dili kay modiskubre niini sa makausa lang, apan diskubrehan niini og balik-balik. …

“Dako ang akong pagbati nga kinahanglan natong tanan nga mobalik ngadto sa mga kasulatan sama sa gibuhat ni Hari Josias ug tugutan kining magalihok sa bug-os nga kusog sulod kanato, nga magduso kanato ngadto sa dili mapalingpaling nga determinasyon sa pag-alagad sa Ginoo. …

“Akong nakita nga kon dili kaayo nako hatagan og bili ang akong pakigrelasyon uban sa Dios ug sa dihang mao ra og walay diosnong dalunggan nga naminaw ug walay diosnong tingog nga mamulong, nga ako layo ra gayud kaayo. Kon akong isubsob ang akong kaugalingon sa mga kasulatan ang gilay-on magkaduol ug ang pagkaespirituhanon mobalik. Akong makita ang akong kaugalingon nga mas labaw pang mahigugmaon niadtong kinsa kinahanglan nakong higugmaon sa tibuok nakong kasingkasing ug hunahuna ug kusog, ug sa paghigugma kanila og maayo, nakita nakong mas sayon ang pagsunod sa ilang mga tambag” (Mga Pagtulun-an sa mga Presidente sa Simbahan: Spencer W. Kimball [2006], 78, 80, 84).

Pagpalambo sa Atong Pagtudlo

Gamita ang mga tabang sa pagtuon sa kasulatan. Usa ka paagi aron matabangan ang mga sakop sa klase nga makasabut sa mga kasulatan mao ang pagtudlo kanila ngadto sa mga kapanguhaan sama sa Giya ngadto sa mga Kasulatan (ChurchofJesusChrist.org). Makakita usab sila og makatabang nga impormasyon diha sa mga seksyon sa “Mga Hunahuna nga Hinumduman” sa Dali, Sunod Kanako—Alang sa mga Indibidwal ug mga Pamilya.