Si Eliseo nga nagpakita sa mga sulugoon og mga karwahe sa kalayo

Paghulagway kang Eliseo nga nagpakita sa iyang mga sulugoon og mga karwahe sa kalayo, © Review & Herald Publishing/lisensyado gikan sa goodsalt.com

Hulyo 4–10

2 Mga Hari 2–7

“May Propeta Dinhi sa Israel”

Samtang mangandam ka sa pagtudlo, basaha ang 2 Mga Hari 2–7 nga magtinguha og inspirasyon alang sa imong kaugalingong kinabuhi. Dayon paminaw sa mga pag-aghat mahitungod sa mga mensahe nga makapanalangin sa mga sakop sa imong klase.

Irekord ang Imong mga Hunahuna

pagpaambit nga icon

Dapita ang Pagpaambit

Usahay ang mga sakop sa klase magkinahanglan og panahon nga ribyuhon og kadali ang mga kapitulo nga ilang gibasa sa dili pa sila makapaambit og mga ideya gikan sa ilang personal nga pagtuon sa kasulatan. Sulayi ang paghatag og pipila ka minuto alang niini diha sa pagsugod sa klase; dayon dapita ang mga sakop sa klase sa pagpaambit og butang nga ilang nakat-unan.

icon sa pagtudlo

Itudlo ang Doktrina

2 Mga Hari 2–6

Ang Dios makabuhat og mga milagro sa atong kinabuhi.

• Samtang maghisgot kamo og mga milagro diha sa 2 Mga Hari 2–6, makatabang tingali nga mangutana sa mga sakop sa klase sa paghatag og kahulugan sa pulong nga milagro. Mahimo nimong ipaambit kini nga ideya gikan ni Presidente Howard W. Hunter: “Ang [mga milagro] mao ang mga pagpakita sa gahum sa [Dios] nga dili nato mapasabut o hingpit nga masabtan. … Kini nga mga timailhan ug mga katingalahan makita gayud sa kinabuhi ug pangalagad ni Jesukristo, nga Anak gayud mismo sa Dios. Apan ingon man kini ka makapatingala o makapahingangha, ang daghang milagro ni Kristo mga repleksyon lamang niadtong mas dagkong mga katingalahan nga gihimo sa iyang Amahan sa iyang atubangan ug padayon nga himoon sa atong palibut. … Adunay daghan pa nga mga milagro kanunay kon kita adunay mga mata nga makakita ug dalunggan nga makadungog” (“The God That Doest Wonders,” Ensign, Mayo 1989, 15–16). Sa unsang paagi nga kini nga mga ideya makatabang nato nga makakita sa kamot sa Dios diha sa atong kinabuhi?

• Ikonsiderar ang paghangyo sa mga sakop sa klase sa paglista og pipila ka milagro nga gihulagway diha sa 2 Mga Hari 2–6. Unsay atong makat-unan mahitungod sa Ginoo gikan niini nga mga milagro? Ang mga sakop sa klase mahimong andam usab nga mohisgut mahitungod sa mga milagro—dako o gamay—nga nasinati nila o sa ilang mga pamilya. Sa unsang paagi nga mas makaila kita sa mga milagro sa Dios diha sa atong kinabuhi—lakip na niadtong lahi kay sa atong gilauman?

• Ang mga sakop sa klase mahimong makakita nga makapadasig ang pagtandi sa pipila ka milagro nga gihimo ni Eliseo ngadto sa pipila ka milagro nga gihimo ni Jesukristo (tan-awa sa 2 Mga Hari 4:8–37 ug Lucas 7:11–16; 2 Mga Hari 4:42–44 ug Juan 6:1–13; 2 Mga Hari 5:1–15 ug Lucas 17:11–19). Unsa ang gitudlo niini nga mga milagro mahitungod sa Manluluwas ug sa Iyang mga propeta?

2 Mga Hari 5:1–19

Kon kita mapainubsanon ug masulundon, si Jesukristo makaayo nato.

• Usa ka leksyon nga atong makat-unan gikan sa pagkaayo sa sanla ni Naaman mao ang kamahinungdanon sa pagkamapainubsanon. Sa pagsugod sa panaghisgutan, mahimo nimong isulat diha sa pisara ang garbo ni Naaman ug pagkamapainubsanon ni Naaman. Ang mga sakop sa klase mahimo nga mosiksik sa 2 Mga Hari 5:1–19 ug isulat diha sa pisara ang mga hugpong sa mga pulong nga nagpakita sa garbo o pagkamapainubsanon ni Naaman. Sa unsang paagi nga kita usahay sama ni Naaman? Sa unsang paagi nga kita usahay sama sa iyang mga sulugoon? Giunsa nato pagkasayud sa unsay nasayran ni Naaman?

• Ang laing leksyon nga atong makat-unan gikan niini nga istorya mao ang kamahinungdanon sa pagsunod sa Dios diha sa ginagmay nga mga butang. Mahimo nimong sugdan pinaagi sa pagbasa sa 2 Mga Hari 5:9–12 ug mangutana kon unsa ang mga hunahuna sa mga sakop sa klase mahitungod kon nganong si Naaman “milakaw nga nasuko pag-ayo” (bersikulo 12). Nganong usahay mas pilion man nato nga mobuhat og “dakong butang” nga gipangayo sa Dios kanato, kay sa yano nga mga butang? (bersikulo 13). Unsa kamahinungdanon ang pagbuhat niining yano nga mga butang?

2 Mga Hari 6:8–23

“Ang ania uban kanato mas daghan kay niadtong uban kanila.”

• Kitang tanan adunay mga higayon nga mibati kita nga nag-inusara o nahadlok. Ikonsiderar kon sa unsang paagi nga ang paghisgot sa asoy diha sa 2 Mga Hari 6:8–23 mahimong makatabang sa mga sakop sa klase nga mibati niini nga paagi. Mahimo nimong sugdan pinaagi sa yanong pagpangutana sa mga sakop sa klase kon unsay nakapadasig nila mahitungod niini nga mga bersikulo. Mahimo usab sila nga mopaambit og mga kasinatian nga “ang Ginoo mibuka sa [ilang] mga mata” (bersikulo 17) ug mitabang nila nga makita nga wala sila mag-inusara (tan-awa usab sa “Dugang nga mga Kapanguhaan”). Sa unsang paagi nga kita makatabang sa usag usa nga “[dili] mahadlok”? (bersikulo 16).

icon sa dugang nga mga kapanguhaan

Dugang nga mga Kapanguhaan

“Ablihan ang atong espirituhanong mga mata.”

Nagpasabut sa asoy diha sa 2 Mga Hari 6:8–23, si Elder Ronald A. Rasband miingon:

“Kita mahimong aduna o walay carro sa kalayo nga gipadala aron sa pagkuha sa atong mga kahadlok ug pagbuntog sa atong mga demonyo, apan ang leksyon klaro. Ang Ginoo nag-uban kanato, naghunahuna kanato ug nanalangin kanato sa mga paagi nga Siya lamang ang makabuhat. Ang pag-ampo makatawag sa kalig-on ug sa pagpadayag nga atong gikinahanglan aron sa pagsentro sa atong mga hunahuna diha kang Jesukristo ug sa Iyang maulaong sakripisyo. Ang Ginoo nasayud nga adunay mga higayon nga kita mobati og kahadlok. Nakasulay na ako niana ug kamo usab. … Niini nga Simbahan tingali kita dili ingon niana kadaghan nga importanting maka-impluwensya sa kalibutan, apan kon atong ablihan ang atong espirituhanong mga mata, “sila nga ania uban kanato, labing daghan kay kanila nga anaa kanila’ [2 Mga Hari 6:16]” (“Ayaw Kabalaka,” Liahona, Nob. 2018, 18–19).

Pagpalambo sa Atong Pagtudlo

Ipatan-aw sa mga tigkat-on ang mga kasulatan. Bisan kanus-a kon mahimo nimo, awhaga ang mga sakop sa klase nga modangup sa mga kasulatan ug sa mga pulong sa buhi nga mga propeta alang sa giya, mga tubag sa mga pangutana, ug suporta. Ang pulong sa Dios mao ang labing maayo nga tinubdan sa kamatuoran. (Tan-awa sa Pagtudlo sumala sa Pamaagi sa Manluluwas,21.)