Paghulagway sa templo ni Zerubabel, ni Sam Lawlor

Hulyo 18–24

Esdras 1; 3–7; Nehemias 2; 4–6; 8

“Ako Nagabuhat og usa ka Dakong Buhat”

Kon imong dapiton ang mga sakop sa imong klase nga mopaambit kon unsay importante kaayo alang nila diha sa mga basahon ni Esdras ug ni Nehemias, pagpaambit usab og bisan unsa nga mga hunahuna nga imong nadawat samtang nagtuon ka.

Irekord ang Imong mga Hunahuna

Dapita ang Pagpaambit

Usahay ang pagsulat sa mahinungdanon nga mga pulong o mga hugpong sa mga pulong diha sa pisara makapahinumdom sa mga sakop sa klase sa mga butang nga ilang nakat-unan gikan sa mga kasulatan ug mas sayon na alang nila ang pagpaambit. Pananglitan, mahimo nimong isulat ang Pagtukod og balik, Pag-ayo, ug Pag-establisar og balik diha sa pisara ug dapiton ang mga sakop sa klase sa pagpaambit sa mga bersikulo gikan sa ilang gibasa nga may kalabutan ngadto sa usa o daghan pa niini nga mga pulong.

Itudlo ang Doktrina

Esdras 3:8–13; 6:16–22

Ang mga templo makahatag kanato og kalipay.

• Sa pagbasa mahitungod sa kalipay nga gibati sa mga Judeo samtang ang ilang templo gitukod og balik mahimong makatabang sa mga sakop sa klase nga mobati nga mas mapasalamaton alang sa mga templo sa atong panahon karon. Tingali mahimo nimong dapiton ang mga sakop sa klase sa pagribyu sa Esdras 3:8–13 ug 6:16–22 ug dayon sa paghisgot og pipila ka paagi sa pagsaulog sa mga Judeo sa pagtukod og balik ug sa pagpahinungod sa templo. Nganong ang pagtukod og templo usa man ka hinungdan nga magsaulog? Mahimo nimong dapiton ang mga sakop sa klase sa pagpaambit kon sa unsang paagi nga ang mga templo, ug ang buhat nga atong gihimo didto, nakahatag kanila og hingpit nga kalipay. Ang pamahayag diha sa “Dugang nga mga Kapanguhaan” makapadasig sa mga sakop sa klase nga masinati ang hingpit nga kalipay sa buhat sa templo.

  

  Ang templo mahimong usa ka tinubdan sa hingpit nga kalipay sa atong kinabuhi.

Esdras 4–5; Nehemias 2; 4; 6

Makatabang kita sa pagpalambo sa buhat sa Dios bisan pa man sa mga oposisyon.

• Ang mga basahon ni Esdras ug Nehemias naghulagway sa katawhan nga nagtuman sa importante nga buhat bisan pa man sa oposisyon gikan sa ilang mga kaaway. Sa pagsugod sa panaghisgutan, mahimo nimong pangutan-on ang mga sakop sa klase kon unsa ang “dakong buhat” ni Nehemias (Nehemias 6:3) nga mahimong ikatandi diha sa atong kinabuhi. Unsa ang importanting buhat nga gihatag sa Dios aron ipahimo kanato? Dayon mahimo ninyong basahon ang Esdras 4:4 ug hisgutan kon sa unsang paagi nga si Satanas naningkamot sa pagpaluya sa atong abilidad sa pagbuhat og butang ug nagsamok kanato diha sa paghimo sa buhat sa Dios. Unsay atong makat-unan gikan ni Nehemias ug sa iyang kaubanan sa trabaho diha sa Nehemias 2:18–20; 4:6–9; ug 6:1–3? Unsay gipasabut sa “madasigon nga nagtrabaho” diha sa pagserbisyo sa Manluluwas? (Nehemias 4:6). Ikonsiderar ang pagpaambit og usa ka bahin sa mensahe ni Presidente Dieter F. Uchtdorf nga “Kita Nagbuhat og Dako nga Buhat ug Dili Makaanha” (Liahona, Mayo 2009, 59–62), ilabi na ang katapusang duha ka seksyon.

• Mahimong nadasig ka sa pagpasiugda og panaghisgutan nga magtandi sa mga paningkamot ni Zerubabel sa pagtukod og balik sa templo ngadto sa atong mga paningkamot sa pagtambong sa templo ug sa paghimo og makaluwas nga buhat didto. Pananglitan, mahimo nimong isulat ang duha ka ulohan diha sa pisara: Zerubabel ug Kita. Ubos sa Zerubabel, ang mga sakop sa klase mahimong mosulat kon unsa ang gihimo sa “mga kaaway sa Juda ug sa Benjamin” (Esdras 4:1) sa pagsulay og pahunong ni Zerubabel ug sa katawhan nga mga Judeo sa pagtukod og balik sa templo (tan-awa sa Esdras 4). Ubos sa Kita, ang mga sakop sa klase mahimong molista og mga paagi nga ang kaaway misulay sa pagpahunong kanato sa pagtambong sa templo. Dayon mahimo silang mopaambit og tambag sa usag usa mahitungod kon unsaon nato sa pagpangayo og tabang sa Ginoo sa pagbuntog niana nga oposisyon.

Nehemias 8:1–12

Mapanalanginan kita kon magtuon kita sa mga kasulatan.

• Tingali ang mga sakop sa klase mahimong magdungan og basa sa Nehemias 8:1–12 ug maghisgot kon unsay gibati ni Esdras ug sa iyang katawhan mahitungod sa Dios ug sa Iyang pulong. Awhaga ang mga sakop sa klase sa pagtan-aw sa piho nga mga bersikulo nga nagpakita sa unsay ilang gibati. Dapita ang mga sakop sa klase sa pagpahayag sa unsay ilang gibati mahitungod sa pulong sa Dios. Unsaon nato sa pagpalambo ang atong mga paningkamot sa pagtuon sa pulong sa Dios?

Dugang nga mga Kapanguhaan

Sinatia ang hingpit nga kalipay tungod sa templo.

Si Presidente Russell M. Nelson mitudlo:

“Mahimo kitang madasig sa tibuok adlaw sa mga kasinatian sa uban mahitungod sa templo ug family history. Apan kinahanglan gayud nga mobuhat kita aron masinati sa kaugalingon ang hingpit nga kalipay. Gusto nakong ihatag ang hagit sa matag usa kanato aron ang maanindut nga pagbati niini nga buhat magpadayun ug gani molambo. Dapiton ko kamo nga ikonsiderar sa mainampuong paagi unsa nga matang sa halad—labing siguro usa ka halad sa panahon—ang inyong mahimo aron mas daghan ang mabuhat sa family history ug sa templo niining tuiga.

“Miapil kita sa buhat sa Makagagahum nga Dios. Siya buhi. Si Jesus mao ang Kristo. Kini Iyang Simbahan. Kita ang Iyang mga anak sa pakigsaad. Siya makasalig nato” (Russell M. Nelson ug Wendy W. Nelson, “Ablihi ang Langit pinaagi sa Buhat sa Templo ug Family History,” Liahona, Okt. 2017, 19).

Pagpalambo sa Atong Pagtudlo

Apila ang mga ginikanan sa mga kabatan-onan. Kon nagtudlo ka sa mga kabatan-onan, ipaambit kon unsay imong gitudlo uban sa ilang mga ginikanan. Makatabang sila nimo nga makasabut sa mga panginahanglan sa mga kabatan-onan ug kon unsaon sa pagtabang kanila. Mahimo usab kining usa ka maayong paagi sa pag-awhag og mga panaghisgot sa pamilya mahitungod sa unsay nakat-unan sa mga kabatan-onan diha sa klase. (Tan-awa sa Pagtudlo sumala sa Pamaagi sa Manluluwas, 27.)