Esther [Ester], ni James Johnson

Hulyo 25–31

Ester

“Ikaw Nahiabut … sa Maingon Niini nga Panahona”

Unsa nimo ka kaila ang imong mga sakop sa klase? Paningkamot nga mas makaila og usa ka sakop sa klase matag semana. Makatabang kini kanimo sa pagkonsiderar sa ilang mga panginahanglan samtang nangandam ka sa pagtudlo (tan-awa sa Pagtudlo sumala sa Pamaagi sa Manluluwas, 7).

Irekord ang Imong mga Hunahuna

Dapita ang Pagpaambit

Ang mga sakop sa klase mahimong mopaambit ngadto sa usa ka tawo nga naglingkod sa ilang duol og butang nga gitudlo sa Espiritu kanila, butang nga mas nasabtan na nila, o butang nga mapahisama nila sa ilang kinabuhi samtang nagbasa sila sa basahon ni Ester. Dayon ang pipila kanila mahimong mopaambit ngadto sa tibuok klase.

Itudlo ang Doktrina

Ester

Ang Ginoo mobutang kanato sa mga sitwasyon diin makapanalangin kita sa uban.

• Ang mga sakop sa imong klase mahimong nakakita og mga paagi nga gihimong posible sa Ginoo alang ni Ester sa pagluwas sa mga Judeo, sama sa gisugyot diha sa latid [outline] niini nga semana sa Dali, Sunod Kanako—Alang sa mga Indibidwal ug mga Pamilya. Dapita sila sa pagpaambit kon unsa ang ilang nakit-an. O mahimong magdungan kamo sa pagpangita og pipila ka ehemplo (tan-awa sa Ester 2:21–23; 3:10–14; 4:14–16). Unsay atong mahimo aron makita ang kamot sa Dios diha sa atong kinabuhi? Ang pamahayag ni Elder Neil L. Andersen diha sa “Dugang nga mga Kapanguhaan” naglangkob og tubag niini nga pangutana.

• Aron matabangan ang mga sakop sa imong klase nga maghunahuna mahitungod kon giunsa sila pag-andam sa Ginoo “sa maingon niini nga panahona” (Ester 4:14), dapita sila sa pagbasa sa Ester 4:10–17. Sa unsang paagi nga ang mga pulong ni Mardoqueo ngadto ni Ester mahimong nakatabang kaniya sa paghimo og desisyon nga panalipdan ang iyang katawhan? Ingon nga ang Dios mibutang ni Ester sa usa ka posisyon diin makahimo siya sa pagluwas sa mga Judeo, unsa ang pipila ka sitwasyon nga gibutangan Niya kanato aron makapanalangin kita sa uban? Unsaon nato aron mahimong mas maayo nga mga instrumento sa Iyang mga kamot? Ang pagbasa sa pamahayag ni Sister Virginia U. Jensen diha sa “Dugang nga mga Kapanguhaan” mahimong makapadasig sa mga sakop sa klase sa paghunahuna og mga higayon nga mibati sila nga sila mga instrumento alang sa Ginoo. Hangyoa sila sa pagpaambit sa ilang mga kasinatian, ingon nga gigiyahan sa Espiritu.

Ester 4

Ang pagpuasa nagpakita sa atong pagsalig diha sa Ginoo.

• Mahimo nimong gamiton ang Ester 4 sa paghisgot sa mga panalangin nga moabut tungod sa pagpuasa. Mahimo nimong iparibyu sa usa ka sakop sa klase ang mga panghitabo nga maoy hinungdan nga nagpuasa si Ester ug ang ubang mga Judeo. Nganong mipili sila nga magpuasa? Nganong mopili kita nga magpuasa? Mahimong magdungan kamo sa pagribyu sa pipila ka dugang nga mga kasulatan mahitungod sa pagpuasa, sama sa Isaias 58:6–12 ug Mateo 4:1–4; 17:14–21 (tan-awa usab sa Giya ngadto sa mga Kasulatan, “Puasa, Pagpuasa,” scriptures.ChurchofJesusChrist.org). Tingali ikaw o ang pipila ka sakop sa klase mahimong mopaambit og mga kasinatian nga nagpakita kon sa unsang paagi nga ang pagpuasa nagdala og gahum sa Ginoo diha sa atong kinabuhi.

Ester 3:1–11; 4:10–17; 5:1–4

Ang pagbuhat sa sakto nga butang sa kanunay nagkinahanglan og dakong kaisug.

• Ang mga asoy bahin ni Mardoqueo ug ni Ester nga maisugong mibarug alang sa pagkamatarung makapadasig sa mga sakop sa klase sa pagbaton og kaisug sa pagbuhat sa sakto nga butang. Mahimo nimong hangyuon ang katunga sa klase sa pagbasa mahitungod ni Mardoqueo (tan-awa sa Ester 3:1–11) ug ang laing katunga sa pagbasa mahitungod ni Ester (tan-awa sa Ester 4:10–17; 5:1–4). Kon ania pa sila karon, unsa kaha ang isulti ni Mardoqueo ug ni Ester aron sa pagdasig kanato kon naglisud sa pagbuhat sa unsay sakto? Ang mga sakop sa klase mahimo usab nga mopaambit og mga sitwasyon nga kinahanglan silang molihok sa maisugong paagi. Mahimo nimong dapiton ang klase nga mokanta o mobasa sa mga pulong sa usa ka awit mahitungod sa pagbarug alang sa kamatuoran, sama sa “Buhata Unsa ang Matarung” (Mga Himno, nu. 145). Dayon hisguti kon unsay gitudlo sa awit mahitungod sa pagbaton og kaisug.

  

  Esther before the King [Si Ester nga diha sa atubangan sa Hari], ni Minerva K. Teichert

Dugang nga mga Kapanguhaan

Ang kamot sa Dios.

Si Elder Neil L. Andersen nagtudlo:

“Usahay atong makita ang kamot sa Ginoo sa kinabuhi sa uban apan makapangutana, ‘Unsaon nako nga mas klarong makakita sa Iyang kamot sa akong kinabuhi?’ …

“Kon kamo motuman sa mga sugo ug mag-ampo inubanan sa pagtuo aron makita ang kamot sa Ginoo sa inyong kinabuhi, mosaad ko nga Iyang bukhon og mas dako ang inyong espirituhanong mga mata, ug mas maklaro sa inyong panan-aw nga wala mo mag-inusara” (“Paanhia ang Imong Gingharian,” Liahona, Mayo 2015, 121–22).

“Sa maingon niini nga panahona”

Si Sister Virginia U. Jensen mitudlo: “Dili ko motuo nga kamo ug ako aksidente lang nga maanhi niining talagsaon nga panahon. Ako nagtuo nga, sama ni Ester sa karaang panahon, kita ‘nahiabut sa gingharian sa maingon niini nga panahona’ [Ester 4:14], nga ang atong impluwensya, ang atong ehemplo, ang atong kalig-on, ug ang atong hugot nga pagtuo mahimong mobarug isip usa ka lig-on nga depensa batok sa dagkong bul-og sa dautan nga naghulga sa pagtabon sa atong mga panimalay, sa atong mga pamilya, ug sa atong mga minahal” (“Creating Places of Security,” Ensign, Nob. 1997, 89).

Pagpalambo sa Atong Pagtudlo

Dangup una sa mga kasulatan. Ang mga kasulatan kinahanglan nga mao ang imong nag-unang tinubdan alang sa imong pagtuon ug pagpangandam. Ayaw kalimot nga ang mga pulong sa mga propeta sa modernong panahon misuporta sa sumbanan nga mga basahon ug kasulatan usab. (Tan-awa sa Pagtudlo sumala sa Pamaagi sa Manluluwas, 17–18.)