tulo ka lalaki nga nakig-istorya sa usa ka tawo diha sa nataran

The Judgments of Job [Ang mga Paghukom kang Job], ni Joseph Brickey

Agosto 1–7

Job 1–3; 12–14; 19; 21–24; 38–40; 42

“Bisan Pa Niini Ako Mosalig Kaniya”

Unsa nga mga kamatuoran ang gitabang sa Espiritu Santo kanimo nga imong nakat-unan samtang nagtuon ka sa basahon ni Job? Unsay gusto nimong ipaambit sa imong klase?

Irekord ang Imong mga Hunahuna

pagpaambit nga icon

Dapita ang Pagpaambit

Ang mga sakop sa klase nga nagtuon sa Job niini nga semana mahimong nakadiskobre og mga kamatuoran nga makahuluganon ngadto kanila. Aron maaghat sila nga mopaambit, mahimo nimong isulat diha sa pisara ang Akong nakat-unan gikan ni Job … ug pangutan-a ang mga sakop sa klase kon unsaon nila sa pagkompleto niini nga kapahayag [sentence].

icon sa pagtudlo

Itudlo ang Doktrina

Job 1–2; 12–13; 19:23–27

Ang atong pagsalig diha sa Langitnong Amahan ug ni Jesukristo makatabang kanato nga magpabiling matinud-anon sa tanang kahimtang.

• Ang unang duha ka kapitulo sa Job, nga naghulagway ni Satanas nga mikwestyon sa mga rason sa pagkamatinud-anon ni Job, mahimong makatabang sa mga sakop sa klase sa pagsusi sa ilang kaugalingong mga rason sa pagkamatinud-anon ngadto sa Langitnong Amahan ug ni Jesukristo. Ang mga sakop sa klase mahimong magsugod pinaagi sa paglista og pipila ka rason nga ang usa ka tawo mahimong mopili nga mosunod sa mga sugo sa Dios. Dayon mahimo silang mosiksik sa Job 1:6–12; 2:1–6 aron makita kon unsay gisulti ni Satanas mahitungod sa pagkamatinud-anon ni Job. Nganong makuyaw man nga mosunod sa Ginoo tungod lamang sa rason nga gisugyot ni Satanas? Unsay tubag ni Job diha sa Job 1:20–22; 2:9–10 nga nagbutyag mahitungod ni Job? Ang mga sakop sa klase mahimong maghisgot kon nganong pilion nila nga magpabiling matinud-anon ngadto sa Dios.

  lalaki nga nagtan-aw sa ibabaw

  Job, ni Gary L. Kapp

• Bisan kon si Job adunay mga higayon diin iyang gipanglimbasugan ang pagduhaduha ug pagkawalay paglaum, sa katapusan ang iyang pagsalig diha sa Ginoo nakapatunhay kaniya sa iyang mga pag-antus. Aron makakat-on gikan sa ehemplo ni Job, ang mga sakop sa klase mahimong mosiksik sa pipila sa mosunod nga mga bersikulo sa pagtino sa pipila ka positibo nga mga tubag ni Job sa iyang mga pagsulay: Job 1:21; 2:10; 12:9–10, 16; 13:15–16; 19:23–27. Unsay atong makat-unan gikan niining mga tubag nga makatabang nato nga mahimong lig-on sa espirituhanong paagi kon kita mag-atubang og mga pagsulay? Nganong makuyaw man ang paghunahuna nga ang mga pagsulay mao ang mga silot sa sala?

• Ang pamahayag ni Job diha sa Job 19:23–27 mahimong makapadasig sa mga sakop sa klase nga mamalandong ug mopaambit sa ilang kaugalingong lig-on nga pagtuo nga ang Manunubos, nga si Jesukristo, buhi. Mahimo nimong sugdan pinaagi sa pagdapit sa mga sakop sa klase nga hilum nga mamalandong sa mga pulong ni Job dinhi niini nga mga bersikulo. Dayon mahimo silang maghisgot og mga pangutana sama niini: Ngano nga ang usa ka pagpamatuod bahin sa atong Manunubos bililhon man kaayo atol sa mga panahon sa pagsulay sama niadtong giantus ni Job? Sa unsang paagi nga ang atong pagpamatuod makapatunhay kanato diha sa atong mga pagsulay? Ang pagkanta o pagbasa sa mga pulong sa usa ka himno mahitungod ni Jesukristo, sama sa “Buhi ang Manunubos Ko, Niini Nasayud Ako” (Mga Himno, nu. 80), mahimong makahatag og ideya ug espirituhanong gahum nganha sa inyong panaghisgutan.

Job 38

Ang panglantaw sa Dios mas labaw pa kay sa atong panglantaw.

• Kadaghanan sa basahon ni Job (mga kapitulo 3–37) adunay kalabutan ni Job ug sa iyang mga higala nga nakigbisog sa pangutana nga “Nganong mahitabo man ang dili maayong mga butang ngadto sa matarung nga mga tawo?” Bisan kon ang Ginoo wala motubag sa hingpit niini nga pangutana diha sa basahon ni Job, Siya naghatag og importante nga mensahe. Mahimo nimong tabangan ang mga sakop sa klase nga madiskubrihan kini nga mensahe pinaagi sa pagdapit kanila sa pagbasa sa mga gipangutana sa Ginoo ni Job diha sa Job 38:1–7, 18–24. Unsa ang atong makat-unan gikan niini nga mga pangutana?

• Ang gipahiuli nga ebanghelyo ni Jesukristo naghatag og dugang nga kahayag nga makatabang kanato nga makasabut sa pipila ka rason sa pag-antus dinhi sa kalibutan. Ang mga sakop sa klase mahimong mopaambit og mga kamatuoran nga ilang nahibaloan tungod sa Pagpahiuli sa ebanghelyo nga nakahatag nila og mas taas nga panglantaw ug panabut mahitungod sa pag-antus. Mahimong makita nila ang pipila niini nga mga kamatuoran diha sa mga kasulatan ug sa pamahayag nga makita diha sa “Dugang nga mga Kapanguhaan.”

icon sa dugang nga mga kapanguhaan

Dugang nga mga Kapanguhaan

Ulahing mga adlaw nga ideya bahin sa mga katuyoan sa pag-antus.

Ang mosunod nga mga kasulatan naghatag og mga ideya mahitungod sa mga katuyoan sa pag-antus:

• 2 Nephi 2:11–14

• Ether 12:27

• Doktrina ug mga Pakigsaad 58:3–5

• Doktrina ug mga Pakigsaad 122

• Moises 5:10–12

Si Spencer W. Kimball mitudlo:

“Kon atong tan-awon ang mortalidad nga maoy kinatibuk-an sa pagpakabuhi, ang kasakit, kasub-anan, kapakyasan, ug ang hamubo nga kinabuhi mahimong usa ka kalamidad. Apan kon atong tan-awon ang kinabuhi isip usa ka mahangturon nga butang nga mobira balik ngadto sa nangagi nga kinabuhi sa wala pa dinhi sa yuta [premortal] ug paingon ngadto sa mahangturong umaabut human sa kamatayon, nan ang tanan nga mga panghitabo mabutang sa eksakto nga panglantaw.

“Wala bay kaalam ang paghatag [sa Dios] kanato og mga pagsulay aron mabuntog kini, ang paghatag og mga responsibilidad aron kita molampus, trabaho aron molig-on ang atong mga braso, mga kasub-anan aron sulayan ang atong mga kalag? Wala ba kita hatagi og mga tintasyon aron masulayan ang atong kalig-on, mga sakit aron makat-on kita sa pagpasensya, kamatayon aron kita mahimong imortal ug mahimaya? …

“Kon ang kalipay ug kalinaw ug mga ganti ihatag dayon sa naghimo og maayo, wala untay dautan—tanan mobuhat sa maayo pero dili tungod sa kaeksakto sa pagbuhat og matarung. Wala nay pagsulay sa kalig-on, walay pagpalambo sa kinaiya, walay pagtubo sa mga gahum, walay kagawasan sa pagpili [free agency]” (Mga Pagtulun-an sa mga Presidente sa Simbahan: Spencer W. Kimball [2006], 17–18).

Pagpalambo sa Atong Pagtudlo

Sunda ang Espiritu. Dili nimo matag-an kon unsay mahitabo sa matag leksyon, apan ang mga pag-aghat sa Espiritu mogiya kanimo. Kon andam ka sa espirituhanong paagi, ang Ginoo mohatag kanimo “sa diha gayud nga higayon, unsa ang inyong isulti” (Doktrina ug mga Pakigsaad 100:6), ug siguro mao gayud kini ang unsay kinahanglang madunggan sa mga sakop sa klase. (Tan-awa sa Pagtudlo sumala sa Pamaagi sa Manluluwas, 10.)