Si Kristo nga nakapula og kupo gilibutan sa nanagluhod nga katawhan

Every Knee Shall Bow [Matag Tuhod Moluhod], ni J. Kirk Richards

Agosto 22–28

Mga Salmo 102–103; 110; 116–119; 127–128; 135–139; 146–150

“Dayga ang Ginoo, Kamong Tanang mga Binuhat”

Hain sa mga pagtulun-an diha sa Mga Salmo ang imong gibati nga makatabang og dako sa mga sakop sa imong klase? Samtang magtuon ka niini nga semana, pamalandungi kon unsaon nimo sa pagtabang ang mga sakop sa klase nga makakita og kahulugan sa mga pulong niini nga mga salmo.

Irekord ang Imong mga Hunahuna

pagpaambit nga icon

Dapita ang Pagpaambit

Hatagi ang mga sakop sa klase og pipila ka minuto sa pagribyu sa mga salmo nga ilang nabasa niini nga semana, ug dapita ang pipila sa pagpaambit og paborito nga tudling. Awhaga sila sa pagpaambit kon unsay gitudlo sa Espiritu kanila. Sa unsang paagi nga ang Mga Salmo nakapalambo sa atong personal nga pagsimba sa Ginoo?

icon sa pagtudlo

Itudlo ang Doktrina

Mga Salmo 102–3; 116

Ang Ginoo makahupay kanato diha sa atong pag-antus.

• Gibati ba sa mga sakop sa imong klase ang gibati sa tagsulat sa Salmo 102? Sa unsang paagi kita makadangup sa Ginoo kon kita mobati og kawalay kadasig o kabalaka? Samtang nagtuon sila sa Mga Salmo 102, 103, ug 116 diha sa panimalay niini nga semana, ang mga sakop sa klase mahimong nakakita og mga hugpong sa mga pulong nga nakapadasig kanila nga modangup sa Ginoo diha sa ilang mga pagsulay. Awhaga sila sa pagpaambit kon unsay ilang nakit-an, o sa pagpangita og dungan isip usa ka klase sa pipila ka makapadasig nga mga hugpong sa mga pulong. Ang mga sakop sa klase mahimo usab nga maghisgot kon giunsa pagsuporta sa Ginoo kanila sa panahon sa kalisdanan.

• Ang mga sakop sa imong klase mahimong malingaw sa pagsulat og kaugalingon nila nga salmo mahitungod kon giunsa pagtabang sa Ginoo kanila atol sa mga panahon sa pagsulay. Dili kinahanglan nga taas kini o komplikado nga mga salmo—yano lamang nga mga pagpahayag sa hugot nga pagtuo, pasalamat, ug pagdayeg. Ang mga sakop sa klase mahimong magbuhat nga mag-inusara o managpares, ug mahimo nilang ribyuhon ang Mga Salmo 102, 103, ug 116 alang sa mga ideya. Dapita ang pipila ka tawo sa pagpaambit sa ilang mga salmo, kon gusto nila. Mahimo usab nga magdungan kamo og kanta sa mga himno mahitungod kon giunsa kita paghupay sa Ginoo, sama sa “Ang Kalinaw Asa Ko Pangitaa?” (Mga Himno, nu. 75).

  Si Jesus nga nag-ayo

  Healing [Pag-ayo], ni J. Kirk Richards

Salmo 119

Ang pulong sa Dios mopabilin kanato diha sa Iyang dalan.

• Sa pagsugod og panaghisgutan mahitungod sa Salmo 119, mahimo nimong dapiton ang mga sakop sa klase sa paghisgot mahitungod sa usa ka higayon sa dihang sila misubay og usa ka dalan aron moabut ngadto sa padulngan (mahimong makatabang nga mokontak daan og usa ka tawo ug mohangyo niya nga mangandam sa paghisgot mahitungod niini). Unsa nga mga kasinatian ang nakapahimong lisud nga magpabilin sa dalan? Unsay nakatabang nila nga magpabilin diha niini? Dayon mahimong magdrowing ka og usa ka dalan diha sa pisara ug modapit sa mga sakop sa klase sa pagsulat og mga hugpong sa mga pulong gikan sa Salmo 119 nga naghisgot kon unsay gihimo sa Ginoo sa pagtabang kanato nga magpabilin diha sa Iyang dalan sa pakigsaad. Ikonsiderar ang pagpaambit sa pamahayag ni Presidente Russell M. Nelson diha sa “Dugang nga mga Kapanguhaan” isip kabahin sa inyong panaghisgutan.

• Ang mga sakop sa imong klase mahimong makabenepisyo gikan sa pagtandi sa unsay gitudlo sa Salmo 119 mahitungod sa pagpabilin diha sa dalan sa Ginoo ngadto sa ubang mga kasulatan nga nagtudlo sa susamang mga kamatuoran. Ikonsiderar ang pagbahin sa klase ngadto sa mga grupo ug sa paghangyo sa matag grupo nga ribyuhon ang mga tudling sa kasulatan sama niini: Salmo 119:33–40, 105; Mga Proverbio 4:11–19; 1 Nephi 8:20–28; 11:25; 2 Nephi 31:17–21; Alma 7:9, 19–20. Dapita ang matag grupo sa pagpaambit sa unsay ilang nakat-unan. Hatagi ang mga miyembro og panahon sa pagpamalandong sa unsay ilang dinasig nga buhaton base sa unsay ilang nakat-unan.

Salmo 139

Ang Ginoo nasayud sa atong mga kasingkasing.

• Ang pagsabut nga ang Ginoo nakahibalo kanato—sa atong mga hunahuna ug mga lihok, mga kalig-on ug mga kahuyang—ug nga Siya nahigugma kanato makahatag og gamhanang impluwensya diha sa mga pagpili nga atong himoon. Mahimo nimong dapiton ang klase sa pagpangita sa mga hugpong sa mga pulong diha sa Salmo 139 nga nagtudlo niining importante nga kamatuoran. Sa unsang paagi nga ang atong kinabuhi maapektuhan pinaagi sa pagkasayud niini nga kamatuoran? Ang mga sakop sa klase mahimo usab nga maghisgot og mga paagi nga kita makadapit sa Ginoo nga “susiha ako, O Dios, ug sutaa ang akong kasingkasing” (bersikulo 23).

icon sa dugang nga mga kapanguhaan

Dugang nga mga Kapanguhaan

Ang higpit ug pig-ot nga dalan.

Si Presidente Russell M. Nelson miingon:

“Aron magmalampuson sa atong panaw sa kinabuhi, kinahanglan kita nga mosunod sa balaan nga direksyon. Ang Ginoo miingon, ‘Paghunahuna ngari kanako sa matag hunahuna; ayaw pagduha-duha, ayaw kahadlok’ [Doktrina ug mga Pakigsaad 6:36]. Ang Salmista misulat, ‘Ang imong pulong maoy suga nga magtultol kanako ug maoy kahayag sa akong agianan’ [Salmo 119:105]. …

“Diha sa inyong panaw sa kinabuhi, makasugat kamo og daghang mga babag ug makahimo og pipila ka sayop. Ang giya gikan sa pagbasa sa mga kasulatan makatabang kaninyo sa pag-ila sa sayop ug sa paghimo sa gikinahanglang pagkorihir. Mohunong kamo sa pagpadulong sa sayop nga direksyon. Mainampingon ninyong tun-an ang mga giya nga makita diha sa mga kasulatan. Dayon mopadayon kamo ngadto sa paghinulsol ug pagpakighiuli nga gikinahanglan aron magpabilin diha sa ‘higpit ug pig-ot nga dalan nga mopadulong sa kinabuhi nga dayon’ [2 Nephi 31:18]” (“Living by Scriptural Guidance,” Ensign, Nob. 2000, 17).

Pagpalambo sa Atong Pagtudlo

Apila kadtong kinsa nanglimbasug. Usahay ang nanglimbasug nga mga sakop sa klase nagkinahanglan lamang nga maapil aron mobati nga gihigugma. Ikonsiderar ang paghangyo kanila sa paghimo og usa ka tahas sa umaabut nga leksyon, pagdapit kanila ngadto sa klase, o pagsiguro nga sila adunay kasakyan padulong sa simbahan. Ayaw paghunong kon sa primero sila walay buhaton sa imong mga paningkamot. (Tan-awa sa Pagtudlo sumala sa Pamaagi sa Manluluwas, 8–9.)