Agosto 29–Septyembre 4

Mga Panultihon 1–4; 15–16; 22; 31; Ecclesiastes 1–3; 11–12

“Ang Pagkahadlok sa Ginoo mao ang Sinugdanan sa Kaalam”

Sa unsa kaha nga paagi ang mga mensahe diha sa Mga Panultihon ug sa Ecclesiastes nakapanalangin sa mga kinabuhi niadtong imong gitudloan? Sunda ang mga pag-aghat ug mga impresyon nga imong madawat samtang ikaw magtuon ug mangandam sa pagtudlo.

Irekord ang Imong mga Impresyon

Dapita ang Pagpaambit

Adunay daghang maanindot ug makaimpluwensya nga mga mensahe diha sa Mga Panultihon ug Ecclesiastes. Sa dili pa maghisgot og piho nga mga tudling, sama nianang gisugyot sa ubos, dapita ang mga sakop sa klase sa pagpaambit og pipila sa ilang mga paborito gikan sa ilang personal o pamilya nga pagtuon sa kasulatan niining semanaha.

Itudlo ang Doktrina

Mga Panultihon 1–4; 15–16; Ecclesiastes 1–3; 11–12

“Pamatia ang pagtulon-an nga maalamon.”

• Ang pagdapit sa pagtinguha og kaalam ug salabotan gibalik-balik sa tibuok Mga Panultihon. Sa unsang paagi nga imong matabangan ang mga sakop sa klase nga mopaambit sa unsay ilang nakat-onan mahitungod sa kaalam atol sa ilang pagtuon? Usa tingali sa paagi mao ang pagsulat og kaalam diha sa pisara ug dapita ang sakop sa klase sa pagdugang og mga numero sa bersikulo o hugpong sa mga pulong gikan sa mga Panultihon o Ecclesiastes nga mahitungod sa kaalam. (Kon makatabang, tingali imong isugyot nga ang mga sakop sa klase mosiksik sa Mga Panultihon 1–4; 15–16; Ecclesiastes 1–3; 11–12.) Unsa ang atong makat-onan mahitungod sa kaalam gikan sa mga kasulatan? Sa unsang paagi nga kita napanalanginan kon kita magtinguha og kaalam gikan sa Dios?

Mga Panultihon 1:7; 2:5; 3:7; 8:13; 15:33; 16:6; 31:30; Ecclesiastes 12:13

“Ayaw paghunahuna nga maalamon ka na gayod: kahadloki ug tahora ang Ginoo.”

• Laing tema nga makita sa tibuok Mga Panultihon ug sa Ecclesiastes mao ang “kahadloki ang Ginoo” (Mga Panultihon 1:7; tan-awa usab sa Mga Panultihon 2:5; 3:7; 8:13; 15:33; 16:6; 31:30; Ecclesiastes 12:13). Tingali ang mga sakop sa makabasa og pipila niining mga bersikulo ug mopaambit unsa ang ilang gibati nga kahulogan niining kahadloki ang Ginoo. Sa unsang paagi ang pagkahadlok sa Ginoo lahi gikan sa ubang mga matang sa kahadlok? Mahimo ka nga mopaambit og mga panabot gikan ni Elder David A. Bednar nga makita sa “Dugang nga mga Kapanguhaan.”

Pagkat-on sa Pagsalig sa Ginoo, ni Kathleen Peterson

Mga Panultihon 3:5–7

“Salig sa Ginoo sa bug-os mong kasingkasing.”

• Tingali ang mga sakop sa klase malingaw og usa ka butang sa leksiyon nga makatabang nila nga masabtan unsay ipasabot sa “salig sa Ginoo” ug “ayaw gayod pagsalig sa [ilang] kaalam” (Mga Panultihon 3:5). Pananglitan, mahimo nimong dapiton ang usa ka sakop sa klase sa pagsandig diha sa usa ka lig-on nga bongbong. Dayon ang tawo mahimong mosulay sa pagsandig diha sa dili lig-on nga butang, sama sa silhig. Sa unsang paagi nga kining gipakita makatabang kanato nga makasabot sa Mga Panultihon 3:5? Unsa ang gitudlo sa Mga Panultihon 3:5–7 mahitungod sa ipasabot sa salig sa Ginoo? Nganong dili man maalamon ang pagsalig sa atong kaugalingong panabot? Sa unsang paagi nga atong nabati ang Ginoo nga nagdirekta sa atong mga dalan samtang kita misalig Kaniya?

Mga Panultihon 15:1–2, 4, 18, 28; 16:24–32

“Ang malumong tubag mohupay sa kasuko.”

• Aron matabangan ang mga sakop sa klase sa paghisgot kon sa unsang paagi nga sila makabaton og dugang nga kalinaw ug minos ang panagbingkil sa ilang kinabuhi, mahimo nimong silang dapiton sa pagbasa sa Mga Panultihon 15:1–2, 18; 16:32. Tingali makapaambit sila og sa ilang mga kasinatian nga naghulagway sa mga kamatuoran niining mga bersikulo. Pananglitan, kanus-a nga higayon nga ang paggamit og “malumo nga tubag” nakatabang sa “[mahimong] mohupay ang kasuko”? (Mga Panultihon 15:1). O makahunahuna sila sa mga higayon nga ang Manluluwas mipakita kon unsa ang gitudlo niining mga bersikulo (tan-awa sa Juan 8:1–11; 18:1–11). Unsaon nato nga makasunod sa Iyang ehemplo samtang makigsandurot sa ubang mga tawo?

• Samtang ang mga tigsulat sa Mga Panutihon wala masayod sa daghang paagi sa komunikasyon sa atong panahon, ang tambag diha sa Mga Panultihon 15 ug 16 magamit sa tanang matang sa komunikasyon. Aron matabangan ang mga sakop sa klase nga masabtan kini, mahimo nimong dapiton ang matag usa ka tawo sa pagpili og usa sa mosunod nga mga kasulatan nga basahon: Mga Panultihon 15:1–2, 4, 18, 28; 16:24, 27–30. Ang mga sakop sa klase makasulti dayon pag-usab sa ilang panultihon nga pinatambag mahitungod sa pagkigsandurot diha sa social media pinaagi sa pagtekts, o online. Makapangita sila og dugang pang makatabang nga tambag diha sa “Pinulongan” sa Alang sa Kalig-on sa mga Kabatan-onan (2011), 20–21.

Dugang nga mga Kapanguhaan

“Ang diosnong kahadlok mao ang paghigugma ug pagsalig diha Kaniya.”

Elder David A. Bednar mipasabot:

“Ang diosnong kahadlok resulta sa husto nga pagsabot sa balaang kinaiyahan ug misyon ni Ginoong Jesukristo, ang pagkaandam sa pagtugyan sa atong kabubut-on ngadto sa Iyang kabubut-on, ug kahibalo nga ang matag lalaki ug babaye may tulubagon sa iyang mga sala sa Adlaw sa Paghukom.…

“Ang diosnong kahadlok mao ang paghigugma ug pagsalig diha Kaniya. Sa atong mas hingpit nga pagkahadlok sa Dios, mas hingpit nato Siyang mahigugma. Ug ang ‘hingpit nga gugma mosalikway sa tanan nga kahadlok’ (Moroni 8:16). Mosaad ko nga ang sanag nga kahayag sa diosnong kahadlok mopapahawa sa mga anino sa kalibutanong mga kahadlok (tan-awa sa Doktrina ug mga Pakigsaad 50:25) samtang kita motan-aw ngadto sa Manluluwas isip atong tukuranan, ug mopadayon sa unahan diha sa Iyang dalan sa pakigsaad uban sa gipahinungod nga pasalig” (“Busa Sila Mihupay sa Ilang mga Kahadlok,” Liahona, Mayo 2015, 48–49).

Pagpalambo sa Atong Pagtudlo

Mag-tutok diha ni Jesukristo. Walay mas maayong paagi sa pagpalambo sa hugot nga pagtuo niadtong imong gitudloan kay sa pagsentro sa imong leksiyon diha sa Manluluwas. Pinaagi sa imong pagtudlo, dapita ang mga sakop sa klase sa pagtukod “diha sa lig-on nga sukaranan sa atong Manunubos, kinsa mao si Kristo, ang Anak sa Dios” (Helaman 5:12).