Sacred Grove [Sagrado nga Kakahoyan], ni Brent Borup

Septyembre 12–18

Isaias 13–14; 24–30;35

“Usa ka Katingalahan ug Kahibulongan nga Buhat”

Sa dili ka pa makatabang sa uban sa pagdiskobre sa mga kamatuoran diha sa basahon ni Isaias, ikaw kinahanglan nga makadiskobre sa mga kamatuoran sa imong kaugalingon. Samtang magbasa ka niining semanaha, ikonsiderar kon hain nga mga kamatuoran nga imong nabati nga hatagan og gibug-aton diha sa klase.

Irekord ang Imong mga Impresyon

Dapita ang Pagpaambit

Aron maawhag ang mga sakop sa klase sa pagpaambit kon unsa ang ilang nakat-onan gikan sa Isaias, makapangutana ka nila kon unsaon nila sa pagtubag ang usa ka tawo kinsa moingon, “Ang basahon ni Isaias lisod kaayong masabtan.” Unsa ang nakatabang kanato sa pagpangita og kahulogan sa mga pagtulon-an ni Isaias? Unsa nga tudling sa kasulatan ang nakapadasig kanato?

Itudlo ang Doktrina

Isaias 24:21–23; 25:6–8; 26:19; 28:16

Ang mga sinulat ni Isaias nagponting kanato ngadto ni Jesukristo.

• Sama ni Nephi, ang mga sakop sa inyong klase mahimong mahimuot sa pagsaksi ni Isaias kabahin ni Jesukristo (tan-awa sa 2 Nephi 11:2). Mahimo nimo silang hangyoon sa pagpaambit og bisan unsang bersikulo nga ilang makit-an diha sa ilang pagbasa niining semanaha nga nagtudlo kanila mahitungod sa Manluluwas. O mahimo nimong dapiton ang mga sakop sa klase sa pagpaambit unsa ang ilang nakat-onan mahitungod ni Jesukristo gikan sa Isaias 24:21–23; 25:6–8; 26:19; 28:16 o ubang mga bersikulo nga imong nakit-an diha sa imong pagtuon. Nganong kini nga mga kamatuoran bililhon man ngari kanato?

  

  He Comes Again to Rule and Reign [Siya Moanhi Pag-usab aron sa Pagmando ug Paghari], ni Mary R. Sauer

Isaias 24:1–5; 28:1–8; 29:7–10; 30:8–14

Ang apostasiya nagpasabot sa pagbiya gikan sa Ginoo ug sa Iyang mga propeta.

• Latid niining semanaha sa Dali, Sunod Kanako—Alang sa mga Indibidwal ug mga Pamilya nagsugyot sa pagpamalandong sa pipila sa mga sambingay nga gigamit ni Isaias sa paghulagway sa mga sangpotanan sa pagbiya gikan sa Ginoo ug pagsalikway sa Iyang mga propeta. Dapita ang mga sakop sa klase sa pagpaambit kon unsay ilang nakat-onan. O mahimo nimo silang dapiton sa pagrebyo sa matag usa sa mosunod: Isaias 24:1–5; 28:7–8; 29:7–10; 30:8–14. Base sa unsay ilang gibasa, sila makakompleto niining kapahayag: “Kon kita mopalayo gikan sa Ginoo kita mahisama sa…” Unsa ang atong mahimo aron magpabilin nga matinud-anon ngadto sa Ginoo ug molikay sa apostasiya? (Tan-awa sa “Dugang nga mga Kapanguhaan” alang sa pipila ka mga sugyot.) Sa unsang paagi ang Ginoo mopanalangin niadtong kinsa matinud-anon ngadto Kaniya?

• Aron masugdan ang usa ka hilisgotan mahitungod sa mga kinaiya ug pamatasan nga makadala kanato ngadto sa apostasiya, mahimo nimong dapiton ang mga sakop sa klase sa pagsiksik sa Isaias 24:1–5; 28:1–8; 29:7–10; 30:8–14. Hangyoa sila sa pagsiksik sa mga butang nga gihunahuna ug gibuhat sa mga tawo sa panahon ni Isaias. Paghimo og usa ka sulat sa pasidaan diha sa pisara nga nag-ingon Pasidaan: Ang mosunod nga mga kinaiya ug mga pamatasan makadala ngadto sa apostasiya. Ang mga sakop sa klase mahimong molista diha sa pisara sa unsay ilang makit-an diha sa mga bersikulo. Hatagi sila og usa ka oportunidad sa pagpaambit kon sa unsang paagi nga sila moamping sa ilang kaugalingon o sa ilang mga pamilya gikan sa apostasiya.

Isaias 29:13–24; 30:18–26;35

Ang Ginoo makapahiuli sa mga butang nga nawala o naguba.

• Ania ang usa ka pangutana nga mahimo nimong isulat diha sa pisara nga tingali makatabang sa mga sakop sa klase sa pagpamalandong sa Isaias 29: Sa unsang paagi ang mga sinulat ni Isaias kabahin sa Pagpahiuli sa ebanghelyo may kalabotan sa atong panahon? Awhaga sila sa paghunahuna mahitungod niining pangutana samtang sila mobasa sa hilom sa Isaias 29:13–24. Kon sila nagkinahanglan og tabang, mahimo usab silang morebyo sa mga tudling sama niini: 2 Nephi 27:6–26; Joseph Smith—Kasaysayan 1:17–19, 63–65. Human nila hisgotan ang mahitungod sa pangutana diha sa pisara, mahimo sila nga maghisgot kon nganong “kahibulongan” ug “katingalahan” (Isaias 29:14) mao ang maayong mga pulong sa paghulagway sa Pagpahiuli sa ebanghelyo. Unsa ang atong nakat-onan mahitungod sa Pagpahiuli gikan sa “Ang Pagpahiuli sa Kahingpitan sa Ebanghelyo ni Jesukristo: Usa ka Pamahayag ngadto sa Kalib[o]tan sa Ikaduhang Siglo nga Kasaulogan”? (ChurchofJesusChrist.org).

• Mga Kapitulo 30 ug 35 sa Isaias naglangkob og pipila ka mga tudling nga makapadasig og mas dakong hugot nga pagtuo diha sa gahom sa Ginoo sa pagpanalangin niadtong mobalik ngadto Kaniya. Aron matabangan ang mga sakop sa klase sa pagdiskobre niining mga tudling, mahimo nimo sila nga dapiton sa pagtuon bisan hain sa Isaias 30:18–26 o Isaias 35. Hangyoa sila sa pagpaambit og mga pulong o hugpong sa mga pulong nga ilang makit-an nga makatabang sa usa ka tawo nga mobalik ngadto sa Ginoo alang sa katubsanan.

Dugang nga mga Kapanguhaan

Pagpabilin nga matinud-anon ngadto sa Ginoo ug sa Iyang Simbahan.

Si Presidente M. Russell Ballard mihatag sa mosunod nga tambag sa pagtabang kanato nga magpabilin nga matinud-anon ngadto sa Ginoo ug sa Iyang Simbahan:

“Kinahanglan kitang makasinati og padayon nga pagkakabig pinaagi sa pagpalambo sa atong hugot nga pagtuo kang Jesukristo ug sa atong kamatinud-anon sa Iyang ebanghelyo sa tibuok natong kinabuhi—dili lang kausa apan kanunay [tan-awa sa Alma 5:26].…

“…Ang mga pulong sa Ginoo makita diha sa mga kasulatan ug sa mga pagtulon-an sa mga apostoles ug mga propeta. Naghatag kini kanato og tambag ug direksyon nga, kon sundon, mahimong sama sa usa ka espirituhanong life jacket ug motabang kanato nga masayod unsaon sa paggunit gamit ang duha ka kamot.…

“Agi og dugang sa pagpalambo og kinaiya sa personal nga pagbasa sa kasulatan, kinahanglang mahisama kita sa mga anak ni Mosiah ug mohatag sa atong kaugalingon og “tuman nga pag-ampo, ug pagpuasa’ [Alma 17:3]” (“Pabilin sa Sakayan ug Panggunit!” Liahona, Nob. 2014, 90–91).

Pagpalambo sa Atong Pagtudlo

Pagpakita og pagsalig sa mga abilidad sa mga nagkat-on. Ang ubang tawo sa imong klase tingali dili masaligon sa ilang abilidad sa pagkat-on sa ebanghelyo. Ipasalig kanila nga kon sila maningkamot sa pagkat-on, ang Espiritu Santo motudlo kanila. (Tan-awa sa Pagtudlo sumala sa Pamaagi sa Manluluwas, 29–30.)