Healing the Blind Man [Pag-ayo sa Tawo nga Buta], ni Carl Heinrich Bloch

Septyembre 19–25

Isaias 40–49

“Dasiga ang Akong Katawahan”

Ang pipila ka tawo lagmit magduhaduha sa pagpaambit sa ilang mga hunahuna diha sa klase tungod kay sila mobati nga wala kaayo masayod sa mga kasulatan. Unsaon nimo sa pagtabang ang tanang sakop sa klase nga mobati nga ang ilang espirituhanong panabot gihatagan og bili?

Irekord ang Imong mga Impresyon

Dapita ang Pagpaambit

Ikonsiderar ang pagsulat og usa ka pangutana sama sa mosunod diha sa pisara: Unsa ang gitudlo sa Espiritu kanimo samtang imong gitun-an ang Isaias 40–49? Ang mga sakop sa klase makapamalandong niining pangutana ug isulat ang mga tubag, ug ang pipila mopaambit sa ilang mga hunahuna.

Itudlo ang Doktrina

Isaias 40–49

Si Jesus Christ makapahupay kanato ug mohatag kanato og paglaom.

• Ang latid niining semanaha sa Dali, Sunod Kanako—Alang sa mga Indibidwal ug mga Pamilya nagsugyot sa pagpangita sa mga mensahe sa kahupayan ug paglaom diha sa Isaias 40–49 ug ilista ang pipila ka mga tudling sa pagsugod. Mahimo nimong hangyoon ang mga sakop sa klase sa pagpaambit og bisan unsang mga mensahe nga ilang makit-an. Awhaga sila sa paghisgot mahitungod kon nganong kining mga mensahe lagmit makatabang sa mga Judio sa pagkaulipon ug sa unsang paagi nga kini makatabang kanato karon. Mahimo usab nimong itudlo nila ang mga tudling nga imong makit-an diha sa imong personal nga pagtuon. Unsay gusto sa Ginoo nga atong mahibaloan mahitungod Kaniya? Sa unsang paagi Siya mohupay kanato? Tingali imong pahinumdoman ang mga sakop sa klase nga “ang Ginoo” diha sa Daang Tugon nagpasabot ni Jehova, o ni Jesukristo.

• Ang Himno nga “Unsa Kalig-on ang Tukuranan” (Mga Himno, nu. 100) nagbase sa mga pulong ni Isaias diha sa Isaias 41:10; 43:2–5; 46:4. Human sa pagbasa niining mga kasulatan ug pagkanta nga may kalabotan sa mga tudling sa himno, ang mga sakop sa klase makahisgot mahitungod sa mga panahon nga sila mibati nga ang Ginoo nagauban kanila ug sa unsang paagi ang ilang mga kasinatian nakatabang kanila nga “dili mahadlok.”

“Siya magapasibsib sa iyang panon sama sa usa ka magbalanay sa karnero.” (Isaias 40:11).

Isaias 40:1–3, 9–11; 43:8–13; 48:20–21; 49:1–9

“Kamo mao ang akong mga saksi.”

• Unsay ipasabot sa pagkahimong mga “saksi” sa Ginoo? Ang mga sakop sa klase makapamalandong niining pangutana samtang sila mobasa og usa o dugang pa sa mosunod nga mga tudling: Isaias 40:1–3, 9–11; 48:20–21; 49:1–9. Ang pamahayag diha sa “Dugang nga mga Kapanguhaan” makahatag usab og pipila ka mga tubag. Unsa ang mga “maayong balita” nga atong ipaambit isip mga saksi sa Ginoo? Unsa ang anaa niining mga bersikulo nga makatabang kanato nga “[dili] mahadlok” sa pagpaambit sa atong pagsaksi? (Isaias 40:9). Ang mga sakop sa klase makahisgot og mga oportunidad nga ilang maangkon aron mahimong saksi sa Ginoo ug sa unsang paagi ang ilang pagpamatuod makapanalangin sa uban.

• Aron matabangan ang mga sakop sa klase nga magamit ang mga pagtulon-an sa Isaias 43:8–13, mahimo nimo silang dapiton sa paghunahuna nga sila natawag nga mosaksi sa diha sa hukmanan. Niining paghusay, si Jesukristo ang gikasohan sa pagpangangkon nga nasulat diha sa Isaias 43:11. Kon kita gitawag isip mga saksi agig pagsuporta sa giangkon ni Jesukristo (tan-awa sa bersikulo10), unsa nga pagpamatuod ang atong matanyag? Unsa nga ebidensya gikan sa atong mga kinabuhi ang atong ipresentar?

Isaias 48:10; 49:13–16

Ang Ginoo makapalambo kanato pinaagi sa atong mga kasakit.

• Tingali ang mga sakop sa klase mahimong maghisgot kon sa unsang paagi ang mga pulong ni Elder Quentin L. Cook makatabang kanato nga makasabot sa Isaias 48:10: “Kalidad sa pamatasan ug pagkamatarung nga napalambo pinaagi sa kalisdanan mohingpit ug molimpyo kanato” (“Ang mga Awit nga Dili Nila Makanta,” Liahona, Nob. 2011, 106). Sila makahisgot usab mahitungod kon sa unsang paagi ang ilang kaugalingong “pagpalambo pinaagi sa kalisdanan” nakatabang kanila nga molambo sa espirituhanong paagi. Sa unsang paagi ang Isaias 49:13–16 nakatabang kanato kon kita gisakit?

Dugang nga mga Kapanguhaan

Pagbarog isip usa ka saksi.

Presidente Margaret D. Nadauld mipasabot kon unsa ang kahulogan sa “mobarog ingon nga mga saksi sa Dios sa tanan nga mga panahon ug diha sa tanan nga mga butang, ug diha sa tanan nga mga dapit” (Mosiah 18:9):

“Sa pagbarog isip usa ka saksi sa tanan nga mga panahon, kita mosaad sa paghigugma sa Ginoo, sa pagpasidungog Kaniya sa tanan nga panahon—sa buntag ug sa gabii, sa ting-init ug tingtugnaw, maayong panahon ug sa dili maayong panahon—sa paghigugma sa Ginoo ug ipakita kana nga gugma pinaagi sa atong pagpuyo.…

“Ang pagbarog isip usa ka saksi sa tanang butang nagpasabot sa tanang mga butang—dagko nga mga butang, gagmay nga mga butang, sa tanang panag-istoryahanay, sa mga pasiaw, sa mga dula ug sa mga libro nga basahon ug sa musika nga gipaminaw, sa mga kawsa nga gisuportahan, sa serbisyo nga gihatag, sa mga sinina nga gisul-ob, sa mga higala nga gihimo.…

“Sa kataposan, kita moingon nga kita mobarog isip usa ka saksi sa tanan nga mga dapit. Kana nagpasabot nga dili lang sa pangpubliko nga mga dapit apan sa pribado nga mga dapit, sa tago, diha sa ngitngit o sa mahayag nga mga dapit; sa simbahan, eskwelahan, panimalay, o mga sakyanan; lugar sa kabukiran nga mga dapit o sa kabaybayonan nga mga dapit; sa kadalanan o sa mga parke.…

“Kon kita maghunahuna sa kahalangdon sa gasa [sa Manluluwas] ngari kanato, unsa ka gamayng butang nga atong mabuhat alang Kaniya ug alang sa atong Langitnong Amahan kinsa mipadala Kaniya? Kita makabarog isip mga saksi sa Ilang gugma ug mga pagtulon-an sa tanan nga mga panahon, sa tanan nga mga butang, ug sa tanan nga mga dapit” (“Stand as a Witness,” Ensign, Mayo 2000, 93, 95).

Pagpalambo sa Atong Pagtudlo

Pagdapit og makugihon nga pagkat-on. “Ang mga tigkat-on mao gayod ang responsable sa ilang pagkat-on. Ikonsiderar kon sa unsang paagi nga makatabang ka sa mga tigkat-on nga modawat ug motuman niini nga responsibilidad” (Pagtudlo sumala sa Pamaagi sa Manluluwas, 29).