Si Kristo gipurongan sa mga tunok ug gibugalbugalan sa mga sundalo

The Mocking of Christ [Ang Pagbugalbugal ni Kristo], ni Carl Heinrich Bloch

Septyembre 26–Oktubre 2

Isaias 50–57

“Giantos Niya ang mga Kasakitan nga Kita Untay angay Mag-antos”

Ang labing importanting paagi sa pag-andam sa pagtudlo mao ang pagbasa ug pagpamalandong sa mga kasulatan. Unsa ang imong nabati ug nakat-onan samtang imong gibasa ang Isaias 50–57?

Irekord ang Imong mga Impresyon

pagpaambit nga icon

Dapita ang Pagpaambit

Aron maaghat ang mga sakop sa klase sa pagpaambit sa ilang mga kasinatian samtang nagbasa sa Isaias 50–57, mahimo nimong isulat diha sa pisara ang kapahayag [sentence] nga Ang akong hugot nga pagtuo kang Kristo napalig-on sa dihang akong gibasa ang… Dapita ang mga sakop sa klase sa pagpaambit kon unsaon nila sa paghuman ang kapahayag.

icon sa pagtudlo

Itudlo ang Doktrina

Isaias 50–52

Hayag ang kaugmaon alang sa mga katawhan sa Ginoo.

• Kitang tanan adunay mga higayon nga kita mobati og kaluya. Aron matabangan ang mga sakop sa klase nga mosalig sa kusog sa Ginoo, mahimo nimo nga tahasan ang matag usa nila sa pagbasa og pipila ka mga bersikulo gikan sa Isaias 51–52 ug mopaambit og butang nga ilang makit-an nga makapalig-on og usa ka tawo nga mibati og kaluya og nawad-an sa kadasig. Tingali mahimo usab nimong ipasabot nga ang nabanhaw nga Manluluwas misubli sa pipila ka mga pulong ni Isaias ngadto sa mga tawo sa Amerika (tan-awa sa 3 Nephi 20:32–45). Unsa ang gikadugang sa mga pulong sa Manluluwas diha sa 3 Nephi 20:30–34 diha sa atong mga salabotan kon kanusa kining mga panagna matuman?

• Ang latid karong semanaha sa Dali, Sunod Kanako—Alang sa mga Indibidwal ug mga Pamilya nagsugyot sa paglista sa tanang butang sa Isaias 50–52 nga gidapit sa Ginoo nga buhaton sa Iyang katawhan. Tingali ang mga sakop sa klase makapaambit unsa ang ilang nakit-an ug maghisgot kon unsay kahulogan niining mga pagdapit ngadto kanila. Mahimo nimong tutukan ang mga pagdapit diha sa Isaias 51:1–2, 6–8; 52:1–3, 9–11. Unsaon nato sa pagbuhat niining mga pagdapit? Mahimo nimong ipasabot nga ang Doktrina ug mga Pakigsaad 113:7–10 naghatag og usa ka dinasig nga pagpasabot sa Isaias 52:1–2. Unsa ang gikadugang niini nga mga pulong ngadto sa atong mga salabotan?

istatuwa ni Kristo nga nagdala og krus

Because of Love [Tungod sa Gugma], pinaagi sa mangungulit nga si Angela Johnson

Isaias 52:13–15; 53

Gidala ni Jesukristo diha sa Iyang kaugalingon ang atong mga sala ug mga kagul-anan.

• Aron matabangan ang mga sakop sa klase nga malantaw ang mga pulong sa Isaias 53, mahimo nimong ipakita ang pipila ka mga hulagway sa mga panghitabo nga naglibot sa Pag-ula ni Jesukristo (tan-awa sa Libro sa mga Hulagway sa Ebanghelyo, mga nu. 56–60). Mahimo na dayon nimong hangyoon ang mga sakop sa klase sa pagpangita sa hugpong sa mga pulong diha sa Isaias 53 nga naghulagway sa mga panghitabo diha sa mga hulagway. Unsa ang gitudlo sa mga pulong ni Isaias mahitungod sa pag-antos sa Manluluwas alang kanato? Unsa ang gisugyot niini mahitungod kon nganong Siya nag-antos alang kanato? Unsa ang gidasig niining mga pagtulon-an nga atong buhaton?

• Aron dapiton ang Espiritu Santo sa pagpamatuod sa mga kamatuoran nga gitudlo diha sa Isaias 52:13–15; 53, mahimo nimong hangyoon ang mga sakop sa klase sa pagbasa niining mga bersikulo sa hilom samtang imong ipatukar ang usa ka girekord nga himno mahitungod sa Pag-ula ni Jesukristo. Dapita ang mga sakop sa klase sa pagpangita sa mga pulong diha sa mga kasulatan nga ilang gibati nga importante kaayo. Dayon tugoti nga sila mopaambit unsa ang ilang nakit-an ug unsa ang ilang gibati mahitungod sa Manluluwas. Ikonsiderar ang pagdapit sa mga sakop sa klase sa pagbasa sa Mosiah 15:10–12, diin gipasabot ni Abinadi unsa ang kahulogan sa mga pulong nga “iyang binhi.” Sa unsang paagi nga kini nakatabang kanato nga makasabot sa Isaias 53:10?

Isaias 54

Si Jesuskristo gusto nga kita makabalik Kaniya.

• Ang pagtuon sa Isaias 54 mahimong makapadasig sa mga sakop sa klase kinsa mobati nga nawad-an sa kadasig tungod sa ilang mga sala o mga kahuyang. Mahimo nimong dapiton ang mga sakop sa klase sa pagsiksik sa kapitulo 54 alang sa mga pulong o mga bersikulo nga nagpakita kon unsa ang mga pagbati sa Manluluwas mahitungod kanato. Sa unsang paagi nga Siya gusto nga kita mobati mahitungod sa atong nanglabay nga mga sala ug mga kahuyang? Unsay gusto Niya nga atong bation mahitungod Kaniya? Awhaga ang mga sakop sa klase sa pagpaambit og bisan unsa pang butang nga ilang nakat-onan mahitungod ni Jesukristo gikan niining kapitulo. Ang pamahayag ni Presidente Dieter F. Uchtdorf diha sa “Dugang nga mga Kapanguhaan” mahimong makadugang sa inyong panaghisgutan.

icon sa dugang nga mga kapanguhaan

Dugang nga mga Kapanguhaan

Pinaagi ni Jesukristo kita makalaom.

Presidente Dieter F. Uchtdorf mitudlo:

“Dili igsapayan unsa ka guba ang atong kinabuhi. Dili igsapayan unsa kaitom ang atong mga sala, unsa kapait, unsa kamingaw, biniyaan, o ka masulub-on sa atong mga kasingkasing. Bisan kadtong wala’y mga pagla[o]m, kinsa desperado, kinsa miluib sa pagsalig, mibiya sa ilang kaligdong, o mitalikod sa Dios, mahimong mausab.…

“Ang nindot nga balita sa ebanghelyo mao kini: tungod sa mahangturong plano sa kalipay nga gihatag sa atong mahigugmaong Langitnong Amahan ug pinaagi sa walay kinutuban nga Pag-ula ni Jesukristo, dili lamang kita matubos gikan sa atong kalaglagan ug mapahiuli sa kaputli, mahimo usab kitang mouswag saylo pa sa unsay mahunahuna ug mahimong manununod sa kinabuhing dayon ug mga tig-ambit sa dili mahulagway nga himaya sa Dios” (“Pas-anon Ka Niya sa Iyang Abaga ug Dad-on Pauli,” Liahona, Mayo 2016,102).

Pagpalambo sa Atong Pagtudlo

Pagpakabuhi nga takos sa giya sa Espiritu. Kon imong sundon ang ebanghelyo sa takos nga paagi, ikaw takos sa pagpakig-uban sa Espiritu, kinsa mao ang labing maayo nga magtutudlo. Samtang magtinguha ka sa giya sa Espiritu Santo, Siya mohatag kanimo og mga hunahuna ug mga impresyon, ug mamugnaon nga mga ideya mahitungod kon unsaon sa pagkab-ot sa mga panginahanglan niadtong imong gitudloan. (Tan-awa sa Pagtudlo sumala sa Pamaagi sa Manluluwas, 5.)