Si Jesus nagtudlo sa sinagoga

Jesus in the Synagogue at Nazareth [Si Jesus sa Sinagoga sa Nazaret], ni Greg K. Olsen

Oktubre 3–9

Isaias 58–66

“Ang Manunubos moab[o]t sa Sion”

Samtang imong tun-an ang matahom nga doktrina niining mga kapitulo, dapita ang Espiritu sa paggiya kanimo ngadto sa mga mensahe nga labing makahuluganon ngadto sa mga sakop sa klase.

Irekord ang Imong mga Impresyon

pagpaambit nga icon

Dapita ang Pagpaambit

Mahimo nimong dapiton ang mga sakop sa klase sa pagsulat diha sa pisara sa mga pakisayran alang sa mga bersikulo nga midasig kanila atol sa ilang pagtuon sa kasulatan niining semanaha. Isip usa ka klase, imo na dayon nga mapangita kadtong mga bersikulo ug hisgotan ang mga kamatuoran nga makita didto. Kini nga mga salabotan makadala ngadto sa mas lawom nga panaghisgotan sa mga baroganan nga nalista sa ubos.

icon sa pagtudlo

Itudlo ang Doktrina

Isaias 58:3–12

Ang Pagpuasa makadala og mga panalangin.

• Aron matabangan ang mga sakop sa klase sa paghisgot ngano ug kon sa unsang paagi ang Ginoo misugo kanato sa pagpuasa, makahimo ka og duha ka kolum diha sa pisara nga sulatan og “Ang Pagpuasa Sama sa Inyong Gihimo Niining Adlawa Dili Makahimo” ug “Ang Puasa Nga Akong Napili.” Dayon ang mga sakop sa klase mahimong mobasa sa Isaias 58:3–7, magsulat diha sa unang kolum sa mga paghulagway kon sa unsang paagi ang mga Israelita nanagpuasa ug sa ikaduhang kolum sa mga paghulagway sa pagpuasa sumala sa gipili sa Ginoo. Sa unsang paagi kini nga mga paghulagway makaapekto sa paagi nga kita manglantaw sa pagpuasa? Ang mga sakop sa klase mahimo usab nga makapaambit kon sa unsang paagi, sa ilang kasinatian, ang pagpuasa mosangpot ngadto sa mga panalangin nga gisaad sa Ginoo sa mga bersikulo 8–12.

• Ang pipila ka mga sakop sa klase tingali adunay mga kasinatian nga magpasabot ngadto sa uban kon nganong magpuasa kita. Dapita sila sa pagpaambit kon unsa ang ilang gisulti. Mahimo usab nimong dapiton ang usa ka sakop sa bishopric sa paghisgot mahitungod kon sa unsang paagi gigamit ang halad sa puasa. O tingali imong ipaambit ang usa sa mga ehemplo gikan sa mensahe ni Presidente Henry B. Eyring “Dili ba Mao Kini ang Pagpuasa nga Akong Napili?” (Liahona, Mayo 2015, 22–25). Sa unsang paagi ang pagpuasa ug ang pagbayad og halad sa puasa makatabang sa “pagtangtang sa mga bugkos sa yugo” sa atong kaugalingon ug sa uban? (Isaias 58:6).

Isaias 61:1–3; 63:7–9

Si Jesukristo mao ang atong Manluluwas ug Manunubos.

• Sa dihang si Jesukristo mipahibalo ngadto sa katawhan sa Nazaret, nga Siya mao ang Mesiyas, Siya mikutlo gikan sa Isaias 61:1–3 (tan-awa sa Lucas 4:16–21). Tingali ang mga sakop sa klase makabasa sa Isaias 61:1–3 ug maghisgot mahitungod kon nganong kining mga bersikulo usa ka maayo nga paghulagway sa misyon sa Manluluwas. Tingali mahimo nimo nga ilista diha sa pisara ang matag butang ang Manluluwas gidihogan sa pagbuhat ug paghisgot sa unsay kahulogan sa matag usa. Sa unsang paagi ang Maluluwas nakatuman niining mga aspeto sa Iyang misyon atol sa Iyang mortal nga kinabuhi? Giunsa man Niya sa pagtuman niini diha sa atong mga kinabuhi?

• Ang mga sakop sa klase mahimo usab nga makabasa sa Isaias 63:7–9 ug mopaambit kon sa unsang paagi si Jesukristo mipanalangin kanila niining mga paagiha.

• Ang Isaias 61:1–3 naggamit og matahom ug balaknon nga pinulongan sa paghulagway sa gahom ni Jesukristo sa pagtubos sa unsay ingon og naguba. Aron sa pagtabang sa pagtudlo niining mga bersikulo, ikonsiderar ang pagpaambit og usa ka istorya mahitungod sa usa ka butang nga gituohan nga nawala o naguba apan nahimong usa ka butang nga mas matahom pa. Pananglitan, tan-awa ang istorya diha sa sinugdanan sa mensahe ni Presidente Dieter F. Uchtdorf, “Pas-anon Ka Niya sa Iyang Abaga ug Dad-on Pauli” (Liahona, Mayo 2016, 101–4). Ang mga sakop sa klase mahimong maghisgot mahitungod kon sa unsang paagi nga ilang nakita ang Ginoo nga naghatag sa mga tawo og usa ka butang nga matahom kon sila naghunahuna nga ang ilang mga kinabuhi naguba.

Isaias 65:17–25

Sa Iyang Ikaduhang Pag-anhi, ang Ginoo “mohimo og bag-ong mga langit ug usa bag-ong kalibotan.”

• Ang Isaias 65:17–25 naghulagway sa mga kahimtang sa kalibotan human sa Ikaduhang Pag-anhi sa Manluluwas. Mahimo nimong dapiton ang mga sakop sa klase sa pagrebyo niining mga bersikulo sa pagpangita alang sa mga tubag sa mga pangutana sama niini: Sa unsang paagi ang kinabuhi sa “bag-ong kalibotan” mahimong lahi gikan sa kasamtangang kinabuhi sa kalibotan? Unsa ang imong nakit-an dinhi niining mga bersikulo nga nakapahimo nimo sa paglipay?

icon sa dugang nga mga kapanguhaan

Dugang nga mga Kapanguhaan

Ang Ginoo “dili mobiya kanato nga maugdaw.”

Human sa pagsaysay kon sa unsang paagi ang kalayo hapit migun-ob sa Tabernakulo sa Provo, nagtugot niini nga matukod pag-usab sa kadugayan isip ang Provo City Center Temple, si Sister Linda S. Reeves miingon: “Ang Ginoo mitugot nga kita pagasulayan, usahay hangtod sa atong kinadak-an nga kapasidad. Atong nakita ang mga kinabuhi sa mga minahal—ug tingali ang atoa—nga naguba ug naghunahuna ngano nga ang usa ka mahigugmaon ug mabinationg Langitnong Amahan motugot nga mahitabo ang maong mga butang. Apan dili Siya mobiya kanato nga maugdaw; nagbarug Siya nga bukas ang mga bukton, madasigong nagdapit kanato sa pagduol ngadto Kaniya. Iyang gitukod ang atong mga kinabuhi ngadto sa maanindot nga mga templo diin ang Iyang Espiritu makapuyo sa kahangtoran.” (“Kuhaa ang mga Panalangin sa Inyong mga Pakigsaad,” Liahona, Nob. 2013, 119).

Pagpalambo sa Atong Pagtudlo

Tinguhaa ang pagsabot sa imong mga gitudloan. Ang matag tawo nga imong tudloan adunay talagsaon nga gigikanan, panan aw, ug hugpong sa mga abilidad. Ikonsiderar kining mga kalainan samtang ikaw magtinguha sa pagtabang sa tanan nga makat-on sa makahuloganon ug sa halandumon nga mga paagi. (Tan-awa sa Pagtudlo sumala sa Pamaagi sa Manluluwas, 7.)