propeta namulong ngadto sa katawhan

Jeremias, ni Walter Rane

Oktubre 10–16

Jeremias 1–3; 7; 16–18; 20

“Sa Wala Pa Ikaw Buhata Nako diha sa Tiyan Naila Ko na Ikaw”

Samtang magtuon ka, hunahunaa ang mga sakop sa imong klase, ug tinguhaa ang giya sa Espiritu aron masayod unsa nga mga mensahe nga mahimong labing importante ngadto kanila.

Irekord ang Imong mga Impresyon

pagpaambit nga icon

Dapita ang Pagpaambit

Usa sa paagi nga ikaw makaawhag sa pagpaambit mao ang pagdapit sa mga sakop sa klase sa pagsulat diha sa usa ka gilis sa papel og usa ka kamatuoran sa ebanghelyo nga ilang nakat-onan atol sa ilang pagtuon sa Jeremias niining semanaha. Mahimo nimong kolektahon ang mga gilis sa papel ug magpili og pipila aron hisgotan isip usa ka klase. Sa unsang paagi ang mga sinulat ni Jeremias makatabang kanato nga masabtan kining mga kamatuoran?

icon sa pagtudlo

Itudlo ang Doktrina

Jeremias 1:4–19

Ang mga propeta gitawag aron sa pagpamulong sa mga pulong sa Ginoo.

• Mahimo nimong sugdan ang usa ka panaghisgotan mahitungod sa tawag ni Jeremias isip usa ka propeta pinaagi sa pagpakita og usa ka litrato sa buhi nga propeta ug mohangyo sa mga sakop sa klase sa pagpaambit kon giunsa nila pagkasayod nga siya gitawag sa Dios. Mahimo usab nimo silang hangyoon sa pagpaambit kon sa unsang paagi nga sila mitabang sa uban nga masayod niining importanting kamatuoran. Sa unsa nga paagi nga kining kahibalo nakapanalangin sa atong mga kinabuhi? Ang mga sakop sa klase makalista na dayon diha sa pisara sa mga butang nga ilang nakat-onan sa mga propeta gikan sa Jeremias 1:4–19. Unsa ang “[gi]luka” o “[gi]gun-ob” sa mga propeta sa atong panahon”? Unsa ang ilang “[gi]tukod” ug “[gi]tanom”? sa (bersikulo 10).

• Dapita ang mga sakop sa klase sa pagpaambit kon unsa ang nakat-onan ni Jeremias mahitungod sa iyang kaugalingon diha sa Jeremias 1:5. Sa unsang paagi kaha nga kining kasinatian nakaapekto sa iyang pagpangalagad? Ang mga sakop sa klase makabasa sa pamahayag diha sa “Dugang nga mga Kapanguhaan” ug sa mosunod nga mga kasulatan nga mosuporta niining kamatuoran: Alma 13:1–4; Doktrina ug mga Pakigsaad 138:53–56; Abraham 3:22–23. Sa unsang paagi nga kining mga kamatuoran mahitungod sa atong kinabuhi sa wala pa matawo makaapekto sa paagi nga kita magpuyo sa atong kinabuhi?

tawo nga nagbarog sa karaan nga pundohanan og tubig

Ang mga tawo sa karaan nga Israel migamit og mga pundohanan sa tubig aron kapundohan sa bililhon nga tubig.

Jeremias 2; 7

“Sila mingbiya kanako, ang tuburan sa mga tubig nga buhi.”

• Sa pag-aghat og usa ka panaghisgotan mahitungod sa Jeremias 2:13, mahimo nimong drowingon diha sa pisara ang usa ka pundohanan sa tubig (usa ka dakong reserbower ilawom sa yuta) ug usa ka tuburan (sama sa natural nga tubod). Ang mga sakop sa klase mobasa dayon sa Jeremias 2:13 ug maghisgot mahitungod kon nganong mas maayo ang tubig gikan sa usa ka tuburan kay sa magkawot og usa ka pundohanan sa tubig. Unsa kaha ang mahimong espirituhanong katugbang sa paghimo og liki nga mga pundohanan sa tubig? Mahimo nimong dapiton ang mga sakop sa klase sa pagbasa sa mga bersikulo gikan sa Jeremias 2 ug 7 ug mopaambit sa mga paagi nga ang mga Israelita mibiya “sa tuboran sa mga tubig” (tan-awa sa, pananglitan, Jeremias 2:26–28; 7:2–11). Ngano nga ang “tuboran sa mga tubig” usa ka simbolo sa unsa ang mahatag sa Manluluwas kanato?

Jeremias 3:14–18; 16:14–15

Ang Ginoo mopundok sa Iyang katawhan.

• Tungod kay si Jeremias mitandi sa pagpundok sa Israel sa ulahing mga adlaw ngadto sa pagtubos sa Israel pinaagi ni Moises gikan sa Ehipto, tingali mahimo nimong ipakita ang hulagway sa Exodo (tan-awa sa ang latid alang sa Abril 4–10 sa Dali, Sunod Kanako—Alang sa mga Indibidwal ug mga Pamilya). Dapita ang mga sakop sa klase sa paghisgot kon unsa ka makahuluganon ang Exodo ngadto sa mga Israelita sulod sa mga henerasyon. Ang mga sakop sa klase makahimo na dayon sa pagbasa sa Jeremias 16:14–15 ug maghisgot kon sa unsang paagi ang Israel mahimong mas importanting katawhan ngadto sa katawhan sa Dios (tan-awa usab sa Jeremias 3:14–18). Ang mga sakop sa klase kinsa mirebyo sa “Hope of Israel” isip kabahin sa ilang personal nga pagtuon mahimong makapaambit unsa ang ilang nakat-onan mahitungod sa kaimportante sa pagpundok sa Israel (tan-awa sa Russell M. Nelson ug Wendy W. Nelson, “Hope of Israel” [tibuok kalibotan nga debosyonal sa kabatan-onan, Hunyo 3, 2018], suplemento ngadto sa New Era ug Ensign, Ago. 2018, 2–17, ChurchofJesusChrist.org). O mahimo kamong morebyo sa mga bahin sa mensahe isip tibuok klase. Sa unsang paagi ang Israel gipundok diha sa atong dapit?

icon sa dugang nga mga kapanguhaan

Dugang nga mga Kapanguhaan

Ang Langitnong Amahan nakaila kaninyo.

Presidente Russell M. Nelson nagtudlo:

“Ang inyong espiritu mahangturong butang. Ang Ginoo miingon sa Iyang propeta nga si Abraham: ‘Ikaw napili sa wala pa ikaw matawo’ [Abraham 3:23]. Ang Ginoo miingon ug susama niini mahitungod ni Jeremias [tan-awa sa Jeremias 1:5] ug sa daghan pa [tan-awa sa Alma 13:2–3]. Miingon man gani siya niini mahitungod kaninyo [tan-awa sa Doktrina ug mga Pakigsaad 138:55–56].

Nakaila ang inyong Langitnong Amahan kaninyo sa dugay nang panahon. Kamo, isip Iyang mga anak, gipili Niya nga moanhi sa kalib[o]tan niining sakto nga panahon, nga mahimong lider sa Iyang importante nga buhat sa kalib[o]tan. Kamo gipili dili tungod sa inyong lawasnong mga hiyas apan tungod sa inyong espiritwal nga mga hiyas, sama sa kais[o]g, kaligdong sa kasingkasing, kauhaw sa kamatuoran, kagutom sa kaalam, ug tinguha sa pagserbisyo sa uban.

“Inyong napalambo kining pipila ka mga hiyas sa kinabuhi nga wala pa dinhi sa yuta. Ang uban inyong mapalambo dinhi sa kalibotan samtang padayon nimo kining gipangita” (“Mga Desisyon alang sa Kahangturan,” Liahona, Nob. 2013, 107).

Pagpalambo sa Atong Pagtudlo

Sunda ang ebanghelyo sa tibuok nimong kasingkasing. Ikaw mahimong usa ka Kristohanong magtutudlo kon imong hangpon ang ebanghelyo ug mosunod niini sa matag adlaw sa imong kinabuhi. Ang Kristohanong pagtudlo wala magkinahanglan nga ikaw mahimong hingpit—paningkamot lang ug padayon sa pagpaningkamot. Kon ikaw makugihon sa pagbuhat sa imong labing maayo ug magtinguha og kapasayloan kon ikaw magkulang, ikaw mahimong disipulo ni Kristo nga Siya gusto nga ikaw mamahimo. (Tan-awa sa Pagtudlo sumala sa Pamaagi sa Manluluwas, 13–14.)