The Cry of Jeremiah the Prophet [Ang Pagtuaw ni Jeremias ang Propeta], gikan sa usa ka kinulit sa Nazarene School

Oktubre 17–23

Jeremias 30–33; 36; Mga Pagbangotan 1; 3

“Ang Ilang Pagbangotan Ilisan Kog Pagmaya”

Pamalandongi ang mga impresyon nga imong nadawat atol sa imong personal nga pagtuon sa Jeremias ug Mga Pagbangotan. Unsa nga mga tudling gikan niining mga kapitolo ang imong gibati nga nahimong makahuloganon niadtong imong gitudloan?

Irekord ang Imong mga Impresyon

Dapita ang Pagpaambit

Aron matabangan ang mga sakop sa klase nga mopaambit kon unsa ang ilang pagtuon sa kasulatan, mahimong isulat nimo sa pisara ang mga pulong nga sama sa Akong nakat-onan nga…, Ako adunay usa ka pagpamatuod sa…, o Ako nakabaton og kasinatian sa… Ang mga sakop sa klase makapaambit og butang gikan sa Jeremias o Mga Pagbangotan aron makompleto kining mga pamahayag.

Itudlo ang Doktrina

Jeremias 30–31; 33; Mga Pagbangotan 1:1–7; 3:1–5

Ang Ginoo mohaw-as sa Israel gikan sa pagkaulipon ug mopundok kanila.

• Ang mga mensahe sa paglaom diha sa mga panagna ni Jeremias makahatag sa mga sakop sa klase og paglaom diha sa ilang kaugalingong mga kahimtang. Tingali makahisgot ang imong klase og mga kahimtang nga lagmit makapahimo sa mga tawo sa atong panahon nga mobati og sama sa gibati sa mga tawo sa panahon ni Jeremias (tan-awa sa Jeremias 30:5; 31:15; Mga Pagbangotan 1:1–7; 3:1–5; ug ang kinutlo diha sa “Dugang nga mga Kapanguhaan”). Mahimo dayon nimong bahinon ang mga sakop sa klase ngadto sa tulo ka grupo ug dapita ang matag grupo sa pagrebyo sa Jeremias 30; 31; ug 33 alang sa mga mensahe nga makahatag og paglaom ngadto sa mga tawo karon. Sa unsang paagi ang paglaom diha sa Ginoo nakatabang kanato sa paglahutay sa atong mga pagsulay?

Jeremias 31:31–34; 32:37–42

“Mahimo ako nga ilang Dios, ug sila akong katawhan.”

• Sa pagrebyo sa Jeremias 31:31–34; 32:37–42 makatabang sa imong klase sa pagpamalandong sa mga pakigsaad nga ilang gihimo. Usa ka paagi sa pagdasig og panaghisgotan mahitungod niining mga bersikulo mao ang paghatag sa mga sakop sa klase og pipila ka minuto sa pagbasa sa mga bersikulo ug dayon magsulat diha sa gilis sa papel og usa ka pangutana nga gusto nilang ipangutana sa klase mahitungod sa unsay ilang nabasa. Pananglitan, tingali gusto nilang maghisgot kon unsay ipasabot sa pagbaton sa balaod sa Dios nga nahisulat sa atong mga kasingkasing (tan-awa sa Jeremias 31:33) o unsa ang mga pakigsaad makatabang kanato nga makaila ang Ginoo (tan-awa sa Jeremias 31:34). Mahimo nimong kolektahon ang mga pangutana ug mopili og pipila aron mag-uban sa paghisgot. Unsa ang atong makat-onan gikan niini nga mensahe nga makadasig kanato nga mas magmaisugon sa pagtuman sa atong mga pakigsaad?

Ang mga kasulatan makadasig kanato sa paghinulsol ug mobalik ngadto sa Ginoo.

Jeremias 36

Ang mga kasulatan adunay gahom sa pagpalayo kanato gikan sa daotan.

• Ang mga sakop sa imong klase mahimong makabaton og mga panabot mahitungod sa mga kasulatan samtang sila magtuon sa Jeremias 36 diha sa panimalay. Dapita sila sa pagpaambit kon unsay ilang nakat-onan. Mahimo usab nimong sangonan ang mga sakop sa klase og ngalan sa usa ka tawo diha sa kapitulo ug dapita sila sa pagbasa mahitungod sa unsa ang gibuhat niana nga tawo sa pulong sa Dios. Ang mga sakop sa klase mahimong magtuon sa mga pulong ug mga buhat sa Ginoo (tan-awa sa mga bersikulo 1–3, 27–31); Jeremias (tan-awa sa mga bersikulo 4–7,32); Baruk (tan-awa sa mga bersikulo 4, 8–10, 14–18); Jehudi ug si Hari Jehoiakim (tan-awa sa mga bersikulo 20–26); ug Elnathan, Delaias, ug Gemarias (tan-awa sa bersikulo 25). Sa unsang paagi nga ang atong mga pulong ug mga buhat mopakita sa atong pagbati mahitungod sa mga kasulatan?

Dugang nga mga Kapanguhaan

Kamo kanunay nga makabaton og paglaom.

Si Presidente M. Russell Ballard mihisgot og pipila ka mga sitwasyon nga mahimong maoy hinungdan nga ang pipila mawad-an og paglaom, ug siya mitanyag og tambag mahitungod kon asa makaplagan ang paglaom:

“Ang pipila kanato mahimong makaamgo nga atong mga kinabuhi napuno sa kalagot, pagmahay, ug kaguol. Daghan ang mahimong mobati walay mahimo sa pagsagubang sa kasamok nga ingon og mopatigbabaw diha sa kalibotan. Ang uban naguol sa mga sakop sa pamilya kinsa nadala sa kusog nga bul-og sa makapaluya nga bili ug nagkaubos nga moral nga mga sumbanan. … Daghan man gani ang mipanunot sa ilang kaugalingon sa pagdawat sa kadaotan ug kabangis sa kalibotan isip wala nay pagkaayo. Sila miundang sa paglaom.…

“…Pipila kanato mahimong nawad-an sa tanang paglaom tungod sa sala ug kalapasan. Ang usa ka tawo mahimong hingpit nga modawat sa pagkakalibotanon imbis sa baroganan sa ebanghelyo nga siya motan-aw nga wala nay kalingkawasan ug mawad-an na sa tanang paglaom. Akong pangamuyo sa tanan kinsa nahitumpawak ngadto niining laang sa kaaway nga dili gayod molunga [give up]! Bisan unsa pa ka desperado ang dangatan sa mga butang o bisan unsa pa ka despirado ang mahitabo, palihog tuohi ako, nga kamo makabaton og paglaom. Sa kanunay” (“The Joy of Hope Fulfilled,” Ensign, Nob. 1992, 31–32).

“Sa yanong paagi lang, ang atong usa ka paglaom alang sa espirituhanong kahilwasan atol niining masamok nga mga panahon mao ang pagbali sa atong mga hunahuna ug mga kasingkasing ngadto ni Jesukristo. … Ang hugot nga pagtuo diha sa Dios ug sa Iyang Anak, si Jesukristo, mao gayod ang mahinungdanon alang kanato aron mapabilin ang usa ka balanse nga panglantaw latas sa mga panahon sa pagsulay ug kalisdanan” (“The Joy of Hope Fulfilled,” 32).

Pagpalambo sa Atong Pagtudlo

Sunda ang Espiritu. Dili nimo matag-an kon unsay dagan sa matag leksiyon, apan kon maminaw ka sa mga pag-aghat sa Espiritu, Siya mogiya sa leksyon. Kon andam ikaw maandam sa espirituhanong paagi, ang Ginoo mohatag kanimo “sa diha gay[o]d nga higayon, unsa ang inyong isulti” (Doktrina ug mga Pakigsaad 100:6; tan-awa usab sa Pagtudlo sumala sa Pamaagi sa Manluluwas, 10).