sinulat sa karaang propeta

The Prophet Isaiah Foretells Christ’s Birth [Si Propeta Isaias Nanagna sa Pagkatawo ni Kristo], ni Harry Anderson

Septyembre 5–11

Isaias 1–12

“Ang Dios mao ang Akong Kaluwasan”

Ikonsiderar ang mga paagi sa pag-awhag sa mga sakop sa klase sa pagpaambit og mga impresyon ug salabotan nga ilang nadawat atol sa ilang personal ug pamilya nga pagtuon.

Irekord ang Imong mga Impresyon

pagpaambit nga icon

Dapita ang Pagpaambit

Ang latid karong semanaha sa Dali, Sunod Kanako—Alang sa mga Indibidwal ug mga Pamilya naghatag og mga ideya alang sa pagsabot sa sinulat ni Isaias. Mahimo nimong dapiton ang mga sakop sa klase sa pagpaambit kon sa unsang paagi kining mga ideya, o lain pang mga butang, nakatabang kanila nga makat-on gikan sa Isaias 1–12.

icon sa pagtudlo

Itudlo ang Doktrina

Isaias 1–12

Ang mga pulong ni Isaias ang tanan matuman.

• Sa paghisgot kabahin sa Isaias, ang Manluluwas nagtudlo nga “Ug ang tanan nga mga butang diin siya namulong nahimo kaniadto ug mahimo sa umaab[o]t, gani sumala sa mga pulong nga siya namulong” (3 Nephi 23:3). Tingali imong sugdan og usa ka panaghisgotan mahitungod sa Isaias pinaagi sa pagpaambit niining kasulatan ug sa pamahayag sa “Dugang nga mga Kapanguhaan.” Mahimo na dayon nimong isulat diha sa pisara ang panahon ni Isaias, Ang mortal nga pagpangalagad sa Manluluwas, ug Ang ulahing mga adlaw. Ang mga sakop sa klase mahimong mangita sa mga tudling diha sa Isaias 1–12 nga lagmit magamit sa usa o dugang pa sa mga hugpong sa mga pulong diha sa pisara (pananglitan, Isaias 2:1–5; 7:1–7; 7:10–14; 9:2–7; 10:20; 11:10; 12:1). Nganong usa kini ka panalangin nga adunay mga panagna kanato karon?

Isaias 1; 3; 5

“Hunong na sa pagbuhat og daotan.”

• Mahimo nimong hangyoon ang klase sa pagpaambit unsa ang ilang nakat-onan gikan sa personal ug pamilya nga pagtuon sa Isaias 1, 3, 5 mahitungod sa espirituhanong kahimtang sa Gingharian ni Juda sa mga panahon ni Isaias. Tingali makarebyo sila niining mga kapitulo ug maghimo og usa ka lista sa mga bersikulo ug sa mga kahimtang nga gihulagway niini. Unsa nga mga mensahe sa paglaom ang atong nakit-an niini nga mga kapitulo? (Kon gikinahanglan, mahimo nimong itudlo sa mga sakop sa klase ang Isaias 1:16–20, 25–27; 3:10.) Kon ang karaang Juda adunay usa ka mensahe alang kanato, unsa kaha kini?

• Ang mga sakop sa klase mahimong magpakaaron ingnon nga sila nagpuyo kunohay sa Jerusalem sa dihang si Isaias nanagna. Mahimo nimong interbiyohon ang pipila kanila, pangutana nila unsa ang gisulti ni Isaias ug unsa ang ilang gibati mahitungod niini. Pananglitan, tingali imong hangyoon ang mga sakop sa klase sa paghisgot mahitungod sa mga pulong ni Isaias nga makita sa Isaias 1:16–20; 3:16–26; 5:20–23. Unsa ang gisulti ni Isaias nga nakapadasig kanato sa paghinulsol?

Isaias 2; 4; 11–12

Ang Dios mohimo og talagsaong buhat diha sa ulahing mga adlaw.

• Aron matabangan ang mga sakop sa klase sa pagpamalandong kon sa unsang paagi ang mga panagna ni Isaias mahitungod sa ulahing mga adlaw natuman, makapili ka og pipila ka mga bersikulo gikan sa Isaias 2; 4; 11–12 (sama sa Isaias 2:2–3; 4:5–6). Dayon hangyoa ang mga sakop sa klase sa pagpangita og mga future-tense nga mga berbo niininga mga bersikulo. (sama sa “mahimong [shall be]” o “moadto [shall go]”). Dapita sila sa pagpuli sa pipila niini sa present-tense nga mga berbo (sama sa “gihimo” o “himoon”). Sa unsang paagi kini nga mga panagna gituman diha sa atong mga kinabuhi? Nganong importante ang masayod mahitungod niining mga panagna?

• Mahimo nimong ipasabot nga sa dihang si Moroni mibisita ni Joseph Smith niadtong 1823, siya mikutlo sa Isaias 11 ug miingon nga kini hapit na matuman (tan-awa sa Joseph Smith—Kasaysayan 1:40; tan-awa usab sa Doktrina ug mga Pakigsaad 113:1–6). Ang mga sakop sa klase makabasa og pipila ka mga bersikulo gikan sa Isaias 11 (sama sa mga bersikulo 6–12) ug i-summarize sa ilang kaugalingong mga pulong kon unsa ang napanglantawan ni Isaias. Unsa ang atong tahas sa pagtuman niining mga panagna?

babaye nga naggunit og bata

“Natawo alang kanato ang usa ka bata, gihatag kanato ang usa ka anak nga lalaki” (Isaias 9:6).

Isaias 7–9

Si Isaias nanagna kabahin ni Jesukristo.

• Mahimo nimong pangutan-on ang mga sakop sa klase unsa ang ilang nakat-onan mahitungod ni Jesukristo gikan sa mga tudling sama sa Isaias 7:14; 8:13–14; 9:2, 6–7. Pananglitan, nganong ang Immanuel usa ka maayong titulo sa Manluluwas? (tan-awa sa Mateo 1:23). Sa unsang paagi nga si Jesukristo usa ka “Magtatambag” o “Prinsipe sa Kalinaw” ngari kanato? Ang mga sakop sa klase makapaambit usab sa uban nga mga tudling nga ilang makit-an diha sa Isaias 1–12 nga nagpahinumdom kanila ni Jesukristo. Unsa ang gitudlo niini nga mga bersikulo kanato mahitungod Kaniya?

• Sa dili pa ang klase, mahimo nimong dapiton ang mga sakop sa klase sa pagdala og usa ka hulagway ni Kristo nga sa ilang pamati nagrepresentar sa usa sa paghulagway sa Manluluwas nga makita sa Isaias 7–9. Atol sa klase, hatagi sila og panahon sa pagpakita sa hulagway nga ilang gidala ug mopasabot kon sa unsang paagi kini may kalabotan sa mga pulong ni Isaias.

icon sa dugang nga mga kapanguhaan

Dugang nga mga Kapanguhaan

Ang mga panagna ni Isaias mahimong adunay daghang mga katumanan.

Si Presidente DallinH. Oaks mitudlo: “Ang basahon ni Isaias naglangkob sa daghang mga panagna nga morag dunay daghang mga katumanan. Ang usa ingon og nag-apil sa mga katawhan sa panahon ni Isaias o ang mga kahimtang sa sunod nga henerasyon. Ang lain nga kahulugan, kasagaran may simbolo, ingon og nagpasab[o]t ngadto sa mga panghitabo sa tunga-tunga sa kapanahonan, sa dihang ang Jerusalem gilumpag ug ang mga katawhan niini nagkatibulaag human sa paglansang sa krus sa Anak sa Dios. Lain pa gay[o]d nga kahulugan o katumanan sa samang panagna ingon og kabahin sa mga panghitabo kalab[o]t sa Ikaduhang Pag-anhi sa Manluluwas. Ang kamatuoran nga daghan niining mga panagna dunay nagkadaiyang mga kahulugan nga naghatag og gibug-aton sa kaimportante sa pagtinguha nato og pinadayag gikan sa Espiritu Santo sa pagtabang nato nga mahubad kini” (“Scripture Reading and Revelation,” Ensign, Ene. 1995, 8).

Pagpalambo sa Atong Pagtudlo

Dapita ang Espiritu. “Ang sagrado nga musika, ang mga kasulatan, mga pulong sa mga propeta sa ulahing mga adlaw, mga pagpahayag sa gugma ug pagpamatuod, ug mga panahon sa hil[o]m nga pagpamalandong tanan makadapit sa presensya sa Espiritu” (Pagtudlo sumala sa Pamaagi sa Manluluwas, 10).