Si Jesus nga naglakaw uban sa mga karnero

The Lord Is My Shepherd [Ang Ginoo Mao Ang Akong Magbalantay], ni Yongsung Kim, havenlight.com

Agosto 8–14

Mga Salmo 1–2; 8; 19–33; 40; 46

“Ang Ginoo Mao Ang Akong Magbalantay”

Pagplano og mga paagi aron ang mga sakop sa klase mopaambit og espirituhanong mga kasinatian nga ilang nasinati samtang nagbasa sila sa Mga Salmo.

Irekord ang Imong mga Hunahuna

pagpaambit nga icon

Dapita ang Pagpaambit

Ang pagdapit sa mga sakop sa klase nga mopaambit sa unsay ilang nadiskubrihan diha sa Mga Salmo mahimong ingon lang ka yano sa pagpangutana og sama niini: Unsay gitudlo sa Espiritu kaninyo samtang nagbasa kamo sa Mga Salmo niini nga semana? Hain sa mga salmo ang nakatabang ninyo nga mabati nga labihan ka duol ngadto sa Ginoo?

icon sa pagtudlo

Itudlo ang Doktrina

Mga Salmo 1; 23; 26–28; 46

Ang Mga Salmo nagtudlo kanato nga mosalig sa Ginoo.

• Ang latid [outline] niini nga semana diha sa Dali, Sunod Kanako—Alang sa mga Indibidwal ug mga Pamilya nagsugyot nga basahon ang Mga Salmo 1; 23; 26–28; 46 ug pangitaon ang mosunod:

  • Mga pagdapit nga mosalig sa Ginoo

  • Mga pulong nga naghulagway sa Ginoo

  • Mga pulong nga naghulagway sa kalinaw, kalig-on, ug uban pa nga mga panalangin nga Iyang ihatag

  • Mga pulong nga naghulagway niadtong kinsa misalig Kaniya

  Mahimo nimong isulat kining mga hugpong sa mga pulong diha sa pisara ug dapita ang mga sakop sa klase sa pagsulat og butang, tupad sa matag hugpong sa mga pulong, nga ilang makita diha sa Mga Salmo 1; 23; 26–28; o 46. Kon magkinahanglan sila og tabang, mahimo nimong ipatan-aw kanila kini nga mga bersikulo: Mga Salmo 1:1–4; 23:1–6; 26:1, 6–8, 12; 27:1, 3, 8, 14; 28:1, 7; 46:1–3, 10. Ang mga sakop sa klase mahimong mopaambit sa ilang mga pagbati mahitungod sa Manluluwas samtang nagbasa sila niini nga mga salmo.

• Tungod kay ang Mga Salmo daw sama sa mga himno alang sa mga Israelihanon, mahimo nimong dapiton ang mga sakop sa klase sa pagsugyot og mga himno nga nakapahinumdom kanila sa mga salmo nga ilang gibasa niini nga semana. Mahimo silang motan-aw sa indeks sa “Mga Kasulatan” nga anaa sa katapusan sa hymnbook alang sa mga ideya (tan-awa usab ang lista diha sa “Dugang nga mga Kapanguhaan”). Ang mga sakop sa klase mahimong mokanta og pipila niini nga mga himno ug motino og komon nga mga tema diha sa mga himno ug sa mga salmo. Unsa nga mga mensahe sa kalinaw ug hugot nga pagtuo diha ni Jesukristo ang atong makit-an?

Mga Salmo 2; 22; 31:5

Ang Mga Salmo nagpunting sa atong mga hunahuna ngadto sa kinabuhi ug pangalagad ni Jesukristo.

• Ang pagbasa sa Mga Salmo—ilabi na niadtong nagpunting ngadto sa kinabuhi sa Manluluwas—mahimong usa ka mahinungdanong paagi sa paglig-on sa pagtuo diha ni Jesukristo. Mahimo nimong bahinon ang klase sa mga grupo nga magtinagurha o mas daghan pa ug hatagan ang matag grupo og usa sa mosunod nga mga pares sa mga pakisayran: Salmo 2:1–3 ug Mga Buhat 4:24–28; Salmo 2:7 ug Mga Buhat 13:30–33; Salmo 22:1 ug Mateo 27:45–46; Salmo 22:7–8 ug Mateo 27:39–43; Salmo 22:16 ug Lucas 23:32–33; Salmo 22:18 ug Mateo 27:35; Salmo 31:5 ug Lucas 23:46. Hangyoa ang matag grupo sa pagpangita kon sa unsang paagi nga ang panagna diha sa Mga Salmo natuman sa kinabuhi sa Manluluwas ug sa paghisgot kon sa unsang paagi nga kini nga mga kasulatan nakapalig-on sa ilang pagpamatuod bahin sa Manluluwas.

  O mahimo nimong isulat ang mga pakisayran sa kasulatan diha sa pisara ug dapita ang mga sakop sa klase nga ipares ang usa ka tudling sa Mga Salmo ngadto sa tukma nga panghitabo diha sa Bag-ong Tugon.

  Mahimo usab nimong dapiton ang mga sakop sa klase sa pagpaambit og uban pa nga mga pakisayran bahin sa Manluluwas nga ilang nakita diha sa ilang pagtuon sa Mga Salmo (sama sa Mga Salmo 34:20; 41:9; tan-awa usab sa Lucas 24:44).

  Human sa paghisgot sa mga sakop sa klase niini nga mga kasulatan, mahimo silang mag-istorya mahitungod kon ngano nga kini nga mga salmo mahimong makahuluganon unta ngadto sa mga Judeo nga nakaila sa Manluluwas. Nganong makahuluganon man kini ngari kanato?

Salmo 23

“Ang Ginoo mao ang akong magbalantay.”

• Aron matabangan ang mga sakop sa klase sa paghisgot sa larawan ug simbolo diha sa Salmo 23, ikonsiderar ang pagpakita og mga hulagway nga may kalabutan sa mga ideya diha sa salmo, sama niadtong anaa sa Dali, Sunod Kanako—Alang sa mga Indibidwal ug mga Pamilya. Mahimo dayon nimong hangyuon ang mga sakop sa klase sa pagtino og makahuluganon nga mga pulong o mga hugpong sa mga pulong diha sa salmo ug hisgutan kon unsa kaha ang girepresentar niini. Pananglitan, unsay inyong mahunahunaan sa mga hugpong sa mga pulong nga “gipapahulay sa lunhawng sibsibanan” o “tin-aw nga katubigan”? Unsa kaha ang gisimbolo sa “sungkod” ug “bunal”? Unsa kaha ang gipasabut sa gipaawas mo ang among “kopa”? Unsa ang gitudlo niini nga mga simbolo kanato mahitungod ni Jesukristo? Mahimo nimong isugyot nga ang mga sakop sa klase mopamahayag og usab sa salmo, nga pulihan ang pipila ka simbolo sa posible nga mga kahulugan nga gihisgutan sa klase.

icon sa dugang nga mga kapanguhaan

Dugang nga mga Kapanguhaan

Mga Himno nga may kalabutan sa Mga Salmo.

• Mga Salmo 8:3–9; 9:1–2. “Gamhanan Ka” (Mga Himno, nu. 45)

• Salmo 23. “Ang Dios ang Akong Magbalantay,” “Ginoo Nako Moandam” (Mga Himno, mga nu. 61, 62)

• Mga Salmo 23:6; 150. “Daygon ang Dios, nga Gamhanan” (Mga Himno, nu. 39)

• Salmo 27:1. “Ang Dios Kahayag Ko” (Mga Himno, nu. 46)

• Mga Salmo 33:1–6; 95:1–6. “Sa Katahum sa Yuta” (Mga Himno, nu. 47)

• Salmo 37:3–9. “Akong Kalag, Magmalinawon” (Mga Himno, nu. 70)

• Salmo 148. “Tanan nga Nilalang sa Atong Dios” (Mga Himno, nu. 31)

Pagpalambo sa Atong Pagtudlo

Paggamit og musika. “Ang mga himno modapit sa Espiritu sa Ginoo, momugna og usa ka matinahuron nga pagbati, mohiusa kanato isip mga miyembro, ug mohatag nato og paagi sa paghalad og mga pagdayeg ngadto sa Ginoo. … Ang mga himno modala kanato ngadto sa paghinulsol ug maayong mga buhat, molig-on sa pagpamatuod ug sa pagtuo, mohupay sa nanagluya, mohupay sa nagmasulub-on, ug modasig kanato sa paglahutay hangtud sa katapusan” (Mga Himno, ix).