Si Jesus nga naggunit og suga

Saving That Which Was Lost [Pagluwas Nianang Nawala], ni Michael T. Malm

Agosto 15–21

Mga Salmo 49–51; 61–66; 69–72; 77–78; 85–86

“Suginlan Ko Kamo sa Iyang Gibuhat alang Kanako”

Ikonsiderar ang tambag ni Elder David A. Bednar samtang nangandam ka sa pagtudlo: “Ang pag-istorya ug pagsulti lang wala magtudlo. [Ang pagtudlo] sa ebanghelyo sa pamaagi sa Ginoo naglakip sa pag-obserbar ug pagpaminaw ug pag-ila isip kinahanglanon sa pagpakig-istorya” (“Pagkahimong Misyonaryo sa Isangyaw ang Akong Ebanghelyo,” Liahona, Okt. 2013, 50).

Irekord ang Imong mga Hunahuna

pagpaambit nga icon

Dapita ang Pagpaambit

Usa ka paagi sa pagdapit sa mga sakop sa klase nga mopaambit og butang nga ilang nabasa niini nga semana mao ang pagsulat diha sa pisara og “Ang akong mga ngabil magahugyaw sa kalipay” o “Ang dila ko usab magasulti sa imong pagkamatarung” (Salmo 71:23, 24). Ang mga sakop sa klase mahimong mopaambit sa unsay ilang nakit-an nga makatabang nila nga “magahugyaw sa kalipay” o “magasulti sa pagkamatarung [sa Ginoo].”

icon sa pagtudlo

Itudlo ang Doktrina

Mga Salmo 51; 85–86

“Kay Ikaw, O Ginoo, maayo man, ug andam sa pagpasaylo.”

• Ang Salmo 51 naghulagway sa mga pagbati sa kadaghanan kanato samtang nagtinguha kita nga maghinulsol ug mapasaylo. Aron matabangan ang mga sakop sa klase nga mas makasabut sa paghinulsol ug mobati nga nadasig nga maghinulsol kanunay, mahimo nimong isugyot nga mosiksik sila sa Salmo 51 nga maghunahuna niini nga pangutana: Unsay gipasabut sa maghinulsol? Dayon tuguti sila nga mopaambit sa posible nga mga tubag. (Ang “Dugang nga mga Kapanguhaan” naglangkob og makatabang nga mga ideya.) Ngano nga ang paghinulsol usahay daw dili man tilinguhaon? Unsay atong makita niini nga salmo nga makahimo sa paghinulsol nga makapalipay?

• Unsaon nato sa paghulagway kon unsa kaha ang bation kon makadawat og kapasayloan sa sala pinaagi sa maulaon nga gahum ni Jesukristo? Dapita ang mga sakop sa klase sa pagpaambit sa ilang mga hunahuna, ug awhaga sila sa pagpangita sa mga tudling diha sa Mga Salmo 51; 85–86 nga naghulagway sa epekto sa Iyang makalimpyo nga pagpasaylo diha sa atong kinabuhi (pananglitan, tan-awa sa Mga Salmo 51:1–2, 7–12; 85:2–9). Ikonsiderar ang pagpakita og mga hulagway o mga butang sa pagtabang sa mga sakop sa klase nga makahanduraw [visualize] niining mga hugpong sa mga pulong. Dayon ang mga sakop sa klase mahimong mopaambit sa ilang mga pagbati mahitungod sa Manluluwas nga si Jesukristo ug sa Iyang kaandam sa pag-ula alang sa atong mga sala aron kita mahimong mapasaylo. Mahimo usab ninyong kantahon og dungan ang usa ka himno mahitungod sa maulaon nga sakripisyo sa Manluluwas, sama sa “Ako Nagpabilin nga Natingala” (Mga Himno, nu. 114).

• Aron makahinulsol, nagkinahanglan kita og hugot nga pagtuo dili lamang nga si Jesukristo makahimo sa paglimpyo kanato kon dili Siya usab buot nga molimpyo kanato. Ang mga sakop sa klase mahimong nakakita og mga tudling diha sa Mga Salmo 51; 85–86 niini nga semana nga nakapalig-on sa ilang pagtuo sa kaandam sa Ginoo nga mopasaylo. Awhaga sila nga mopaambit sa unsay ilang nakit-an. Mahimo usab nimong ipatan-aw nila sa Salmo 86:5, 13, 15 ug ipangutana kon unsay gitudlo niini nga mga bersikulo mahitungod sa Ginoo. Unsa kaha ang gipasabut nga Siya “kanunayng mahigugmaon ug matinud-anon”? (bersikulo 15). Nganong importante man alang kanato nga masayud niini?

Salmo 66:5–20

Ang atong pagpamatuod bahin ni Jesukristo makatabang sa uban nga moduol ngadto Kaniya.

• Usa sa mahinungdanong mga panalangin sa pagpundok diha sa Sunday School mao ang oportunidad nga makabaton og kalig-on gikan sa hugot nga pagtuo ug mga pagpamatuod sa uban nga mga sumusunod ni Jesukristo. Aron mahatag kini nga oportunidad alang sa imong klase, mahimo nimong hangyuon ang mga sakop sa pagbasa sa Salmo 66:16 ug sa pagpamalandong niini nga pangutana: Kon kamo ang “[mosugilon] sa gibuhat [sa Ginoo] alang [kaninyo],” unsa man kaha ang inyong isugilon? Samtang mamalandong sila, mahimo nilang basahon ang mga bersikulo 5–20 alang sa mga ideya. Ipasulat nila ang ilang mga tubag. Dayon dapita sila nga “mosugilon” sa usag usa—diha sa gagmay nga mga grupo o ngadto sa tibuok klase—kon unsay nahimo ni Jesukristo alang sa ilang mga kalag.

  duha ka batan-ong lalaki nga nag-istoryahanay

  Makapaambit kita sa uban sa atong mga pagpamatuod bahin sa unsay nahimo sa Ginoo alang kanato.

icon sa dugang nga mga kapanguhaan

Dugang nga mga Kapanguhaan

Ang paghinulsol nagpasabut og kausaban.

Si Presidente Russell M. Nelson mihulagway sa paghinulsol niining paagiha:

“Kon si Jesus moingon kaninyo ug kanako sa ‘paghinulsol,’ Siya nagdapit kanato sa pag-usab sa atong hunahuna, sa atong kahibalo, sa atong espiritu––bisan sa paagi sa atong pagginhawa. Siya nagsugo kanato sa pag-usab sa atong pamaagi sa paghigugma, paghunahuna, pagserbisyo, paggahin sa atong oras, pagtagad sa atong asawa, pagtudlo sa atong mga anak, ug gani sa pag-atiman sa atong mga lawas.

“Walay laing mas makapagawasnon, mas makapahamili, o mas importante sa atong kaugalingong paglambo kay sa usa ka kanunay, matag-adlaw nga paghatag og gibug-aton sa paghinulsol. Ang paghinulsol dili usa ka panghitabo; usa kini ka proseso. Mao kini ang yawe ngadto sa kalipay ug kalinaw sa hunahuna. Kon inubanan sa hugot nga pagtuo, ang paghinulsol moabli sa atong agianan ngadto sa gahum sa Pag-ula ni Jesukristo. …

“Kon kita mopili nga maghinulsol, kita mopili nga mag-usab! Atong gitugutan ang Manluluwas nga mousab kanato ngadto sa labing maayo nga bersyon sa atong mga kaugalingon. Kita mopili nga molambo sa espirituhanon nga paagi ug makadawat sa hingpit nga kalipay––ang hingpit nga kalipay sa katubsanan diha Kaniya. Kon kita mopili nga maghinulsol, kita mopili nga mas mahisama ni Jesukristo!” (“Kita Makabuhat og Mas Maayo pa ug Mahimong mas Maayo,” Liahona, Mayo 2019, 67).

Pagpalambo sa Atong Pagtudlo

Pangutana og mga pangutana nga makapatandog sa kasingkasing ug sa hunahuna. “Hangyoa ang mga tigkat-on nga mopakigbahin sa unsay ilang gibati kabahin sa usa ka tudling sa kasulatan, kon unsa kaha ang gibati sa mga tawo diha sa mga kasulatan, o sa unsang paagi ang mga kamatuoran diha sa tudling adunay kalabutan sa atong kinabuhi” (Pagtudlo sumala sa Pamaagi sa Manluluwas, 31).