Love One Another [Maghigugmaay sa Usag Usa], ni Emma Donaldson Taylor

Enero 24–30

Moises 7

“Ang Ginoo Mitawag sa Iyang mga Katawhan og Zion”

Samtang magtuon ka sa Moises 7, hunahunaa ang mga tawo nga imong tudloan ug sa unsang paagi ka makatabang kanila nga makasabut kon unsay gitudlo niining kapitulo mahitungod sa Zion ug sa uban pang mga baruganan sa ebanghelyo.

Irekord ang Imong mga Impresyon

Dapita ang Pagpaambit

Usahay usa ka yano nga pangutana ug pipila ka minutos nga pagpamalandong igo na aron sa pagtabang sa mga tawo nga mopaambit sa unsay ilang nakat-unan diha sa panimalay. Tingali mahimo nimong hatagan ang mga sakop sa klase og gamay nga panahon sa pagribyu sa Moises 7, sa pagpangita og bersikulo nga makapabati nila nga mapasalamaton alang sa mga kamatuoran nga gipahiuli diha sa basahon ni Moises, ug dayon sa pagpaambit niini.

Itudlo ang Doktrina

Moises 7:16–21, 27, 53, 62–69

Makatukod kita og Zion sa atong panahon.

• Unsa ang labing maayo nga paagi sa pagpaila sa konsepto sa Zion diha sa imong klase? Usa ka ideya mao ang pagkontak sa mga sakop sa klase atol sa semana sa wala pa ang klase ug sa pagdapit kanila nga magdala og usa ka butang gikan sa panimalay nga ilang gibati nga nagrepresentar sa mga kinaiya sa katawhan sa Zion, sigun sa gihulagway diha sa Moises 7:18. Samtang maghisgot kamo og dungan niini nga bersikulo, ang mga sakop sa klase mahimong mopasabut sa kamahinungdanon sa butang nga ilang gidala.

  

  Kinahanglan kitang maningkamot nga mahimong “usa sa kasingkasing ug usa sa hunahuna” (Moises 7:18).

• Ikonsiderar ang paghangyo sa mga sakop sa klase sa paghunahuna mahitungod sa mga panahon sa dihang mibati sila og panaghiusa sa sulod sa ilang mga pamilya o samtang nagserbisyo kuyog sa uban diha sa Simbahan o sa komunidad. Unsay gibuhat sa mga tawo aron makamugna og panaghiusa niini nga mga sitwasyon? Unsay atong makat-unan mahitungod sa Zion ug panaghiusa gikan sa Moises 7? (tan-awa ilabi na ang mga bersikulo 16–21, 27, 53, 62–69). Ania ang pipila ka lain pa nga mga kasulatan nga mahimong makatabang: Mga Taga-Filipos 2:1–4; 4 Nephi 1:15–18; Doktrina ug mga Pakigsaad 97:21; 105:5.

Moises 7:28–44

Ang Dios nagbakho alang sa Iyang mga anak.

• Ang ubang mga tawo mahimong naghunahuna sa Dios isip anaa sa layo, dili maduol, ug gani wala magpakabana. Unsaon nimo sa paggamit ang panan-awon ni Enoch aron sa pagtabang sa imong klase nga makasabut nga ang Dios nalambigit sa atong kinabuhi ug nagpakabana kanato? Mahimo nimong dapiton ang mga sakop sa klase nga mobasa sa Moises 7:28–44 ug mohimo og usa ka lista sa pipila ka rason nga ang Dios nagbakho. Unsa ang gitudlo kaninyo niini nga mga bersikulo kon unsay gibati sa Dios mahitungod sa Iyang mga anak? Ang pamahayag diha sa “Dugang nga mga Kapanguhaan” mahimong makatampo niini nga panaghisgutan.

• Ang outline niini nga semana diha sa Dali, Sunod Kanako—Alang sa mga Indibidwal ug mga Pamilya nagsugyot nga pamalandungan kon unsay gitudlo sa Moises 7:28–31, 35 mahitungod sa Dios. Kadtong nagbuhat niini sa panimalay mahimong andam nga mopaambit sa ilang mga hunahuna diha sa klase. O mahimo nimong dapiton ang mga sakop sa klase sa pagpamalandong niini nga mga bersikulo ug sa paghisgot niini diha sa klase.

Moises 7:59–67

Ang Ginoo moanhi pag-usab sa katapusang mga adlaw.

• Unsaon nimo sa pagtabang ang mga sakop sa imong klase nga makadiskubre kon unsay gitudlo sa Moises 7:59–67 mahitungod sa Ikaduhang Pag-anhi sa Manluluwas? Siguro mahimo nimong ilista ang duha o tulo ka kamatuoran o mga panghitabo gikan niini nga mga bersikulo diha sa pisara ug hangyoa ang mga sakop sa klase sa pagpangita sa mga bersikulo ug idugang ngadto sa lista. Nganong usa man kini ka panalangin nga makabaton og rekord sa panan-awon ni Enoch—usa sa nag-unang mga panagna bahin sa Ikaduhang Pag-anhi?

Dugang nga mga Kapanguhaan

Ang Dios nagbakho alang sa Iyang mga anak.

Si Elder Jeffrey R. Holland mitudlo:

“Didto taliwala sa dakong panan-awon sa katawhan diin ang langit nakita niyang naabli, si Enoch, nga nag-obserbar sa mga panalangin ug mga hagit sa pagkamortal, milingi ngadto sa Amahan ug dili makatuo nga nakakita Kaniya nga naghilak. Siya natingala nga miingon ngadto niining pinakagamhanan nga Nilalang sa kalibutan: ‘Sa unsa nga paagi nga ikaw makabakho?’ …

“Naglantaw sa mga panghitabo sa hapit kada kapanahonan, ang Dios mitubag: ‘Tan-awa kining imong mga kaigsoonan; sila ang talagsaong mga binuhat sa akong kaugalingong mga kamot. … Ako mihatag ngadto kanila … og [usa] ka sugo, nga sila kinahanglan maghigugmaay sa usag usa, ug nga sila kinahanglan nga mopili kanako, nga ilang Amahan; apan tan-awa, sila mga walay balatian ug sila nasilag sa ilang kaugalingong dugo. … Busa dili ba mobakho ang mga langit, nagtan-aw niini nga mag-antus?’ [Moises 7:29–33, 37].

“Kanang usa, makatandog nga talan-awon nakahatag og labaw pa sa pagtudlo kanato sa tinuod nga kinaiya sa Dios kay sa mahatag sa bisan unsang sinulat mahitungod sa relihiyon. … Unsa ka dili malimtan nga hitsura sa pakiglambigit sa Dios sa atong kinabuhi! Unsa nga kaguol sa usa ka ginikanan kon ang Iyang mga anak wala mopili Kaniya ni ‘sa ebanghelyo sa Dios’ nga Iyang gipadala! [Mga Taga- Roma 1:1]. Unsa ka sayon sa paghigugma sa usa ka tawo kinsa tinagsa-tagsang naghigugma kanato!” (“Ang Kahalangdon sa Dios,” Liahona, Nob. 2003, 71–72).

Pagpalambo sa Atong Pagtudlo

Awhaga ang mga sakop sa klase sa pagtuon sa mga kasulatan diha sa panimalay. Usa ka paagi nga maawhag nimo ang pagtuon sa kasulatan diha sa panimalay mao ang paghatag og panahon aron mapaambit sa mga sakop sa klase ang mga nadiskubrihan ug mga ideya gikan sa ilang personal ug pamilya nga pagtuon sa kasulatan. (Tan-awa sa Pagtudlo sumala sa Pamaagi sa Manluluwas, 29.)