Better than Paradise [Mas Maayo pa kay sa Paraiso], ni Kendal Ray Johnson

Enero 17–23

Genesis 5; Moises 6

“Pagtudlo Niini nga mga Butang sa Gawasnon nga Paagi ngadto sa Imong mga Anak”

Sa dili pa ka magbasa og bisan unsa nga dugang nga mga materyal, basaha ug pamalandungi ang Genesis 5 ug Moises 6, ug irekord ang imong espirituhanon nga mga impresyon. Ang Dali, Sunod Kanako—Alang sa mga Indibidwal ug mga Pamilya ug kini nga outline makahatag kanimo og mga ideya kon unsaon sa pagtabang niadtong imong gitudloan sa pagdiskubre og mga kamatuoran nga mahinungdanon ngadto kanila.

Irekord ang Imong mga Impresyon

Dapita ang Pagpaambit

Unsaon nimo sa pag-awhag ang mga sakop sa klase sa pagpaambit og mga ideya ug mga kasinatian nga sila aduna samtang nagtuon sila sa Genesis 5 ug Moises 6? Mahimo nimong isulat ang mga ngalan nga Adan ug Enoch diha sa pisara ug dapita ang mga sakop sa klase sa pagsulat og butang nga gibuhat o gitudlo sa usa niining mga propeta nga makahuluganon ngadto kanila.

Itudlo ang Doktrina

Moises 6:26–39

Gitawag kita sa Ginoo aron sa paghimo sa Iyang buhat bisan pa man sa atong mga kakulangan.

• Adunay dakong kahigayunan nga usa ka tawo diha sa imong klase ang mibati—o padayong mibati—og kakulangan mahitungod sa usa ka responsibilidad diha sa panimalay o sa simbahan. Aron maugmad ang hugot nga pagtuo sa mga sakop sa klase nga ang Ginoo makatabang kanila, mahimo nimo silang dapiton sa pagbasa sa kasinatian ni Enoch nga makita diha sa Moises 6:26–39. Giunsa sa Dios sa pagtabang ni Enoch aron mahimo ang Iyang buhat bisan pa man sa mga kahadlok ni Enoch? Hangyoa ang mga sakop sa klase sa paghunahuna mahitungod sa uban pang mga ehemplo sa mga tawo kinsa nakabuntog sa ilang mga kahuyang ug nakatuman sa buhat sa Ginoo, gikan man kini sa mga kasulatan o sa ilang kaugalingong kinabuhi. Unsa nga mga ehemplo ang atong mapaambit? (tan-awa usab sa Exodo 4:10–16; Jeremias 1:4–10; 2 Nephi 33:1–4; Ether 12:23–29).

• Daghang apostoles ug mga propeta sa modernong panahon ang mipahayag og mga kabalaka nga susama kang Enoch sa dihang ilang gihulagway kon unsay ilang gibati sa dihang nadawat nila ang ilang mga tawag. Ang ilang mga kasinatian mahimong makapalambo sa panabut sa mga sakop sa klase sa Moises 6:26–39. Ikonsiderar ang pagribyu sa usa ka pakigpulong sa bag-o lang gitawag nga sakop sa Korum sa Napulog Duha (sama pananglit, tan-awa ang mga pagpamatuod nila ni Elder Ronald A. Rasband, Elder Gary E. Stevenson, ug Elder Dale G. Renlund [Liahona, Nob. 2015, 89–94]). Ipaambit sa mga sakop sa klase kon unsay nakahatag nila og impresyon mahitungod niining mga ehemplo. Unsa ang atong makat-unan gikan niining mga lider mahitungod sa atong kaugalingong mga pagbati og kakulangan? Ang pamahayag ni Presidente Thomas S. Monson diha sa “Dugang nga mga Kapanguhaan” mahimong makatabang usab isip kabahin niining panaghisgutan.

Moises 6:48–65

Ang hugot nga pagtuo, paghinulsol, bunyag, ug pagdawat sa Espiritu Santo makaandam kanato aron sa pagbalik ngadto sa Dios.

• Ang outline niini nga semana diha sa Dali, Sunod Kanako—Alang sa mga Indibidwal ug mga Pamilya nagsugyot sa pagbasa sa Moises 6:48–62 aron makit-an kon unsay kinahanglan gayud nga masayran ug buhaton sa matag usa kanato aron matubos. Tingali ang mga sakop sa klase mahimong mopaambit og bisan unsa nga mga ideya nga nagagikan niana nga pagtuon diha sa ilang mga panimalay. O mahimo ninyong hisgutan og dungan ang Moises 6:48–62 diha sa klase. Unsaon nato sa pagtubag ang usa ka tawo nga mangutana kon nganong ang hugot nga pagtuo, paghinulsol, bunyag, ug pagdawat sa Espiritu Santo gikinahanglan? Giunsa pagtubag sa Ginoo kining pangutana diha sa mga bersikulo 53–65, ug unsay atong makat-unan gikan sa Iyang tubag?

  

  Ang mga ginikanan kinahanglan nga motudlo sa ebanghelyo ngadto sa ilang mga anak.

Moises 6:51–63

“Pagtudlo niini nga mga butang sa gawasnon nga paagi ngadto sa imong mga anak.”

• Diha sa Moises 6:51–63 atong makat-unan ang mga kamatuoran sa ebanghelyo nga gitudlo sa Ginoo ngadto ni Adan ug gihangyo niya nga itudlo sa umaabut nga mga henerasyon. Tingali ang mga sakop sa klase makahimo og usa ka lista niining mga kamatuoran pinaagi sa pagtuon sa mas gagmay nga mga grupo sa mga bersikulo, sama sa mga bersikulo 51–52, 53–57, 58–60, 61–63. Nganong bililhon man kini nga mga kamatuoran sa bag-o nga henerasyon karon? Unsay gusto nimong masayran sa mga batan-on mahitungod sa Manluluwas gikan niiini nga mga bersikulo? Ang mga sakop sa klase mahimong andam nga mopaambit og mga ideya o mga kasinatian aron sa pagtabang sa usag usa sa pagtudlo niining mga kamatuoran sa mas epektibong paagi ngadto sa mga bata ug mga batan-on. Unsa pa man ang atong makat-unan gikan sa mga instruksyon sa Ginoo ngadto sa mga ginikanan diha sa Mosiah 4:14–15 ug sa Doktrina ug mga Pakigsaad 68:25–28; 93:40–50?

• Kon nagtudlo ka sa mga batan-on, mahimo nimo silang dapiton sa pagpaambit kon unsaon nila sa pagsuporta ang ilang mga ginikanan sa ilang mga paningkamot sa pagtudlo sa ebanghelyo diha sa panimalay.

Dugang nga mga Kapanguhaan

“Kon kinsa ang tawagon sa Ginoo, ang Ginoo mohimo kaniyang sarang.”

Si Presidente Thomas S. Monson nagtudlo: “Pipila kaninyo tingali may kinaiya nga maulawon o naghunahuna nga ang inyong kaugalingon may kakulangan sa pagbuhat sa usa ka calling. Hinumdumi nga kini nga buhat dili lamang inyo ug ako. Buhat kini sa Ginoo, ug kon kita anaa sa buluhaton sa Ginoo, may katungod kita sa panabang sa Ginoo. Hinumdumi nga kon si kinsa ang tawagon sa Ginoo, ang Ginoo mohimo kaniyang sarang” (“Duty Calls,” Ensign, Mayo 1996, 44).

Pagpalambo sa Atong Pagtudlo

“Ang Espiritu Santo mao ang magtutudlo. Ang imong tahas isip magtutudlo importante, apan hinumdumi nga ang Espiritu Santo mao ang tinuod nga magtutudlo. Tabangi ang mga sakop sa klase nga makakat-on gikan sa Espiritu ug mopaambit sa usag usa sa unsay ilang nakat-unan.