Disyembre 27–Enero 2

Moises 1; Abraham 3

“Mao Kini ang Akong Buhat ug ang Akong Himaya”

Samtang magbasa ka sa Moises 1 ug Abraham 3, ipabiling bukas ang imong hunahuna ug kasingkasing sa mga impresyon gikan sa Espiritu. Modasig Siya kanimo pinaagi sa mga hunahuna ug mga ideya nga makatabang kanimo sa pagpangandam sa pagtudlo.

Irekord ang Imong mga Impresyon

Dapita ang Pagpaambit

Ang mga sakop sa imong klase tingali adunay talagsaong mga kasinatian sa pagbasa sa Moises 1 ug Abraham 3 diha sa panimalay. Unsaon nimo sa paghatag ang mga sakop sa klase og mga oportunidad sa pagpaambit nianang mga kasinatian? Mahimo kining sama ka yano sa pagpangutana og pareho niini: Unsay nakahatag ninyo og impresyon samtang nagbasa kamo sa mga kasulatan niini nga semana? Unsay nakapasurprisa ninyo? Unsay nakapahunong ug nakapahunahuna ninyo? Unsay nakapatabang ninyo nga mobati nga mas duol ngadto sa inyong Langitnong Amahan ug ni Jesukristo?

Itudlo ang Doktrina

Moises 1:1–10, 37–39; Abraham 3:22–26

Isip mga anak sa Dios, kita adunay balaanong padulngan.

• Ang mga kamatuoran nga gipadayag diha sa mga panan-awon nila ni Moises ug Abraham makahatag og gamhanang impluwensya sa atong mga pagpili ug sa atong abilidad sa pagbuntog sa mga hagit sa kinabuhi. Unsaon nimo sa pagtabang ang mga sakop sa imong klase nga makadiskubre niining mga kamatuoran diha sa Moises 1 ug Abraham 3? Usa ka ideya mao ang pagbahin sa klase ngadto sa mga grupo ug pagsangon sa matag grupo og usa sa mosunod nga mga tudling: Moises 1:1–10; Moises 1:37–39; Abraham 3:22–26. Ang matag grupo mahimong makapangita og mga tubag sa mga pangutana sama sa “Kinsa man ko?” “Nganong ania man ako dinhi?” ug “Kinsa man ang gusto sa Dios nga ako mahimo?” Human sa igo nga panahon, ang mga grupo mahimo dayon nga mopaambit sa ilang mga tubag. Sa unsang paagi nga kining mga tubag makaimpluwensya sa atong inadlaw-adlaw nga mga lihok?

  

  Christ and the Creation [Si Kristo ug ang Paglalang], ni Robert T. Barrett

Moises 1:12–23

Makabatok kita sa impluwensya ni Satanas.

• Ang komprontasyon ni Moises kang Satanas, nga makita diha sa Moises 1:12–23, naghatag og mga leksyon nga makatabang sa mga sakop sa imong klase samtang mag-atubang sila og tintasyon o pagpanglingla gikan sa kaaway. Unsay atong makat-unan gikan sa tubag ni Moises? Tingali mahimong makahuluganon kini kon ang mga sakop sa klase mipaambit og mga ideya ug pag-awhag aron sa pagtabang sa usag usa nga makabantay ug makabatok sa mga paningkamot ni Satanas.

• Usa ka leksyon gikan sa kasinatian ni Moises mao nga si Satanas motintal kanato pinaagi sa peke nga mga bersyon [counterfeit] sa kamatuoran ug gahum sa Dios. Aron matabangan ang mga sakop sa klase nga ma-visualize kini, mahimong magdala ka sa klase og pipila ka butang nga peke nga mga bersyon sa ubang mga butang, sama sa usa ka artipisyal nga tanom o bata nga monyeka. Unsaon nato pagkahibalo nga mga peke kini? Unsa kaha ang pipila ka peke nga mga bersyon nga gigamit karon ni Satanas aron sa pagtintal kanato? Unsaon man nato sa pag-ila ug pagsalikway niini? (Aron mahibaloan kon giunsa kini paghimo ni Moises, tan-awa ang Moises 1:13–18.) Sa unsang paagi nga ang Ginoo mitabang kanato sa atong mga paningkamot? (tan-awa ang Moises 1:24–26).

Abraham 3:22–28

Kini nga kinabuhi mao ang atong oportunidad sa pagpakita nga mobuhat kita sa unsay isugo sa Dios.

• Unsaon nimo sa pagtabang ang mga sakop sa klase nga makita nila ang ilang kinabuhi isip usa ka oportunidad sa pagmatuod sa ilang pagkamatinud-anon sa mga sugo sa Dios? Mahimo nimong sugdan pinaagi sa paghangyo kanila nga maghisgot mahitungod sa kasinatian sa dihang kinahanglan silang mopakita og kabatid sa usa ka kahanas—sama pananglit, diha sa eskwelahan, sa trabahoan, o sa usa ka team sa athletic. Mahimo silang maghisgot kon unsay gikinahanglan nilang buhaton aron mapamatud-an ang ilang kaugalingon. Sa unsang paagi nga kining mga kasinatian susama sa unsay gihulagway diha sa Abraham 3:24–26? Sa unsang paagi kini managlahi? Unsaon nato sa pag-apil ang Langitnong Amahan ug ang Manluluwas diha sa atong mga paningkamot nga “mosulay” sa atong kaugalingon? (Abraham 3:25). Sa unsang paagi nga ang pagkasayud nga kita ania dinhi aron mosulay sa atong kaugalingon nga magmasulundon makaapekto sa paagi sa atong pagtubag sa mga hagit sa kinabuhi?

• Unsa pa man ang atong makat-unan gikan sa Abraham 3:22–28 mahitungod sa premortal nga kinabuhi, o ang atong “kinabuhi sa wala pa dinhi sa yuta”? (bersikulo 26). Nganong kini nga mga kamatuoran bililhon ngari ngari kanato?

Dugang nga mga Kapanguhaan

Ayaw pagduha-duha sa unsay gipadayag nganha kaninyo.

Si Elder Jeffrey R. Holland nagtudlo niini mahitungod sa kasinatian ni Moises diha sa Moises 1: “Ang mensahe ni Moises kaninyo karon mao kini: Ayaw ipaubos ang inyong panagang. Ayaw paghunahuna nga ang talagsaong pagpadayag, ang pipila kahibulongan, makapalamdag nga gutlo, ang pag-abli sa dinasig nga agianan, mao na ang katapusan niini. … Sa higayon nga adunay paglamdag, pagbantay sa tintasyon nga mosibug gikan sa usa ka maayo nga butang. Kon sakto kadto sa dihang nag-ampo kamo mahitungod niini ug misalig niini ug nagpakabuhi alang niini, sakto kini karon. Ayaw paghunong kon ang gibug-aton mosamut. Siguroa nga dili kamo motugyan nianang binuhat nga nagtinguha sa pagguba sa inyong kalipay. Atubanga ang inyong mga pagduha-duha. Kontrolaha ang inyong mga kahadlok. ‘Ayaw ninyo pagwad-a ang inyong pagsalig’ [Mga Hebreohanon 10:35]. Pagpabilin sa dalan ug sud-onga ang katahum sa kinabuhi nga mobukhad alang kaninyo” (“Cast Not Away Therefore Your Confidence,” Ensign, Mar. 2000, 7, 9).

Pagpalambo sa Atong Pagtudlo

Tabangi ang mga tigkat-on nga makadiskubre sa mga kamatuoran diha sa mga kasulatan. Sa dili pa modapit sa mga sakop sa klase sa pagbasa og usa ka tudling sa kasulatan, mahimo nimo silang hatagan og piho nga butang nga ilang pangitaon o ikonsiderar. Sama pananglit, mahimo silang mangita og butang nga ilang nakat-unan mahitungod sa Manluluwas o usa ka butang nga gusto nilang ipaambit sa usa ka sakop sa pamilya. (Tan-awa sa Pagtudlo sumala sa Pamaagi sa Manluluwas, 21.)