Enero 3–9

Genesis 1–2; Moises 2–3; Abraham 4–5

“Sa Sinugdan Gibuhat sa Dios ang Langit ug Yuta”

Aron makapangandam sa pagtudlo, basaha ug pamalandunga una ang Genesis 1–2; Moises 2–3; ug Abraham 4–5, ug irekord ang imong espirituhanon nga mga impresyon. Ang Dali, Sunod Kanako—Alang sa mga Indibidwal ug mga Pamilya ug ang mga ideya sa ubos makatabang kanimo nga makasabut ug makatudlo sa doktrina niini nga mga kapitulo.

Irekord ang Imong mga Impresyon

Dapita ang Pagpaambit

Ang Dios subli nga namahayag nga ang mga butang nga Iyang gihimo atol sa Paglalang “maayo” (tan-awa sa Moises 2:4, 10, 12, 18, 21, 25, 31). Dapita ang mga sakop sa klase sa pagpaambit og maayo nga mga butang nga ilang nakita samtang nagbasa sila sa mga kasulatan diha sa panimalay niini nga semana. Unsa ang maayo mahitungod sa mga butang nga ilang nadiskubrihan?

Itudlo ang Doktrina

Genesis 1; Moises 2; Abraham 4

“Gibuhat sa Dios ang langit ug yuta.”

• Ang mga sakop sa klase mahimong nakabantay og mga pagkasusama ug mga kalainan sa mga asoy bahin sa Paglalang diha sa mga basahon sa Genesis, Moises, ug Abraham. Awhaga ang mga sakop sa klase sa pagpaambit kon unsay nadugang sa hubad ni Joseph Smith diha sa Moises 2 sa atong panabut bahin sa asoy sa Paglalang diha sa Genesis 1. Unsay dugang nga mga ideya ang atong nabatunan gikan sa Abraham 4? Aron matugutan nga mas daghang tawo ang makapaambit, mahimo nimong awhagon ang klase sa paghimo niining pagtandi nga magpares o sa ginagmay nga mga grupo. (Ang uban niining mga bersikulo nga adunay importante nga mga kalainan anaa sa “Dugang nga mga Kapanguhaan.”) Unsay atong makuha nga kaayohan gikan sa daghang asoy? Unsa may gisugyot niining mga asoy mahitungod sa unsay gusto sa Dios nga atong mahibaloan mahitungod sa Paglalang?

• Sa dihang gilalang sa Dios si Adan ug si Eva, gihatagan Niya sila og kamandoan ibabaw sa yuta ug sa uban pa Niyang mga gilalang diha niini (tan-awa sa Genesis 1:28; Moises 2:28; Abraham 4:28). Sa unsang paagi nga ang Doktrina ug mga Pakigsaad 59:16–21 ug 104:13–18 makatabang kanato nga mas makasabut kon unsay kahulugan sa paggamit og matarung nga kamandoan ibabaw sa yuta?

• Pipila ka adlaw sa wala pa ang klase, mahimo nimong dapiton ang mga sakop sa klase nga magdala og mga litrato nga ilang nakuha o anaa sa ilang mga panimalay nga nagpahinumdom nila bahin sa katahum sa mga gilalang sa Dios. Sa unsang paagi nga ang pagkahibalo mahitungod sa mamugnaong buhat sa Ginoo makaapekto sa atong mga pagbati mahitungod Kaniya, sa atong kaugalingon, ug sa kalibutan? Ang mga sakop sa klase mahimo usab nga mopaambit kon unsa nga mga mensahe ang ilang gibati nga giandam sa Dios alang kanato niining mga asoy bahin sa Paglalang diha sa Genesis 1; Moises 2; ug Abraham 4. Ang pagkanta o pagpaminaw sa usa ka awit mahitungod sa Paglalang, sama sa “Sa Katahum sa Yuta” (Mga Himno, nu. 47) makatabang sa mga sakop sa klase nga mobati og pagpasalamat alang sa mga gilalang sa Dios.

  

  Creation [Paglalang], ni Joan Hibbert Durtschi

Genesis 1:26–28; Moises 2:26–28; Abraham 4:26–28

Gilalang kita diha sa panagway sa Dios.

• Nganong importante man alang kanato nga makasabut nga gilalang kita diha sa panagway sa Dios? Unsaon nimo sa pagtabang ang mga sakop sa klase nga makapamalandong niini nga kamatuoran? Mahimo nilang mabasa ang Genesis 1:26–28; Moises 2:26–28; Abraham 4:26–28; o ang ikaduhang parapo [paragraph] sa “Ang Pamilya: Usa ka Pamahayag ngadto sa Kalibutan” (ChurchofJesusChrist.org). Sa unsang paagi nga kining kamatuoran makaapekto sa paagi sa atong pagtan-aw sa atong kaugalingon, sa uban, ug sa Dios? Ang mga sakop sa klase mahimong makakita og dugang nga mga ideya diha sa mga himno sama sa “O Amahan Ko” o “Ako Anak sa Dios” (Mga Himno, nu. 182, 189).

• Si Presidente Russell M. Nelson nagpamatuod bahin sa milagruso nga lawas sa tawo (tan-awa sa “Salamat sa Dios,” Liahona, Mayo 2012, 77–80). Ikonsiderar ang pagpaambit niini nga pakigpulong sa dili pa mobasa sa Genesis 1:26–28; Moises 2:26–28; o Abraham 4:26–28 isip usa ka klase. Sa unsang paagi nga ang pagpamatuod ni Presidente Nelson makapalambo sa atong pagpasalamat alang sa mga kamatuoran niining mga bersikulo?

Genesis 1:27–28; Moises 3:18, 21–25; Abraham 5:14–19

Ang kaminyoon tali sa lalaki ug sa babaye gi-orden sa Dios.

• Daghang panglantaw sa kalibutan bahin sa kaminyoon karon ang misimang gikan sa mahangturong kamatuoran. Aron matabangan ang imong klase nga makakat-on mahitungod sa panglantaw sa Dios bahin sa kaminyoon, mahimo nimo silang dapiton sa pagbasa sa Genesis 1:27–28; Moises 3:18, 21–25; o Abraham 5:14–19 ug sa paglista diha sa pisara sa mga kamatuoran nga ilang makit-an. Mahimo nilang madugang sa ilang lista ang mga kamatuoran nga ilang makita diha sa “Ang Pamilya: Usa ka Pamahayag ngadto sa Kalibutan” (ChurchofJesusChrist.org). Nganong kini nga mga kamatuoran bililhon man ngari kanato?

Dugang nga mga Kapanguhaan

Pagtandi sa mga istorya bahin sa Paglalang.

Genesis	Moises	Abraham
Genesis Genesis 1:1	Moises Moises 2:1	Abraham Abraham 4:1
Genesis Genesis 1:16	Moises Moises 2:16	Abraham Abraham 4:16
Genesis Genesis 1:26–27	Moises Moises 2:26–27	Abraham Abraham 4:26–27
Genesis Genesis 1:30	Moises Moises 2:30	Abraham Abraham 4:30
Genesis Genesis 2:5	Moises Moises 3:5	Abraham Abraham 4:30
Genesis Genesis 2:5	Moises Moises 3:5	Abraham Abraham 5:5
Genesis Genesis 2:7	Moises Moises 3:7	Abraham Abraham 5:7
Genesis Genesis 2:9	Moises Moises 3:9	Abraham Abraham 5:9
Genesis Genesis 2:17–19	Moises Moises 3:17–19	Abraham Abraham 5:13–14

Pagpalambo sa Atong Pagtudlo

Tabangi ang mga tigkat-on nga ipahisama ang mga kasulatan ngadto sa ilang kaugalingon. “Ang sama nga mga kamatuoran sa ebanghelyo nga midasig ug milig-on ni Abraham, Ester, Lehi, ug Joseph Smith makatabang sa imong mga gitudloan sa pag-atubang sa modernong mga hagit” (Pagtudlo sumala sa Pamaagi sa Manluluwas, 21). Awhaga ang mga tigkat-on sa paggamit sa mga baruganan nga ilang makita diha sa mga kasulatan ngadto sa ilang kaugalingong mga sitwasyon.