Si Adan ug si Eva kuyog nga naglakaw

Adam and Eve [Adan ug Eva], ni Douglas M. Fryer

Enero 10–16

Genesis 3–4; Moises 4–5

Ang Pagkapukan ni Adan ug ni Eva

Samtang mangandam ka sa pagtudlo mahitungod sa Genesis 3–4 ug Moises 4–5, hunahunaa kon unsa ang mga pangutana o mga kalihokan nga tingali makatabang sa mga sakop sa klase nga mas makasabut sa Pagkapukan ni Adan ug ni Eva.

Irekord ang Imong mga Impresyon

pagpaambit nga icon

Dapita ang Pagpaambit

Ang mga sakop sa klase mahimong moribyu og daklit sa Genesis 3–4 o Moises 4–5, mopili og usa ka bersikulo nga mahinungdanon ngadto nila, ug mopaambit niini sa usa ka tawo nga naglingkod sa duol. Dayon ang pipila ka tawo mahimong mopaambit og ideya ngadto sa klase.

icon sa pagtudlo

Itudlo ang Doktrina

Moises 4:1–13; 5:1–12

Nagkinahanglan kita sa kabubut-on ug oposisyon aron molambo.

• Tungod kay ang kabubut-on—ang hinatag sa Dios nga katungod sa paghimo og mga pagpili—ingon man ka mahinungdanong bahin sa mortal nga kinabuhi, usahay ato lang kining ibaliwala. Aron mas mapalambo ang pagpasalamat sa mga sakop sa klase alang niini nga gasa, mahimo nilang basahon ug hisgutan ang Moises 4:1–4. Unsa man ang gitudlo niini nga mga bersikulo mahitungod sa kaimportante sa kabubut-on? Nganong maguba man ang plano sa Dios kon kita wala pay kabubut-on? Ang kinutlo diha sa “Dugang nga mga Kapanguhaan” mahimong makahatag og pipila ka ideya.

• Siguro ang mga sakop sa klase nagtuon sa mensahe ni Presidente Dallin H. Oaks nga “Oposisyon sa Tanang mga Butang” (Liahona, Mayo 2016, 114–17) isip kabahin sa ilang indibidwal o pamilya nga pagtuon niini nga semana. Atol sa semana, mahimo nimong makonsiderar ang pagdapit sa pipila ka tawo nga motungha nga andam sa pagpaambit og butang gikan sa iyang mensahe nga nakatabang nila nga masabtan ang Pagkapukan ni Adan ug ni Eva (tan-awa ilabi na ang mga seksyon I ug II). Nganong gitugutan man kita sa Langitnong Amahan nga makasinati og “katugbang [oposisyon] sa tanan nga mga butang”? (tan-awa sa 2 Nephi 2:11–16). Mahimo usab nimong dapiton ang mga sakop sa klase sa pagbasa sa Doktrina ug mga Pakigsaad 29:39–40 ug hisguti kon ngano nga ang mga tintasyon ni Satanas gikinahanglan diha sa plano sa Dios. Unsaon sa Langitnong Amahan ug ni Jesukristo sa pagtabang kanato kon magsagubang kita og tintasyon?

  Si Eva nga nagkupot sa bunga

  Leaving Eden [Pagbiya sa Eden], ni Annie Henrie Nader

Moises 4:4–12; 5:13–33

Si Satanas nagtinguha “sa pag-ilad ug pagbuta” kanato.

• Ang Moises 4:4–12; 5:13–33 makatabang sa mga sakop sa imong klase sa pag-ila sa pipila ka paagi diin si Satanas motintal kanato aron sa pagbuhat og dautan. Mahimo nimong hangyuon ang katunga sa klase sa pagbasa sa Moises 4:4–12 ug ang laing katunga sa pagbasa sa Moises 5:13, 18–33. Samtang magbasa sila, mahimo nilang ilista ang mga paagi nga misulay si Satanas sa pagtintal ni Adan ug ni Eva ug sa ilang mga anak. Sa unsang paagi nga siya misulay niining sama nga mga butang karon? Unsaon sa Langitnong Amahan sa pagtabang kanato sa pagbatok sa mga pagpangilad ni Satanas?

Genesis 3:1–7; Moises 4:22–31; 5:4–15

Ang Pag-ula ni Jesukristo nagtanyag og paglaum ug katubsanan gikan sa Pagkapukan.

• Kon mas makasabut kita sa mga epekto sa Pagkapukan, mas makapasalamat kita sa Pag-ula ni Jesukristo. Ang mga sakop sa klase mahimong mangita sa mga epekto sa Pagkapukan diha sa Genesis 3:1–7; Moises 4:22–31 ug molista sa unsay ilang makit-an diha sa pisara. Mahimo silang mangita sa Moises 5:4–12, 14–15 aron makakat-on mahitungod sa plano sa Dios sa pagtubos kanato gikan niadto nga mga epekto (tan-awa usab sa 2 Nephi 2:19–25; Alma 12:22–34) ug molista sa unsay ilang makit-an diha sa pisara. Mahimo usab silang mopaambit kon unsay nakahatag nila og impresyon mahitungod sa mga pagpamatuod ni Adan ug ni Eva bahin ni Jesukristo nga makita diha sa mga bersikulo 10–12. Unsay atong gibati mahitungod sa plano sa Dios human magbasa niining mga kasulatan?

• Ang istorya ni Adan ug ni Eva bahin sa paglaum ug katubsanan makapadasig sa mga sakop sa klase kon ang kinabuhi lisud. Ikonsiderar ang pagdapit kanila nga mangita og mga pulong ug mga hugpong sa mga pulong diha sa Moises 5:7–12 nga nagpahayag sa paglaum nga gibati ni Adan ug ni Eva sa dihang ilang nahibaloan nga ang Manluluwas makatubos nila. Kanus-a kita mibati og paglaum susama sa gibati ni Adan ug ni Eva? Ikonsiderar ang pagdapit sa mga sakop sa klase sa pagpaambit sa ilang paborito nga mga himno nga nagpahayag sa paglaum nga moabut pinaagi sa Pag-ula sa Manluluwas. Mahimo kamong manganta og pipila niini nga magdungan.

icon sa dugang nga mga kapanguhaan

Dugang nga mga Kapanguhaan

Makapili kita alang sa atong kaugalingon.

Si Elder Dale G. Renlund nagtudlo:

“Ang tumong sa atong Langitnong Amahan sa pagkaginikanan dili ang pagbuhat sa Iyang mga anak sa unsay matarung; kini ang pagpili sa Iyang mga anak sa pagbuhat sa matarung ug sa katapusan mahimong sama Kaniya. Kon gusto lang Niya nga magmasulundon kita, mogamit Siya og diha-diha dayon nga mga ganti ug mga silot aron sa pag-impluwensya sa atong mga kinaiya.

“Apan dili interesado ang Dios nga ang Iyang mga anak mahimo lang nga disiplinado ug masulundon nga mga ‘binuhi’ nga dili mokitkit sa Iyang tsinelas diha sa celestial nga sala. Dili, gusto sa Dios nga ang Iyang mga anak mohingkod sa espirituhanong paagi ug moapil Kaniya sa buluhaton sa pamilya” (“Magpili Kamo Niining Adlawa,” Liahona, Nob. 2018, 104).

Pagpalambo sa Atong Pagtudlo

Palamboa ang pag-apil sa mga sakop sa klase. Daghang kalihokan ang mahimo isip usa ka klase, sa ginagmay nga mga grupo, o sa mga parisan. Paggamit og lain-laing mga paagi sa pagtudlo aron matugutan ang mga tawo nga makaapil kinsa mahimong walay kahigayunan nga moapil. (Tan-awa sa Pagtudlo sumala sa Pamaagi sa Manluluwas, 33–34.)