O Sera kei Aisake, mai vei Scott Snow

14–20 ni Feperueri

Nai Vakatekivu 18–23

“E Dua beka na Ka sa Dredre Vei Jiova?”

Ena nomu vakavakarau mo veivakavulici, nanuma tiko ni vuqa na lewe ni kalasi sa sotava beka na veika eso e vakaibalebale vakalevu vei ira ni ra wilika na Nai Vakatekivu 18–23. Na cava o rawa ni cakava mo vakayaloqaqataki ira mera wasea na veika era sa sotava kei na veivakararamataki eso oqo? Sa rawa mo laiva na veivakararamataki oqori me vakauqeta na veivosaki vakalasi.

Vola na Veika o Vakauqeti Kina

Sureta na Veiwasei

Na noda vakayadrati kei na vakatovolei sa yaco me veigauna ni veivakatudonutaki ni noda bula. Nai Vakatekivu 18–23 e vakamacalataka tiko na veigauna eso vakaoqori ena nodrau bula o Eparaama kei Loti. Sa rawa ki na lewe ni kalasi mera wasea e dua na tikina era kunea ena nodra vuli vakai ira yadua ena macawa oqo e vakamacalataka e dua na gauna ni veivakatudonutaki vei Eparaama. Sa rawa mera qai wasea na veika era sa vulica mai kina.

Vakavulica na iVunau

Nai Vakatekivu 18:9–14; 21:1–7

Sa dau vakayacora na Turaga na Nona yalayala ena Nona gauna ga.

• Na itukutuku e tiko ena veitikina oqo sa rawa ni veivakauqeti vei ira na lewe ni kalasi era lomatarotarotaka tiko na kena yaco na yalayala ni Kalou kivei ira. Me tekivutaki e dua na veivosaki, ena rawa ni veivuke me ra sureti na lewe ni kalasi me ra railesuva vata kei na dua tale ena kalasi na itukutuku ni yalayala ni Kalou kivei Eparaama kei Sera ena Nai Vakatekivu 17:4, 15–22; 18:9–14 kei na kena yaco na veika a yalataki tu e Nai Vakatekivu 21:1–7. Na veika cava ena veitikina oqo e taleitaki vei ira na lewe ni kalasi? Na dina cava soti eda rawa ni taura mai na veika rau a sotava o Eparaama kei Sera meda wasea vua e dua na itokani sa yali na nona inuinui ni na vakayacora na Kalou na Nona yalayala? Na cava eso tale na ivolanikalou se veika e sotavi eda rawa ni wasea? (raica, me vakataka na, Roma 8:28; Iperiu 11; Momani 9:19–21; Vunau kei na Veiyalayalati 88:64). Na veika cava era sa sotava na lewe ni kalasi me baleta na kena sa yaco na yalayala ni Kalou ki na nodra bula? Eda na tokona vakacava na noda vakabauta ena gauna sa na sega beka ni yaco mai kina ena bula oqo na veivakalougatataki sa yalataki tu? (raica na Iperiu 11:8–13).

Nai Vakatekivu 19:15—26

Me vaka ni da sa tisaipeli i Jisu Karisito, e dodonu meda drotani mai na itovo butobuto ka sega tale ni raivuki.

• Na lesoni cava o vakila e rawa vei ira na lewe ni kalasi mera vuli mai kina ena itukutuku kei Loti ni drotani tiko mai Sotoma kei Komora? E dua na lesoni e tukuna tiko o Elder Jeffrey R. Holland ena itukutuku mai na “iKuri ni iVurevure.” Sa rawa mo wasea oqo vata kei na kalasi ni oti na vakamacalataki vakalekaleka ni veika e yaco e tukuni tiko e Nai Vakatekivu 19:15–26. Na sala se ena ituvaki cava eda dau “[rai] lesu” kina ena so na gauna (tikina e 26) ni a dodonu ga me da rai ki liu ena noda vakabauta tiko na iVakabula? Sa rawa vei ira na lewe ni kalasi mera wasea na veika era sa sotava e vakaraitaka tiko na kena bibi me kakua na rai lesu. Na cava e vakuria na Luke 9:62 meda kila vinaka kina na vakasama oqo?

  

  Na Dro Mai Sotoma kei Komora, mai vei Julius Schnorr von Carolsfeld

Nai Vakatekivu 22:1–14

Na yalodina nei Eparama me sorovaki Aisake sai koya e dua na ivakatakarakara ni Kalou kei na Luvena.

• Na itukutuku i Eparama ena nona cabora na luvena me isoro e rawa ni vakavulici keda me baleta na Nona sorovaka o Tamada Vakalomalagi na Luvena. E dua na sala me dikevi kina na itukutuku oqo sai koya me lesi e veimama ni kalasi mera vakasamataka vakatitobu Nai Vakatekivu 22:1–14 ena vakasama maivei Eparaama kei na Kalou na Tamada, ka ra vakasamataka vakatitobu na ikarua ni veimama nai itukutuku oqo ena vakasama maivei Aisake kei Jisu Karisito. Kerei ira na lewe ni kalasi mera wasea na veivakararamataki era sa kunea. Vakabibi, na cava era sa vulica na lewe ni kalasi sa vakatitobutaka na nodra vakavinavinakataka na Tamada Vakalomalagi kei Jisu Karisito? Me tiki ni veivosaki oqo, sa rawa mo vakaraitaka na iyaloyalo E Kauti Aisake Tiko o Eparama me Cabori me iSoro (Gospel Art Book, naba 9) se vakaraitaka na vidio “Akedah (The Binding)” (ChurchofJesusChrist.org).

iKuri ni iVurevure

“Na vakabauta sa na dau dusi yani ki na veisiga ni mataka.”

E vakavulica o Elder Jeffrey R. Holland:

“A rawa sara ga vei wati Loti me rai vuki ena yalo ca vua na Turaga ena vuku ni Nona kaya vua na veika me na biuta laivi tu yani. … Koya gona ni a sega walega ni rai lesu; a rai lesu ena gagano. Me vakalekalekataki ga, na nona semati ki na veika sa oti a uabaleta na nona nuidei ki na veisiga ni mataka. …

“… Au sa vakamasuti kemuni mo ni kakua ni malele tiko ki na veisiga sa oti yani se mo ni gaganotaka matewale na veisiga sa oti, se mani vakacava sara na vinaka ni veisiga e nanoa. Na veika sa sivi meda vuli mai kina ia me kakua ni da bula tiko kina. Eda railesu meda taura mai kina na veika vinaka ena veika eda sotava ka sega ni kena dravusa. Ni gauna eda sa vulica rawa kina na veika e dodonu meda kila ka kauta tu vata kei keda na veika vinaka mai na veika eda sa sotava oti, meda sa qai rai ki liu ka nanuma tiko ni vakabauta sa dau dusi tikoga ki na veisiga ni mataka. …

“… A sega nona vakabauta na [wati Loti]. A vakatitiqataka ni sa rawa vua na Turaga me solia vua e dua na ka e vinaka cake sara mai na kena a tu vua. Ia, a nanuma o koya ni sega na ka e sa tu mai liu ena rawa ni vinaka me vaka na kena sa na biuta tu yani. …

“… Na malele tiko ki na bula sa oti, oka kina na cala sa oti, e sega ni dodonu! E sega ni kosipeli i Jisu Karisito”(“The Best Is Yet to Be, ” Ensign, Jan. 2010, 24, 26–27).

Vakatorocaketaki na Noda Veivakavulici

Yalataka na Veivakalougatataki. Ni ko sureti ira o vakatavulica mera cakacakataka na veika era sa vulica, mo vakadinadinataka talega na veivakalougatataki ka sa yalataka na Kalou vei ira era sa vakayacora vakakina. (Raica talega na Veivakavulici ena iVakarau ni iVakabula, 35.)