Droini kei Repeka, mai vei Dilleen Marsh

21–27 ni Feperueri

Na iVakatekivu 24–27

Sa Vakavoui na Veiyalayalati

Ni o wilika Na iVakatekivu 24–27, masu mo kila na sala mo na vakayaloqaqataki ira kina na lewe ni kalasi mera sotava na veika eso mai na nodra vulica na ivolanikalou.

Vola na Veika o Vakauqeti Kina

Sureta na Veiwasei

Ni gadrevi mera vakayaloqaqataki na lewe ni kalasi me ra wasea na nodra veivakararamataki mai Na iVakatekivu 24–27, sa rawa mo sureti ira mera digitaka e dua na malanivosa e vakauqeti ira ka vola ena dua na tiki ni pepa. Soqoni ira na pepa, ka digitaka e vica mera wilika ka veivosakitaka vakalasi.

Vakavulica na iVunau

Na iVakatekivu 24

Sa yaga sara ki na ituvatuva tawamudu ni Kalou na vakamau ena veiyalayalati.

• Na nona vakabibitaka o Eparaama ena kena kunei e dua na yalewa me wati Aisake sa madigi vinaka me veivosakitaki kina na bibi ni vakamau ena veiyalayalati ena ituvatuva ni Kalou kivei keda. Me tekivu kina na veivosaki, mera na dikeva na lewe ni kalasi Nai Vakatekivu 24 ka wasea na veika a cakava na Turaga me vukea na nodrau kau vata mai ena vakamau o Aisake kei Repeka. Na cava e bibi kina na vakamau vua na Turaga? Mera vukei na lewe ni kalasi mera veivosakitaka na taro oqo, sa rawa mo wasea vei ira na itukutuku nei Elder D. Todd Christofferson ena “iKuri ni iVurevure.” E rawa vakacava meda vukea me vakadeitaka na kena yaco rawa na inaki ni Kalou me baleta na vakamau?

• Tarogi ira na lewe ni kalasi na yavunibula cava era sa raica ena dua na tamata vakawati, ira na itubutubu, se dua tale na veiwatini sa vakaitavi me rau yalodina, ka marautaka na nodrau vakawati. Na itukutuku e Na iVakatekivu 24 e vakaraitaka na yavunibula e rawa ni vukea e dua na tamata me tauyavutaka na marau ena nona vakawati—kei na so tale na ivakarau ni bula. Me vakataka, ena tikina e 12. eda vulica kina mo dusimaki ena masu, ia ena tikina e 19 eda vulica kina na noda sasagataka tikoga meda veiqaravi. Na ivakavuvuli cava tale e rawa ni kune ena wase oqo? E rawa mera rai talega na lewe ni kalasi ki “Na Matavuvale: Ai Vakaro ki Vuravura Raraba” (ChurchofJesusChrist.org).

Na iVakatekivu 25:29–34

Sa rawa meda digitaka na veivakamarautaki totolo se na yavunibula e yaga vakalevu cake sara.

• Ena rawa vakacava mo vukea na lewe ni kalasi mera kunea na nodra dui lesoni mai na veika rau a sotava o Jekope kei Iso? E dua na vakasama o ya mo sureti ira me ra vola e rua na lisi ena vava ni volavola—e dua baleta na veivakalougatataki tawamudu e vinakata na Kalou me solia vei keda kei na dua tale na veika vakavuravura ka vagolei keda tani mai na veivakalougatataki oqori. Mera qai wilika na lewe ni kalasi Nai Vakatekivu 25:29–34, ka sosomitaka na “itutu ni ulumatua” ena dua na ka mai na imatai ni lisi kei na “rourou” ena dua na ka mai na ikarua ni lisi. E dau tovolea vakacava na vu-ni-meca me vakauqeti keda meda vakaisosomitaka na veivakalougatataki ni Kalou ena veika e sega soti ni yaga? Sa rawa mo sureti ira na lewe ni kalasi me ra veivakasalataki vakai ira ena sala mera vakanamata kivua na iVakabula kei na veivakalougatataki tawamudu sa vakarautaka tu vei keda.

Nai Vakatekivu 26:18–25, 32–33

O Jisu Karisito na ivurevure ni wai ni bula

• E vakamacalataki toka vakavica e Nai Vakatekivu 26 ni o Aisake kei na nona matavuvale era a keli tobu mera vakasaqaqara wai, ka gadrevi vakawasoma kina na sasaga levu. Na dina oqo e rawa ni vukei iko mo vakavulica kina na lewe ni kalasi me baleta na sasaga e gadrevi me kauta mai kina na “wai bula” ni iVakabula ki na noda bula (raica na Joni 4:10). E rairai o rawa ni vakaraitaka oqo ena nomu droinitaka ena papa ni volavola e dua na ivurevure ni wai e sa benuci tu ena qele vavaku. Sa rawa mera taura nodra dui gauna na lewe ni kalasi mera bokoca kina eso na benu ni ra vakamacalataka na sala mera kunea kina na wai bula ni iVakabula. Vakayaloqaqataki ira mera vakayagataka na IDusidusi ki na iVolanikalou mera kunea kina na veitikina e sema ki na veika era wasea.

  

  E dua na ikeli wai makawa e Pieri-sepa, a keli tobu wai kina o Eparaama kei Aisake.

iKuri ni iVurevure

Na vakamau kei na matavuvale sa bulia mai na Kalou.

E a vakaraitaka o Elder D. Todd Christofferson eso na vuna e sa rui bibi kina na vakamau kei na matavuvale ki na ituvatuva ni Kalou:

“Na matavuvale e yavutaki ena vakawati ni dua na tagane kei na yalewa e vakarautaka na ituvaki vinaka duadua me buroro kina na ituvatuva ni Kalou—na ituvaki ni nodra sucu na gone, era lako vakasavasava ka tawacala mai vua na Kalou, kei na tikina me baleta na vuli kei na vakavakarau era na gadreva me baleta na rawa-ka ni bula vakayago kei na bula tawamudu ena vuravura e tarava mai. E dua na iwiliwili matata ni matavuvale ka yavutaki ena vakawati vakaoya e sa ka bibi vei ira na tamata mera bula ka buroro cake. …

“… Ia na noda ile me baleta na itavi ni bula vakawati kei na matavuvale e sega ni vakatautaki kina vulici ni bula veimaliwai ia ena ka dina ni ra sa ibulibuli ni Kalou. Sai Koya ka a buli Atama kei Ivi ena ivakatekivu me rau ucui Koya, na tagane kei na yalewa, ka vakaduavatataki rau vakaveiwatini me rau ‘dua ga na lewe’ ka tubu me lewe vuqa ka vakatawai vuravura. E kauta voli na tamata yadua na itovo vakalou, ia mai na duavata ni vakawati ni tagane kei na yalewa me rau le duabauga eda sa rawata kina na ibalebale taucoko sara ni noda a buli meda itovo vata kei na Kalou—tagane kei na yalewa. … Na vakawati vakaoqo … sa tiki vataga ni ituvatuva ni bula marau me vaka na Lutu kei na Veisorovaki” (“A Cava na Vuni Vakawati, A Cava na Vuni Matavuvale,” Liaona, Me 2015, 52).

Vakatorocaketaki ni Noda Veivakavulici

Yavutaka na nomu veivakavulici ena ivunau. Ni ko sa sureti ira na lewe ni kalasi me ra veiwasei, vakadeitaka mo na muataka lesu tikoga na veivosaki ki na ivunau ena ivolanikalou. Sa rawa mo cakava oqo ena nomu kerea na lewe ni kalasi me ra wilika na veitiki ni ivolanikalou ena kalasi, ka vakataroga toka na veika e tukuna na ivolanikalou, ka sureti ira na lewe ni kalasi me ra wasea na nodra ivakadinadina me baleta na ivakavuvuli e vakavulici tiko.