Droini kei Noa ni sa biuta mai na waqa, mai vei Sam Lawlor

31 ni Janueri–6 ni Feperueri

Nai Vakatekivu 6–11; Mosese 8

“Ia Ko Noa Sa Kune Loloma e na Mata i Jiova”

Nai ituvatuva oqo e vakararamataka na vei ivakavuvuli ka kunei e Nai Vakatekivu 6–11 kei na Mosese 8, ia oqo era sega duadua ga ni ivakavuvuli o rawa ni vakanamata kina ni o veivakavulici. Nuitaka na veivakauqeti vakayalo o ciqoma ena nomu vulica na ivolanikalou.

Vola na Veika o Vakauqeti Kina

Sureta na Veiwasei

Sa rawa mo kerei ira na lewe ni kalasi me ra wasea e dua na itukutuku vakayalo baleta na noda gauna oqo mai na italanoa kei Noa se na Valececere o Pepeli. Vakayaloqaqataki ira me ra wasea e dua na tiki ni ivolanikalou e tokona na itukutuku oqo.

Vakavulica na iVunau

Nai Vakatekivu 6–8; Mosese 8

Ena yaco na veitaqomaki vakayalo ni da muria na parofita ni Turaga.

• Na caka ca ena gauna i Noa e rawa ni veivakananumi vei keda baleta na caka cala eda raica sa wavoliti keda tu edaidai. Mera vukei na lewe ni kalasi me yaga vei ira na lesoni ena italanoa kei Noa, sa rawa mo vola ena vava ni volavola na iVakaro ni Qaqarauni kei na Veivakadeitaki Tale. Sa rawa ki na lewe ni kalasi me ra railesuva Nai Vakatekivu 6–8 se na Mosese 8:13–30 ka raica e dua na ka era sa vakila ni sa dua na ivakaro ni qaqarauni bibi me baleta na noda gauna oqo kei na veika era nanuma ni sa veivakadeitaki tale (raica talega na “iKuri ni iVurevure”). Sa rawa mera vola na veika era raica ena ruku ni kena ulutaga donu ena vava ni volavola. Na cava na vuna e yaga bibi kina vei keda nikua na italanoa kei Noa?

Nai Vakatekivu 9:8–17

Na ivakatakarakara se na ivakatakilakila ena vukei keda meda nanuma tiko na noda veiyalayalati kei na Turaga.

• Na ituvatuva ni macawa oqo ena Lako Mai, Mo Muri Au—Baleta na Tamata Yadua kei na Matavuvale e vakatura tiko me wiliki Nai Vakatekivu 9:8–17 ka vakasamataki vakatitobu na sala e rawa ni yaco kina na ivakatakilakila se ivakatakarakara me veivakananumi tiko ni noda veiyalayalati. Me vukei ira na lewe ni kalasi mera wasea na nodra vakasama, sa rawa mo kauta mai ki na kalasi na iyaya eso me ivakananumi tiko ni veika bibi—me vaka na mama ni vakamau, e dua na kuila ni matanitu, se dua na itokaniyaca ni kaulotu—ka vakatauvatani ira vata kei nai “vakatakarakara” ni drodrolagi. Na cava e vakavulica vei keda na iVakadewa i Josefa Simici, Nai Vakatekivu 9:21–25 (ena iDusidusi ki na iVolanikalou) me baleta na ivakatakarakara oqo? E vakayagataka vakacava na Kalou na ivakatakarakara se na ivakatakilakila me vukea na noda nanuma tiko na noda veiyalayalati?

Nai Vakatekivu 11:1–9

Na sala duadua ga me yacovi kina o lomalagi o ya meda muri Jisu Karisito.

• Na kedra itukutuku na tamata mai Pepeli era a tara cake e dua na vale cecere e vakarautaka e dua na duidui talei ki na itukutuku i Inoki kei ira na nona tamata ena kena taraicake o Saioni, era a vulica na lewe ni kalasi ena macawa sa oti. Oi rau ruarua na ilawalawa tamata oqo era a saga tiko mera yacovi lomalagi ia ena sala e duidui. Sa rawa mo sureti ira na lewe ni kalasi me ra vola ena vava ni volavola na veika era nanuma rawa baleti ira na tamata e Saioni (raica na Mosese 7:18–19, 53, 62–63, 69) kei na veika era sa vulica mai Nai Vakatekivu 11:1–9 kei na Ilamani 6:26–28 baleti ira na tamata mai Pepeli. Na duidui cava soti era sa raica rawa? Na cava e vakavulica vei keda oqo me baleta na noda dui sasaga me da lesu tale ki na iserau ni Kalou?

  

  Droini ni Vale Cecere o Pepeli, mai vei David Green

• Sa sega ni tiko ena gauna oqo na siti makawa o Pepeli, ia na dokadoka kei na veika vakavuravura e vakatakilakilataka sa tu oqo. Me ra vukei na lewe ni kalasi mera vakayagataka na lesoni mai na Vale Cecere o Pepeli ki na nodra bula, tekivuna ena nomu sureti ira me ra railesuva Nai Vakatekivu 11:1–9. Mo qai veisoliyaka yani na veitiki ni pepa ka sureti ira na lewe ni kalasi me ra vola na veika era cakava na tamata ka muataki ira tani mai vua na Kalou; oti o ya, ena so tale na tiki ni pepa, mera vola na veika era cakava na tamata ka muataki ira vakavoleka vua na Kalou. Sa rawa mo marautaka nomu tuva na imatai ni wase ni veitiki ni pepa ena vava ni volavola ena ibulibuli ni dua na vale cecere kei na ikarua ni iwasewase ena ibulibuli ni dua na valetabu. Na cava sa vakarautaka na Kalou me vukei keda meda “yacovi lomalagi”? (Nai Vakatekivu 11:4; raica talega na Joni 3:16). Sa rawa me lagati e dua na serenilotu ena iulutaga oqo, me vaka na “Au Toro Yani Tu” (Sere ni Lotu, naba 53).

iKuri ni iVurevure

Lesoni mai vei Noa

A kaya o Peresitedi Henry B. Eyring:

“Ni sa sega ni ciqomi na ivakasala vaka-parofita ena vakagogotaki keda meda taura na ivakasala veivakauqeti ena veisiga ni mataka. Na gauna vinaka duadua meda lewa kina meda vukei Noa me taya na waqa o ya na imatai ni gauna a kerei keda kina. Ena veigauna yadua a kerei keda tale kina e muri, ka da sega ni muria, sa rawa me vakagogotaka noda rogoca na Yalo. Ka vakakina ena veigauna yadua ni nona kerekere sa vaka me ka lialia vakalevu cake sara, me yacova ni sa tau mai na uca. Ia sa yaco me sa bera sara.

“Ena veigauna kece au digitaka ena noqu bula meu vakaberaberataka noqu muria na ivakasala veivakauqeti se nanuma ni sega ni yaga meu muria, au qai kila e muri niu sa biuti au sara ena dua na sala rerevaki. Ena veigauna yadua au a vakarorogo kina ki na nodra ivakasala na parofita, vakila ni sa vakadeitaki ena masu, ka qai muria sara, au sa kunea kina niu sa toso yani ki na veitaqomaki” (“Finding Safety in Counsel, ” Ensign, Me 1997, 25).

Na cava na vuna a tala mai kina na Kalou na Waluvu?

Eso na tamata era vakataroga tiko na lewa dodonu ni Kalou ena kena vakau mai e dua na waluvu me “vakarusa na tamata” (Nai Vakatekivu 6:7). E vakamacalataka o Elder Neal A. Maxwell ni ena gauna ni Waluvu Levu, “na ca sa yalana na nodra galala ni digidigi na tamata mera bula dodonu, ka sa na tawa dodonu kina vei ira na yalo mera vakau mai ki vuravura.” (We Will Prove Them Herewith [1982], 58).

Vakatorocaketaki ni Noda Veivakavulici

Solia na gauna me vakasamataki vakatitobu. Na veitaro vivinaka ena gadreva kina na vakasama titobu, na vaqaqara, kei na veivakauqeti. Solia vei ira na lewe ni kalasi e vica na miniti mera vakasamataka vakatitobu e dua na taro ni bera ni ra kerei me ra sauma mai. (Raica na Veivakavulici ena iVakarau ni iVakabula, 31–34.)