Love One Another (Dou Veilomani Vakaikemudou), maivei Emma Donaldson Taylor

24–30 ni Janueri

Mosese 7

“A Sa Vakatokai Ira na Nona Tamata na Turaga ko Saioni”

Ni o vulica na Mosese 7, vakasamataki ira na tamata o vakavulica kei na sala mo vukei ira kina mera kila vinaka na cava e vakavulica tiko na wase ni ivola oqo me baleti Saioni kei na so tale na ivakavuvuli ni kosipeli.

Vola na Veika o Vakauqeti Kina

Sureta na Veiwasei

Ena so na gauna ena veirauti vinaka e dua na taro rawarawa kei na vica na miniti ni kena vakasamataki vakatitobu me vukei ira na tamata mera wasea na veika era sa vulica tiko mai vale. Sa rawa mo solia vei ira na lewe ni kalasi e vica na miniti mera railesuva na Mosese 7, raica e dua na tikina e vakavuna mera vakavinavinakataka na dina sa vakalesuimai ena ivola i Mosese, ka qai wasea.

Vakavulica na iVunau

Mosese 7:16–21, 27, 53, 62–69

Eda rawa ni tarai Saioni ena noda gauna oqo.

• Na sala cava beka e vinaka duadua mo vakatakila kina na ivakavuvuli kei Saioni ena nomu kalasi? E dua na vakasama o ya mera tarai na lewe ni kalasi ena loma ni macawa ni bera na kalasi ka sureti ira me ra kauta mai e dua na iyaya mai vale era nanuma ni vakatakarakarataka na ivakarau ni nodra bula na lewe i Saioni, e vakamacalataki tiko ena Mosese 7:18. Ni ko ni veivosakitaka vata na tikina oqo, sa rawa mera vakamacalataka na lewe ni kalasi na ibalebale ni iyaya era kauta mai vale.

  

  Sa dodonu me da segata meda “yalovata ka duavata ena noda vakasama” (Mosese 7:18).

• Na vidio “—” (ChurchofJesusChrist.org) ena rawa me vukei iko mo tekivutaka e dua na veivosaki me baleta na sala e rawa ni da “yalovata ka duavata ena noda vakasama” (Mosese 7:18) ena noda tabanalevu kei na matavuvale. Sa rawa mo kerei ira na lewe ni kalasi mera vakasamataka na gauna era a vakila kina na duavata ena loma ni nodra matavuvale se ni veiqaravi tiko vata kei ira eso ena Lotu se itikotiko. Na cava era cakava na tamata me tauyavutaki kina na duavata ena ituvaki vakaoqo? Na cava eda rawa ni vulica me baleti Saioni kei na duavata mai na Mosese 7? (raica vakabibi na tikina e 16–21, 27, 53, 62–69). Oqo eso tale na ivolanikalou ena rawa ni veivuke: Filipai 2:1–4; 4 Nifai 1:15–18; Vunau kei na Veiyalayalati 97:21; 105: 5.

Mosese 7:28–44

Na Kalou sa tagicaki ira na Luvena.

• Eso na tamata era nanuma ni Kalou sa tu vakayawa, sega ni torovi rawa, ka sega ni veikauwaitaki. E rawa vakacava mo vakayagataka na raivotu nei Inoki me vukea na nomu kalasi me ra kila vinaka ni Kalou sa cakacaka tiko ena noda bula ka dau kauwaitaki keda? Sa rawa mo sureta na lewe ni kalasi me ra wilika na Mosese 7:28–44 ka vola eso na vuna a tagi kina na Kalou. Na cava era vakavulica na veitikina oqo baleta na loma ni Kalou vei ira na Luvena? Na itukutuku ena “iKuri ni iVurevure” e rawa ni cau ena veitalanoa oqo.

• Na ituvatuva ena macawa oqo ena Lako Mai, Mo Muri Au—Baleta na Tamata Yadua kei na Matavuvale e vakatura tiko me vakasamataki vakatitobu na veika e vakavulica tiko na Mosese 7:28–31, 35 me baleta na Kalou. Sa rawa vei ira era vakayacora oqo e vale me ra wasea na nodra vakasama ki na kalasi. Se o rawa ni sureti ira na lewe ni kalasi mera vakasamataka vakatitobu na veitikina oqo ka veivosakitaka ena kalasi.

Mosese 7:59–67

Ena lako tale mai na Turaga ena iotioti ni gauna.

• Ena rawa vakacava mo vukei ira nomu lewe ni kalasi mera kunea na veika e vakavulica tiko na Mosese 7:59–67 me baleta na iKarua ni Lako Mai ni iVakabula? E rairai rawa mo vola e rua se tolu na dina se na veika e yaco mai na veitikina oqo ena vava ni volavola ka kerei ira na lewe ni kalasi me ra vakasaqara ena veitikina ka vakuria ki na lisi. Na cava na vuna sa dua kina na veivakalougatataki me tiko e dua na itukutuku ni raivotu nei Inoki—e dua na parofisai taumada ni iKarua ni Lako Mai?

iKuri ni iVurevure

Na Kalou sa tagicaki ira na Luvena.

E vakavulica o Elder Jeffrey R. Holland:

“Ena maliwa ni dua na raivotu cecere ni kawa tamata ka sa tadolava mai vua ko lomalagi, sa raica rawa o Inoki, na veivakalougatataki kei na bolebole ni bula oqo, a vuki kina na matana ki vua na Tamada ka kurabui ni raici Koya ni a tagi tiko. A kaya ena kurabui kei na qoroqoro ki vei Koya sa kaukauwa duadua e vuravura kei lomalagi taucoko: ‘Ia ko ni sa tagi ena vuku ni cava?’…

“Raica na veika a yaco ena dua ga na siga, a sauma lesu na Kalou: ‘Raici ira oqo na wekamu; sai ira na cakacaka ni ligaqu. … Kau sa solia vei ira …[e dua] na ivakaro, ni dodonu me ra veilomalomani, ia sa dodonu me ra digitaki au, na Tamadra; ia raica, era sa sega ni veilomani, ka ra sa cati ira na wekadra dina. … Me kakua beka ni tagi ko lomalagi, ni sa raica na nodra rarawa ko ira oqo?’ [Mosese 7:29–33, 37].

“Ia na ka totoka duadua, o ya e levu na ka me vakavulici kina na ituvaki dina ni Kalou mai na kena e rawa me bau vakadewataka yani e dua na ivolatukutuku vakalotu. … Sa qai dua na iyaloyalo tawaboko rawa ni nona cakacaka na Kalou ki na noda bula! Sa rarawa dina na itubutubu ni o ira na Luvena era sa sega ni digitaki Koya se ‘na kosipeli ni Kalou’ a tala mai! [Roma 1:1]. Isa na kena rawarawa meda lomana e dua sai koya vakai koya ga sa lomani keda!” (“The Grandeur of God, “ Liahona, Nove. 2003, 72).

Vakatorocaketaki ni Noda Veivakavulici

Vakayaloqaqataki ira na kalasi mera vulica na ivolanikalou e vale. E dua na sala o rawa ni vakauqeta kina na vulici ni ivolanikalou ena itikotiko o ya mo solia na gauna ki na kalasi mera wasea na veika sa kunei kei na veivakararamataki mai na nodra vuli yadua ka vakamatavuvale. (Raica na Veivakavulici ena iVakarau ni iVakabula, 29.)