Better than Paradise (Vinaka Cake mai vei Parataisi), mai vei Kendal Ray Johnson

17–23 ni Janueri

Nai Vakatekivu 5; Mosese 6

“Vakatavulica Raraba Yani na Veika Oqo Vei Ira na Nomudou Kawa”

Ni bera ni ko wilika e dua na ikuri ni ivola ni vuli, wilika ka vakasamataka vakatitobu Nai Vakatekivu 5 kei na Mosese 6, ka vola na nomu nanuma vakayalo. Lako Mai, Mo Muri Au—Baleta na Tamata Yadua kei na Matavuvale kei na ituvatuva oqo ena rawa me soli vakasama vei iko ena sala mo vukei ira kina o vakavulica me ra kunea na dina e baleti ira.

Vola na Veika o Vakauqeti Kina

Sureta na Veiwasei

O na vakayaloqaqataki ira vakacava na lewe ni kalasi mera wasea na veivakararamataki kei na veika era sotava ni ra vulica Nai Vakatekivu 5 kei na Mosese 6? Sa rawa mo vola na yaca Atama kei Inoki ena vava ni volavola ka sureti ira na lewe ni kalasi me ra vola e dua na ka a cakava se vakavulica e dua vei rau na parofita oqo a vakaibalebale vei ira.

Vakavulica na iVunau

Mosese 6:26–39

Sa kacivi keda na Turaga meda cakava na Nona cakacaka se cava ga na noda malumalumu.

• Ena rairai rawa ni tiko e dua ena nomu kalasi sa vakila oti—se vakila tiko—ni sega ni ganiti koya me dua na nona ilesilesi e vale se ena lotu. Me taraicake na nodra vakabauta na lewe ni kalasi ni Turaga e rawa ni vukei ira, sa rawa mo sureti ira mera wilika na veika a sotava o Inoki ka kunei ena Mosese 6:26–39. A vukei Inoki vakacava na Kalou me cakava na Nona cakacaka dina ga ni a rere o Inoki? Kerei ira na lewe ni kalasi mera vakasamataka mada eso tale na ivakaraitaki ni tamata era a vorata rawa na nodra malumalumu ka vakayacora rawa na cakacaka ni Turaga, mai na ivolanikalou se ena nodra dui bula. Na ivakaraitaki cava eda rawa ni wasea? (raica talega Na Lako Yani 4:10–16; Jeremaia 1:4–10; 2 Nifai 33:1– 4; Ica 12:23–29).

• E vuqa na iapositolo kei na parofita ni gauna oqo era sa vakaraitaka na nodra kauwai me vakataki Inoki ni ra a vakamacalataka na lomadra ni ra ciqoma na nodra veikacivi. Na veika era sotava e rawa ni laveta cake nodra kila vinaka na lewe ni kalasi na Mosese 6:26–39. Sa rawa me raici edua na vosa mai vei ira era se qai kacivi wale tikoga oqo ena lewe ni Kuoramu ni iApositolo Le Tinikarua (me kena ivakaraitaki, raica na nodratou ivakadinadina o Elder Ronald A. Rasband, Elder Gary E. Stevenson, kei Elder Dale G. Renlund [Liaona, Nove. 2015, 89–94]). Me ra wasea na lewe ni kalasi na veika era sa vakauqeti kina me baleta na ivakaraitaki eso oqo. Na cava eda rawa ni vulica mai vei ira na iliuliu oqo me baleta na noda dui nanuma ni da tawayaga? Na itukutuku mai vei Peresitedi Thomas S. Monson ena “iKuri ni iVurevure” sa rawa talega ni veivuke me tiki ni veivosaki oqo.

Mosese 6:48–65

Na vakabauta, veivutuni, papitaiso, kei na ciqomi ni Yalo Tabu ena vakarautaki keda meda lesu tale vua na Kalou.

• Na ituvatuva ni macawa oqo ena Lako Mai, Mo Muri Au—Baleta na Tamata Yadua kei na Matavuvale e vakatura tiko me wiliki na Mosese 6:48–62 me raici kina na veika e dodonu meda kila ka cakava oi keda yadua me da vueti rawa kina. Sa rawa ki na lewe ni kalasi mera wasea na veivakararamataki eso e lako mai na vuli o ya ena nodra itikotiko. Se sa rawa me veivosakitaki vata na Mosese 6:48–62 ena kalasi. Eda na sauma beka vakacava vua e dua e taroga na vuna sa yaga bibi sara kina na vakabauta, veivutuni, papitaiso, kei na ciqomi ni isolisoli ni Yalo Tabu? E sauma vakacava na Turaga na taro oqo ena tikina e 53–65, kei na cava eda vulica mai na Nona isaunitaro?

  

  Sa nodra itavi na itubutubu me ra vakavulici ira na luvedra ena kosipeli.

Mosese 6:51–63

“Vakatavulica raraba yani na veika oqo vei ira na nomudou kawa.”

• Eda vulica ena Mosese 6:51–63 na dina ni kosipeli a vakavulica na Turaga vei Atama ka kerei koya me vakavulica vei ira na itabatamata mai muri. Sa rawa vei ira na lewe ni kalasi me ra vola na dina eso oqo ena nodra vulica vakailawalawa lalai na veitikina, me vakataka na tikina e 51–52, 53–57, 58–60, 61–63. Na cava na vuna e yaga vakalevu sara kina na dina oqo vei ira na itabatamata era tubucake tiko mai nikua? Na cava o na vinakata vei ira na itabagone me ra kila me baleta na iVakabula mai na veitikina oqo? Sa rawa ki na lewe ni kalasi me ra wasea na vakasama eso se veika era sotava mera veivukei vakai ira mera vakavulica na dina oqo me mana sara vei ira na gonelalai kei na itabagone. Na cava soti tale eda rawa ni vulica mai na ivakaro ni Turaga vei ira na itubutubu ena Mosaia 4:14–15 kei na Vunau kei na Veiyalayalati 68:25–28; 93:40–50?

• — — Kevaka o vakavulici ira na itabagone, sa rawa mo sureti ira me ra wasea na sala e rawa ni ra tokoni ira kina na nodra itubutubu ena nodra sasaga me ra vakavulica na kosipeli e vale.

iKuri ni iVurevure

“O koya sa kaciva na Turaga, sa vakadonui koya na Turaga.”

A vakavulica o Peresitedi Thomas S. Monson: “Eso vei kemuni o ni dau mamadua beka se nanuma ni ko ni sega ni dau yaga mo ni ciqoma vakadodonu e dua na veikacivi. Me nanumi tiko ni cakacaka oqo e sega ni nomu ka noqu duadua ga. Oqo e nona cakacaka na Turaga, ia ni da sa cakava tiko na cakacaka ni Turaga, sa noda na dodonu ki na veivuke ni Turaga. Nanuma tiko ni o koya sa kaciva na Turaga, sa vakadonui koya na Turaga”(“Duty Calls, ” Ensign, May 1996, 44).

Vakatorocaketaki ni Noda Veivakavulici

E dauveivakavulici na Yalo Tabu. Na nomu itavi me vaka e dua na qasenivuli e ka bibi, ia mo nanuma tiko ni sa qasenivuli dina na Yalo Tabu. Mo vukei ira na lewe ni kalasi mera vuli mai vua na Yalo ka veiwasei vakai ira ena ka era sa vulica.