Adam and Eve, (Atama kei Ivi), maivei Douglas M. Fryer

10–16 ni Janueri

Na iVakatekivu 3–4; Mosese 4–5

Na Lutu Nei Atama kei Ivi

Ni ko vakavakarau mo veivakavulici me baleta Na iVakatekivu 3–4 kei na Mosese 4–5, mo vakasamataka na veitaro se na itaviqaravi eso e rawa ni vukei ira na lewe ni kalasi mera kila vakavinaka cake na Lutu nei Atama kei Ivi.

Vola na Veika o Vakauqeti Kina

Sureta na Veiwasei

Sa rawa ki na lewe ni kalasi mera raica vakalekaleka tale Nai Vakatekivu 3–4 se na Mosese 4–5., ka mera digitaka e dua na tikina e bibi vei ira, ka wasea vua e dua e dabe e yasadra. Mera qai wasea e so vei ira e dua na veivakararamataki ki na kalasi.

Vakavulica na iVunau

Mosese 4:1–13; 5:1–12

Eda gadreva na galala ni digidigi kei na veisaqasaqa me rawa ni da tubu.

• Ena vuku ni galala ni digidigi—ni sa isolisoli ni dodonu va-Kalou me da cakava na digidigi—e sa dua na tiki bibi ni bula oqo, ena so na gauna eda sa taura tu kina vakamamada. Me vakatitobutaki na nodra vakavinavinakataka na lewe ni kalasi na isolisoli oqo, sa rawa ni ra wilika ka veivosakitaka na Mosese 4:1–4. Na cava e vakavulica tiko na vei tikina oqo me baleta na galala ni digidigi? Na cava na vuna ena vakarusai kina na ituvatuva ni Kalou kevaka e sega vei keda na galala ni digidigi? Na vosa era tiko ena “iKuri ni iVurevure” ena veivakararamataki.

• E rairai beka era a vulica na itukutuku nei Peresitedi Dallin H. Oaks “Veibasai ni Ka Kecega” (Liaona, Me 2016, 114–17) me tiki ni nodra vuli vakai ira yadua se vakamatavuvale ena macawa oqo. Ena loma ni macawa, sa rawa mo sureti ira e vica na tamata me ra vakavakarau mera mai wasea eso na ka mai na nona itukutuku a vukei ira me ra kila vinaka na Lutu nei Atama kei Ivi (raica vakabibi na wase I kei naII). Na cava na vuna e vakatara kina na Tamada Vakalomalagi meda na mai sotava na “veibasai ni ka kecega”? (raica na 2 Nifai 2:11–16). Sa rawa mo sureti ira na lewe ni kalasi me ra wilika na Vunau kei na Veiyalayalati 29:39–40 ka veivosakitaka na vuna e yaga kina ena ituvatuva ni Kalou na veitemaki nei Setani. Ena vukei keda vakacava na Tamada Vakalomalagi kei Jisu Karisito ena gauna eda sotava kina na veitemaki?

  

  Leaving Eden, (Na Biubiu Mai Iteni), mai vei Annie Henrie Nader

Mosese 4:4–12; 5:13–33

E vakasaqara o Setani “me vakaisini ka vakamatabokotaki” keda.

• Na Mosese 4:4–12; 5:13–33 e rawa ni vukea na nomu lewe ni kalasi mera raica eso na sala e temaki keda kina o Setani meda kitaka na ka butobuto. Sa rawa mo kerea na veimama ni kalasi me ra wilika na Mosese 4:4–12 kei na ikarua ni veimama me ra wilika na Mosese 5:13, 18–33. Ni ra sa wilika, sa rawa mera vola na sala a tovolea o Setani me temaki Atama kei Ivi kina kei ira na luvedrau. E tovolea vakacava o koya na veika vata oqo nikua? Ena vukei keda vakacava na Tamada Vakalomalagi meda vorata rawa na veilawakitaki nei Setani?

Nai Vakatekivu 3:1–7; Mosese 4:22–31; 5:4–15

Sa solia tu na Veisorovaki nei Jisu Karisito na inuinui kei na veivueti mai na Lutu.

• Na levu ga ni noda kila na revurevu ni Lutu, na levu cake ni noda vakavinavinakataka na Veisorovaki i Jisu Karisito. Sa rawa ki na lewe ni kalasi mera vakasaqara na revurevu ni Lutu ena iVakatekivu 3:1–7; Mosese 4:22–31 ka vola ena vava ni volavola na veika era sa kunea. Me ra qai vakaraica ena Mosese 5:4–12, 14–15 mera vulica na ituvatuva ni Kalou me vueti keda mai na revurevu o ya (raica talega na 2 Nifai 2:19–25; Alama 12:22–34) ka vola na veika era kunea ena vava ni volavola. Era rawa talega mera wasea na veika era vakauqeti kina me baleta na nodrau ivakadinadina o Atama kei Ivi baleti Jisu Karisito e tiko ena tikina 10–12. Na cava eda vakila me baleta na ituvatuva ni Kalou ni oti na wiliki ni ivolanikalou oqo?

• Na italanoa ni inuinui kei na nodrau vueti o Atama kei Ivi e rawa ni vakayaloqaqataki ira na lewe ni kalasi ni dredre na bula. Sa rawa mo sureti ira mera vaqara na vosa kei na malanivosa mai na Mosese 5:7–12 e vakamacalataka vakavinaka na inuinui e rau vakila o Atama kei Ivi ni rau sa vulica ni iVakabula ena rawa ni vueti rau. Ena gauna cava eda a vakila kina na inuinui e tautauvata ki na kena rau a vakila o Atama kei Ivi? Sa rawa mo sureta na lewe ni kalasi mera wasea na nodra serenilotu taleitaki e vakamacalataka na inuinui e kauta mai na Veisorovaki ni iVakabula. Sa rawa mo ni lagata vata e vica vei ira oqo.

iKuri ni iVurevure

Sa rawa meda digitaka ga vakai keda.

E vakavulica oqo o Elder Dale G. Renlund:

“Na lalawa vakaitubutubu nei Tamada Vakalomalagi e sega ni nodra cakava na Luvena na ka e dodonu; ia mera digitaka na ka dodonu ka mera yaco mera vakataki Koya. Ke gadreva o Koya meda talairawarawa ga, ena veisaumi ka veitotogitaki sara vakatotolo me vakauqeta na noda itovo.

“E sega ni taleitaka na Kalou mera vuli walega na Luvena ka “dauvakasamei” talairawarawa era na sega ni katia na Nona ivava ena loqi ni gade vakasilesitieli. Sega, e vinakata na Kalou me ra na tubu cake vakayalo ka ra duavata kei Koya ena bisinisi ni matavuvale” (“Moni Digitaki Koya Edaidai,” Liaona, Nove. 2018, 104).

Vakatorocaketaki ni Noda Veivakavulici

Vakalevutaki na nodra vakaitavi na lewe ni kalasi. E vuqa na itaviqaravi e rawa ni caka vaka-kalasi, vakailawalawa lalai, se mera veisasa. Vakayagataka na veimataqali iwalewale eso mera vakaitavi taucoko rawa kina me kakua ni dua e lutu. (Raica na Veivakavulici ena iVakarau ni iVakabula, 33–34.)