27 ni Tiseba–2 ni Janueri

Mosese 1; Eparaama 3

“Oqo na Noqu Cakacaka kei na Noqu Lagilagi”

Ni o wilika na Mosese 1 kei na Eparaama 3, mo dolava tiko na nomu vakasama kei na yalomu ki na veivakauqeti mai vua na Yalo. Ena vakauqeti iko ena veivakanananu kei na vakasama ena vukea na nomu vakavakarau mo veivakavulici.

Vola na Veika o Vakauqeti Kina

Sureta na Veiwasei

Era na rawa ni sotava na lewe ni nomu kalasi eso na veika totoka ni ra wilika na Mosese 1 kei na Eparaama 3 e vale. Ena sala cava mo solia kina na madigi vei ira na nomu lewe ni kalasi mera wasea na veika a sotavi oqori? Ena rawarawa toka ni ko taroga na veika vakaoqo: Na cava a vakauqeti iko ena nomu wilika na ivolanikalou ena macawa oqo? Na cava o a kurabuitaka? Na cava a tarovi iko mo vakasama? Na cava a vukei iko mo vakila ni ko sa voleka vua na Tamada Vakalomalagi kei Jisu Karisito?

Vakavulica na iVunau

Mosese 1:1–10, 37–39; Eparaama 3:22–26

Eda sa luve ni Kalou, ka sa tiko na noda ilesilesi vakalou.

• Na dina era a vakatakilai ena raivotu nei Mosese kei Eparaama ena rawa me na veivakauqeti sara vakaukauwa ena noda digidigi kei na noda rawa ni vorata na veibolebole ni bula. Ena rawa vakacava mo vukei ira na lewe ni nomu kalasi mera kunea na veidina oqo ena Mosese 1 kei na Eparaama 3? E dua na vakasama o ya mo wasea na kalasi ki na vica na ilawalawa ka lesia ki na ilawalawa yadua e dua vei ira na tikina oqo: Mosese 1:1–10; Mosese 1:37–39; Eparaama 3:22–26. Sa rawa ki na ilawalawa yadua mera vakasaqara na isau ni veitaro me vaka “Ko cei koi au?” “Na cava au mai cakava eke?” kei “O cei e vinakata na Kalou meu na vakataka?” Ni oti na gauna yalataki, sa rawa ki na ilawalawa yadua mera wasea na nodra isaunitaro. Ena veivakauqeti vakacava ki na noda itovo ena veisiga na isaunitaro oqo?

  

  Christ and the Creation, (Na Karisito kei na Veika Buli), mai vei Robert T. Barrett

Mosese 1:12–23

Sa rawa meda valuta rawa na veivakauqeti nei Setani.

• Na nona saqati Setani o Mosese, e tiko ena Mosese 1:12–23, sa lesoni veivuke tiko vei ira na nomu lewe ni kalasi ni ra sa sotava na veitemaki se na ivadi ca maivei vu-ni-meca. Na cava eda rawa ni vulica mai na veika a kaya lesu o Mosese? — E rawa ni vakaibalebale cake kevaka era wasea na lewe ni kalasi na veivakasama kei na veivakayaloqaqataki me ra veivukei vakai ira mera kila ka valuta rawa na sasaga nei Setani.

• E dua na lesoni mai na veika a sotava o Mosese o ya ni sa dau temaki keda o Setani ena ivadi lasulasu ni dina kei na kaukauwa ni Kalou. Me vukea mera raitayalotaka rawa oqo na lewe ni kalasi, mo kauta mai ki na kalasi eso na ka era sa ibulibuli lasutaki ni veika dina eso, me vakataka e dua na senikau palasitika se gone dramidrami matakau. Eda na kila vakacava ni ra sa ka lasutaki? Na cava soti na ibulibuli lasutaki sa vakayagataka tiko o Setani me temaki keda kina ena gauna oqo? Eda na kila ka biuti ira tani vakacava? (Mo vulica na sala a cakava kina o Mosese, raica na Mosese 1:13–18.) E vukei keda vakacava na Turaga ena noda sasaga? (raica na Mosese 1:24–26).

Eparaama 3:22–28

Na bula oqo sa noda madigi meda vakaraitaka ni da na vakayacora na veika e vakarota na Kalou.

• O na vukei ira vakacava na lewe ni kalasi mera raica ni nodra bula sa dua na madigi mera vakadinadinataka na nodra yalodina ki na ivakaro ni Kalou? Sa rawa mo tekivuna ena nomu tarogi ira me ra veivosakitaka na veika era sa sotava ena gauna era a vakaraitaka kina nodra gumatuataka e dua na kila-ka—me vakataka, ena vuli, cakacaka, se ena dua na timi ni veitaucici. Sa rawa mera veivosakitaka na veika e gadrevi mera cakava mera vakadinadinataki ira kina. Era sa tautauvata vakacava na veika sotavi oqo ki na veika e vakamacalataki tiko ena Eparaama 3:24–26? Era sa duidui vakacava? Eda na okati Rau vakacava na Tamada Vakalomalagi kei na iVakabula ena noda sasaga meda “vakadinadinataki” keda? (Eparaama 3:25). Na noda sa kila tiko ni noda mai tiko eke meda na vakadinadinataki keda ena vakayaco-ka vakacava ena sala meda na uabaleta rawa na veibolebole ni bula oqo?

• Na cava soti tale eda vulica mai na Eparaama 3:22–28 me baleta na bula taumada, se na noda “itutu taumada”? (tikina e 26). Na cava e yaga bibi kina vei keda na dina oqo?

iKuri ni iVurevure

Kakua ni vakatitiqataka na veika sa vakatakilai tiko vei iko.

A vakavuvulitaka oqo o Elder Jeffrey R. Holland me baleta na ka a sotava o Mosese ena Mosese 1: “Na itukutuku nei Mosese’ vei kemuni nikua o ya: Kakua ni biuta e ra na nomu isasabai. Kakua ni nanuma ni dua na ivakatakila cecere, ena kena totoka eso, kei na kena e veivakararamataki, na dolavi ni dua na salatu veivakauqeti, me sa kena itinitini. … Ni sa yaco e dua na veivakararamataki, qarauna sara na veitemaki mo vakasuka mai na dua na ka vinaka. Kevaka sa ka dodonu ni ko sa masulaka oti ka nuitaka ka bulataka, mo sa cakava sara ga oqo. Kakua ni guce ni sa veitaqataqai mai na veika dredre. Mo kakua sara ni soli iko vei koya sa vakatani me vakarusa na nomu bulamarau. Mo vorata yani na nomu vakatitiqa. Mo vakatulewa qaqa ni ko sa rere. ‘Mo dou kakua ni biuta na nomudou dinata.’ [Iperiu 10:35]. Mo tikoga ena kena salatu ka raica na totoka ni bula ni sa cereki vei iko” (“Cast Not Away Therefore Your Confidence,” Ensign, Mar. 2000, 7, 9).

Vakatorocaketaki ni Noda Veivakavulici

Vukei ira na vuli mera kunea na dina ena ivolanikalou. Ni bera ni ra sureti na lewe ni kalasi mera wilika e dua na malanivosa ni ivolanikalou, sa rawa mo solia vei ira eso na ka digitaki mera vakasaqara se vakasamataka. Me vakataka, ni sa rawa mera raica eso na ka era sa vulica me baleta na iVakabula se e dua na ka era gadreva mera wasea vei ira na lewe ni matavuvale. (Raica na Veivakavulici ena iVakarau ni iVakabula, 21.)