Atama kei Ivi ena taudaku ni Were ko Iteni

Better than Paradise, mai vei Kendal Ray Johnson

17–23 ni Janueri

Nai Vakatekivu 5; Mosese 6

“Mo Vakatavulica ena Yalogalala na Veika Oqo vei ira na Nomu Kawa”

Ni o wiliwili ka vakasamataka vakatitobu Nai Vakatekivu 5 kei na Mosese 6, vola na veivakauqeti vakayalo o ciqoma. Na itukutuku cava o kunea ena vakamareqeti vakalevu cake vei iko kei na nomu vuvale?

Vola na Veika o Uqeti Kina

E dua na iwase levu ni Nai Vakatekivu 5 e ituvatuva ni itabatamata mai vei Atama kei Ivi ki vei Noa. Eda wilika kina e vuqa na yaca, ia eda sega ni vulica e levu na ka me baleti ira. Oti eda qai wilika me baleti Inoki, oti e ono na itabatamata mai vei Atama, ka a vakamacalataki ena malanivosa veiuqeti oqo ia sega ni vakamacalataki sara: “ka rau sa dau lako vata kei na Kalou ko Inoki: a sa yali eke; ka ni sa kauti koya tani na Kalou”(Nai Vakatekivu 5:24). Sa dina sara e tiko kina e dua na italanoa. Ia ke sega na ikuri ni ivakamacala, sa tekivu tale na ituvatuva ni veitabatamata.

Eda vakavinavinaka, ni vakatakila mai na Mosese 6 na veika matailalai ni italanoa kei Inoki—ka sa dua dina na italanoa. Eda vulica me baleta na yalomalumalumu nei Inoki, na nona lomaleqa, na veika e raica rawa vua na Kalou, kei na cakacaka levu a vakayacora me vaka ni parofita ni Kalou. Eda raica rawa talega e dua na iyaloyalo matata ni matavuvale nei Atama kei Ivi ni toso na veitabatamata. Eda wilika na “lewa” nei Setani, ia ko ira talega na itubutubu era sa vakavulica vei ira na luvedra “na ivakavuvuli kece ni Kalou” ka “vunautaka na ivalavala dodonu” ka “vosa ka parofisai” (Mosese 6:15, 21, 23). E talei vakalevu cake na veika eda vulica me baleta na ivunau era vakavuvulitaka na itubutubu kei na dauvunau oqo: na vakabauta, veivutuni, papitaiso, ka ciqoma na Yalo Tabu (raica na Mosese 6:50–52). Na vunau ko ya, me vaka na matabete e salavata kaya, “a tu mai na ivakatekivu, ena tu talega ena ivakataotioti kei vuravura” (Mosese 6:7).

ivakatakilakila ni vuli ni tamata yadua

Vakasama ni Vuli iVolanikalou ni Tamata Yadua

Mosese 6:26–36

Na parofita e daurairai.

Ni o vulica na Mosese 6:26–36, na cava o vulica me baleta na mata, na butobuto, kei na rai? Ena gauna nei Inoki, ocei esega ni rawa ni “rai vakayawa”? Na cava na vuna a sega ni rawa ni raica kina na dina na tamata oqo? Na cava a raica rawa ko Inoki? Na cava beka sa tara cake nomu vakabauta ni o ira na parofita ni gauna oqo era daurairai? (raica na tikina e 36; Na iDusidusi ki na iVolanikalou, “Daurairai,” scriptures.ChurchofJesusChrist.org).

Mosese 6:26–47

Na Kalou e kacivi keda meda cakava na Nona cakacaka se mani cava ga na noda malumalumu.

E sega ni ka vou me da ulabaleti ena veika sa kacivi keda kina na Turaga me da cakava. O Inoki sara mada ga a vakakina ni kacivi koya na Turaga me dua na parofita. Ni o wilika na Mosese 6:26–36, vaqara na cava na vuna a vakadrukai kina ko Inoki kei na ka e tukuna na Turaga me solia vua na yaloqaqa. Ena tikina e 37–47, vaqara na sala eso e tokoni Inoki kina na Turaga ka vakaukauwataki koya me cakava na Nona cakacaka (raica talega na Mosese 7:13). Ena rawa beka mo vakatauvatana na veika a sotava o Inoki kei na so tale na parofita era a nanuma ni sega ni ganiti ira, me vakataki Mosese (raica na Lako Yani 4:10–16), Jeremaia (raica na Jeremaia 1:4–10), Nifai (raica na 2 Nifai 33:1–4), kei Moronai (raica na Ica 12:23–29). Na cava o nanuma e vinakata na Kalou mo vulica mai na veivolanikalou oqo me baleta na cakacaka sa solia vei iko mo cakava?

Raica talega na Jekope 4:6–8.

Mosese 6:48–68

Na ivunau i Karisito e itakele ni ituvatuva ni veivakabulai ni Kalou.

Baleta ni tu vei keda na ivola i Mosese, eda kila ni Kalou sa vakavulica tiko vei ira na luvena na iwalewale me ra kunea kina na veivosoti kei na veivueti me tekivu sara mai na ivakatekivu. Ena ivolanikalou, na ivakavuvuli eso oqo era vakatokai me ivunau i Karisito (raica na 2 Nifai 31:13–21). Ni o vulica na Mosese 6:48–68, vaqara na cava eda na kila ka cakava me da vueti kina. O na raica beka ni veivuke mo vola na nomu ivakaleka ni veika e vakatavulica ko Inoki. Na cava na vuna e bibi kina me kilai ni dina oqo a sa vakavulici mai na gauna nei Atama kei Ivi? Na cava o vakauqeti mo cakava mai na nomu vulica na ivakavuvuli oqo?

Mosese 6:51–62

“Mo vakatavulica ena yalo galala na veika oqo vei ira na nomu kawa.”

A vakavulici vei rau o Atama kei Ivi na veidina vakamareqeti oqo ni kosipeli i Jisu Karisito. Ia na vosa ni Turaga ena Mosese 6:27–28 e vakamatatataka ni ena itabatamata ni se bera o Inoki, e vuqa era sa sega tale ni qai bulataka tiko na veidina oya. E vinakata na Turaga me vakalesuya mai ko Inoki na dina eso sa mai yali tu—vata kei na ivakaro a soli taumada vei Atama: “Vakavulica raraba yani na veika vei ira na nomudou kawa” (Mosese 6:58). Ni o wilika na Mosese 6:51–62, na cava o vulica me baleti Jisu Karisito? Na cava beka o raica ena yaga vakabibi sara ki na itabatamata tubucake tiko mai? Na cava o rawa ni cakava mo vukea na kena soli yani na dina eso oqo ki na veitabatamata muri mai?

era vulica na ivolanikalou na matavuvale

Sa nodrau itavi na itubutubu me rau vakavulica na kosipeli vei ira na luvedrau.

ivakatakilakila ni vuli vakamatavuvale

Vakasama baleta na Vuli iVolanikalou Vakamatavuvale kei na Lotu Vakamatavuvale

Na iVakatekivu 5; Mosese 6:5–25, 46.Nomu wilika me baleta na “ivola ni ivakananumi” eratou a maroroya na matavuvale nei Atama kei Ivi e rawa ni vakauqeta na nomu matavuvale me cakava ga na nomudou ivola ni ivakananumi. Veitalanoataka sara vakamatavuvale na cava dou na gadreva me okati kina. E rairai eso na itaba, italanoa, se itukutuku mai na itukutuku makawa ni nomu matavuvale. O na digitaka beka mo okata na veika era yaco tiko ena nomu matavuvale ena gauna oqo. Na cava beka era na raica na itabatamata muri mai ni na yaga? E rawa talega me veivosakitaki na sala e rawa ni dusimaka kina na nomu sasaga na malanivosa “ena yalo ni veivakauqeti” (Mosese 6:5) kei na “na iwalewale sa soli mai na iqaqalo ni liga ni Kalou” (Mosese 6:46). Vakasamataka mo maroroya na itukutuku mai na nomu ivola ni ivakananumi ena FamilySearch.org.

Mosese 6:53–62.Eda na sauma vakacava na taro nei Atama ena Mosese 6:53? Na isaunitaro cava eda kunea ena tikina 57–62?

Mosese 6:59.Na cava na kena ibalebale me da “sucu vou tale ki na matanitu vakalomalagi”? Na cava e rawa ni da cakava me tomani tikoga noda sucu vou tale ena noda bula taucoko? Me baleta na veivuke, raica na Alama 5:7–14, 26; Na iDusidusi ki na iVolanikalou, “Born Again, Born of God” scriptures. ChurchofJesusChrist.org; David A. Bednar, “Ka na Bokoci na Nomuni iValavala Ca” (Liaona, Me 2016, 59–62).

Mosese 6:61.Na cava eda vulica baleta na Yalo Tabu mai na veitikina oqo?

Mosese 6:63.Na cava soti eso na ka sa “vakadinadinataka na [lako mai i Karisito]”? (raica tale ga na 2 Nifai 11:4). Vakasamataka mo sureta na lewe ni matavuvale me ra wasea e dua na ka era raica “vei ira na veilomalagi e cake” se “e vuravura” ka vukei ira me vulica na veika baleti Jisu Karisito. Me kena ivakaraitaki, e vakananuma vakacava vei keda na veivunikau, vatu, se na matanisiga me baleta na iVakabula? E vakavulica vakacava vei keda na “wai bula” kei na “madrai ni bula,” na veika e baleti Koya? (Joni 4:10–14; 6:35).

Me ikuri ni tukutuku ni vakavulici ni gone, raica na idusidusi ni macawa oqo ena Lako Mai, Mo Muri Au—Me Baleta na Lalai.

Sere vakaturi: “Au Lako Ke Ko Ni Lewa,” Sere ni Lotu, naba 164.

Vakavinakataki ni Vuli Yadudua

Vakaraica na ivakatakilakila. Ena ivolanikalou, na iyaya se na veika e yaco e rawa ni dau matataka se vakatakarakarataka na veika dina vakayalo. Na ivakatakarakara eso oqo e rawa ni vakavutuniyautaka na nomu kilaka ena ivunau. Me kena ivakaraitaki, na cava o sa vulica mai na ivakatakarakara ni mata kei na tete ena Mosese 6:35?

O Atama kei Ivi kei ira na gone

Adam and Eve Teaching Their Children, mai vei Del Parson.