e vuqa na tamata era veimaliwai ena yalololoma

Love One Another, mai vei Emma Donaldson Taylor

24–30 ni Janueri

Mosese 7

“Sa Vakatokai Ira na Nona Tamata na Turaga ko Saioni,”

Ni o wilika ka vakasamataka vakatitobu na Mosese 7, vola na nomu vakauqeti vakayalo. Ni o kitaka oqo, o sa vakaraitaka tiko ni o dau vakabibitaka na veituberi ni Turaga ka ni o vinakata mo ciqoma vakalevu na Nona veituberi.

Vola na Veika o Uqeti Kina

Ena itukutuku ni veigauna, era sa dau tovolea na tamata me ra rawata na veika a rawata o Inoki kei ira na nona tamata: era a tara cake e dua na matatamata uasivi sa sega kina na dravudravua se na tiko yavavala. Me vaka ni da tamata ni Kalou, eda wasea vata na gagadre oqo. Eda vakatoka me tarai cake o Saioni, ka okati kina—me ikuri ni nodra qaravi na dravudravua ka vakatorocaketaki na sautu—caka veiyalayalati, bula vata ena bula dodonu, ka yaco me duavata vakakina vata kei Jisu Karisito, “tui kei Saioni” (Mosese 7:53). Baleta ni sa tomani tikoga na cakacaka ni kena tauyavutaki ko Saioni ena noda gauna oqo, e veivuke me da taroga, era a rawata vakacava o Inoki kei ira na nona tamata? A rawa vakacava me ra “yalovata ka duavata” (Mosese 7:18) dina ga ni tu wavoliti ira na caka cala? Ena kedra maliwa na veika matailalai e solia vei keda na Mosese 7 baleti Saioni, e dua e yaga sara vakabibi vei ira na Yalododonu Edaidai: sa sega ni dua ga na vanua o Saioni—e dua na ituvaki ni yalo. Saioni, me vaka a vakavulica na Turaga, sai koya “na yalo savasava” (Vunau kei na Veiyalayalati 97: 21). E rairai na sala vinaka duadua me tarai cake kina o Saioni me tekivu ena dui yaloda kei na noda itikotiko.

ivakatakilakila ni vuli ni tamata yadua

Vakasama ni Vuli iVolanikalou ni Tamata Yadua

Mosese 7:16–21, 27, 53, 62–69

Na sasaga nei Inoki e dua na ivakarau ni kena tarai cake o Saioni ena noda dui bula.

Me vaka ni Mosese 7 e ivolatukutuku ni nodra tarai Saioni cake na dau muria na Kalou, sa rawa ni vakauqeti keda nikua ni da segata me da kitaka vakakina. Vakasamataka mo vakayagataka e dua na teveli me vaka na kena oqo mo vola kina na veika o vulica me baleti Saioni mai na Mosese 7:16–21, 27, 53, 62–69.

Tikina	Na cava o sa vulica baleti Saioni?	Na cava e vakatura oqo me baleta na nomu sasaga me tarai cake o Saioni?
Tikina 7:18	Na cava o sa vulica baleti Saioni? O ira na lewei Saioni era sa “yalovata ka duavata.”	Na cava e vakatura oqo me baleta na nomu sasaga me tarai cake o Saioni? Eda gadreva me yaco na duavata vakamatavuvale kei na Lotu.
Tikina 7:21	Na cava o sa vulica baleti Saioni? “Ni toso na gauna, sa kau cake ki lomalagi [ko Saioni].”	Na cava e vakatura oqo me baleta na nomu sasaga me tarai cake o Saioni? Me tarai cake o Saioni e dua na iwalewale vakaituvatuva.
Tikina	Na cava o sa vulica baleti Saioni?	Na cava e vakatura oqo me baleta na nomu sasaga me tarai cake o Saioni?
Tikina	Na cava o sa vulica baleti Saioni?	Na cava e vakatura oqo me baleta na nomu sasaga me tarai cake o Saioni?

Mosese 7:18–19, 53

E dodonu vei ira na tamata ni Kalou me ra segata me ra “yalovata ka duavata.”

Ena Mosese 7:18–19 e tuvai kina na nodra ivakarau ni bula na tamata e vakatokai ira na Turaga ko Saioni. Na cava na vuna o nanuma kina ni sa yaga na ivakarau ni bula oqo me tara cake kina ko Saioni? E duatani vakacava o Saioni, me vaka na kena ivakamacala ena iwase oqo, mai vei ira na veilawalawa se isoqosoqo tale eso e vuravura? Ni ko vakasamataka vakatitobu na taro oqo, o na vakasamataka beka na veimalanivosa oqo nei Jisu Karisito ena tikina 53: “Koi au na Mesaia, na tui kei Saioni.” Na cava na kena ibalebale me noda Tui ko Jisu Karisito? E vukei keda vakacava ko Koya me da tara cake na ivakarau ni bula vaka-Saioni?

Raica tale ga na Filipai 2:1–5; 4 Nifai 1:15–18; Vunau kei na Veiyalayalati 97:21; 105:5.

era veikidavaki vakataki ira na tamata

Sa dodonu me da segata me da “yalovata ka duavata” (Mosese 7:18).

Mosese 7:21, 23–24, 27, 69

Na cava a yaco ki na koro i Inoki?

Na malanivosa “kau cake” (Mosese 7:21, 23), “kau cake” (Mosese 7:24), na “kauti ira” (Mosese 7:27), kei na “kau tani” (Mosese 7: 69) ko Saioni kei ira na tamata i Inoki me vakamataliataki ka kau yani ki lomalagi. O ira na tamata era sa vakamataliataki “era sa veisautaki me rawa ni ra sega ni sotava na mosi se na mate” vakatamata (iDusidusi ki na iVolanikalou, “Translated Beings,” “Zion,” scriptures.ChurchofJesusChrist.org; raica talega na 3 Nifai 28:4–9, 15–18, 39–40).

Mosese 7:28–69

Sa tagi na Kalou ena vukudra na Luvena.

Eso na tamata era raica na Kalou me vaka e dua na kabula duatani ka sega ni vakila tu na veika e yaco vei keda. Ia a raica ko Inoki e dua na raivotu ka tagicaki ira kina na Luvena na Kalou. Ni o wilika na Mosese 7:28–40, vakaraica na vuna e tagi kina na Kalou. Ena vo ni raivotu nei Inoki, e vakamacalataki ena Mosese 7:41–69, na ivakadinadina cava o raica kina ni Kalou e “dau loloma ka yalovinaka ka sega ni mudu”? (Mosese 7:30; raica na tikina 43, 47, kei na 62 ena ivakaraitaki).

Mosese 7:62

Ena veisiga e muri ena vakasoqoni ira vata na Nona digitaki na Kalou.

Na Tikina 62 e vakamacalataka na veika ena yaco ena veisiga mai muri. Vakasamataka se cava beka na ibalebale ni veimalanivosa oqo: “kau na tala sobu mai lomalagi na ka dodonu,” “ka tala yani mai vuravura na dina,” “me lako siviti vuravura na cakacaka dodonu kei na dina me vaka sa lakosiviti vuravura na waluvu.” Na cava e vakavulica vei iko na veimalanivosa oqo me baleta na cakacaka ni Kalou ena iotioti ni gauna?

ivakatakilakila ni vuli vakamatavuvale

Vakasama baleta na Vuli iVolanikalou Vakamatavuvale kei na Lotu Vakamatavuvale

Mosese 7:18–19.Me vukei ira na lewe ni matavuvale mera raitayalotaka na cava e kena ibalebale me da “duavata,” e rawa ni o cakava e dua na uto pepa ka kotikotiva me iba, me rauta ni ra yadua na tikina na lewe ni matavuvale kece. Me ra vola na yacadra na lewe ni matavuvale ena nodra tikina me ra qai cakacaka vata me ra biuta vata na uto. Ni vakasotari vata tiko na iba e rawa ni o tukuna tiko na veika eso o taleitaka baleta na lewe ni matavuvale yadua.

Mosese 7:28–31, 35.Na cava eda vulica baleta na Kalou mai na veitikina oqo?

Mosese 7:32.Na cava na vuna e solia kina vei keda na Kalou na galala ni digidigi? Na cava eda rawa ni kaya vua e dua e nanuma ni ivakaro ni Kalou e yalana na noda galala ni digidigi? Ni wiliki na 2 Nifai 2:25–27 e rawa ni vakaikuritaka na veivosaki oqo.

Mosese 7:59–67.Ni wilika na nomu matavuvale na Mosese 7:59–67, tovolea mo vakatakilakilataka se vola na veika e tukuna na Turaga vei Inoki me baleta na veisiga e muri—me kena ivakaraitaki, na Kalou ena “vakasoqoni [ira] mai kina na [Nona] digitaki” (tikina e 62) ka na yaco na “veika rarawa vei ira sa ivalavala ca” (tikina 66). E rawa vakacava ni tu vei keda na vakabauta kei na inuinui dina ga ni tu na caka ca ena gauna mai muri? Me tiki ni veivosaki oqo, tovolea mo wilika na vosa oqo mai vei Elder Ronald A. Rasband: “Ni kakua ni yalolailai, kemuni na taciqu kei na ganequ. Io, eda bula tiko oqo ena veigauna dredre, ia ni da tiko ga ena sala ni veiyalayalati, e sega ni gadrevi meda rere. Au sa vakalougatataki kemuni ni ko ni cakava, o na sega ni lomaleqa ena gauna eda bula tiko kina se na veivakaleqai e yaco mai. Au vakalougatataki kemuni mo ni digia mo tu ena veivanua tabu ka sega ni yavalati rawa. Au vakalougatataki kemuni mo ni vakadinata na yalayala i Jisu Karisito, ni bula tiko o Koya, sa wanonovi keda, kauwaitaki keda ka tu e yasada” (“Dou Kakua ni Rarawa,” Liaona, Nove. 2018, 21).

Me ikuri ni tukutuku ena nodra vakavulici na gone, raica na idusidusi ni macawa oqo ena Lako Mai, Mo Muri Au—Me Baleta na Lalai.

Sere vakaturi: “Loloma e Vale,” Sere ni Lotu, naba 178.

Vakatorocaketaki Noda Veivakavulici

Dau vakaraica vakavinaka na ka. Ni o yadrava na veika e yaco tiko ena nodra bula na luvemu, o na raica na veimadigi vakasakiti ni veivakatavulici. Na ka era kaya kei na taro era taroga na gone ena loma ni siga e rawa ni ivakatakilakila ni gauna ni veivakatavulici. (Raica na Veivakavulici ena iVakarau ni iVakabula, 16.)

Droini kei Inoke kei ira na tamata ni ra raica cake tu na rarama

City of Zion Translated, mai vei Del Parson