“24–30 ni Janueri. Mosese 7: ‘Na Turaga e Vakatokai ira na Nona Tamata ko Saioni,’” Lako Mai, Mo Muri Au—Baleta na Lalai: Veiyalayalati Makawa 2022 (2021)
“24–30 ni Janueri. Mosese 7,” Lako Mai, Mo Muri Au—Baleta na Lalai: 2022
Veilomani vata, mai vei Emma Donaldson Taylor
24–30 ni Janueri
Mosese 7
“Na Turaga e Vakatokai ira na Nona Tamata ko Saioni”
Tekivuna na nomu vakavakarau ena nomu wilika na Mosese 7. Lako Mai, Mo Muri Au—Baleta na Tamata Yadua kei na Matavuvale e rawa ni vukei iko mo kilamatata na iwase oqo, ia na vakasama eso ka koto e ra e rawa ni solia vei iko na vakasama eso ena sala mo vakatavuvulitaka kina vei ira na gone.
Vola na Veika o Vakauqeti Kina
Sureta na Veiwasei
Taura e vica na miniti mera railesuva vata kei iko na veika era kila me baleta na parofita o Inoke—oka kina e dua na ka era vulica ena lesoni ni macawa sa oti. Ke veivuke, vakaraitaka e dua na iyaloyalo mai na ituvatuva ni macawa oqo ena Lako Mai, Mo Muri Au—Me Baleta na Tamata Yadua kei na Matavuvale.
Vakavulica na iVunau: Gone Sobu
E vinakata na Kalou meda veilomani tiko vakai keda.
Era vakamacalataka na veitikina oqo na ivakarau ni bula ni tamata kei Saioni. E rawa vakacava mo vukei ira na gone me ra tekivu tara cake na ivakarau eso oqo?
iTaviqaravi e Rawa ni Caka
-
Wasea na italanoa kei ira na tamata nei Inoke mai na “Ko Inoki na Parofita” (ena ITukuni ni Veiyalayalati Makawa), se me ra tukuna na gone na italanoa ena nodra vosa ga ka vakayagataka na iyaloyalo kei Inoki ena ituvatuva ni macawa oqo ena Lako Mai, Mo Muri Au—Me Baleta na Tamata Yadua kei na Matavuvale. O na rawa talega ni lagata vata kei ira na gone na ikarua ni qaqa ni “Vakamuri Ira na Parofita” (iVolanisere ni Lalai, 110 – 11) me railesuva na italanoa.
-
Vukei ira na gone me ra vakasamataka na ivalavala eso e sema ki na matavosa “yalovata ka duavata” (Mosese 7:18). Vakamacalataka ni matavosa oqo e kena ibalebale ni ra veilomani na tamata i Inoki, ka ra dui veilomavinakataki. Sureta me ra taurivaka na tabana ni itaviqaravi ni macawa oqo me ra droinitaka kina e dua na sala e rawa ni ra vakaraitaka kina na loloma.
-
Lagata e dua na sere me baleta na noda veilomani vakai keda, me vaka na “Loloma e Vale” (Serenilotu, naba 178). Kauta mai eso na iyaloyalo e vakaraitaka tiko na vu ni matavosa eso ena sere me vukei ira na gone me ra vulica na vosa. Kerei ira na gone me ra wasea na sala eso e rawa ni ra vakaraitaka kina na veilomani vakai ira ena Lalai kei na nodra veivale. Me ra qai vakatovotovotaka na nodra vakasama.
Sa dodonu me da segata me da “yalovata ka duavata” (Mosese 7:18).
Na Kalou e kauwaitaki ira na Luvena.
Sa rawa mo vukei ira na gone me ra vulica ni kauwaitaki keda vakatitobu kei na noda ivalavala na Tamada Vakalomalagi kei Jisu Karisito .
iTaviqaravi e Rawa ni Caka
-
Vukei ira na gone me ra vakasamataka na veika e vakamarautaki Tamada Vakalomalagi. Wilika na Mosese 7:28 kei ira na gone, ka vakamacalataka ni a rarawa na Tamada Vakalomalagi baleta ni ra sa ca sara ko ira na tamata (raica na tikina e 32–33).
-
Me ra droinitaka na gone e dua na mata mamarau ena dua na yasa ni pepa ka dua na mata rarawa ena yasana kadua. Cavuta e so na cakacaka vinaka, me vaka na cavuti ni dua na masu, kei na so na veikaca, me vaka na vosa lasu, ka kerei ira na gone me taura cake na mata mamarau se mata rarawa me vakaraitaka na veika e vakila na Tamada Vakalomalagi kei Jisu Karisito me baleta na digidigi yadua.
-
Sureti ira na gone me ra cakava e dua na qito ka ra matanataka na veika e rawa ni ra cakava me marau kina na Tamada Vakalomalagi. Kerei ira na gone tale eso mera vakilakila na ka era cakava tiko. Wasea vata kei ira yadua na gone e dua na ka o sa raica ni ra cakava koya vakamarautaka na Tamada Vakalomalagi.
O Jisu ena lesu mai ki vuravura.
Ena nona raivotu, a raica ko Inoki na veisiga e muri, e oka kina na iKarua ni Lako mai ni iVakabula. E rawa vakacava mo vukei ira na gone me ra vakanamata ki na iKarua ni Lako mai?
iTaviqaravi e Rawa ni Caka
-
Tukuna vei ira na gone me ra raitayaloyalotaka ni dua na vulagi talei ena mai sikovi ira. Na cava era na cakava me ra vakavakarau me baleta na veisiko? Wasea na vosa ni Turaga vei Inoke ena Mosese 7: 60: “Au [na] lako mai ena iotioti ni gauna.” Na cava soti eso na sala e rawa ni da vakavakarau kina me baleta na lesu mai nei Jisu?
-
Vakaraitaka eso na iyaloyalo ni veigauna e rairai kina na iVakabula vei ira na tamata (raica na Gospel Art Book, naba 60, 82, 83, kei na84). Na cava era sa cakava tiko na tamata ena iyaloyalo? Na cava era na vakila beka na tamata ni ra sota kei Jisu? Me ra wasea na gone na veika era vakila me baleta nodra na raici Jisu ena Nona lesu tale mai.
-
Lagata na sere me baleta na iKarua ni Lako Mai ni iVakabula, me vaka na “Ena Lesu Tale Beka Mai” (iVolanisere ni Gonelalai, 82–83), ka tarogi ira na gone se cava era nanuma ni na yaco ena lesu tale mai nei Jisu.
Vakavulica na iVunau: Gone Qase Cake
Eda rawa ni duavata me vaka na tamata kei Saioni.
Ni o wiliwili baleti Saioni, vakasamataka na ivakaraitaki ni duavata o sa raica. E rawa vakacava mo vukei ira na gone me ra vulica me ra dau duavata me vakai ira na tamata nei Inoke?
Taviqaravi e Rawa ni Caka
-
Kerei ira na gone me ra vakasaqara na vosa e vakamacalataki ira na tamata i Inoke, ka kilai talega me o Saioni, ni ra wilika na Mosese 7:18. Vola na vosa oqo me iulutaga ena ulu ni papa, ka sureti ira na gone me ra vola, ena ruku ni iulutaga yadua, na veika era rawa ni cakava me ra ucui ira kina na tamata nei Inoke. Ni ra wasea oti, tarogi ira na gone na cava era rawa ni cakava me vakai Saioni kina na nodra veivale. Era rawa ni kunea eso na vakasama mai na 4 Nifai 1:15–8.
-
Kerei ira na gone mera wilika na levu ni gauna e basika kina na vosa “Saioni” ena Mosese 7:18–21, 62–63, 68–69. Ena veigauna kece e basika mai kina na vosa, vukei ira na gone me ra raica na ka e tukuna na tikina me baleti Saioni (raica talega na iDusidusi ki na iVolanikalou, “Zion,” na ivolanikalou. ChurchofJesusChrist.org). Ena rawa vakacava meda vakai ira vakalevu cake na tamata era tukuni ena veitikina oqo?
-
Taurivaka na tabana ni itaviqaravi ena macawa oqo me vukei ira na gone me ra vakasamataka na sala eso e rawa kina ni ra “yalovata ka duavata” (raica na Mosese 7:18).
E tagi na Kalou e vukudra na Luvena.
E rawa vakacava mo vukei ira na gone mera raica ni Kalou e kauwaitaki keda kei na noda ivalavala?
iTaviqaravi e Rawa ni Caka
-
Tarogi ira na gone na cava e rawa ni vakavuna me tagi na Kalou (raica na Mosese 7:28–31). Sureti ira na gone mera vakasaqara ena Mosese 7:32–33, 37 na isau ni taro. Na cava era vakavulica vei keda na veitikina oqo baleta na loma ni Kalou me baleti ira na Luvena? Eda kila vakacava ni lomani keda na Kalou? Wasea na nomu ivakadinadina me baleta na loloma ni Kalou me baleti keda.
-
Kolotaka e dua na taga bini se e dua na polo vua e dua na gone. Kerei koya me vakaotia mada na matavosa “Au rawa vakamarautaki na Kalou ena” ka qai kolotaka na iyaya oqori vua e dua tale na gone. Vakayacora me yaco ni sa cakava kece na gone.
O Jisu Karisito ena lako tale mai ena iotioti ni gauna.
Ni o wilika me baleta na iKarua ni Lako Mai ena Mosese 7:60–67, vakasamataka na sala mera vakavulici kina na gone ena dua na sala rekitaki.
iTaviqaravi e Rawa ni Caka
-
Wilika vata na Mosese 7: 60–67, ka vukea me ra kila na gone na veika e kaya na Turaga ni na yaco ena iotioti ni veisiga. Tarogi ira ena veika cava ena yaco oqo era sa nanamaki kina ka cava na vuna.
-
Sureti ira na gone me ra tukuna e dua na gauna era a namaka kina me dua e veisiko mai se me lesu kina ki vale. Na cava era vakila na gone? Na cava era a cakava me ra vakavakarau kina? Eda na vakavakarau vakacava meda raici Jisu tale?
-
Vakaraitaka e dua na iyaloyalo ni iKarua ni Lako Mai ni iVakabula (me kena ivakaraitaki, raica na Gospel Art Book, naba 66). Me ra droinitaka na gone na nodra droini ni iKarua ni Lako Mai, vakayavutaki ena veika era sa wilika ena Mosese 7:60–67.
Vakauqeta na Vuli e Vale
Ena rawa vakacava mo vakauqeti ira na gone kei ira na nodra matavuvale me ra tomana na nodra vuli mai na Veiyalayalati Makawa e vale? Me kena ivakaraitaki, era rawa ni wasea na gone e dua na ka era droinitaka se rokataka ena Lalai me tiki ni dua na lesoni ni lotu vakamatavuvale.
Vakatorocaketaki Noda Veivakavulici
Vukei ira na gone me ra dauyavala. “Ni o vakavulici ira na gone, laivi ira mera tara, droinitaka, rokataka, vola, ka bulia. Na veika oqo sa ra levu cake mai na itaviqaravi lasa eso—era sa yaga sara ki na vuli” (Veivakavulici ena iVakarau ni iVakabula, 25).