o Noa, nona matavuvale, manumanu, na waqa, kei na dua na drodrolagi

iYaloyalo kei Noa ni biuta na waqa, mai vei Sam Lawlor

31 ni Janueri–6 ni Feperueri

Na iVakatekivu 6–11; Mosese 8

“Sa Kune Loloma soli wale kina ena Mata ni Turaga ko Noa”

Na vulici tiko me baleta na manumanu ena waqa nei Noa kei Valececere balavu mai Pepeli e rawa ni lasa vei ira na gone. Ia nanuma tiko ni italanoa oqo nakiti me ra vakavulica na dina tawamudu. Vakasamataka ena masumasu na dina e vinakata na Kalou me ra vulica na gone.

Vola na Veika o Vakauqeti Kina

ivakatakilakila ni veiwasei

Sureta na Veiwasei

Ni bera ni o tekivu vakavulica na italanoa ena iVakatekivu 6–11 kei na Mosese 8 vei ira na gone, solia vei ira na madigi mera veivakavulici vakai ira ena veika era kila baleti Noa kei na waqa se na Valececere mai Pepeli.

ivakatakilakila ni veivakavulici

Vakavulica na iVunau: Gone Sobu

Na iVakatekivu 6:14–22; 7–8; Mosese 8:16–30

Na muria tiko na parofita ena vakalougatataki au kei na noqu matavuvale.

Ni ra vulica na gone mera muria na parofita, era na vakalougatataki ka taqomaki vakayalo, me vaka ga na matavuvale nei Noa ni a maroroi vinaka tu mai na Waluvu.

iTaviqaravi e Rawa ni Caka

• Ena nomu vosa ga, tukuna vei ira na italanoa kei Noa kei na waqa (raica na “Ko Noa kei na Nona Matavuvale,” ena ITukuni ni Veiyalayalati Makawa; raica talega na “Muria na Parofita,” iVolanisere ni Lalai, 110–11, tikina 3). Vukei ira na gone mera matanataka eso na tiki ni italanoa—me kena ivakaraitaki, me totomuria na vakayagataka e dua na iyaya me tara kina na waqa se lako voli me vaka na manumanu sa curu ki waqa.

• Wilika vei ira na gone na Mosese 8:19–20, ka vakabibitaka na veika a vakarota na Turaga vei Noa me cakava. Vukei ira na gone me ra kila ni sa parofita o Noa ka a vakabulai na nona matavuvale mai na Waluvu baleta ni ratou muri koya. Tarogi ira na gone kevaka era kila o cei e noda parofita nikua. Vakaraitaka e dua na kena itaba, ka vukei ira na gone mera tokaruataka na yacana.

• Kauta mai ki na kalasi na iyaloyalo se iyaya ka matataka na ivakavuvuli ni parofita ena gauna oqo, me vaka na ivolanikalou se dua na itaba ni dua na valetabu. Me ra veivukevuke ena kena digitaki e dua na iyaya ka tukuna na ka era kila baleta na iyaya. Vakamacalataka vei ira na cava e matataka na iyaya o ya. Vakayaloqaqataki ira me ra droinitaka e dua na kedra iyaloyalo ni ra talairawarawa tiko ki na veika sa vakatavuvulitaka na parofita. Wasea na nomu ivakadinadina me baleta na veivakalougatataki ni vakamuria na parofita.

Na iVakatekivu 9:15–16

Na Kalou ena maroroya na Nona yalayala vei keda.

Sa ka bibi vei ira na gone me ra kila ni Kalou e dau dinata na Nona yalayala, vakabibi ni ra vakavakarau me ra cakava na veiyalayalati vata kei Koya ena gauna era sa papitaiso kina.

iTaviqaravi e Rawa ni Caka

• Sureti ira na gone me ra droinitaka na iyaloyalo ni drodrolagi. Wilika vei ira na iVakatekivu 9:15–16, ka kerei ira mera vakarogoca na vosa nanuma. Sureti ira mera laveta na nodra veidrodrolagi ni ra sa rogoca na vosa. Vakamacalataka ni drodrolagi e ivakananumi ni yalayala sa vakayacora na Kalou vei keda.

• Tukuna vei ira na gone eso na yalayala ni Kalou—me kena ivakaraitaki, ni da rawa ni lesu tale vua na Tamada Vakalomalagi kevaka eda sa muri Jisu Karisito se ni na tala mai na Kalou na Yalo Tabu me vakacegui keda. Wasea na nomu ivakadinadina ni Kalou e dau dinata tu ga na Nona yalayala.

• Vakayagataka na iyaloyalo mo tukuna vei ira na gone me baleta na veiyalayalati eda cakava vata kei na Kalou, me vaka na iyaloyalo ni gone e papitaiso, na sakaramede, kei na dua na valetabu (raica na Gospel Art Book, naba 104, 108,120).

Na iVakatekivu 11:1–9

Na sala duadua ga me yacovi kina o lomalagi oya na muri Jisu Karisito.

Era vakasamataka na tamata e Pepeli mera yaco rawa ki lomalagi ena nodra tara cake e dua na vale ka sega ena bulataka na kosipeli i Jisu Karisito. E rawa vakacava ni o vukei ira na gone me ra kilamatata ni vakamuria na iVakabula e sala duadua me lesu kina vei Tamada Vakalomalagi?

iTaviqaravi e Rawa ni Caka

• Tukuna na italanoa ni Valececere e Pepeli ena nomu vosa ga, se wilika na italanoa e kune ena “Na Valececere e Pepeli” (ena ITukuni ni Veiyalayalati Makawa). Vakayaloqaqataki ira na gone me ra vukei iko ena nodra wasea na veika era kila me baleta na italanoa oqo.

  iyaloyalo ni valececere mai Pepeli

  iYaloyalo ni Valececere mai Pepeli, mai vei David Green

• Mera tara na gone e dua na vale cecere mai na buloko, se na veika tale eso. Mo qai vakaraitaka vei ira na gone e dua na iyaloyalo ni iVakabula, ka tarogi ira na cava na sala me da lesu tale kina vua na Tamada Vakalomalagi—na kena tarai cake e dua na vale se na muri Jisu Karisito? Sureti ira na gone me ra tukuna na veika era rawa ni cakava me ra muria kina na iVakabula.

vakatakilakila ni veivakavulici

Vakavulica na iVunau: Gone Qase Cake

Na iVakatekivu 6:14–22; 7–8; Mosese 8:16–30

Na muria tiko na parofita ena vakalougatataki au kei na noqu matavuvale.

Era sa tubucake tiko na gone ena dua na vuravura ca, tautauvata ena so na sala kei na gauna nei Noa. E rawa ni solia vei ira na yalodei na ka ea sotava o Noa ni ra rawa ni kune veitaqomaki vakayalo ni ra vakamuria na parofita.

iTaviqaravi e Rawa ni Caka

• Vukea mera digia na gone na veitikina mai na iVakatekivu 6:14–22; 7–8 era rawa ni droinitaka. Vakayagataka na nodra droini me vakavulica vei ira na italanoa kei Noa. Kerei ira na gone me ra wasea na ka era vulica mai na italanoa.

• Vakaraitaka e dua na iyaloyalo kei Noa (raica na Gospel Art Book, naba 7–8) kei na kena na parofita edaidai. Vukea mera vakasaqaqara na gone ena Mosese 8:16, 19–20, 23–24 mera kunea na veika e vakatavulica o Noa era se vakatavulica tiko ga na iliuliu ni Lotu edaidai. Eda na vakalougatataki vakacava ni da talairawarawa kina vei ivakavuvuli oqo?

• Wasea e dua na ka a vakatavulica wale tikoga oqo na parofita ena gauna oqo. Kerei ira na gone me ra vola e dua na ka sa vakatavuvulitaka na parofita ena tikinipepa eso, ka vukei ira me ra tuva na tikinipepa me vaka na ibulibuli ni dua na waqa. E vaka vakacava na ivakavuvuli oqo na waqa ka tara ko Noa?

Na iVakatekivu9:15—17

E dodonu meda nanuma tiko na noda veiyalayalati.

Ni da sa papitaiso, eda sa cakava na veiyalayalati vata kei na Kalou me talairawarawa ki na Nona ivakaro. Ena iVakatekivu 9:15–17, na drodrolagi e raici me ivakananumi ni veiyalayalati ni Kalou. Na veitikina oqo e rawa ni vakauqeti ira na gone mera vakasaqara na sala eso mera nanuma tiko kina na nodra veiyalayalati kei na Kalou.

iTaviqaravi e Rawa ni Caka

• Vakaraitaka vei ira na gone e dua na nomu ka e dau vakananumi iko ena dua na ka bibi ena nomu bula, me vaka e dua na mama ni vakamau, e dua na itaba se dua na ivolaniveisiga. Sureti ira na gone mera wasea na nodra dui ivakaraitaki. Wilika vata Na iVakatekivu 9:15–17 (raica talega na iVakadewa i Josefa Simici, iVakatekivu wase 9:21–25 [ena appendix ni iVola Tabu]). Na cava e vinakata na Tamada Vakalomalagi meda vakasamataka ni da raica e dua na drodrolagi?

• Vakananuma vei ira na gone na veiyalayalati era sa cakava ena gauna era a papitaiso kina ka ra vakavouya ena veigauna kece era kania kina na sakaramede (raica na Mosaia 18:8–10; Vunau kei na Veiyalayalati 20: 77, 79). Mera droinitaka se cakava na gone e dua na ka me vakananuma vei ira na nodra veiyalayalati.

Na iVakatekivu 11:1–9

Na sala duadua ga me yacovi kina o lomalagi oya na muri Jisu Karisito.

O ira na tamata nikua era sega beka ni tovolea me ra tara na vale balavu eso me yacovi lomalagi, e vuqa na tovolea me ra kunea na vakacegu kei na marau mai na muri ni sala duatani mai vei koya sa tauyavutaka tu o Jisu Karisito. O na vakayagataka vakacava na italanoa ni Valececere mai Pepeli me vakavulica na ivakavuvuli oqo?

iTaviqaravi e Rawa ni Caka

• Kerei ira na gone me ra wasea na veika era kila me baleta na italanoa ni Valececere mai Pepeli (raica na Na iVakatekivu 11:1–9). Me vaka ena Ilamani 6:28, na cava na vuna era tara kina na valececere na tamata e Pepeli? Na cava e cala kina na tara na valececere oqo me sala ni yacovi lomalagi? Na ivakasala cava e rawa ni da solia vei ira na tamata e Pepeli?

• Sureti ira na gone mera vakasaqara ena 2 Nifai 31:20–21 kei Ilamani 3:28 me kunei na sala dodonu ni yacovi lomalagi. Solia na nomu ivakadinadina me baleta na iVakabula ko Jisu Karisito.

ivakatakilakila ni vuli

Vakauqeta na Vuli e Vale

Sureti ira na gone me ra vakasamataka na sala eso era na vakavulici ira kina na nodra matavuvale me baleta na italanoa era a vulica ena Lalai. Me ivakaraitaki, e rawa ni ra vakayagataka iyaloyalo era a droinitaka se tabana ni itaviqaravi ena macawa oqo.

Vakatorocaketaki Noda Veivakavulici

Vakasaqara mo kilamatata na gone o vakavulica. Ni o vakavulici ira na gone, vakarogoca matua na nodra taro, nodra vosa, kei na italanoa se ivakavuvuli ka vaka me vakaibalebale vakalevu vei ira. Na kila na veika oqo ena vukei iko mo vakanamata ki na veika era gadreva.

tabana ni itaviqaravi: na muria ni parofita ena vakalougatataki au kei na noqu matavuvale