Repeka

Droini kei Repeka, mai vei Dilleen Marsh

21–27 ni Feperueri

Nai Vakatekivu 24–27

Sa Vakavoui na Veiyalayalati

Ni o wilika na Nai Vakatekivu 24–27 ka vakavakarau tiko mo veivakavulici, vakasamataki ira na gone ena nomu kalasi. Na cava era gadreva me ra rogoca? O cei vei ira na itaviqaravi oqo e na rawa me vakaibalebale vei ira? Yavutaki ena nodra gagadre, e rawa ni o moica e dua ga na itaviqaravi ka okati eke se o ira era tiko ena Mo Lako Mai, Mo Muri Au—Baleta na Tamata Yadua kei na Matavuvale.

Vola na Veika o Vakauqeti Kina

ivakatakilakila ni veiwasei

Sureta na Veiwasei

Ena ruku ni idabedabe ni gone yadua, biuta kina e dua na taro me baleta e dua na soqo se na ivakavuvuli ena Nai Vakatekivu 24–27. Me ra sauma na taro na gone ke ra rawata, se sureti ira me ra vakarogoca na isaunitaro ena gauna ni lesoni.

ivakatakilakila ni veivakavulici

Vakavulica na iVunau: Gone Sobu

Nai Vakatekivu 24:10–21

Au rawa ni lomavinaka vei ira na tani.

E marautaka na dauveiqaravi nei Eparama na vakasakiti ni lomavinaka ka a vakaraitaka vua o Repeka ni a saga me soli wai, sega walega ki vua ia ki na lewe 10 talega ni nona kameli. Na nona ivakaraitaki e rawa me dua na iveivakananumi vei ira na gone me ra dau lomavinaka vei ira na tani.

e dua na tobu makawa

E dua na tobu ni wai e Peri-sepa makawa, ka rau a keli tobu kina ko Eparaama kei Aisake.

Taviqaravi e Rawa ni Caka

• Vakaraitaka na iyaloyalo kei Repeka ena tabana ni itaviqaravi ena macawa oqo. Dusia na matailalai ni iyaloyalo ena nomu vakalekalekataka na italanoa ena Nai Vakatekivu 24:10–21, ka a vakaraitaka kina o Repeka na lomavinaka vua na dauveiqaravi i Eparaama. Dusia ni nona vosa kei na ivalavala ni lomavinaka e sa ivakatakilakila ni sai Repeka ka a vinakata na Kalou me vakamau vei Aisake na luvei Eparaama. Sureti ira na gone me ra vakatovotovotaka ni ko ira na tamata e yaco mai kei irana kameli se o Repeka e takiva medra wai. Solia vei ira na matavosa eso mera cavuta mai na ivolanikalou, me vaka na “Mo vagunuvi au mada vakalailai”(tikina e 17) kei na “Au na takiva vei ira talega na nomu kameli” (tikina e 19). Na cava na vuna e bibi kina vei keda meda loma vinaka vei ira na tani?

• Tukuna vei ira e dua na italanoa me baleta na sala e vakaraitaka kina na iVakabula na loma vinaka vua e dua. Sureta eso na gone me ra wasea na veika era sotava ni ra vakaraitaka na lomavinaka.

• Vakatura e vica na ivakaraitaki e rawa kina vua e dua na gone me vakaraitaka na lomavinaka, me vakataka na qito vata kei ira na itokani se na sotava e dua na gone vou e koronivuli. Tarogi ira na gone na cava era rawa ni cakava mera lomavinaka kina ena ivakaraitaki eso oqo.

• Lagata vata kei ira na gone e dua na sere me baleta na lomavinaka, me vakataka na “Loloma Noqu iGu” se “I‘m Trying to Be like Jesus” (Nodra iVolanisere na Lalai, 145, 78–79). Sureti ira na gone mera vakarorogo ki na vosa “lomavinaka” (se dua na vosa e tautauvata) ka tucake ni ra rogoca. Eda rawa ni vakaraitaka vakacava na lomavinaka vei ira na tani? Ena rawa ni veivuke ena veivosaki oqo na tabana ni itaviqaravi ena macawa oqo .

Nai Vakatekivu 25:29–34

Au rawa ni digitaka na veika e bibi duadua.

Baleta ni o Iso na gone qase duadua ena nona matavuvale, a nanumi ni okoya me na nona na bibi ni itavi kei na galala, ka vakatokai me itutu ni ulumatua. Ena dua na siga sa walokai ena viakana ko Iso, qai volitaka na nona itutu ni ulumatua ki vua na tacina, ko Jekope, me isau ni kakana. Na italanoa oqo e rawa ni vakavulici ira na gone ni sa dodonu me da digitaka na veika bula balavu mai na veivakacegui vakalekaleka.

iTaviqaravi e Rawa ni Caka

• Kauta mai ki na kalasi eso na iyaya ka na rawa ni tukuna na italanoa kei Iso ni volitaka na nona itutu vakaulumatua, me vaka e dua na beseni kei na kena iyaloyalo e dua e taura tiko na veivakalougatataki ni matabete. Sureti ira na gone me ra vakayagataka na iyaya ni ra tukuna tiko vei iko na veika era kila me baleta na italanoa. “Jekope kei na Iso“ (ena iTukuni ni Veiyalayalati Makawa) e rawa ni veivuke. Wilika vata Nai Vakatekivu 25:34, ka vakamacalataka ni o koya ga e tu vua na itutu ni ulumatua e tu vua na galala digitaki kei na itavi me qarava na vo ni matavuvale.

• Vakaraitaka vei ira na gone e rua na iyaloyalo: e dua vei rau me ka yaga cecere vakayalo (me vaka e dua na valetabu) ka dua vei rau me ka ena kauta mai na marau vagauna ga (me vaka e dua na qito, na iyaya ni vakatatalo, se na ivakalomavinaka). Kerei ira me ra digitaka na ka ena vukei keda vakavinaka cake meda na lesu tale vua na Tamada Vakalomalagi. Me tokaruataki ena veiyaloyalo yadua.

• Lagata vata kei ira na gone e dua na sere me baleta na digidigi vinaka, me vakataka na “Choose the Right Way” (iVolanisere ni Lalai, 160–61). Vakadinadinataka ni da sa kalougata ka marau ni da digitaka na dodonu.

ivakatakilakila ni veivakavulici

Vakavulica na iVunau: Gone Qase Cake

Nai Vakatekivu 12:1–28

Au na vakalougatataki niu cakacaka ena vakabauta ka vakaraitaka na lomavinaka vei ira na tani.

Era a vakaraitaka na dauniveiqaravi nei Eparaama na vakabauta ena nona ravita na veidusimaki ni Kalou me kunea e dua na wati Aisake. E vakaraitaka na lomavinaka o Repeka mai na ivakarau a qarava kina na dauniveiqaravi i Eparaama. E rawa vakacava mo vukei ira na gone o vakavulica mera vakamuria na ivakaraitaki ni tamata i Eparaama kei Repeka?

iTaviqaravi e Rawa ni Caka

• Wilika vata Nai Vakatekivu 24:1–28 ka, vukei ira na gone mera raica na ivakaraitaki ni vakabauta kei na lomavinaka (raica, me kena ivakaraitaki, na tikina e 12–14 kei na 17–20). Erau vakalougatataki vakacava na tamata i Eparaama kei Repeka ni rau vakaraitaka na vakabauta kei na lomavinaka? Vola ena papa Eda rawa ni vakaraitaka na vakabauta ena … kei na E rawa ni da vakaraitaka na lomavinaka ena … , ka sureti ira na gone me ra vakatura na sala eso me vakaoti kina na veiyatuvosa oqo.

• Vola ena tiki ni pepa eso, na veika a tukuna se cakava na dauniveiqaravi nei Eparaama kei na veika a tukuna se cakava o Repeka ena Nai Vakatekivu 24:1–28. Sureti ira na gone mera digitaka e dua na tiki ni pepa ka cakacaka vata me ra kilakila o cei a tukuna se cakava na veika oqo (e rawa ni ra rai ki na ivolanikalou ke ra gadreva na veivuke). Na cava e vakatavulica vei keda na italanoa oqo me baleta na lomavinaka? Na cava e vakavulica vei keda me baleta na vakabauta? Eso tale na ivakaraitaki ni lomavinaka kei na vakabauta e kunei ena Nai Vakatekivu 24:29–33, 58–61.

• Sureti ira na gone me ra vakasamataka mada e dua na ivalavala ni lomavinaka era sa raica. Sureti ira mera vola ka wasea ki na kalasi se na nodra matavuvale mai vale. Na cava eda vakila ni dua e lomavinaka vei keda?

Nai Vakatekivu 25:21–34

Au na vakabibitaka na veika e tawamudu mai na veika vakayago.

E digitaka o Iso me volitaka e dua na ka yaga cecere, na nona itutu ni ulumatua, me veisau kei na dua na ka yaga vakalailai, eso na madrai kei na e dua na peleti supu. Ni o wilika na veitikina oqo, tugana na sala mo vukei ira kina na gone me vakaliuca na veika e tawamudu na kena bibi.

Taviqaravi e Rawa ni Caka

• Wilika vata na italanoa nei Jekope kei Iso ena Nai Vakatekivu 25:21–34. Ni ko ni wiliwili tiko, sureti ira yadua na gone mera digitaka e dua na ka mera droinitaka mai na italanoa. Mo qai sureti ira me ra vakayagataka na nodra iyaloyalo me ra tukuna na italanoa ena nodra vosa. Kevaka era gadreva na veivuke me kilaimatata na cava na itutu ni ulumatua, vakayaloqaqataki ira mera wilika na “iTutu ni Ulumatua” ena iDusidusi ki na iVolanikalou (ChurchofJesusChrist.org). Sureti ira na gone mera raitayalotaka ni kere noda ivakasala o Iso me baleta nona volitaka na nona itutu ni ulumatua ena rourou; na cava eda na kaya vua?

• Tukuna vei ira me baleta e dua na gauna a solia kina e dua na ka vinaka me sosomitaki ena dua na ka yaga vakalevu cake sara. Se vakaraitaka na vidio “Continue in Patience” (ChurchofJesusChrist.org). Na nomu italanoa se italanoa ena vidio e semati vakacava ki na digidigi nei Iso ena Nai Vakatekivu 25:29–34? Vukei na gone me ra vakasamataka na veivakalougatataki e vinakata na Tamada Vakalomalagi me solia vei ira (me vaka e dua na ivakadinadina kaukauwa cake, na veivakalougatataki ni valetabu, se na bula tawamudu vata kei koya). Vakayaloqaqataki ira me ra vakasamataka na veika era na rawa ni yalorawarawa mera solibula kina me rawa ni ra ciqoma na veivakalougatataki bibi oqo.

learning icon

Vakauqeta na Vuli e Vale

Sureti ira na gone me ra vakasamataka e dua na takete e rawa ni ra virikotora me baleta e dua na ivakavuvuli era sa vulica nikua. Me kena ivakaraitaki, e rawa mera biuta e dua na takete me ra lomavinaka vei ira na tani mai vale.

Vakatorocaketaki Noda Veivakavulici

Era taleitaka na gone me ra wasea na veika era vulica tiko. E dina ni ra se gone, sa rawa vei ira na gone me ra vaqaqacotaka na lewe ni nodra matavuvale. Vakayaloqaqataki ira na gone me ra wasea ki na nodra matavuvale e dua na ka era vulica ena Lalai. (Raica na Veivakavulici ena iVakarau ni iVakabula, 30.)

tabana ni itaviqaravi: Au rawa ni lomavinaka vei ira na tani.