Valetabu e Tijuana México

28 ni Feperueri–6 ni Maji

Nai Vakatekivu 28–33

“Sa Tiko Vakaidina ko Jiova ena Yasana Oqo”

Ni ko wilika na Nai Vakatekivu 28–33, tugana na sala ena rawa ni vakalougatataki ira kina na gone o vakavulica na italanoa kei na ivakavuvuli ena wase eso oqo.

Vola na Veika o Vakauqeti Kina

ivakatakilakila ni veiwasei

Sureta na Veiwasei

Sureti ira na gone me viri se vaqiqi polo vua e dua tale. Ni ra ciqoma na gone na polo, kerei ira mera wasea na veika era sa vulica tiko mai na Veiyalayalati Makawa, mai vale beka se ena Lalai.

ivakatakilakila ni veivakavulici

Vakavulica na iVunau: Gone Sobu

Nai Vakatekivu 28:10–22

Na veiyalayalati e vukea meu lesu vua na Tamada Vakalomalagi.

Ena dua na tadra, a raica ko Jekope e dua na ikabakaba e mua tu yani ki lomalagi. Na veikalawa ena ikabakaba e rawa ni matataka na veiyalayalati eda cakava vata kei na Kalou, baleta ni veivuke na veiyalayalati oqori meda vakarautaki keda meda lesu tale ki na Nona iserau.

iTaviqaravi e Rawa ni Caka

• Wilika na Nai Vakatekivu 28:12–13 vei ira na gone. Vakamacalataka ni na veikalawa ena ikabakaba e rawa ni matataka na veiyalayalati ka na vukei keda meda lesu rawa vei Tamada Vakalomalagi. Sureti ira na gone me ra vakatovotaka ni ra sa kaba ikabakaba ni o tukuna tiko me baleta na gauna eda yalataka me da talairawarawa vua na Kalou, me vaka ni da papitaiso, vakayagataka na sakaramede, se lako ki valetabu. Vukei ira na gone me ra vakasamataka na sala e rawa ni ra vakavakarau kina me ra cakava na veiyalayalati ni ra sa papitaiso.

• Wilika na Nai Vakatekivu 28:15 vei ira na gone, ka vakabibitaka na vosa “Au na tiko vata kei iko” kei na “Au na sega ni biuti iko.” Vakamacalataka ni sa yalataka na Kalou me na dau tiko vata kei keda ni da saga tiko meda digitaka na dodonu. Vukei ira na gone me ra vakasamataka na veika e rawa ni ra cakava me ra vakila ni ra voleka vua na Tamada Vakalomalagi kei Jisu Karisito.

Nai Vakatekivu 29:16–28

E dodonu meu dau maroroya tikoga na noqu iyalayala.

E vakadonuya o Jekope me qaravi Lepani me vitu na yabaki me rawa kina ni vakamautaka na luvena yalewa i Lepani ko Rejieli. E maroroya o Jekope na veidinadinati oqo, ia a sega ko Lepani. Navuca mo taurivaka na italanoa oqo me vakavulici ira na gone me baleta na bibi ni kena maroroi na noda veiyalayalati.

iTaviqaravi e Rawa ni Caka

• Wilika na Nai Vakatekivu 29:18, 20 vei ira na gone, ka vakamacalataka ni ko Jekope e maroroya na nona iyalayala me vitu na yabaki vei Lepani me rawa ni vakamautaki Rejeli, veitalia sara na balavu ni gaunameda cakacaka kina (raica talega “Ko Jekope kei na Nona Matavuvale,” ena ITukuni ni Veiyalayalati Makawa). Vukea mera vakasamataka na gone na iyalayala era na rawa ni cakava vei ira tale eso. Na cava na vuna e bibi kina me da dau rokova na noda iyalayala? Vukei ira mera kilamatata ni na veiyalayalati sa dua na iyalayala tabu vei keda yadua kei na Kalou. Wasea na nomu ivakadinadina ni o Tamada Vakalomalagi kei Jisu Karisito e Rau dau maroroya tikoga na Nodrau iyalayala.

• Lagata vata ka veivosakitaka e dua na sere me baleta na yalodina, me vaka na “Au Vakabauta na Noda Yalodina” se “Tutaka na Dina” (iVolanisere ni Lalai, 149, 159).

Nai Vakatekivu 33:1–4

Sa rawa ni vukei au na Tamada Vakalomalagi meu lomana na noqu matavuvale.

E vuqa na gone era kila e na veika dau vakilai era cudruva e dua na tacidra. Na italanoa ka rau uabaleta rawa na nodrai veidruvi o Jekope kei Iso e rawa ni veivakauqeti vei ira.

Erau veimokomoko o Jekope kei Iso

Na iyaloyalo ni nodrau veimokomoko o Jekope kei Iso, mai vei Robert T. Barrett

iTaviqaravi e Rawa ni Caka

• Vukei ira na gone mera nanuma tiko na cava na vuna a cudruvi Jekope kina o Iso (raica na Nai Vakatekivu 27:41 se “O Jekope kei Iso,” mai na iTukuni ena Veiyalayalati Makawa). Kerei ira na gone me ra vakaraitaka vei iko e rairai vakacava e dua na mata cudrucudru. Vakamacalataka ni oti e vica vata na yabaki, a rere me sikovi Iso o Jekope. Kerei ira na gone me ra vakaraitaka vei iko e vakacava na irairai ni dua na mata ni rere. Na cava e dodonu meda cakava ni da sa rere? Sureti ira na gone mera vakatovotovotaka ni ra masu tiko ni ko wilika na ka e kaya o Jekope ena nona masu (raica na Nai Vakatekivu 32:11). Qai wilika na Nai Vakatekivu 33:4 na cava a yaco ni sa raici Jekope o Iso. Kerei ira na gone me ra vakaraitaka vei iko ni vakacava beka na irairai ni matai Jekope kei Iso ni rau sa veirai mata tale.

• Vakaraitaka na iyaloyalo kei Jekope kei Iso e tiko ena ituvatuva oqo. Tarogi ira na gone se cava era raica ena iyaloyalo. Tukuna vei ira ni sa tu na veimaliwai ca vei rau na veitacini oqo, ia erau sa digitaka me rau veivosovosoti vakai rau. Vukei ira na gone me ra vakasamataka na sala era rawa ni vakaraitaka kina na loloma vua tale e dua ena nodra matavuvale, me vaka na nodrau ivakaraitaki o Jekope kei Iso ni veilomani.

ivakatakilakila ni veivakavulici

Vakavulica na iVunau: Gone Qase Cake

Nai Vakatekivu 28:10–22

Na veiyalayalati e vukea meu lesu vua na Tamada Vakalomalagi.

Sa rawa mo taurivaka na tadra nei Jekope ni dua na ikabakaba e cabe cake ki lomalagi me vakavulici ira na gone ena maroroi ni noda veiyalayalati e vakarautaki keda me da curu ki na iserau ni Kalou.

iTaviqaravi e Rawa ni Caka

• Sureti ira na gone me ra wilika na Nai Vakatekivu 28:10–15 ka mera qai droinitaka e dua na iyaloyalo ni tadra nei Jekope. Kerea me ra wasea na nodra iyaloyalo. Vakamacalataka ni na ikabakaba e matataka e dua na sala me lesu tale kina o Jekope vua na Kalou. Na cava a solia na Kalou me vukea na noda lesu tale Vua? (raica na tabana ni itaviqaravi ena macawa oqo). Veivakananumi vei ira na gone ena nodra veiyalayalati ni papitaiso. Ena kauti keda vakavoleka vakacava vua na Kalou na bulataki ni veiyalayalati oqo?

• Vakaraitaka e dua na iyaloyalo ni dua na valetabu, ka vola ena papa na matavosa bibi mai na Nai Vakatekivu 28:15–17, me vaka: “Au na tiko vata kei iko,” “Sa tiko na Turaga ena vanua oqo,” “Na vale ni Kalou”, se “Na matamata kei lomalagi.” Sureti ira na gone me ra kunea na matavosa eso oqo. Tukuna vei ira na gone e vukei iko vakacava na valetabu kei na veiyalayalati ni valetabu mo vakila na nomu voleka vua na Turaga.

Nai Vakatekivu 29:16–30

Au vakabauta ni sa kilikili meu dau dina tikoga.

O Jekope e maroroya na nona iyalayala me qaravi Lepani me yabaki vitu, ia ko Lepani a vakaisini koya. E rawa vakacava mo vakayagataka na italanoa oqo me vukei ira na gone mera kilamatata na bibi ni yalodina ni ra veivakaisini na tani?

iTaviqaravi e Rawa ni Caka

• Wilika vata na Nai Vakatekivu 29:16–30, ka vukei ira na gone me vakalekalekataka na veika a yaco ena veitikina oqo. Na cava na imoimoi nei Jekope ni sa vakaisini? Na cava eda vulica rawa mai na itukutuku oqo?

• Vola ena papa Na cava ena yaco ni da sa sega ni dina? kei na Na cava ena yaco ni da sa yalodina? Sureti ira na gone me ra kunea na isaunitaro ena nodra wilika na “Yalodina ka Yalododonu” (ena Me iSakisaki ni iTabagone [2011], 19).

Nai Vakatekivu 32:6–11; 33:1–4

Sa rawa ni vukei au na Tamada Vakalomalagi meu lomana na noqu matavuvale.

E sa rarawataki Jekope sara ga o Iso, ka sa rere ni raici Iso tale o Jekope, e dina ni sa sivia e 20 na yabaki ni tu veiyawaki. Ia sa masulaka na veivuke ko Jekope, ia sa uabaleta rawa ko Iso na nona cudru. E rawa mo vakayagataka vakacava na italanoa oqo me ra vakavulici kina na gone ena bibi ni noda lomani ira na noda matavuvale?

iTaviqaravi e Rawa ni Caka

• Tarogi ira na gone ena veika era nanuma ena veimaliwai nei Jekope kei Iso (raica na Nai Vakatekivu 27:41 se “O Jekope kei Iso,” mai na iTukuni ena Veiyalayalati Makawa). Vakamacalataka ni oti na nona yali tu me rauta e 20 na yabaki, sa qai laki sotavi Iso tale ko Jekope. Wilika vata na Nai Vakatekivu 32:6–11. E vakacava tu vakila nei Jekope? Na cava a cakava me kunea na veivuke? Vakadinadinataka ni da rawa ni kere veivuke vei Tamada Vakalomalagi ni sa dredre na noda veimaliwai vakamatavuvale. Wilika vata na Nai Vakatekivu 33:1–4 me da kunea na Nona sauma vakacava na Turaga na masu nei Jekope.

• Wasea na veika o sotava se e dua na italanoa mai na mekesini ni Lotu ena sala meda loloma vakalevu cake kina ena noda matavuvale. Sureti ira na gone mera wasea talega na veika era sotava. Na cava e rawa ni da cakava ni cudruvi keda e dua na lewe ni matavuvale? Me vulici na ka e vakavulica na iVakabula meda cakava, raica na Maciu 5:43–45.

ivakatakilakila ni vuli

Vakauqeta na Vuli e Vale

Sureti ira na gone me ra wasea na tabana ni itaviqaravi ena macawa oqo kei na nodra matavuvale me vukei ira mera vulica ka dau nanuma na tadra nei Jekope.

Vakatorocaketaki ni Noda Veivakavulici

Taurivaka na iyaloyalo me vukei ira na gone mera kilamatata na italanoa mai na ivolanikalou. Era dau vuli vakavinaka cake na gone ni ra rawa ni raica na iyaloyalo ni italanoa se ivakavuvuli mai na ivolanikalou. E rawa ni o vakaraitaka na iyaloyalo ni ituvatuva ni macawa oqo ena Lako Mai, Mo Muri Au—Me Baleta na Tamata Yadua kei na Matavuvale.

tabana ni itaviqaravi: Era vukei au na veiyalayalati meu lesu vua na Tamada Vakalomalagi.