Mosese kei na Vunikau Kama, mai vei Harry Anderson

21–27 ni Maji

Na Lako Yani 1–6

“Kau sa Nanuma na Noqu Vosa ni Yalayala”

Tekivuna nomu vakavakarau ni veivakavulici ena nomu wilika na Lako Yani 1–6. iTuvatuva ni Macawa Oqo ena Lako Mai, Mo Muri Au—Baleta na Tamata Yadua kei na Matavuvale sa rawa ni vukei iko mo kilamatata na veiwase oqo, ka rawa ni solia vei iko na ituvatuva oqo eso na vakasama ni veivakavulici.

Vola na Veika o Vakauqeti Kina

Sureta na Veiwasei

Vakaraitaka eso na iyaya ka sema tiko ki na itukutuku ena wase eso oqo—me ivakaraitaki, e dua na basikete levu se e dua na matakau ni gone. Sureti ira na gone me ra vakayagataka na veiyaya oqo mera wasea kina na nodra tikina talei mai na italanoa kei Mosese.

Vakavulica na iVunau: Gone Sobu

Na Lako Yani 1–2

Na Kalou e rawa ni vakayagataki au me vakayacora na Nona ituvatuva.

E dua na itavi levu vei Mosese me sereki ira na Isireli mai na veivakabobulataki. Ia ena sega ni rawa ni vakayacora oqo kevaka era a sega ni taqomaka ka qaravi koya na tinana, ganena, na luvei Fero yalewa, kei na so tale na marama yalodina.

iTaviqaravi e Rawa ni Caka

• Vakayagataka na tabana ni itaviqaravi ni macawa oqo kei na “Miriama” (ena ITukuni ni Veiyalayalati Makawa) me tukuna vei ira na gone na sala era a susugi Mosese kina o Jokapeti (na tinai Mosese), o Miriama (na ganena) kei na luveyalewa i Fero. Vakabibitaka ni baleti ira oqo kei na so tale na marama yalodina, e taqomaki tu kina o Mosese ka me liutaki ira na luvei Isireli ena dua na siga ki na bula taqomaki. Sureti ira na gone me ra droinitaka na iyaloyalo ni tamata era kauwaitaki ira.

  

  Mosese ena Veikuta, © Providence Collection/vakalaiseni mai goodsalt.com

• Lagata vata e dua na sere ni veiqaravi, me vaka na “‘Give,’ Said the Little Stream” (Nodra iVolanisere na Lalai, 236). Vukei ira na gone mera vakasamataka na veika rawarawa e rawa ni ra cakava me vukei ira na tani mai vale, e valenilotu, ka mai koronivuli.

Na Lako Yani 3

Ena vukei au o Jisu niu cakava na veika vinaka.

E lomaleqataka o Mosese se na rawa me sereki ira na Isireli mai Ijipita. Ia e yalataka na Turaga ni na vukei Mosese. Vukea mera rawata na gone na vakabauta ni na vukei ira talega na iVakabula.

iTaviqaravi e Rawa ni Caka

• Tukuna vei ira na gone baleta ni a solia na Turaga e dua na cakacaka bibi me cakava o Mosese. Wilika na veitikina digitaki mai na Na Lako Yani 3, se wilika na “Ko Mosese na Parofita” (ena ITukuni ni Veiyalayalati Makawa). Wasea e vakacava na lomai Mosese (raica na Na Lako Yani 3:6, 11) ka cava e tukuna vua na Turaga (raica na tikina e 12 kei na 14). Sureti ira na gone me ra cavuta vata kei iko na matavosa “Au na tiko vakaidina kei iko”, ka wasea e dua na gauna ka a tiko kina kei iko na Turaga ni a tiko e dua na ka bibi mo a cakava me baleti Koya.

• Vukei ira na gone e vakasamataka eso na ituvaki ka ra na rawa ni kerei kina mera cakava e dua na ka e vaka me dredre. Vakamacalataka ni vaka ga ni a vukei Mosese o Jisu, ena vukei ira talega o Jisu. Lagata e dua na sere me baleta e vukei keda vakacava o Jisu, me vaka na “Au na Lako Vata kei Jisu” (ChurchofJesusChrist.org). Vakadinadinataka ni na vukei keda na iVakabula ni da lomaleqa se rere.

• Kotiva eso na uto pepa ka vola kina na sala eso ena vukei ira kina na gone na Turaga. Vakatoboicutaka tu na pepa ena fuloa. Sureti ira na gone mera veivukevuke me digia na uto, ka vukei ira mera wilika na ka e volai tu kina.

Na Lako Yani 3:1–5

Au rawa ni vakarokoroko ena veivanua tabu.

Vakayagataka na italanoa ko Mosese kei na vunikau kama me vukei ira na gone mera kilamatata na vuna eda torova kina na veika tabu ena vakarokoroko.

iTaviqaravi e Rawa ni Caka

• Wilika na Na Lako Yani 3:1–5, ka vakamacalataka ni a vakaraitaka o Mosese na vakarokoroko ena nona luvata na nona ivava. Na cava meda cakava me vakaraitaka na vakarokoroko ena gauna ni Lotu? Lagata vata e dua na sere ni vakarokoroko, me vaka na “Reverence Is Love” (Children’s Songbook, 31). Vukei ira na gone mera raica na vosa ena sere ka vakavulica vei keda na sala meda na vakaraitaka kina na vakarokoroko. Na cava e vinakata kina na Turaga meda vakarokoroko?

• Vakaraitaka eso na iyaloyalo ni ituvaki ka dodonu meda dau vakarokoroko kina ka so na vanua e sega ni gadrevi kina meda dau vakarokoroko, me vaka e dua na soqoni ni sakaramede, e dua na masu, e dua na vanua ni gade, ka dua na soqo ni Siganisucu. Kerei ira na gone me ra tuvanaka na iyaloyalo me vakaraitaka na vanua sa dodonu meda vakarokoroko kina.

• Sureti ira na gone mera droinitaka na kedra dui iyaloyalo, ka dusia na kedra iyaloyalo ni o veivosakitaka na sala eso e rawa mera vakarokoroko kina ena tiki duidui eso ni yagodra, me vaka ena matadra, daligadra, gusudra, ligadra, kei na yavadra.

Vakavulica na iVunau: Gone Qase Cake

Na Lako Yani 1–2

Sa dau cakacaka mai vei keda yadudua na Kalou me vakayacori kina na Nona inaki.

Era veivuke e vuqa na tamata me vakayacori kina na inaki ni Kalou ena kena maroroi na bula ni gone o Mosese. O na vukei ira na gone o vakavulica tiko me ra kilamatata na itavi bibi eda sa vakaitavitaki kece kina ena vakayacori na lewa ni Kalou?

iTaviqaravi e Rawa ni Caka

• Sureti ira na gone me ra wasea na veika era kila baleti Mosese ni se dua na gonelailai. Vakayagataka na tabana ni itaviqaravi ena macawa oqo kei na Na Lako Yani 1:22.; 2:1–10 mo vakalekalekataka na italanoa kei Mosese ena nona gauna ni gone. Wilika na vosadusi ni ivolanikalou ena tabana ni itaviqaravi, ka tarogi ira na gone se cava era cakava na marama oqori me maroroi kina na bula nei Mosese.

• Tukuna vei ira na gone me baleta na tamata o dau qoroya ena vuku ni nodra yalodina ki na qarava na Kalou kei ira era tu vakavolivoliti ira, ni ra veiqaravi mada ga ena veisala lalai. Sureti ira na gone mera tukuna na tamata era kila ka ra sa veiqaravi oti ena yalodina vua na Kalou kei ira tale eso. Na cava na noda itavi ena cakacaka ni Kalou?

Na Lako Yani 3–4

Na Turaga ena vukei au meu vakayacora na Nona lewa.

E vakila o Mosese ni takiveiyaga baleta na nona veikacivi, ia sa yalataka vua na Turaga ni na tiko vata kei Mosese ka vukei koya. Ena vakauqeti ira vakacava na gone o vakavulica na itukutuku oqo?

iTaviqaravi e Rawa ni Caka

• Vakayagataki na itukutuku ena Na Lako Yani 3; 4:1–17, mera veivukevuke me ra vakatamuri Mosese na gone. Ke rawa, kauta mai na iyaya veivuke mera taurivaka me vaka e dua na cina livaliva kei na dua na vunikau me matataka na veikau kama.

• Kerei ira na gone me ra wilika na Na Lako Yani 3:11; 4:1, 10 ka vaqara na cava ea vakila o Mosese ni laki kerei Fero me vakatalai ira na Isireli. Ena gauna cava era bauvakila vata kina na veika vaka oqori? Na ivakasala cava e rawa ni ra wasea na gone vei Mosese me vukei koya? Vukei ira mera kunea na sala e vakayaloqaqataki Mosese kina na Turaga (raica na Na Lako Yani 3:12; 4:2–9, 11–12).

• Wasea e dua na kasotavi ka o vakila kina ni a vukei iko tiko na Kalou mo vakayacora e dua na veikacivi se mo qaravi Koya ena dua na sala. Kerei ira na gone mera wasea e dua na gauna a vukei ira kina na Turaga.

Na Lako Yani 3:1–5

Au rawa ni vakarokoroko ena veivanua tabu.

A kerei Mosese na Turaga me luvata na nona ivava ena veikau kama me ivakatakilakila ni veidokai kei na vakarokoroko. O rawa ni vakayagataka vakacava na itukutuku oqo mo vakavulici ira kina na gone baleta na vakarokoroko?

iTaviqaravi e Rawa ni Caka

• Wilika na Na Lako Yani 3:1–5, ka kerei ira na gone mera vakalekalekataka na tikina eso oqo ena nodra vosa ga. Na cava e rawa ni da cakava me vakaraitaka na vakarokoroko ena veivanua tabu, me vaka ena gauna ni Lotu se ena loma ni valetabu? Vukei ira na gone me ra bulia na “taga ni vakarokoroko” mera kauta ki vale ka tu kina na tikitiki ni pepa e volai tu kina na vakasama mera vakarokoroko vakacava. Sureti ira mera laki wasea na veivakasama oqo kei na nodra matavuvale.

• Lagata vata e dua na sere me baleta na vakarokoroko, me vaka na “Reverence Is Love” (Children’s Songbook, 31), ka kerei ira yadua na gone me ra vola ka wasea e dua na ivakamacala ni vakarokoroko e yavutaki mai na qaqa ni sere.

• Taurivaka na iyaloyalo Vakasavasavataka tiko na Valetabu o Jisu (Gospel Art Book, naba. 51) me tukuna na italanoa e volai ena Maciu 21:12–13. E duatani vakacava na itutuniyalo nei Mosese ena Na Lako Yani 3:1–5 mai na nodra itutuniyalo na dauveisau ilavo? Na cava na vuna e vinakata kina na iVakabula meda torova na veika tabu ena vakarokoroko?

Vakauqeta na Vuli e Vale

Me vukei ira na gone me ra wasea na veika era sa vulica mai na Na Lako Yani 1–6, vakayaloqaqataki ira me ra droinitaka e dua na iyaloyalo ni dua na tamata era sa vulica ena kalasi me ra wasea vata kei na nodra matavuvale.

Vakatorocaketaki Noda Veivakavulici

E dau yaga vei ira na gone na tokarua. Kua ni ririko mo tokaruataka vakavica vata na itaviqaravi, vakauasivi vei ira na gone sobu. Oqo ena vukei ira na gone me ra nanuma na veika o vakavulica.