“14–20 ni Maji. Nai Vakatekivu 42–50: ‘Sa Nakita na Vinaka na Kalou,’“ Lako Mai, Mo Muri Au—Baleta na Lalai: Veiyalayalati Makawa 2022 (2021)
“14–20 ni Maji. Nai Vakatekivu 42–50,” Lako Mai, Mo Muri Au—Baleta na Lalai: 2022
iYaloyalo kei Josefa e Ijipita, mai vei Robert T. Barrett
14–20 ni Maji
Nai Vakatekivu 42–50
“Sa Nakita na Vinaka na Kalou”
Sa ka bibi mo kila kina na ivolanikalou o vakatavulica tiko, ia sa bibi talega mo kilai ira na gone o vakatavulica tiko. Taura na gauna mo tugana ka masulaki rau ruarua.
Vola na Veika o Vakauqeti Kina
Sureta na Veiwasei
Baleta ni italanoa ena Nai Vakatekivu 42–50 e tomani kina na italanoa ena lesoni ni macawa sa oti, mai na Nai Vakatekivu 37–41, taura na gauna ena itekivu ni kalasi me laivi ira na gone me ra wasea na veika era nanuma baleti Josefa, oka kina na veika era sa vulica ena Lalai kei koya mai vale.
Vakavulica na iVunau: Gone Sobu
Au rawa ni vakaraitaka na loloma ki na noqu matavuvale.
Vei ira na gone lalai, ko na vinakata beka mo vakabibitaka na tiki eso ni italanoa oqo ka vakaraitaka kina o Josefa na loloma vei iratou na nona matavuvale.
iTaviqaravi e Rawa ni Caka
-
Ni o vakayagataka tiko na “O Josefa kei na Dausiga” (ena ITukuni ni Veiyalayalati Makawa) se iyaloyalo era tiko ena Lako Mai, Mo Muri Au—Baleta na Tamata Yadua kei na Matavuvale, tukuna vei ira na gone me baleta na sotatale nei Josefa Simici kei ira na tuakana. Vakabibitaka e vakaraitaka vakacava o Josefa na nona loloma vei ira na tuakana.
-
Wilika eso na matavosa mai na Nai Vakatekivu 45:4–15 e vakamacalataka na veika e cakava o Josefa me vakaraitaka ni sa lomani ira na nona matavuvale. Sureti ira na gone mera vakatamuria na veika e vakamacalataka tiko ena veitikina. Me kena ivakaraitaki, e rawa ni ra vakatamuriame kerea e dua na lewe ni matavuvale me “toro mada mai” (tikina e 4) se solia vei ira na lewe ni matavuvale na kakana (raica na tikina e 11).
-
Lagata vata e dua na sere ni loloma, me vaka na “Dauloloma ko Jisu” (iVolanisere ni Gonelalai,39). Vukei ira na gone me ra droinitaka na ligadra ka vola ena droini e dua na ka e rawa ni ra cakava me ivakaraitaki ni loloma ki na nodra matavuvale.
E vukei au na veivakalougatataki ni matabete.
E vakalougatataki ira na luvena tagane kei na makubuna o Jekope (raica na Nai Vakatekivu 48–49). Nikua eda rawa ni ciqoma na veivakalougatataki ni matabete ka na solia vei keda na veivakacegui, veivakabulai, veituberi, kei na kaukauwa vakayalo.
Eda rawa ni ciqoma na veivakalougatataki mai vei ira era taura tu na matabete.
iTaviqaravi e Rawa ni Caka
-
Vakaraitaka vei ira na gone e dua na iyaloyalo kei Jekope ni vakalougatataki ira na luvena tagane se so tale na iyaloyalo eso ni veivakalougatataki ni matabete (raica na iyaloyalo era tiko ena ituvatuva oqo; raica talega na Gospel Art Book, naba. 12). Mera vakamacalataka na gone na ka e yaco tiko ena iyaloyalo.
-
Wilika vei ira na gone na Nai Vakatekivu 48:8–9. Vakamacalataka ni ko Isireli, ka yacana tale ga ko Jekope, e tamai Josefa ka via solia okoya vei ira na luvei Josefa e dua na veivakalougatataki ni matabete. Kevaka e dua vei ira na gone sa ciqoma na veivakalougatataki ni matabete, sureti ira mera wasea na veika era sotava. Se wasea e dua na ka o sa sotava vakai iko.
-
Vukei ira na gone me ra vakasamataka na vuna era na kerea beka kina e dua na veivakalougatataki ni matabete. Vukei ira talega mera cavuta na yaca ni lewe ni matabete era rawa ni kerea, me vaka e dua na tama, tukana, se turaga veiqaravi.
Au rawa ni veivosoti.
Na cava era rawa ni vulica na gone me baleta na veivosoti mai na ivakaraitaki i Josefa ni vosoti ira na tuakana?
iTaviqaravi e Rawa ni Caka
-
Vakayagataka na tabana ni itaviqaravi ena macawa oqo me vukei ira na gone mera nanuma tiko ni ra a lomacataki Josefa o ira na tuakana. Wilika vei ira na gone na Nai Vakatekivu 50:17, ka vakabibitaka ni ra sa veivutunitaka e muri na veika era sa cakava ka vinakata o Josefa me vosoti ira. Wilika na tikina e 21 me vakaraitaka ni o Josefa e vosoti ira na tuakana—a sega ni cudruvi ira tale.
-
Lagata vata “Ni Vukei Au Mai Noqu KalouiVolanisere ni Gonelalai,52). Ni o lagata tiko me baleta na veivosoti, sureti ira na gone me ra dusi Josefa ena tabana ni itaviqaravi. Ni o lagata tiko me baleta na veivutuni, sureti ira mera dusia vei iratou na tuakana.
-
Vukei ira na gone me ra vakasamataka eso na ituvaki ka ra na gadreva kina me ra vosota e dua. Sureti ira na gone me ra vakatovotovotaka na veika era na cavuta se cakava me ra vakaraitaka na veivosoti vua na tamata oqori.
Vakavulica na iVunau: Gone Qase Cake
Na veivosoti e kauta mai na vakacegu.
O ira na tuakai Josefa era a cakava na veika ca sara ki vua. Ia o Josefa a vosoti ira ka kauta mai na vakacegu ki na nona matavuvale.
iTaviqaravi e Rawa ni Caka
-
Vukei ira na gone me ra matanataka e dua na itabagauna mai na Nai Vakatekivu 42–44. Ni ra cakava tiko, tarogi ira se cava era nanuma a vakila o Josefa ni mai raici iratou tale se na cava beka era a vakila na tuakana ni ra sa qai kila ni oqo o Josefa.
-
Tarogi ira na gone ena ibalebale me vosoti dua. Vukei ira me ra kila ni nomu vosota e dua e oka kina na qaravi koya ena loloma va-Karisito. Tarogi ira na gone na cava era kila me baleta na italanoa kei Josefa ena nona vosoti ira na tuakana, se wilika vata kei ira na gone na tikina mai na Nai Vakatekivu 45:1–15. Na cava e cakava o Josefa se kaya mera kila na tuakana ni sa vosoti ira? Na cava e rawa ni da cavuta se cakava ni ra kerea eso meda vosoti ira?
-
Kerei ira na gone mera vakasamataka e dua na gauna ni ra a vosoti dua se na gauna e vosoti ira kina e dua. Me soli na gauna me ra vakasamataka, wasea e dua ga na nomu veika sotavi , ka vakadinadinataka na veivakalougatataki e yaco mai na veivosoti. Sureti ira na gone me ra wasea na veika era sotava, kevaka era vinakata. Na cavaera vakila? Na cava eda vulica me baleta na veivosoti mai na ivakaraitaki ni iVakabula? (raica na Luke 23:33–34).
Ko Tamada Vakalomalagi e talai Jisu Karisito me mai vakabulai au.
Na italanoa kei Josefa ni vakabula na nona matavuvale mai na dausiga e rawa ni vakavulici keda baleti Jisu Karisito, o Koya sa vakabulai keda mai na ivalavala ca kei na mate.
iTaviqaravi e Rawa ni Caka
-
Vola ena papa Josefa kei na Jisu Karisito. Vukei ira na gone mera vakasaqara ena ivolanikalou veisasa oqo ka vola ena papa na veika erau tautauvata kina o Joseph kei Jisu: Nai Vakatekivu 37:3 kei na Maciu 3:17; Nai Vakatekivu 37:26–28 kei na Maciu 26:14–16; Nai Vakatekivu 45:5–7 kei na Luke 4:18; kei Nai Vakatekivu 47:12 kei na Joni 6:35.
-
Tarogi ira na gone na cava e kena ibalebale me ra vakabula se vueta e dua. Kevaka e dua vei ira sa tu na ka e sotava ni a vakabulai se vueti mai na ka rerevaki, sureta me mai wasea. Sa vakabulai vakacava na tuakana ko Josefa? (raica na Nai Vakatekivu 42:1–3; 45:5–7). Vakaraitaka e dua na iyaloyalo ni iVakabula. E vakabulai keda vakacava o Jisu?
A iVakadewa i Josefa Simici, Nai Vakatekivu 50:27–33 (ikuri ena iVola Tabu)
Sa vakarautaki Josefa Simici tu na Tamada Vakalomalagi me mai dua na parofita ena noda gauna.
Vica vata na udolu na yabaki ki liu, a raica o Josefa mai Ijipita ni na kacivi Josefa Simici na Turaga me cakava e dua na cakacaka cecere ena iotioti ni gauna. Vakavulici ira na gone ena sala sa vakalougatataki keda kina na Turaga mai vua na Parofita o Josefa Simici.
iTaviqaravi e Rawa ni Caka
-
Solia vei ira na gone na idusi rairai levu baleti Josefa Simici, ka sureti ira me ra vakilakila o cei e vakamacalataka tiko. E oka kina na veivuke mai na Joseph Smith Translation, Nai Vakatekivu 50:27–33 (ena appendix ni iVola Tabu), me vaka “e vakavulici keda okoya me baleta na veiyalayalati” (raica na tikina e 28), “a solia vei keda na vosa ni Turaga” (raica na tikina e 30), ia “e vakayacani vei tamana” (raica na tikina e 33). Ni ra sa toboka donu na gone, sureti ira mera raica na idusi ena veitikina. Na cava soti tale eda vulica me baleti Josefa Simici mai na parofisai nei Josefa mai Ijipita?
-
Vakaraitaka vei ira na gone na iyaloyalo e matataka na veika bibi a cakava se vakavulica o Josefa Simici (raica, me kena ivakaraitaki, na Gospel Art Book, naba. 89–95, 97, 98, 117, 118). Vukei na gone me ra vakasamataka na veivakalougatataki sa noda ena vukui Josefa Simici. Me ivakaraitaki, sa vukei keda vakacava na nona cakacaka meda toro voleka cake vei Jisu Karisito?
Vakauqeta na Vuli e Vale
Sureti ira na gone me ra wasea na tabana ni itaviqaravi ena macawa oqo vata kei nodra matavuvale e vale. Sa rawa ni ra vakayagataka me ra railesuva kina na italanoa kei Josefa kei ira na tuakana, ka me veivosakitaki kina na bibi ni loloma kei na veivosoti ena noda matavuvale.
Vakatorocaketaki Noda Veivakavulici
Vakadinadinataki Jisu Karisito E dina ga ni sega ni tukuna na Veiyalayalati Makawa na yacai Jisu Karisito, e vosabaleti Koya ena so tale na yaca, ka sa vakadinati Koya ena ivakatakilakila kei na italanoa. Vukei ira na gone me ra vulica me ra vaqara na dina me baleta na iVakabula e veigauna era wilika kina na ivolanikalou.