“14–20 ni Maji. Nai Vakatekivu 42–50: ‘Sa Nakita na Vinaka na Kalou,’” Lako Mai, Mo Muri Au—Baleta na Tamata Yadua kei na Matavuvale: Veiyalayalati Makawa 2022 (2021)
“14–20 ni Maji. Nai Vakatekivu 42–50,” Lako Mai, Mo Muri Au—Baleta na Tamata Yadua kei na Matavuvale: 2022
iVakaraitaki kei Josefa e Ijipita, mai vei Robert T. Barrett
14–20 ni Maji
Nai Vakatekivu 42–50
“Sa Nakita na Vinaka na Kalou”
Na wiliki ni ivolanikalou e sureta na ivakatakila. Vakarorogo ki na nona veivakauqeti ni ko wilika, kevaka sara mada e sega ni semati voleka ki na veika o wilika tiko.
Vola na Veika o Uqeti Kina
E rauta ni 22 na yabaki mai na gauna a volitaki kina ki Ijipita o Josefa mai vei iratou na tuakana. E a sotava e vuqa na veivakatovolei, oka kina na nona beitaki vakailasu ka biu ki na valeniveivesu. Ni qai raici iratou tale na tacina, sa kovana tu mai Ijipita taucoko ko Josefa, ka ikarua yani vua na fero. A rawarawa sara me sauma lesu vei iratou na ka eratou a cakava vua, ni vakasamataki na veika eratou a cakava vei Josefa, ena ciqomi oqori. Ia a vosoti iratou na tuakana ko Josefa. Sega ni o koya walega oqori, ia e vukei ira mera raica na inaki vakalou ni nona rarawa. “Sa Nakita na Vinaka na Kalou” (Nai Vakatekivu 50:20), a tukuna vei iratou, baleta ni sa biuti koya e na dua na itutu me ia na veivakabulai “vei ira kece na matavuvale nei tamana” (Nai Vakatekivu 47:12) mai na dausiga.
Ena vuqa na sala, na bula nei Josefa e tautauvata kei Jisu Karisito. E dina ga ni vakavuna Vua na rarawa levu, a veivosoti ka sereki keda kece na iVakabula mai na dua na leqa ka ca vakalevu sara mai na dausiga. Se da gadreva me da na ciqoma na veivosoti se solia—ena so na gauna eda gadreva me da cakava ruarua—na ivakaraitaki nei Josefa e dusimaki keda kivua na iVakabula, na ivurevure dina ni veivakabulai kei na veivakaduavatataki.
Vakasama ni Vuli iVolanikalou ni Tamata Yadua
“A talai au mai na Kalou meu liu mai vei iko mo maroroi kina.”
Me vaka o sa wilika me baleti Josefa, o sa raica beka eso na ka e tautauvata ena nona italanoa kei na nona veiqaravi ni veivakaduavatataki i Jisu Karisito? Mo na vakasamataka beka vakatitobu se tautauvata beka vakacava na itavi nei Josefa ena nona matavuvale kei na itavi ni iVakabula ena matavuvale ni Kalou. Na ivakatautauvata cava o sa raica ena veika a sotava o Josefa kei na nona itavi na iVakabula, o koya a talai mai me “vakabulai [keda] ena dua na veisereki cecere”? (Nai Vakatekivu 45:7).
Na veivosoti e kauta mai na veivakabulai.
Ni o wilika me baleti Josefa ena nona vosoti iratou na tuakana ena veika vakaloloma eratou cakava vua ena rawa ni uqeti iko mo vakasamataka e dua o sasagataka tiko ena gauna oqo mo vosota. Se e dua beka na veivakatovolei dredre ni veivosoti e tu ena nomu veisiga ni mataka. Se cava ga, e rawa ni veivuke mera vakasamataka vakatitobu na cava na vuna a rawa kina ni veivosoti o Josefa. Na cava na ivakatakilakila me baleta na ivakarau kei na itovonibula nei Josefa o kunea ena Nai Vakatekivu 45; 50:15–21? E vakayarayarataki koya beka vakacava na veika a sotava me dau veivosoti vakalevu cake? Na cava e vakatura na ivakaraitaki nei Josefa ena sala ena vukei iko kina na iVakabula mo veivosoti vakalevu cake?
Raica talega na veivakalougatataki e yaco ki na matavuvale nei Josefa ena vuku ni nona veivosoti. Na veivakalougatataki cava soti o sa raica mai na veivosoti? O sa bau vakauqeti beka mo dolele yani vua e dua sa caka cala vei iko?
Raica talega Nai Vakatekivu 33:1–4; Vunau kei na Veiyalayalati 64:9–11; Larry J. Echo Hawk, “Me Vaka sa Vosoti Kemudou ko Karisito, me Vakakina koi Kemudou,” Liaona, Me 2018,15–16.
Na cava na ibalebale ni ivakatakarakara ena veivakalougatataki nei Jekope?
Na veivakalougatataki nei Jekope vei ira na nona kawa e tiko kina na iyaloyalo matata, ia eso na dauwiliwili e dredre ni ra kila. Eda vakavinavinaka, ni kosipeli sa vakalesui mai e solia vei keda eso na ikuri ni kilaka. Ni ko wilika na veivakalougatataki vei Josefa ena Nai Vakatekivu 49:22–26, wilika na veitikina oqo, ka raica na vakasama e votu mai kina: 1 Nifai 15:12; 2 Nifai 3:4–5; Jekope 2:25; Vunau kei na Veiyalayalati 50:44.
Ni o wilika na veivakalougatataki nei Juta ena iVakatekivu 49:8–12, nanuma ni o rau ruarua na Tui o Tevita kei Jisu Karisito erau kawa i Juta. Na vosa kei na malanivosa cava ena veitikina oqo e vakananuma vei iko na iVakabula? Ni o vulica na veivakalougatataki nei Juta, ena veivuke talega me wiliki na Ai Vakatakila 5:5–6, 9; 1 Nifai 15:14–15; Vunau kei na Veiyalayalati 45:59; 133:46–50.
Kevaka o na vinakata mo vulica eso tale na ka me baleti ira na luvena tagane o Jekope kei na mataqali i Isireli ka ra vu mai vei iratou, e tiko e dua na ivakamacala me baleti ira yadua ena iDusidusi ki na iVolanikalou (scripture.ChurchofJesusChrist.org).
Na iVakatekivu 50:24–25; iVakadewa nei Josefa Simici, iVakatekivu 50: 24–38 (ena iDusidusi ki na iVolanikalou)
“E dua na daurairai ena vakatubura na Turaga na noqu Kalou.”
Ena tadra nei Josefa (raica Nai Vakatekivu 37:5–11) kei na nona vakadewataka na nodra tadra eso tale (raica Nai Vakatekivu 40–41), a vakatakila mai na Turaga ena veika ena yaco ena veisiga se ena vica na yabaki mai muri. Ia a vakatakila talega vei Josefa na Turaga na veika ena yaco ena veisenijiuri sa bera mai. Vakabibi, a vulica me baleta na veiqaravi vakalotu vakaparofita nei Mosese kei Josefa Simici. Ni o wilika na vosa nei Josefa e Nai Vakatekivu 50:24–25 kei na iVakadewa nei Josefa Simici, Nai Vakatekivu 50:24–38 (ena iDusidusi ki na iVolanikalou), tarogi iko se sa vakalougatataki Josefa kei ira na luvei Isireli vakacava na nodra kila na veika oqo. Na cava na vuna o nanuma e bibi kina vua na Turaga me vakalesuya mai na parofisai oqo mai vei Josefa Simici? (raica tale ga na 2 Nifai 3).
Sa vakataucokotaka beka vakacava o Josefa Simici na veiparofisai eso ena iVakadewa nei Josefa Simici ni Nai Vakatekivu 50: 27–28, 30–33? (raica na Vunau kei na Veiyalayalati 1:17–23; 20:7–12; 39:11; 135:3).
iVakaraitaki kei Josefa mai Ijipita, mai vei Paul Mann
Vakasama baleta na Vuli iVolanikalou Vakamatavuvale kei na Lotu Vakamatavuvale
-
NaiVakatekivu 42–46.Eratou na marautaka beka nomu matavuvale me ratou matanataka na italanoa kei Josefa ena nona duavata tale kei iratou na tuakana. (“O Josefa kei na Dausiga,” mai na iTukuni ni Veiyalayalati Makawa ena rawa ni veivuke.) Me ka ni lasa— vakayagataka na isulu ni drama kei na iyaya tale eso kevaka o vinakata. Vakayaloqaqataki ira na lewe ni matavuvale me ra tovolea me ra kila na yalo kei na ivakarau ni nodra rai na talanoataki kina. Mo na vakanamata beka vakabibi ena ivakarau ni yaloi Josefa vei iratou na tuakana kei na ivakarau beka ni yalodratou ena nona sa vosoti iratou. Oqo ena rawa ni vakavuna e dua na veivosaki ena ivakarau ena vakalougatataka kina na nomu matavuvale na veivosoti.
Ni sotavi iratou na tuakana o Josefa ni sa oti e vuqa na yabaki, eratou a vakaraitaka vakacava ni ratou sa veisau mai na iotioti ni gauna eratou a sota kina? Na cava e rawa ni da vulica baleta na veivutuni mai na veika eratou a sotava?
-
Nai Vakatekivu 45:3–11; 50:19–21.E kila o Josefa ni dina ga ni a sotava mai Ijipita na dredre, “sa nakita na Kalou na vinaka” (Nai Vakatekivu 50:20). Sa sotava beka na nomu matavuvale e dua na veivakatovolei qai vukica na Kalou me ka ni veivakalougatataki?
E dua na serenilotu me baleta na vinaka ni Kalou ena gauna ni veivakatovolei (me vaka na “Na Yavu Tudei” [Sere ni Lotu, naba 43]) e rawa me vakavinakataka cake na veivosaki oqo. Na veika matailalai cava beka mai na veika a sotava o Josefa e vakaraitaka na veika e vakavulica na serenilotu?
-
Nai Vakatekivu 49:9–11, 24–25.Na cava eda kunea ena veitikina oqo e vakavulica vei keda me baleta na itavi kei na ilesilesi i Jisu Karisito? (Me baleta na veivuke me kilai na veimalanivosa e tiko ena veitikina oqo, raica na iyaragi baleta Nai iVakatekivu 49 ena “Vakasama ni vulica yadua na ivolanikalou.”)
Me ikuri ni tukutuku ni vakavulici ni gone, raica na idusidusi ni macawa oqo ena Lako Mai, Mo Muri Au—Me Baleta na Lalai.
Serenilotu vakaturi “Na Yavu Tudei,” Sere ni Lotu, naba 43.
Vakatorocaketaki Noda Veivakavulici
Vakayagataka na ivakatagi. Vukei ira na lewe ni matavuvale me ra kunea na dina ni kosipeli mai na qaqa ni serenilotu kei na sere ni Lalai. Vaqara na sala eso me rawa kina ni tiki tudei ni nomu vulica na kosipeli na sere kei na ivakatagi vakatabui.
Jacob Blessing His Sons, mai vei Harry Anderson