Vakasama me Nanumi Tu

Na Mataqali i Isireli

Ena dua na vanua ena loma ni lekutu ena tokalau kei Kenani, a waraka ena yalomadua o Jekope na nodrau na sota kei na nona isanidrua, ko Iso. Na iotioti ni gauna a raici Jekope kina o Iso, rauta ni 20 na yabaki sa oti, a tukuna tiko kina o Iso ni na vakamatei koya. A veimulomulo tiko ena bogi taucoko ena lekutu o Jekope, ni vakasaqara e dua na veivakalougatataki mai vua na Kalou. Ena vuku ni vakabauta nei Jekope, na gugumatua kei na yalodina, a sauma na Kalou na nona masu. Ena bogi oya a veisautaki kina na yacai Jekope ki na Isireli, e dua na yaca ka kena ibalebale “sa kaukauwa vua na Kalou” (Nai Vakatekivu 32:28, ivakamacala e botona b; raica talega Nai Vakatekivu 2:24–32).¹

Volekata na uciwai na Japoki e ciqoma kina o Jekope na yaca Isireli.

Oqo na imatai ni gauna me basika kina na yaca Isireli ena i Vola Tabu, oqo e dua na yaca e tu ena loma taucoko ni ivola kei na itukutuku taucoko ni veigauna. Sega ni dede sa dusia e vuqa ka sega ni dua ga na tamata na yaca. E 12 na luvena tagane o Isireli, ka ra vakatokai na nodra kawa me “na mataqali i Isireli,” na “yavusa i Isireli,” “ira na luvei Isireli,” se o ira na “Isireli.”

Ena itukutuku ni veigauna, era dau vakabibitaka na luvei Isireli na kawa era vu mai kina ena yavusa e tinikarua i Isireli. Na nodra laini ni kawa sa dua na kedra ivakatakilakila ni veiyalayalati. E kaya na iApositolo o Paula ni o koya e vua “ni yavusa i Penijamini” (Roma 11:1). Ni talai iratou lesu na luvena tagane o Liai me ratou lai kauta mai na peleti parasa, e dua na vuna ni era tu ena peleti na “kedra itukutuku ni kawa na nona qase” (1 Nifai 5:14; raica talega na 1 Nifai 3:3). A qai kila kina o Liai ni kawa i Josefa, na nodra kila na nona kawa na kedra isema ki na mataqali i Isireli sa ka bibi sara vei ira ena veiyabaki e muri (raica na Alama 26:36; 3 Nifai 20:25).

Ena loma ni Lotu nikua, ena rawa ni o rogoca me baleta na Isireli ena ivakaraitaki me vaka na “nodra vakasokomuni na Isireli.” Eda dau lagata me baleta na “Dauveivueti kei Isireli,” na “iNuinui kei Isireli,” kei na “Bete ni Isireli.”² Ena veigauna vaqori, eda sega ni cavuta se lagata wale tikoga me baleta na matanitu i Isireli ena gauna makawa se na matanitu o Isireli nikua. Ia, eda tukuni ira tiko o ira era sa vakasokumuni mai na veimatanitu ni vuravura ki na Lotu i Jisu Karisito. Eda tukuni ira tiko na tamata ka ra sasaga tikoga vua na Kalou, era sa vakasaqara tiko vagumatua na Nona veivakalougatataki, kei ira era, papitaiso, sa yaco me Nona tamata ni veiyalayalati.

Sa cavuti ena nomu veivakalougatataki vakapeteriaki na kemu isema ki na dua na yavusa i Isireli. Oqori e levu cake mai na dua walega na tiki taleitaki ni itukutuku ni matavuvale. Ni o dua na tiki ni mataqali i Isireli e kena ibalebale ni tiko na kemu isema vakaveiyalayalati kei na Tamada Vakalomalagi kei Jisu Karisito. E kena ibalebale ni o iko, me vakataki Eparaama, e kemu inaki mo “veivakalougatataki” vei ira na luve ni Kalou (Nai Vakatekivu 12:2; Eparaama 2:9–11). E kena ibalebale, ena vosa nei Pita, “sai kemuni e dua na itabatamata digitaki, a matabete vakaturaga, a matanitu yalosavasava, a tamata sa taukena na Kalou; ni dou vakaraitaka kina na nona vinaka sara o koya ka kacivi kemudou mai na butobuto ki nona rarama e veivakurabuitaki” (1 Pita 2:9). E kena ibalebale ni o iko e dua “sa duavata kei na Kalou” ena nomu rokova na nomu veiyalayalati vata kei Koya.

iDusidusi

1. E tiko eso tale na kena ibalebale na yaca Isireli, oka kina “E lewa na Kalou” se “vala na Kalou se ia tikoga.”

2. Sere ni Lotu, naba 5, 157, kei na194.

iVakaraitaki ni vunikau ni matavuvale nei Jekope, mai vei Keith L. Beavers