Na ivakaraitaki kei Repeka mai vei Dilleen Marsh

21–27 ni Feperueri

Nai Vakatekivu 24–27

Sa Vakavoui Kina na Veiyalayalati

Ni o wilika Na iVakatekivu 24–27, vakarogoca matua na veika vakayalo o na ciqoma. Masulaka mo kila se na yaga vakacava ki na nomu bula na ivakavuvuli o kunea.

Vola na Veika o Uqeti Kina

Na veiyalayalati ni Kalou vata kei Eparaama e okati kina, mai vei Eparaama kei ira na nona kawa “era na vakalougatataki kina na veimatavuvale kece sara ni vuravura” (Eparaama 2:11). Oqori e sega ni dua na yalayala ena vakataucokotaki rawa ena dua ga na itabatamata: ena vuqa sara na sala, na iVolatabu sai koya na italanoa ni nona vakataucokotaka tikoga na Kalou na Nona yalayala. Ka tekivuna o Koya ena nona vakavouya na veiyalayalati vata kei na matavuvale nei Aisake kei Repeka. Mai na veika erau a sotava, eda vulica kina e dua na ka me baleta na okati ena veiyalayalati. Nodrau ivakaraitaki e vakavulica vei keda me baleta na yalovinaka, dauvosota, kei na vakabauta na veivakalougatataki yalataki ni Kalou. Eda sa vulica ni sa ka yaga talega me da laiva yani na “rourou damudamu” vakavuravura cava ga (Nai Vakatekivu 25:30) me da rawata kina me noda kei ira na luveda na veivakalougatataki ni Kalou ena veitabatamata muri mai.

Vakasama ni Vuli iVolanikalou ni Tamata Yadua

Na iVakatekivu 24

Na vakamau e ka yaga sara ena nona ituvatuva na Kalou.

Nikua e vuqa na tamata era sa vakawalena na vakamau se ra sa nanuma ni dua na icolacola. A duatani na ivakarau ni rai nei Eparaama—vei koya, sa ka bibi duadua na nona vakamau na luvena o Aisake. Na cava na vuna o nanuma kina ni sa rui ka bibi vua? Ni o wilika Na iVakatekivu 24, vakasamataka na bibi ni vakamau ena ituvatuva ni veivakabulai ni Kalou. Sa rawa talega mo wilika na itukutuku nei Elder D. Todd Christofferson “A Cava na Vu ni Vakamau, A Cava na Vu ni Matavuvale” (Liaona, Me 2015, 50–53) ka vakasamataka na cava na vuna “Na matavuvale e yavutaki ena vakawati ni dua na tagane kei na yalewa e vakarautaka na ituvaki vinaka duadua me buroro kina na ituvatuva ni Kalou” (tabana 52).

Na taro me vakaoqo e rawa ni vukei iko mo vakasamataka eso tale na ivakavuvuli bibi ena wase oqo:

Nai Vakatekivu 24:1–14. Na cava erau a vakayacora o Eparaama kei na nona tamata me rau okata kina na Turaga ena nodrau sasaga me rau kunea e dua na yalewa me wati Aisake?

Nai Vakatekivu 24:15–28, 55–60. Na itovonibula vinaka cava soti o kunea vei Repeka o na vinakata mo vakatotomuria?

Na dina cava so o sa kunea?

Raica talega na Vunau kei na Veiyalayalati 131:1–4; “Na Matavuvale: Ai Vakaro ki Vuravura Raraba,” ChurchofJesusChrist.org.

Na iVakatekivu 25:29–34

E rawa niu digia e dua vei rau na veivakalomavinakataki totolo kei na veika e yaga vakalevu cake sara.

Ena ivakarau vakavanua nei Eparaama, na tagane qase duadua ena dua na matavuvale ena ciqoma e dua na itutu vakaveiliutaki kei na galala, ka vakatokai na itutu vakaulumatua. Ena ciqoma na gonetagane oqo e dua na ivotavota vakawa levu cake mai vei rau na nona itubutubu, vata kei na itavi levu cake ni nodra qaravi na vo ni matavuvale.

Ni o wilika Na iVakatekivu 25:29–34, vakasamataka na cava na vuna sa tuvakarau kina o Iso me solia nona itutu vakaulumatua me isau ni dua na kana. Na lesoni cava soti o kunea e baleti iko ena tikina oqo? Me kena ivakaraitaki, e tiko beka eso na “rourou damudamu” e vagolei iko tani tiko mai na veivakalougatataki e yaga vakalevu cake vei iko? Na cava o sa cakava tiko mo vakanamata ka vakavinavinakataka kina na veivakalougatataki oqo?

Raica talega na Maciu 6:19–33; 2 Nifai 9:51; M. Russell Ballard, “Na Ka e Bibi Duadua sai Koya e Dede Duadua,” Liaona, Nove. 2005, 41–44.

Na iVakatekivu 26:1–5

Na Veiyalayalati vaka-Eparaama a vakavoutaki mai vei Aisake.

Na veiyalayalati a cakava vata kei Eparaama na Kalou e a nakiti me tomani tikoga ena veitabatamata, o koya sa gadrevi kina me vakadewataki sobu na nodrau isolisoli o Eparaama kei Sera vei Aisake, Jekope, kei na so tale na yalewa kei na tagane yalodina vei ira na nodrau kawa. Ni o wilika Na iVakatekivu 26:1–5, vakaraica eso na veivakalougatataki ni veiyalayalati e tukuna na Kalou. Na cava eda vulica baleta na Kalou mai na veitikina oqo?

Nai Vakatekivu 26:18–25, 32–33

O Jisu Karisito na ivurevure ni wai bula

O na raica beka ni bibi sara na itavi ni tobu kei na toevu kei na ivurevure tale eso ni wai ena vuqa na italanoa ni Veiyalayalati Makawa. E sega ni kidacalataki oqo, baleta ni vuqa vei ira na italanoa oqo era yaco tiko ena vanua mamaca sara. Ni ko wilika e Nai Vakatekivu 26 baleta na tobu nei Aisake, vakasamataka vakatitobu se na cava e vakatakarakataki ena wai ena ivolanikalou. Na vakasama cava soti o kunea me baleta na tobu vakayalo ni “wai bula”? (raica na Joni 4:10–15). O sa kelia tiko beka vakacava na tobu vakayalo ena nomu bula? E tautauvata beka vakacava kei na wai bula na iVakabula? Me kilai ni ra sa “tarova” na kai Filisitia na tobu (raica Nai Vakatekivu 26:18). E tiko beka ena nomu bula e dua na ka e tarova tiko na nomu tobu ni wai bula?

E dua na tobu ni wai e Peri-sepa makawa, ka rau keli tobu kina o Eparaama kei Aisake.

Na iVakatekivu 27

Erau a cala beka o Repeka kei Jekope ena nodrau lawakitaki Aisake?

Eda sega ni kila na vu ni nodrau ivalavala o Repeka kei Jekope me rawati kina e dua na veivakalougatataki me baleti Jekope. Ena veivuke me da nanuma tiko ni Veiyalayalati Makawa ena kena ituvaki ena gauna oqo e sega ni taucoko (raica Mosese 1:23, 41). Eso beka na itukutuku e yali tiko mai na ivolatukutuku taumada ka na rawa ni vakamacalataka na veika e rawa ni veivakaleqai vei keda. Ia, eda kila ni lewa ni Kalou me ciqoma ko Jekope na veivakalougatataki mai vei Aisake baleta ni a vakatakilai vei Repeka me na liu o Jekope mai vei Iso (raica Nai Vakatekivu 25:23). Ni oti nona vakadinadinataka o Aisake ni sa vakalougatataki Jekope ka sega o Iso, a vakadeitaka ni o Jekope “ena kalougata ko koya” (Nai Vakatekivu 27:33)—sa vakatura ni sa vakayacori na lewa ni Kalou.

Vakasama baleta na Vuli iVolanikalou Vakamatavuvale kei na Lotu Vakamatavuvale

Nai Vakatekivu 24:2–4, 32–48.A kerea o Eparaama e dua na nona tamata nuitaki me vakaraica mai e dua na wati Aisake, ka veiyalayalati kei Eparaama na tamata oqo ni na vakakina. A vakaraitaka vakacava na tamata oqo na nona yalodina ena rokovi ni veiyalayalati? E rawa vakacava ni da vakamuria na nona ivakaraitaki?

Nai Vakatekivu 24:15–28, 55–60.E rawa ni rai na nomu matavuvale ena veitikina oqo me baleta na ivakarau ni bula a kilikili kina kei Repeka me itokani tawamudu nei Aisake. Vakayaloqaqataki ira na lewe ni matavuvale me ra digitaka e dua vei ira na ivakarau oqo era nanuma ni dodonu me ra tara cake.

Nai Vakatekivu 25:19–34; 27.Me railesuvi na italanoa ni sala a lako kina na itutu vakaulumatua kei na veivakalougatataki nei Iso vei Jekope, e rawa mo vola na veiyatuvosa mai vei “Jekope kei Iso” (ena iTukuni ni Veiyalayalati Makawa) ena veitikinipepa . E rawa ni ra cakacaka vata na lewe ni matavuvale me ra biuta na iyatuvosa ena kena ituvatuva dodonu.

Ni o ni veitalanoataka nona volitaka o Iso nona itutu vakaulumatua, o rawa talega ni veivosakitaka na veika e bibi cake ki na nomu matavuvale, me vaka na Tamada Vakalomalagi kei Jisu Karisito. De rawa ni ra raica na lewe ni matavuvale eso na ka se iyaloyalo e matataka na veika e rawa ni ra vakasamataka me tawamudu na kena yaga. Me ra vakamacalataka na vuna era digitaka kina na veika oqori.

Nai Vakatekivu 26:3–5.Me vukea nodra kila vakavinaka nomu matavuvale na Veiyalayalati vaka-Eparama, o rawa ni sureti ira me ra raica na yalayala e tukuni tiko ena veitikina oqo. Na cava na vuna e bibi kina me da kila na veiyalayala oqo nikua? (raica na “Veika me Nanumi Tu: Na Veiyalayalati,” ena ivola oqo).

Nai Vakatekivu 26:18–25, 32–33.Na cava era ka bibi kina na tobu? E tautauvata vakacava kei na dua na tobu wai o Jisu Karisito?

Me baleta eso tale na vakasama ni nodra vakavulici na gone, raica na ituvatuva ena macawa oqo ena Lako Mai, Mo Muri Au—Baleti Ira na Lalai.

E vakaturi tiko kina na sere: “Digitaka na Dodonu,” Sere ni Lotu, naba 142.

Vakatorocaketaki ni Vuli ni Tamata Yadudua

Cavuqaqataka e dua na ivolanikalou. E vakatavulica o Elder Richard G. Scott, “E dua na tikini volanikalou rawa ni cavuqaqataki ena yaco me nomu itokani ka na sega ni vakamalumalumutaki ena balavu ni gauna” (“Na Kaukauwa ni Volanikalou,” Liaona, Nove 2011, 6).

Esau Sells His Birthright to Jacob, mai vei Glen S. Hopkinson