Keveta tiko na gonelailai o Aisake o Sera

Sarah and Isaac, mai vei Scott Snow

14–20 ni Feperueri

Nai Vakatekivu 18–23

“E Dua beka na Ka e Dredre vua na Turaga?”

Wilika ka vakasamataka vakatitobu Nai Vakatekivu 18–23, ka vola na nomu nanuma. E rawa ni o vakayagataka na vakasama eso ena ituvatuva oqo me vukea na nomu vulica na veiwase ni ivola oqo, ka sa rawa talega mo vakauqeti mo vakasaqara eso tale na itukutuku ena ivolanikalou e biuta mai na Turaga me baleti iko sara ga.

Vola na Veika o Uqeti Kina

Na bula nei Eparaama, ka vakasinaiti tu ena veika vakamosiyalo kei na kena e vakacegu kina, sa ivakadinadina ni dua na dina a vulica o Eparaama ena dua na raivotu—ni da tiko e vuravura me da mai vakatovolei, “se [da] na muria se sega na veika kece sa vakarota vei [keda] na Turaga na [noda] Kalou” (Eparaama 3:25). Ena yalodina beka kina o Eparaama vakataki koya? Ena tomana tiko na nona vakabauta na yalayala ni Kalou ni na levu nona kawa, ni se sega tiko mada ga na luvedrau kei Sera ni rau sa qase mai? Ia ni sa sucu mai ko Aisake, ena rawa ni vosota beka na vakabauta nei Eparaama na ka sega ni vakasamataki rawa—e dua na ivakaro me solia na luvena tagane esa yalataka na Kalou me na vakayacori kina na veiyalayalati oya? A vakadeitaka o Eparaama na nona yalodina. A vakabauta na Kalou ko Eparaama, ka vakabauti Eparaama na Kalou. Ena iVakatekivu 18–23, eda raica kina na italanoa mai na nodra bula o Eparaama kei ira tale eso ka rawa ni vakauqeti keda meda vakasamataka na noda kaukauwa me da vakabauta na iyalayala ni Kalou, me da dro tani mai na ca ka kua ni raica lesu, ka vakabauta na Kalou se cava ga na solibula.

ivakatakilakila ni vuli ni tamata yadua

Vakasama ni Vuli iVolanikalou ni Tamata Yadua

Nai Vakatekivu 18:9–14; 21:1–7

Ena vakayacora na Turaga na nona yalayala ena nona gauna ga.

Na Turaga sa dau vakayacora na yalayala lagilagi vei ira na yalodina, ia ena so na gauna na ituvaki ni noda bula e rawa ni vakavuna me da taroga se na rawa beka vakacava ni vakayacori na yalayala oya. Ena vaka beka oya ena so na gauna na nodrau nanuma o Eparaama kei Sera. Na cava o vulica rawa mai na veika erau a sotava? E rawa ni veivuke me tekivu na nomu vuli ena nomu railesuva na veika sa yalataka na Turaga ena iVakatekivu 17:4, 15–22. Na cava erau a cakava kina o Eparaama kei Sera? (raica talega na iVakadewa nei Josefa Simici, Nai Vakatekivu 17:23 [e Na iVakatekivu 17:17, ivakamacala e ra b]; Na iVakatekivu 18:9–12). A sauma vakacava na Turaga me vukei ira me ra vakalevutaka nodra vakabauta na Nona yalayala? (raica Na iVakatekivu 18:14).

Na cava o sa kunea ena veitikina oqo ka tara cake na nomu vakabauta? Na veika cava tale eso—ena nomu bula se nona e dua tale—sa vaqaqacotaka na nomu vakabauta ni Turaga ena vakayacora na nona yalayala vei iko ena nona gauna kei na sala?

Raica talega na Vunau kei na Veiyalayalati 88:68.

Na iVakatekivu19:12–19

Sa vakaroti keda na Turaga me da drotani mai na caka ca.

Na lesoni cava o sa vulica me baleta na dro tani mai na ca ni o wilika baleti Loti kei na nona matavuvale? Me kena ivakaraitaki, na cava e vakurabuitaki iko me baleta na ka e kaya ka cakava na agilosi me vukei Loti kei na nona matavuvale me ratou dro kina mai na veivakarusai? (raica Nai Vakatekivu 19:12–17). E vukei iko kei na nomu matavuvale vakacava na Turaga mo dro se kunea na veitaqomaki mai na veivakayarayarataki ca ni vuravura?

Ena so tale na ka me baleta na ivalavala ca nei Sotoma kei Komora, raica na Isikeli 16:49–50 kei Juta 1:7–8.

Raica talega na iVakadewa nei Josefa Simici, Nai Vakatekivu 19:9–15 (ena ivakamacala ni iVolatabu).

Droini kei Loti kei na nona matavuvale ni ratou dro mai Sotoma kei Komora

Fleeing Sodom and Gomorrah, mai vei Julius Schnorr von Carolsfeld

Nai Vakatekivu 19:26

Na cava a cakava cala na wati Loti?

E vakavulica o Elder Jeffrey R. Holland:

“E matata, ni leqa nei wati Loti ni a sega walega ni rai lesu tiko; e yalona a vinakata tiko me lesu tale. E kena irairai ni se bera mada ga ni lakosivita na iyalayala ni koro, sa nanuma lesu tale na veika e tu mai Sotoma kei Komora. … E sega vua na vakabauta. E vakatitiqataka na kaukauwa ni Turaga me solia vua e dua na ka vinaka cake mai na veika sa tu oti vua. …

“Vei ira [na tamata] ni veitabatamata kecega, au kaci, ‘Dou nanuma na wati Loti’ [Luke 17:32]. Na vakabauta e baleta na veisiga ni mataka. Na vakabauta e tarai ena veigauna sa oti ia sega ni gadreva me tu voli ga kina. Na vakabauta e nuitaka ni tu vua na Kalou na veika cecere me baleti keda yadua, o Karisito dina na ‘bete levu ni veika vinaka ena yaco mai’ (Iperiu 9:11)” (“The Best Is Yet to Be,” Ensign, Janu. 2010, 24, 27).

Na iVakatekivu 22:1–19

Na tuvakarau nei Eparaama me sorovaki Aisake sai ivakatakarakara ni Kalou kei na Luvena.

Eda sega ni kila na vuna taucoko sara a vakaroti Eparaama kina na Kalou me vakacabori Aisake me isoro; eda kila ga ni a vakatovolei kina na nona vakabauta na Kalou (raica na Nai Vakatekivu 22:12–19). Ni o wilika Na iVakatekivu 22:1–19, na cava o vulica mai na veika a sotava o Eparaama?

Nona tuvakarau o Eparaama me vakacabora na luvena tagane “e dua na ivakatakarakara ni Kalou kei na Luvena Duabau” (Jekope 4:5). Ni o vakasamataka vakatitobu na kedrau tautauvata na veivakatovolei nei Eparaama kei na Nona cabora na Luvena na Tamada me isoro ena vukuda, na cava o nanuma me baleta na Tamada Vakalomalagi?

Era tu talega na veika e tautauvata vei Aisake kei na iVakabula. Vakasamataka mo wilika tale na iVakatekivu 22:1–19, ka vaqara na veika e tautauvata.

Raica talega na “Akedah (The Binding)” (vidio), ChurchofJesusChrist.org.

family study icon

Vakasama baleta na Vuli iVolanikalou Vakamatavuvale kei na Lotu Vakamatavuvale

Nai Vakatekivu 18:14.E tiko beka na italanoa mai na ivolanikalou, mai na itukutuku ni nomu matavuvale, se mai na nomu bula o rawa ni wasea sa vakavulica vei iko ni sega na ka e dredre vua na Turaga?

Nai Vakatekivu 18:16–33.Na cava eda vulica baleta na itovonibula nei Eparaama mai na veitikina oqo? E rawa vakacava ni da muria na nona ivakaraitaki? (Raica talega na Alama 10:22–23.)

Nai Vakatekivu 19:15–17.Na veitikina oqo e rawa ni vukei ira na lewe ni nomu matavuvale me ra vakavakarau ki na gauna era na gadreva kina me ra dro tani mai na ituvaki ca. Na cava beka eso na ituvaki ca oqo? Me kena ivakaraitaki, e rawa beka mo ni veivosaki me baleta na itukutuku sega ni veiganiti se na veitemaki ni kakase. Me da na dro vakacava mai na ituvaki vakaoqori?

Nai Vakatekivu 21:9–20.Na cava e vakurabuitaka na nomu matavuvale ena ivakarau a sotavi rau kina o Eka kei Isimeli na Kalou ni oti nodrau vakasavi tani mai vei Sera kei Eparaama?

Nai Vakatekivu 22:1–14.Mo vukea beka vakacava nomu matavuvale me raica na isema e tiko ena italanoa ni Nona vakaroti Eparaama na Kalou me vakacabori Aisake kei na nona solibula ni Veisorovaki na iVakabula? E rawa mo vakaraitaka na iyaloyalo kei Eparaama kei Aisake kei na Veivakamatei ena Kauveilatai (raica na “Eparaama kei Aisake,” ena iTalanoa ena Veiyalayalati Makawa) ni ra veivosakitaka na lewe ni matavuvale na veika e tautauvata era raica ena veika a yaco oqo. E rawa talega ni o lagata e dua na serenilotu se na sere me baleta na solibula ni iVakabula, me vaka na “Tala Mai Na Luvena” (iVolanisere ni Gonelalai, 20), ka vakasaqara na malanivosa e vakamacalataka na nona isoro na iVakabula.

Na cava eda sa kerei me da solibula kina vakamatavuvale? Sa kauti keda vakavoleka vakacava vua na Kalou na isoro oqo?

Me ikuri ni tukutuku ni vakavulici ni gone, raica na idusidusi ni macawa oqo ena Lako Mai, Mo Muri Au—Me Baleta na Lalai.

Sere vakaturi: “Sa Tala Mai Na Luvena,” Sere ni Lotu, naba 112.

Vakavinakataki ni Vuli Yadudua

Vakarogoca na Yalotabu. Ni o vuli, vakarorogo ki na nomu vakanananu, kevaka sara mada ga e vaka ni ra sega ni veiwekani kei na ka o wilika tiko. Na veivakanananu oqori e rawa ni o koya sara ga na ka e vinakata na Kalou mo kila.

Taubale tiko o Eparama kei Aisake

Droini kei Eparaama kei Aisake, mai vei Jeff Ward