ko Sera e roqota tiko na gone ko Aisake

Ko Sera kei Aisake, mai vei Scott Snow

14–20 ni Feperueri

Na iVakatekivu 18–23

“E Dua beka na Ka sa Dredre vei Jiova?”

Ni ko vakasaqara mo sotava na nodra gagadre na gone o vakavulica, nanuma na veivakasama baleta na gone qase cake kei na gone sobu ena ituvatuva oqo.

Vola na Veika o Vakauqeti Kina

ivakatakilakila ni veiwasei

Sureta na Veiwasei

Me vukei ira na gone me ra wasea na veika era sa kila me baleta na Nai Vakatekivu 18–23, vakaraitaka na iyaloyalo eso ni dua na ka yaco se sivia mai na veiwase ni ivola oqo, ka kerei ira na gone me ra wasea na veika era nanuma me baleta na italanoa.

ivakatakilakila ni veivakavulici

Vakavulica na iVunau: Gone Sobu

Nai Vakatekivu 18:9–14; 21:1–7.

Au rawa ni vakadeitaka ni Kalou ena dinata na Nona yalayala.

E dina ga ni sa yalataka na Kalou ni na dua na luvedrau tagane o Sarah kei Eparaama, me vaka ni rau sa qase tiko, e sega ni kena irairai ni na rawa ni vakayacori na yalayala. O na vakayagataka rawa vakacava na italanoa oqo me vukei ira na gone mera vakabauta ni na maroroya na Nona yalayala na Kalou?

iTaviqaravi e Rawa ni Caka

• Vakalekalekataka na iyalayala ni Kalou kivei Eparaama kei Sera ni na dua na luvedrau, kei na kena yaco na yalayala oqo (raica na Nai Vakatekivu 17:15–19; 18:9–14; 21:1–7). Se sureta e dua na veiwatini ena tabanalevu me rau vakaisulu vakai Eparaama kei Sera ka tukuna na kedrau italanoa. Vukei ira na gone mera kilamatata ni o Eparaama kei Sera erau sa qase sara me rau vakaluveni. Tarogi ira na taro mai na Nai Vakatekivu 18:14, “E dua beka na ka sa dredre vei Jiova?” Vakadinadinataka ni na rawa ni vakayacora na nona iyalayala na Turaga kevaka sara mada ga era dredre.

• Cakava e dua na iyalayala vei ira na gone ni o na vakayacora ni sa tini na kalasi (me vakataka, mo na vakatara me ra rokataka e dua na iyaloyalo). Ena gauna taucoko ni kalasi, vakananuma vei ira na nomu iyalayala, ka qai vakayacora. Vakamacalataka ni na dinata tu ga na Turaga na Nona iyalayala.

• Kerei ira na gone mera wasea na gauna era a waraka tiko e dua na ka era vinakata sara ga. Lagata vata kei ira na gone, e dua na sere e vakadinadinataka na yalayala ni Kalou, me vaka na “Muria na iVakaro” (Nodra iVolanisere na Lalai, 146–47). Vukei ira na gone mera raica na veika sa yalataka na Kalou vei keda kevaka eda yalodina tiko.

• Vakaraitaka e dua na iyaloyalo ni papitaiso se na sakaramede (raica na iVola ni iTaba ni Kosipeli, naba 103, 104, 107,108). Vukei ira na gone mera vulica baleta na iyalayala eda cakava kei na Kalou, kei na veika e yalataka na Kalou me kena isau, ni da sa papitaiso ka kania na sakaramede. (Raica na Tudei ena Vakabauta, 23–25

Nai Vakatekivu 22:1–14

O Eparaama e muria na Turaga.

A dredre dina vei Eparaama me muria na ivakaro me vakacabori luvena tagane. Tugana mada o rawa vakacava ni vakayagataka na italanoa oqo me vakayaloqaqataki ira na gone me ra talairawarawa vua na Kalou ena gauna sara mada ga e dredre se ra sega ni kila taucoko na inaki ni Nona ivakaro.

iTaviqaravi e Rawa ni Caka

• Vakaraitaka e dua na iyaloyalo kei Eparaama kei Aisake (raica na ituvatuva ni vuli ena macawa oqo ena Lako Mai, Mo Muri Au—Baleta na Tamata Yadua kei na Matavuvale), ka vakayagataka me tukuna na italanoa kei Eparaama kei Aisake (raica talega na “Eparaama kei Aisake,” mai na iTukuni ena Veiyalayalati Makawa). Vakaraitaka e dua na iyaloyalo kei Jisu Karisito, ka vosa vei ira na gone me baleta na sala e rawa ni vakananumi keda kina na italanoa kei Eparaama kei Aisake baleta na isoro nei Tamada Vakalomalagi kei Jisu Karisito ka a vakayacori ena vukuda.

• Qitotaka e dua na qito rawarawa ka gadrevi kina mera vakamuria na gone na veidusimaki. Me ivakaraitaki, na veidusimaki e rawa ni veimuataki ki na dua na iyaloyalo ni iVakabula e vunitaki tu ena rumu ni kalasi. Na cava eso na ka e kerea vei keda na Tamada Vakalomalagi me da cakava? Vukei ira na gone mera kila na muri tiko ni Nona ivakaro ena vukei keda meda lesu tale ka laki bula vata tale kei Jisu Karisito.

ivakatakilakila ni veivakavulici

Vakavulica na iVunau: Gone Qase Cake

Nai Vakatekivu 18:9–14; 21:1–7.

E vakayacora na Turaga na Nona yalayala, ena gauna mada ga era sa vaka me dredre.

E sa tukuni vei Eparaama kei Sera ni na dua na luvedrau tagane, ia e kena irairai ni dredre dina—o Eparaama e sa yabaki 100, ka sa yabaki 90 o Sera (raica na Nai Vakatekivu 17:17). A vakayacora na Kalou na Nona yalayala, ia na italanoa oqo e rawa ni vukei ira na gone o vakatavulica me vaqaqacotaka na nodra vakabauta tiko na iyalayala ni Kalou ena vukudra.

iTaviqaravi e Rawa ni Caka

• Vola na vosa yadua mai na imatai ni iyatuvosa ena Nai Vakatekivu 18:14 ki na tiki ni pepa, ka yaduataki ira na gone. Ka qai kerei ira mera tuva vakadodonu na veivosa oqori. Wilika na Nai Vakatekivu 18:9–14; 21:1–7 kei ira na gone me ra kune e dua na ivakaraitaki mai na nodrau bula o Sera kei Eparaama ka a cakava kina na Turaga e dua na ka dredre. Na cava e rawa ni da vulica mai na veika a sotava o Sarah kei Eparaama ka rawa ni vakayaloqaqataki keda me da vakabauta na iyalayala ni Kalou?

• Vakaraitaka na iyaloyalo ni italanoa ena ivolanikalou ka cakava kina na Kalou e dua na ka e sega ni rawa se dredre (me kena ivakaraitaki, raica na Gospel Art Book, naba 7, 8, 25, 26). Kerei ira na gone mera wasea na veika era kila me baleta na veika e vakaraitaki ena iyaloyalo, ka vukei ira mera raica na kena vakayacora vakacava na Turaga na Nona iyalayala ena veigauna yadua oqori. Wasea na sala e sa maroroya kina na Turaga na Nona iyalayala ki na nomu bula se nodra bula o ira o kila (me baleta eso na ivakaraitaki ni nona yalayala na Turaga, raica na Malakai 3:10; Joni 14:26–27; Ni Vunau kei na Veiyalayalati 89:18–21). Me ra wasea na gone na ivakaraitaki vata era kila tu.

Nai Vakatekivu 19:15—26

Au rawa ni drotaka na caka ca.

Na itukutuku ni nodratou dro o Loti kei na nona matavuvale mai na dua na koro ni caka ca ena rawa ni vakauqeti ira na gone o vakatavulica mera dro tani mai na idre ca ena nodra bula.

iYaloyalo kei Loti kei na nona matavuvale ni ratou dro mai Sotoma kei Komora

Dro mai na Sotoma kei Komora, mai vei Julius Schnorr von Carolsfeld

iTaviqaravi e Rawa ni Caka

• Vakalekalekataka na Nai Vakatekivu 19:15–26 ena nomu vakamacalataka ni o Loti kei nona matavuvale eratou vakaitikotiko ena dua na vanua valavalaca, ka vakaroti ratou na agilosi mera biuta. Wilika vata na tikina e 15–17, 26, ka vukei ira na gone mera vakasamataka e cava beka na ibalebale vei ira nikua me ra “drotaka” na ivalavala ca ka “ka kakua ni rai ki muri” (tikina e 17).

• Vakaraitaka na iyaloyalo ni iVakabula, ka kerei ira na gone mera kalawa yani kina ni ra wasea e dua na ka e rawa ni ra cakava me drotaki kina na caka ca ka ra toro voleka yani vua na Karisito.

• Veitalanoataka na ituvaki e rawa ni sureti ira kina na gone e dua na itokani me ra cakava e dua na ka era kila e sega ni dodonu. E rawa vakacava ni da “dro” mai na veiituvaki vakaoqo? Na cava eda rawa ni kaya vua na noda itokani?

Nai Vakatekivu 22:1–14

Na Tamada Vakalomalagi e tala mai na Luvena, ka a vakacabori Koya e vukuda.

Ni o veivakavulici me baleta na yalorawarawa nei Eparaama me sorovaki Aisake, kauwaitaka tiko na nodra vakila na gone. Vakayagataka na italanoa oqo me vukei ira na gone mera vaqaqacotaka na nodra iloloma kei na vakavinavinaka ena solibula ni iVakabula.

iTaviqaravi e Rawa ni Caka

• Me vukei ira na gone mera vulica na italanoa ena Nai Vakatekivu 22:1–14, wilika vei ira na tikina, ka sureti ira mera droinitaka na iyaloyalo ni veika o wilika tiko. Na cava na vuna e na dredre kina vei Eparaama me muria na ivakaro ni Turaga me sorovaki Aisake? Na cava eda vulica baleti Eparaama mai na italanoa oqo?

• Vakayagataka na iyaloyalo kei Eparaama kei Aisake kei na Vakoti ena kauveilatai (raica na Gospel Art Book, naba 9,57) me vakatauvatana na italanoa ena Nai Vakatekivu 22 kei na nona isoro na iVakabula (raica na Maciu 27:26–37). Na cava eda rawa ni vulica me baleta na Tamada Vakalomalagi kei Jisu Karisito mai na italanoa kei Eparaama kei Aisake kei na Vakoti ena kauveilatai?

• Vakaraitaka na vidio “Ni sa Lomani Vuravura Vakaoqo na Kalou” (ChurchofJesusChrist.org), se lagata vata e dua na sere me baleta na solibula ni iVakabula, me vaka na “He Sent His Son” (Children‘s Songbook, 34–35). Sureti ira na gone mera veivosakitaka e vakaraitaki vakacava na solibula i Jisu na loloma nei Tamada Vakalomalagi me baleti keda.

learning icon

Vakauqeta na Vuli e Vale

Sureti ira na gone me ra wasea vata kei ira na nodra matavuvale me baleta e dua na gauna a vakalougatataki ira kina na Kalou ni ra talairawarawa ena Nona ivakaro.

Vakatorocaketaki Noda Veivakavulici

Vakauqeta na vakarokoroko Me vaka ni gadrevi ena kalasi, ena rawa ni o vakananuma vei ira na gone me ra dau vakarokoroko. Sa rawa mo cakava oqo ena lagasere vakamalua se gudruvaka e dua na sere se ena nomu vakaraitaka e dua na iyaloyalo i Jisu.

tabana ni itaviqaravi: Ea Talairawarawa vua na Turaga o Eparaama