Vakasama me Nanumi Tiko

Na Veiyalayalati

Ena Veiyalayalati Makawa, o na dau wilika na vosa veiyalayalati. Nikua eda dau nanuma ni veiyalayalati na yalayala tabu vua na Kalou, ia ena vuravura makawa, na veiyalayalati talega na tiki bibi ni nodra bula veimaliwai na tamata. Me baleta na nodra taqomaki kei na nodra bula, era gadreva na tamata me rawa ni ra veivakabauti, na veiyalayalati e dua na sala me vakadeitaki kina na veivakabauti oqori.

O koya ni vosa na Kalou vei Noa, Eparaama, se o Mosese me baleta na veiyalayalati, a sureti ira tiko me ra bukia na isema ni veivakabauti vata kei Koya. E dua na ivakaraitaki uasivi ni dua na veiyalayalati ena Veiyalayalati Makawa sai koya na kena a cakava na Kalou vata kei rau o Eparaama kei Sera—ka qai vakavouya kei ira na nodrau kawa o Aisake kei Jekope (dau kacivi talega o Isireli). Eda dau vakatoka oqo na Veiyalayalati vaka-Eparaama, e dina ga ni ena veiyalayalati makawa e a kilai vakarawarawa me “veiyalayalati.” O na raica ni Veiyalayalati Makawa e kedra italanoa na tamata era raici ira ni nodra ivotavota vakawa na veiyalayalati oqo—na tamata ni veiyalayalati.

Na Veiyalayalati vaka-Eparaama e se ka bibi tikoga nikua, vakabibi vei ira na Yalododonu Edaidai. Cava na vuna? Baleta ni da sa tamata talega ni veiyalayalati, se da kawa dina i Eparaama, Aisake, kei Jekope se sega (raica na Kalatia 3:27–29). Ena vuku ni ka oqo, sa ka bibi me da kila se cava na Veiyalayalati vaka-Eparaama kei na kena yaga vei keda nikua.

Na Cava na Veiyalayalati vaka-Eparaama?

A vinakata o Eparaama “me vakasaqara ena yalodina na ivalavala dodonu” (Eparaama 1:2), a mani sureti koya kina na Kalou ki na dua na isema ni veiyalayalati. A sega ni kena imatai o Eparaama me tu vua na gagadre oya, ka sega talega ni kena imatai me ciqoma e dua na veiyalayalati. A segata na nodra “veivakalougatataki na tama” (Eparaama 1:2)—na veivakalougatataki a soli ena veiyalayalati mai vei Atama kei Ivi qai muria mai vei ira era segata vagumatua na veivakalougatataki oqo.

Na veiyalayalati ni Kalou vata kei Eparaama sa yalataki kina na veivakalougatataki vakasakiti: na ivotavota vakawa ni vanua, e dua na kawa levu, ciqoma na cakacaka vakalotu ni matabete, kei na dua na yaca me na dokai tu ena veitabatamata sa bera mai. Ia na veivakalougatataki oqori e sega ni o koya walega na veivakalougatataki eratou na ciqoma o Eparaama kei na nona matavuvale ia sa baleta talega na veivakalougatataki eratou na kena idewadewa vei ira na vo ni luve ni Kalou. “Ko na vu ni veivakalougatataki,” e kaya na Kalou, “ena kalougata talega ena vukumu na veimataqali kecega e vuravura” (Nai Vakatekivu 12:2–3).

A solia beka vei Eparaama, Sera, kei ira na nodrau kawa e dua na itutu dokai ena kedra maliwa na luve ni Kalou na veiyalayalati oqo? Ena vakasama walega ni sa dua na ka dokai me da vakalougatataki ira na tani. Na kawa i Eparaama me na “kauta kina na nona cakacaka kei na Matabete ki na veivanua kecega,” wasea yani “na veivakalougatataki ni Kosipeli, sai koya na veivakalougatataki ni veivakabulai, io na bula tawamudu” (Eparaama 2:9, 11).

Na veivakalougatataki oqo sai koya na veivakalougatataki a gadreva tu o Eparaama. Ni oti nona ciqoma, a kaya ko Eparaama e lomana, “Au sa vakasaqarai kemuni matua sara koi au na nomuni tamata; ia oqo au sa kunei kemuni”(Eparaama 2:12).

Oqori ena vica vata na udolu na yabaki sa oti, ia na veiyalayalati oqo sa vakalesuimai ena noda gauna oqo (raica na 1 Nifai 22:8–12). Ka sa vakayacori tiko ena gauna oqo ena nodra bula na tamata ni Kalou. Na ka dina, ni sa totolo cake tiko ena veisiga e muri oqo na vakayacori ni veiyalayalati ena kena sa toso na cakacaka ni Kalou, ena vakalougatataki ni veimatavuvale e vuravura taucoko. Ka sa rawa vua e dua, me vakataki Eparaama, e vinakata me cecere cake nona daumuria na ivalavala dodonu, e dua e dau vakasaqara vagumatua na Turaga, e rawa ni vakaitavi kina.

Na Cava na Kena iBalebale vei Au na Veiyalayalati vaka-Eparaama?

O iko e dua na gone ni veiyalayalati. O sa veiyalayalati kei na Kalou ena gauna o papitaiso kina. O na vakavouya na veiyalayalati oqori ena veigauna kece o vakaivotavota kina ena sakaramede. Ka o sa cakava na veiyalayalati tabu ena loma ni valetabu. Ni ra cakacaka vata, na veicakacaka vakalotu oqo sa vakaitavitaki iko ena veiyalayalati vaka-Eparaama, na kena taucoko e kunei ena veicakacaka vakalotu ni valetabu. Me vaka na ivakavuvuli nei Peresitedi Russell M. Nelson, “Me kena ilutua, ena loma ni valetabu, sa rawa ni yaco me da vakaivotavota vata ena veivakalougatataki ni matavuvale tawamudu, me vaka a yalataki ena dua na gauna vei Eparama, Aisake, Jekope, kei ira na nodratou kawa.”¹

Mai na veiyalayalati kei na cakacaka vakalotu oqo, eda sa yaco kina me tamata ni Kalou (raica na Lako Yani 6:7; Na iVakarua 7:6; 26:18; Isikeli 11:20). Eda sa duatani mai na vuravura wavoliti keda. Na noda veiyalayalati sa rawa kina vei keda me da tisaipeli dina ka yalodina i Jisu Karisito. “Na noda veiyalayalati,” e vakamacalataka o Peresitedi Nelson, “e vauci keda Vua ka solia vei keda na mana vakalou.”² Ia ni vakalougatataki ira na Nona tamata ena Nona kaukauwa na Kalou, sa salavata kei na veisureti kei na nanamaki me ra na vakalougatataki ira na tani—ni ra na yaco “me dua na veivakalougatataki” ki “na veimatavuvale kecega e vuravura” (Eparaama 2:9, 11).

Sai koya oqo na kila vakamareqeti e soli vakailoloma vei keda ena vuku ni kena sa Vakalesui mai na veiyalayalati vaka-Eparaama mai vua na Parofita ko Josefa Simici. O koya ni o wilika na veiyalayalati ena Veiyalayalati Makawa, kakua ni vakasamataka walega na isema ni Kalou vata kei Eparaama, Aisake, kei Jekope. Vakasamataka talega na Kena isema vei iko. Ni o wilika me baleta na yalayala ni kawa e sega ni wiliki rawa (raica Nai Vakatekivu 28:14), kakua ni nanumi ira ga na milioni vakamilioni era kacivi Eparama tu me tamadra nikua. Vakasamataka tale ga na yalayala ni Kalou kivei kemuni ni matavuvale tawamudu kei na tubu tawamudu (raica na Vunau kei na Veiyalayalati 131:1–4; 132:20–24). Ni o wilika me baleta na yalayala ni ivotavota vakawa ni vanua, kakua ni nanuma walega na vanua a yalataki vei Eparaama. Vakasamataka tale ga baleta na icavacava vakasilesitieli ni vuravura vakataki koya—e dua na ivotavota vakawa e yalataki vei ira “sa yalomalua” ka dau “waraka na Turaga” (Maciu 5:5; Same 37:9, 11; raica talega na Vunau kei na Veiyalayalati 88:17–20). Ni o wilika na iyalayala ni ra vakalougatataka na nona tamata ni veiyalayalati na Kalou “na veimatavuvale kecega e vuravura” (Eparaama 2:11), kakua ni vakasamataka walega na veiqaravi vakalotu nei Eparaama se o ira na parofita era a vu mai vua. Vakasamataka tale ga na veika o rawa ni cakava—me vaka e dua na imuri veiyalayalati nei Jisu Karisito—me veivakalougataki vei ira na matavuvale era wavoliti iko.

iDusidusi

1. Russell M. Nelson, “Veiyalayalati,” Liaona, Nove. 2011, 88.

2. Russell M. Nelson, “Vagoleya Mai na Mana nei Jisu Karisito ki na Noda Bula,” Liaona, Me 2017, 41. E kaya o Peresitedi Linda K. Burton: “Ni caka ka rokovi na veiyalayalati e kena ibalebale noda digitaka me da vauci keda vua na Tamada Vakalomalagi kei Jisu Karisito. Sai koya noda iyalayala me da muria na iVakabula” (“Na Mana, Reki, kei na Loloma ena Maroroi ni Veiyalayalati,” Liaona, Nove. 2013, 111).