Ko Mosese ena vunikau kama

Moses and the Burning Bush, mai vei Harry Anderson

21–27 ni Maji

Na Lako Yani 1–6

“Au sa qai nanuma na noqu veiyalayalati”

Mo tekivuna nomu vuli ena masu, ka kerea na veivuke mo kunea na itukutuku ena Na Lako Yani 1–6 e veiganiti ki na nomu bula kei na nomu veiqaravi ena matanitu ni Kalou.

Vola na Veika o Uqeti Kina

Na veisureti ni laki vakaitikotiko ki Ijipita sa vakabulai ira na matavuvale nei Jekope. Ia ni oti e vica na drau na yabaki, era sa vakabobulataki na nodratou kawa ka ra vakararawataki mai vua e dua na fero vou “ka sega ni kilai Josefa” (Na Lako Yani 1:8). Ena matau beka vei ira na Isireli mera taroga se cava na vuna e vakatara kina na Kalou me yaco vei ira na ka oqo, na Nona tamata ni veiyalayalati. A Nanuma tiko beka na veiyalayalati a vakayacora vata kei ira ko Koya? Era se Nona tamata tiko beka ga? E raica rawa beka na levu ni nodra kune rarawa tiko?

Ena so beka na gauna ko ni sa dau nanuma kina mo ni taroga na mataqali taro vata oqo. Ko na taroga beka, e kila tiko li na Kalou na veika au sotava tiko? E rawa ni rogoca beka noqu vakatakekere ni veivuke? Na italanoa ena Lako Yani ni nodra sereki mai Ijipita na Isireli ena sauma vakamatata na mataqali taro vaqori: e sega ni dau guilecavi ira na Nona tamata na Kalou. E nanuma tiko o Koya na Nona veiyalayalati vata kei keda ka na vakayacora vei ira ena Nona gauna kei na sala (raica na Vunau kei na Veiyalayalati 88: 68). “Au na vakabulai kemuni ena ligaqu sa dodo tu,” a kaya. “Sai au ko Jiova na nomuni Kalou, ko koya sa kauti kemuni tani mai na [nomuni] ilesilesi bibi” (Na Lako Yani 6:6–7).

Me laurai raraba na ivola Na Lako Yani, raica “Na Lako Yani, na ivola” ena iDusidusi ki na iVolanikalou.

ivakatakilakila ni vuli ni tamata yadua

Vakasama ni Vuli iVolanikalou ni Tamata Yadua

Na Lako Yani 1–2

Sa noqu Dauveisereki o Jisu Karisito.

E dua na ulutaga bibi ena ivola Na Lako Yani sa ikoya ni tu vua na Kalou na kaukauwa me sereki ira na Nona tamata mai na veika rarawa. Na nodra vakabobulataki na Isireli me vaka e vakamacalataki ena Na Lako Yani 1 e rawa me na raici ni dua na ivakatakarakara ni noda vesuki tu ena vuku ni ivalavala ca kei na mate (raica na 2 Nifai 2:26–27; 9:10; Alama 36:28). Ka rawa ni laurai o Mosese, na nodra dauveisereki na kai Isireli, me dua na kena mataqali, se matataki, Jisu Karisito (raica Nai Vakarua 18:18–19; 1 Nifai 22:20–21). Wilika Na Lako Yani 1–2 ni o nanuma tiko na ivakatautauvata oqo. O rawa ni raica, me kena ivakaraitaki, o rau ruarua o Mosese kei Jisu erau a taqomaki mai na mate ni rau se gonelalai (raica Na Lako Yani 1: 22.–2:10; Maciu 2:13–16) ka ni rau a dau tiko voli ena lekutu ni se bera ni rau tekivuna nodrau veiqaravi vakalotu (raica Na Lako Yani 2:15–22; Maciu 4:1–2). Na veivakararamataki cava tale o vulica rawa mai Na Lako Yani me baleta na vesuki vakayalo? me baleta na veisereki ni iVakabula?

D. Todd Christofferson, “Veivueti,” Liaona, Me 2013, 109–12.

Gone dramidrami o Mosese ena sova

Moses in the Bulrushes, © Providence Collection/licensed from goodsalt.com

Na Lako Yani 3–4

Sa dau solia na Kalou na kaukauwa vei ira e Kaciva me ra cakava na Nona cakacaka.

Nikua eda kilai Mosese ni dua na parofita ka iliuliu cecere. Ia ko Mosese a sega ni raici koya me vakakina ena imatai ni gauna e kacivi koya kina na Turaga. “O cei o au,” a taroga ko Mosese, “meu lako vei Fero?” (Na Lako Yani 3:11). Ia na Turaga, e kila se o cei dina o Mosese—kei cei e rawa ni yaco me vakakina. Ni o wilika Na Lako Yani 3–4, raica na ivakarau e vakadeitaki Mosese kina na Turaga ka sauma mai na nona kauwai. Na cava o sa kunea ena wase oqo, ena rawa ni vakauqeti iko ni o vakila na nomu sega ni veiganiti? E vakalougatataki ira vakacava na nona italai na Turaga ena kaukauwa vakalevutaki me ra cakava na Lomana? (raica na Mosese 1:1–10, 24–39; 6:31–39, 47). Ena gauna cava o raica kina na Kalou ni cakava na Nona cakacaka mai vei iko se o ira na tani?

Me baleta eso tale na ka ena nona bula kei na veiqaravi o Mosese, raica na “Mosese” ena iDusidusi ki na iVolanikalou.

Na Lako Yani 5–6

Na inaki ni Turaga ena vakayacori ena Nona gauna ga.

E dina ga ni a lako ena yaloqaqa ko Mosese e matai Fero, me vaka ga sa vakarota na Kalou, ka tukuna vua me sereki ira na Isireli, a besetaka o Fero. Na ka dina, ni a vakadredretaka na bula vei ira na Isireli. Era a vakataroga beka o Mosese kei ira na kai Isireli se cava na vuna e sega ni donu tiko kina na veika dina ga ni sa cakava tiko o Mosese na veika e kerea vua na Kalou me vakayacora (raica Na Lako Yani 5:22–23).

O sa bau vakila mada ni o sa cakava tiko na loma ni Kalou, ia o sega ni raica na bulaqaqa o namaka tiko? Raica Na Lako Yani 6:1–8, ka vakasaqara na veika e tukuna na Turaga me vukei Mosese me gugumatua tikoga. Sa vukei iko tiko vakacava na Turaga mo kitaka tikoga na Lomana?

Na Lako Yani 6:3

O cei o Jiova?

Na Jiova e dua na yaca i Jisu Karisito ka dusia na iVakabula ni bula taumada. E vakamatatataka na iVakadewa nei Josefa Simici ni ratou kila na Turaga ena yacana na parofita o Eparaama, Aisake, kei Jekope (raica Lako Yani 6:3, ivakamacala e botona c). E kena ivakarau, ni basika na malanivosa “na Turaga” ena Veiyalayalati Makawa, e dusia tiko na Jiova. E Na Lako Yani 3:13–15, na itutu “KOI AU” sai koya talega e dua na idusidusi kei Jiova (raica talega na Vunau kei na Veiyalayalati 38:1; 39:1).

ivakatakilakila ni vuli vakamatavuvale

Vakasama baleta na Vuli iVolanikalou Vakamatavuvale kei na Lotu Vakamatavuvale

Na Lako Yani 1–2.E vica na marama era a qarava eso na itavi bibi sara ena ituvatuva ni Kalou me vakatubura cake e dua na Dauveisereki vei ira na Isireli. Vakamatavuvale e rawa ni dou wilika me baleti rau na vunikalou o Sifira kei Pua (Na Lako Yani 1:15–20); na tinai Mosese, o Jokapeci, kei na ganena, o Miriama (Na Lako Yani 2:2–9; Na Tiko Voli Mai Na Lekutu 26:59); Na luvei Fero yalewa (Na Lako Yani 2:5–6, 10); kei na wati Mosese o Saipora (Na Lako Yani 2:16–21). Era a tosoya vakacava na marama oqo na nona ituvatuva na Kalou? E vakananuma vakacava vei keda na veiqaravi vakalotu nei Jisu Karisito na veika era a sotava? E rawa talega mo vasokumuna na kedra iyaloyalo na wekamu yalewa kei ira na tubumu ka wasea na kedra italanoa. Eda sa vakalougatataki beka vakacava mai vei ira na marama buladodonu? Na itukutuku nei Peresitedi Russell M. Nelson “E Dua na Kerekere Vei Ira na Ganequ” (Liaona, Nove. 2015, 95–98) e rawa me ikuri ni nomuni veivosaki.

Na Lako Yani 3:1–6.Ni torova yani ko Mosese na vunikau kama, a kaya vua na Turaga me luvata na nona ivava me ivakatakilakila ni vakarokoroko. E rawa vakacava ni da vakarokorokotaka na veivanua tabu? Me kena ivakaraitaki, na cava e rawa ni da cakava me vanua tabu kina na noda veitikotiko me rawa ni tiko kina na Yalo ni Turaga? Eda na vakaraitaka vakacava na vakarokoroko e levu cake ena veivanua tabu tale eso?

Na Lako Yani 4:1–9.A solia vei Mosese na Turaga na kaukauwa me cakava e tolu na cakacaka mana me ivakatakilakila vei ira luvei Isireli ni sa talai Mosese yani o Koya. Na cava e vakavulica vei keda na ivakatakilakila eso oqo baleti Jisu Karisito?

Na Lako Yani 5:2.Na cava beka e rawa ni kena ibalebale me da “kila” na Turaga? Ena yaco vakacava me da kilai Koya? (me kena ivakaraitaki, raica na Alama 22:15–18). Ena tara vakacava na noda gagadre meda talairawarawa Vua na noda veiwekani vata kei koya? (raica talega na Joni 17:3; Mosaia 5:13).

Me baleta na ikuri ni vakasama ni nodra vakavulici na gone, raica na ituvatuva ena macawa oqo ena Lako Mai, Mo Muri Au—Baleti Ira na Lalai.

Na sere sa vakaturi tiko: “Sega Walega ni Vakarokoroko,” iVolanisere ni Gonelalai, 12.

Vakatorocaketaki Noda Vuli

Me tiko e dua na nomu ivolaniveisiga ni vuli. Ena rawa me veivuke vei iko ni ko vakayagataka e dua na ivolalailai se na ivolaniveisiga mo vola kina na vakanananu, vakasama, na taro kei na nanuma e yaco mai ni ko vuli tiko.

Kunea na gone dramidrami o Mosese na luvei Fero yalewa

Moses Found in the Bulrushes by Pharaoh’s Daughter, mai vei George Soper.